طبعاً المطبخ من أهم الأشياء في المنزل ومن وجهة نظري من أكتر الأماكن اللي المفروض نصرف عليها لأنه مش بيتغير وكمان لازم يكون مريح علشان يطلع منه أحلى الأكلات.
السيراميك والجرانيت نظافة وشياكة
أول حاجة تعالوا نتكلم عن أرضية وحيطان وسقف المطبخ طبعا أحسن حاجة علشان المطبخ يفضل نضيف إننا نعمل حيطة المطبخ سيراميك لغاية السقف وفيه حاجة كمان ممكن نعملها وهي إننا نعمل الأرض سيراميك وبين الدولايب رخام بنفس الرخام اللي بن**ي بيه الدولاب من فوق، وعلى فكرة ممكن نعمل رخام أو جرانيت وطبعا الجرانيت أمتن وبيستحمل أكتر.
لمطبخ أجمل لازم نحدّد لون وحجم الأجهزة الكهربائية
والأجهزة طبعا مهمة جدا في المطبخ وعايز أقولكم حاجة إننا قبل ما نفصّل المطبخ الخشب أو الألمونيوم لازم الأول نشتري الأجهزة الكهربائية وده علشان نبقى عارفين حجم الجهاز إيه وعلى أساسه يكون حجم الدولايب حواليه.
ونحاول دايما نجيب كل الأجهزة بنفس اللون يعني لو التلاجة بيضاء يبقى كل الأجهزة التانية بيضاء.. موضة قوي الأجهزة الإستانلس وشكلها بيكون أحلى وبتعيش أكتر لكن مشكلتها إن سعرها غالي.
وبالنسبة للأجهزة اللي المفروض نشتريها في المطبخ فدي بتختلف من شخص للتاني على حسب الإمكانيات والاحتياجات لكل واحد.
التلاجة يا ريت نختارها كبيرة
وأول حاجة بقت من الأساسيات دلوقتي وما أعتقدش إن في بيت ممكن يستغني عنها هي طبعا التلاجة وطبعا كل ما كانت أكبر كانت أحسن علشان تاخد حاجات أكبر لكن ده طبعا بيتوقف على الحجم المتاح في المطبخ وكمان الإمكانيات المادية. ولو فيه إمكانية إننا نجيب الديب فيرز يبقى نعمل حسابنا إنه يكون موقعه جنب التلاجة.
بوتجاز الغاز أفضل
فبالنسبة للبوتجاز ففيه أشكال كتيرة وأنواع كتيرة من البوتجازات في السوق دلوقتي يفضل دايما إننا نجيب بوتجاز من الغاز وتكون العين اللي في الوسط بالكهرباء في بوتجازات "بيلت إن " وده بيكون البوتجاز جوه رخامة المطبخ زي اللي عندي في البرنامج كده، وده عيبه إنه بالكهرباء ومفيش منه بالغاز ومفيش فيه فرن وبيحتاج نجيب فرن لوحده كده كده بيكون شكلهم أحلى في المطبخ لكن أغلى وأنا شايف إنهم مش عمليين.
الشفّاط.. ضروري جدا
طبعا وجود شفاط فوق البوتجاز مهم جدا علشان بيمنع تراكم الدهون على حوائط المطبخ وبيمنع وجود ريحة الأكل في المنزل.
غسالة الأطباق
وطبعا دي بتعتبر من الكماليات عند ناس كتير ولذلك ممكن الاستغناء عنها ولكن لو هنجيبها يبقى مكانها أسفل حوض المطبخ علشان سهولة رصّ الأطباق والمعالق، ولكن فيه منها حجم صغير ممكن يتحط جنب الحوض.
غسالة الملابس
يستحسن وضعها في الحمام مش في المطبخ.
ولو المطبخ عندنا فيه بلكونة صغيرة يبقى دايما نحط البوتجاز جنب شباك البلكونة ولو إحنا معندناش غاز طبيعي نحط الأنبوبة في البلكونة ونعمل وصلة في الحيطة نحط فيها خرطوم الأنبوبة كمان السخان لو بالكهرباء من الأحسن إننا نحطه في البكلونة دي لكن لو غاز نحطه أحسن في الحمام علشان الشعلة بتاعته لا تنطفئ.
دواليب المطبخ
في رأيي إن أحسن حاجة إننا نجيب الدولايب الخشب المبطنة من جوه بطبقة فرمايكة من الأفضل دائما إن لون الدولايب يكون لونه لون الخشب الطبيعي.
لو المطبخ صغير نحاول إننا نجيب أجهزة كهربائية صغيرة ونخلي الدولايب جرّارة علشان ما تخدش مساحة في الفتح، وطبعا في جميع الحالات سواء المطبخ كبير أو صغير هنقفل تحت الحوض دولايب خشب إلا إذا كان فيه غسالة أطباق، ونعمل وازرة نحاس أو المونيوم حوالين داير المطبخ كله علشان ما يتأثرش بالمية.
ممكن نبطن الحوائط بالحجر الهاشمة أو الفرعوني وده طبعا بيدّي شكل جمالي للمطبخ.
استايل المطبخ يا مودرن يا كلاسيك
طبعا اختيار استايل المطبخ بيكون على حسب ذوق كل واحد وكمان يكون مريح نفسيا لأصحابه ومريح في استخدامه ومناسب لفرش البيت بصفة عامة وبالنسبة لاستايلات المطابخ فهنلاقي إن في الاستايل المودرن والكلاسيك.
الاستايل الكلاسيكي ده بيكون غالبا خشب بني وممكن نحط نجفة فيرفورجيه مع ستارة بكرنيشة.
أما المطبخ المودرن بيكون ألوانه صارخة وبيكون مصنوع من الألمونيوم أو الفرمايكة وممكن لونه يكون أحمر أو أصفر أو أخضر وأنا عن نفسي مش بافضلّه قوي.
لراحة أكبر في المطبخ
وعلشان يكون المطبخ فعلا مريح ومنحسش إننا عايزين نخرج منه بأسرع وقت ممكن فلازم ناخد بالنا من شوية حاجات بسيطة...
فمثلا ممكن نحط في المطبخ نجفة مروحة تدينا إضاءة حلوة وفي نفس الوقت هتهوي المطبخ.
يا ريت كمان المطبخ مايكونش فيه بلوعة صرف علشان دي بتدخل صراصير وحشرات وبيكون التخلص منها صعب قوي.
ودايما الدولاب اللي فيه منظفات أو مبيدات يكون عالي بعيد عن متناول الأطفال ويكون بعيد عن البوتجاز علشان الموادّ دي سريعة الاشتعال.
وفي الآخر المطبخ طبعا لازم يكون فيه طفاية حريق..
ودي تشكيلة من المطابخ
المشاركة الأصلية كتبت بواسطة Blue_Gaya
