مرحبا شباب ...
اليوم الموضوع كما هوا العاده يخص جميع لاعبي كمال الأجسام واخص بالذكر الي يهتمو في شكل الصدر باذات
( حقولكم ليه الأن ) ....
طبعا كثير والكثير جدا لما يكون في النادي او يسأل المدرب او واحد خبير في اللعبه يقولو اش هوا
افضل اكل الواحد ياكلو مليان بروتين ؟؟؟؟؟؟
طبعا حيقولك أكثر من مصدر زي التونا والبيض إلــــــــخ.... لكن الجواب الي موضوعنا عليه هوا
(( صدور الدجاج )) !
حتكلم على الموضوع بشكل علمي وبعد حقولكم تجربه لصديق كل يوم كان يدوام معايا في النادي .
الدجاج المطبوخ :
يعتبر من أشهر مأكولات لاعبي بناء الأجسام ، لسهولة طبخه و مذاقه الذيذ وسعره المناسب للجميع ، فهو مصدر رائع للبروتين ، قليل الدهون ، غني بالفيتامينات وخصوصاً ب-B.
إن أكثر منطقه يتركز فيها البرتوين في الدجاجه هيا منطقه ( الصدر ) .
فا الواحد ممنا يروح لأقرب محل دجاج شوايه ويطلب منو سواء على الفحم او شويه .
صحيح كله بروتين ويديك طاقه ولا احلى لكن فين المشكله يا شباب هيا :
الحقيقة أنو الدجاجة الأن تحقن بمادة
الاسترويدس (نوع من الهرمونات) و هذه المادة تعجل من عملية النمو وتخليها أسرع ( مكسب تجاري ياسلام سلم )
و تستخدم هذه الطريقة لكي يكون هناك توازن في أعداد الدجاج التي يستهلكها المجتمع مع الأعداد التي في طريقها للنمو لكي تكون كمية الدجاج المباع متزنة مع المخزون ( يعني ما يتورط ويخلص عليه الدجاج على بال ما تجيلو دفعات متأخرة او يستنا الدجاجة الين ما تصبح جاهزة للدبح). فا الدجاج بتحقن بالمادة هادي عادة في منطقه الصدر بشكل اساسي عشان كلها لحم , ومنطقه الجناح ..
طيب لو جا احد يقولي طيب اش دخل الدجاج في شكل الصدر يا ماجد ؟؟؟؟
الجواب / كلنا لما نلعب حديد نهتم انو الصدر يكون ناشف ومشدود ومنحوت نحت بشكل مره حلو , فا لما نكثر من أكل صدور الدجاج الي اصلا تكون منفوخه من جراء الهرومون المذكور اعلاه فا بتتنفخ الصدر حق لاعبين الحديد بشكل عكسي وتتملى فات . أو انو تضخم بشكل غريب وبشع . أو انو الي يكون اصلا عندو فات والصدر عندو مترهل وكل يوم بلعب دك لاين وعقله وبش اب ويلعب كل العاب الصدر ويقولك : والله الصدر عندي فيلو مشكله برضوا مو راضي يتزبط والفات فيه غريب ّ!! من هنا الموضوع حقي ينطلق وهوا الصدور حق الدجاج المهرمن تعمل رد فعل عكسي مع لاعب كمال الأجسام الي بحاول يزبط منقطه الصدر عندو .
التجربه الحية لصاحبي :
صاحبي في النادي بشوفو يجي كل يوم ماشاءالله لمده 8 شهور وكل يوم يضيف مع جدول التمارين حقو أنواع تمارين لحرق الصدر وشده .. والشهاده لله ما يقصر . ووقت ما يجي اليوم حق تمارين الصدر ماشاءالله عليك بركان حي يتحول . فا المسأله غريبه صارت يا جماعه !!!
فا لوحظ انو الصدر عندو مترهل بعكس الأجزاء الباقيه في الجسم عندو .. فا بعد دراسات وبحوثات معاه أتضح انو
ياكل في اليوم 3 حبات دجاج شوايةه .
الخلاصة /
ايام زمان كان في عندنا محلات تنقي الدجاجه من القفص وعلى المغسله ويدبحها ويحطها في ذيك المكينه الي تلف تلف تلف وتطلع الدجاجه طازه وجاهزه للطبخ فا كان طازه الموضوع ومافيلو خوف والله والطعم كان أحلى . الأن مافي الكلام دا فا المزارع والشركات الكبيره صارت تتلاعب في الدجاج لربح أكبر مكسب مادي . ماتلاحظو لما ندخل السوبرماركت نلاقي دجاج صغير ودجاج كبير والوزن مختلف وايضا السعر مختلف ؟ كله تلاعب في الدجاجه نفسها وكميه الهرمونات الي تاخدها .
فا نصيحتي الشخصيه لكم : كلو دجاج ليه لأ لكن لا نكثر منو فقط لا غير .. ومصادر البروتين ماشاءالله تبارك الله
لا تعد ولا تحصى والكل على علم فيها ..
تحياتي للجميع .. وربنا يحمي الكل
المشاركة الأصلية كتبت بواسطة toto jeddah
