العزائم و المناسبات و اضراها على الدايت و افكار لمقاومه اكل العزائم و المناسبات
من اكثر الاشياء التي تتعبني في العالم العربي و خصوصا في دولتي الحبيبه السعوديه موضوع العزائم في فترات الاعياد و المناسبات . اي مكان تروحه يقدمونلك عشاء او غداء موجود فيه بلاين من الكلوريات و مو هنا المشكله لانك انسان قوي ولك فتره ماشي على نظامك ما بيأثر فيك و لا بيغريك لا شكل المفطح و لا شكل المدفون و لا شكل الغوزي و لا اي شي . لكن المشكله تبدا اذا احد شافك ما تاكل قام يرميلك لحم عندك و قام يجيبلك جميع المؤكولات الي على السفر قدامك عشان تاكل و تتغذي و يقولك بكل انبساط فرحه ( كل كل انت نحفان هذي الفتره ) و انت نفس تقوله شكرا لانه ملاحظ ونفسك تقوله لو سمحت خليني في حالي ما ابي اعبي فل ابي بس اعبي ب 10 ريال هههههههه . هذي مشكله عويصه جدا . و الي ادهى من كذا اذا قلتلهم انك مسوي دايت قامو الشباب ينكتون عليك و سرت نكتت المجلس و قام الشياب يشرهون عليك و يقولون ( كيف تجي بيتنا و ثمك ما يطبه اكلنا ) ودك تقولهم انا دافع دم قلبي على هذي المكملات و الدايت و البرنامج الغذائي و حارم نفسي فترات من اشياء احبها عشان اوصل لهذه النتائج . فاذا كنت انسان قوي و ما اكلت زعلو منك و لكن اذا اكلت هنا تبدأ الدراما . اليوم الي بعده تنعزم مع ناس ثانيه و تبدأ نفس المعاناه من جديد و بعد مره تنحرج و بعد كذا تقول خلاص باخذ بقيه الاسبوع بريك ....... ( احذر من هذا البيريك ) اول ما تاخذ بريك يجي الاسبوع الي بعده و انت متكاسل و تقول بزود كمان اسبوع بريك في الدايت بس بمشي على التمرين ( هنا تبدأ الدهوره ) و كثير من الشباب يدخل في دوامه العزائم من فتره العيد لحد عيد الحج و عندك فتره الصيف و الزواجات و المناسبات و الجمعات العائليه . انا اتكلم هنا من واقع تجربه استمرت سنين .
و لقيت تقريبا حل لموضوع العزائم و التقليل من اضرارها عل الدايت ( طبعا هذي الحلول للشخص الي ما يقدر يقول لا ما ابي اكل معاكم ....... اذا انت تقدر تقول لا فانا اهنيك على قوه رايك و اصرارك بس برضو بيجيك كلام )
هذي الاشياء الي اسويها يوم اضطر اني اروح عزيمه و يحرجوني على الاكل:
1- اشرب ماء بكميات كبيره جدا ( تساعد في التحكم في الشهية)
2- ابدأ بالسلطه او اي نوع خضار او فاكهه غير مطبوخه
3- توجه للخضار المطبوخه
4- بعدها توجه و كل اي نوع بروتين موجود ( دجاج -سمك -لحم)
( اذا كان موجود جلد او شحوم حاول ازالتها قبل ما تاكلها )
5-بعدها توجه للكربويهدرات ( اذا قدرت تهرب من الرز و النشويات فمبروك عليك )
اهم شي الموضوع ما يكون فيه احراج امهات لان الواحد ما يبي يضيق صدورهم على العيد
اذا احد عنده اي طريقه لاجل مقاومه الاكل في العزائم بالله يشاركنا هنا و يخلينا نستفيد من تجاربكم يا وحوش.
كل عام و انتم بخير وحوش
)
