السلام عليكم ورحمة الله وبركاتة
انا قررت ازيد وزني بعد ماتم الصاق بي العديد من الالقاب مثل الصومالي مع اني ابيض ومثل الاشارة لاني طويل ونحيف ومثل بنك بانثر مع اني ماعندي ذيل والعديد من الالقاب لدرجة انهم كانوا يقنعوني اشتغل عارضة او قائم بالملاعب السعودية عشان اصير مشهور
والحمدلله وضعت نظام غذائي وقررت الاستمرار عليه واهم شئ الارادة الحديدية ولا تلتفت لاي محاولة تحطيم مثل " لو تاكل سنتين ماراح تسمن" او "رح كل اسمنت اسرع لك" وكل ماطلعتوا مجمع او مكان وكان فيه جهاز قياس الطول والوزن يقولون يلا روح ورنا كم وزنك كل هالامور ماعليك منها
كانت النتائج بالنسبه لي مثالية مع العلم اني ما العب اي رياضة وان شاء الله ببدأ حديد قريبا
طولي 188 ووزني قبل الجدول 55
بعد ما بديت بالجدول الغذائي خلال 10 أيام زاد وزني 2 ونص
الغريب ان الناس لما يجي وقت الاكل تاكل كثير ولا يزيد وزنهم والسبب ان الناس تركز على الكمية وماتركز على النوع وتعدد مصادر الغذاء ، الفطور مثلا ياكل الواحد صحنين فول و 3 كاسات شاهي ويمشي يمكن يزيد وزنه لكن بالنسبه للجسم مازال يحتاج اشياء ثانية الوجبة الكاملة هي الي تحتوي جميع العناصر المهمه للجسم وعلى يوم كامل لازم توفر لجسمك كل العناصر من فيتامينات وبروتينات وسعرات حرارية
وبسم الله الرحمن الرحيم
انا بذكر جدولي خلال العشر ايام بكل شئ اكلته او شربته وبالتوقيت ولكل شخص قدرة استيعاب للاكل
المكملات والادوية الخارجية:
GNC Weight Gain 2200 موجود في جي ان سي وسعره 290 ويكفي من 5 الى 6 ايام
ميسيقور شراب - الشراب افضل من الحبوب ميسيقور وعيوبه اول 3 ايام يجيب النوم بشكل مو طبيعي وانا انصح انك تبدا تستخدمه بايام الاجازة
ملتي فيتامين واسمه ديمونيزان تقريبا
انا دوامي من الساعه 8 الصباح الى 4 ونص العصر وماعندي فترة بريك لذلك الغدا يكون الساعه 5 عندي لكن بالجدول راح اقولكم وش اكل بفترة الدوام
الافطار الساعه 6 الصباح
فول - بيض او شكشوكه ( صحن صغير )
عسل طبيعي ( 3 ملاعق )
جبن ( ملعقتين )
قشطة ( ملعقتين)
مربى ( ملعقتين )
زيتون ( 6 حبات )
كاس موية
الساعه 8 صباحا
اشرب المكمل الغذائي واكل سنكرز واكل الملتي فيتامين راح يعطيك طاقة حلوه
الساعه 9 صباحا
كاس موية
الساعه 10
عصير برتقال معلب ( الربيع ) + 2 جلكسي او اي2 نوع من الحلويات
الساعه 12
اجهز المكمل وانا على المكتب واشربه مع الملتي فيتامين
الساعه 2
كاس موية + فطيرة جبن او فطيرة تمر او فطيرة تفاح
الساعه 3
اشرب الميسيقور
الغدا الساعه 5
رز مع لحم او دجاج او اي وجبة رئيسية ( تقريبا مايكفي 20 ملعقة طعام )
سلطة خضراء ( 4 ملاعق )
كريما
فواكة ( نص برتقاله + موزه + تفاحه )
الساعه 7
اشرب المكمل الغذائي + واذا كان لي نفس اكلت لي اي نوع من الحلويات
الساعه 9
ملتي فيتامين + وجبة صغيره سواء ساندويش وغالبا بالنسبه لي ساندويش صغير من صب وي
الساعه 10 ونص
كاس موية + ميسيقور
بعدها النوم
مع العلم اني اشرب المكمل مع حليب كامل الدسم
هذا الجدول الي مشيت عليه
وانا بكمل عليه لمدة شهرين بعد
المشاكل الي واجهتني:
تعب الذهاب للدوام وانت شايل معاك المؤونه حلويات وسكوب من المكمل وحليب وعصير
توقفت عن شرب الكوفي والشاي اثناء الدوام
انا مدخن للاسف
المكمل ثقيل وكانك تشرب رز مضروب بالخلاط
سؤالي للمختصين هنا
شرايكم اغير المكمل الي استخدمه واستخدم السيرياس ماس، لاني كذا برتاح من الملتي فيتامين لان الفيتامينات بالسيرس ماس عالية وغير كذا 3 سكوبات منه افضل من المكمل الي استخدمه
وابغى رايكم بالجدول بشكل عام ونصايحكم الله يعافيكم
بالنسبة للحديد انا ناوي ادخل ان شاء الله قريب
واذا دخلت هل راح ازيد من عدد المكملات الي اخذها
مثل الكرياتين وغيرها
انا عندي مشكله بالمعده بسبب الحبوب الكبيره او الكبسولات الكبيره لذلك انا مقصر شوي بالملتي فيتامين
وبشكل عام الجدول جاب نتيجة معي وبخبراتكم راح يكون افضل بكثير ان شاء الله والكل يستفيد منه
خصوصا العصاقيل الي مثلي
اخيرا احب ان اشكر جميع القائمين على القسم
واشكر جميع الكباتن على المجهود الرائع الي تبذلونه من خلال مواضيعكم الممتازة
ودمتم بود
المشاركة الأصلية كتبت بواسطة الرســـــمي
