ايييييي يا بووك..زماان اول غييييييييير حتى الحب غييير..تعالوا وشوفوا الفرق
غزل الأولين
الأولين الله يغفرلهم ويعفا عنهم كان غزلهم شكل ثاني كان راقي وعلى مستو يخلي
البنات يفقفقون معهم ، واحد من أسلافي الأولين كان هو ويأ الشاعر المتنبي 24
ساعة دوران في مضارب بني عبس وسمرقند والسويدي ، وكان جدي أيامها توه مطلع
جمل من رتوه وكان ذاك الجمل له موصفات غريبة عجيبة لدرجة ان كليب بن مره
لماشافه طقته الغيره وراح يدخل الجمل حقه "ماي جمل(كار)" عشان يعدلون
وجهيته ويرشونه بويه زي جمل جدي ، المهم ان المتنبي ذاك اليوم كان متسلف
الجمل حق جدي عشانه كوبيه وملمع خفوفه وطالع يدور فيع بالسويدي وشاف ذيك
الجارية اللي تقطع القلب كانت راكبه حمار بيك أب ومتقضيه سمن واقط وطحين
وتمر وكرون فليكس ، ورايحة لمجمع البساتين تشتري أغراض ناقصتها قام وكع
المتنبي فرامل بغى يعدم فحمات البعير وقال - ذيك القصيده تخلي الواحد يبكي
من غير مايحس ويقول في مطلعها
آه يالاسمر يازين...........الشوق امرني أطيعك وانسى خلاني
وجا بيطلع المعروض من الدرج علشان يرقمها بس مفتاح الدرج كان مع جدي قام
ودق بيجر على جدي عشان يجيه عند مجمع البستان ،طبعا بتستغربون وشلون ذاك
الوقت كان عندهم بياجر أنا اقولكم كيف ... من أول كان فيه محل عند مجمع
الاتصالات في حي المرسلات اسمه مشاعر الخليج وكان هو الوكيل الحصري لشركة
توكيا اليابنية وكانو يبرمجون البعرصي على موجات تحت الحمراء وجنب
البنفسجية وفوق الفسفورية بحيث انك اذا دعست على ذيل البعرصي وقلت اسم
خويك على طول البعرصي اللي عند خويك يقعد يتقلب ويتاغر واذا قلبته تلقى
مكتوب على بطنه اسم الي داق عليك بعرصي (بيجر) مرفق بعيارته ، المهم يوم
طلعه ويلقى مكتوب على بطنه المتنبي وبين قوسين ابو ديود . قام على طول راح
الكبينة عشان يتصل على جوال المتنبي لأن ابو جدي كان فاصل الصفر من تليفون
البيت من كثر مامتحنه جدي بخط الصداقة.
عاد يوم دق جوال المتنبي كان مبرمج الدقة على صوت عنز مشلوله وقعد الجوال يقول
باااااااع ...... رد عليه وقال لجدي الحين تجيني مجمع البستان باسرع
مايمكن قام جدي خذى الجمل واجن حق البيت ودز للسويدي عند مجمع البستان
بأسرع مايمكن ، وشاف المتنبي مشغل الفلشر ويحتريه عن الصراف الالي ، راحله
جدي وقال خير يابو ديود وش فيك ،قام قاله المتنبي والله ياشفتلك ذيك الموووت
اللي لابسه عبايه مخصره دخلت المجمع قبل شوي وكنت أبي ارقمها بس المعروض في
الدرج والمفتاح معك ، قام جدي وطلع المفتاح وخذوا المعروض ودخلوا وراها
السوق حاولوا يكلمونها بس ماعطتهم وجه ، وقعد المتنبي يتميلح ويسوي ولد
نعمه وقال للجارية ماودك يازين البنات ندفع عنك الحساب ، التفتت وقالت بلى
يازين الشباب ان كان ودك تروح الكاشير وتدفع ماعندي مانع وكان المتنبي
ايامها مخلص المتوسطة وداج ماعنده شغل قام غمز لجدي وقاله جيب دفتر
الشيكات من البعير قام جدي وتوهق ماعاد يدري شيسوي ، وقعد يدور
في الجمل واجن حق اهله ولقى بطاقة الصراف حقت ابوه وكان حافظ الرقم السري
وبطاقات الصراف وقتهم كانت قطعة جلد منقوش عليه بنك الرمحي المصرفي واسم
صاحب البطاقة مطبوع عليها باللغتين العربية والفارسية ، قام جدي حط
البطاقة في الصراف وطلب الرقم السري المكون من اربع خانات ، قام جدي أدخل
الرقم التالي : عضمه - بعير - بعير - طاسه.
وطلعت على شاشة الصراف نأسف الرقم السري غير صحيح، راجع البنك لاستلام
البطاقة ، وانسحبت البطاقة منه وقعد بها جدي ويوم رجع للمتنبي لقاه محاسب
وخالص قاله جدي من وين لك قروش يابو ديود ، قاله المتنبي الفيزا حقت خويي
ناسيها معي وقعدوا يشيلون الاغراض ويحملونها في الحمار بيك أب حقت
الجارية ، واثناء ذلك طلع لهم أخو جدي اللي كان مرقم الجارية في الويك اند
اللي فات وقالهم خير ياشباب وش جايبكم عند خويتي تحتكون فيها قال جدي هذي
مهي خويتك هذي الجارية فرند حقت المتنبي وبداء الملاقط ومافكتهم إلا مكافحة
الشغب ومن حينها هاجروا اجدادي إلى البرازيل وصاروا متزاعلين بسبب الجارية.
صحيح الغزل وقتهم راقي بس نهايته للاسف مؤلمه.
منقووووووووووول علشان محد يسويلنا عرس في المنتدى خلوا الاعراس حق هذاك الي يبي يعرّس..نسيت شسمه
اليوم ماتنفع دموعي ورجواي .... اليوم تفصل عن حياتي حياته
اليوم يعطيني بقايا بقاياي .... واعطيه انا ماشلت من ذكرياته
اليوم بابدل مشاعر حناياي .... يصبح من اخواني وانا من خواااااته
اليوم يتركني لحالي بدنياي .... مجبووووور يقفي لو يزيد التفاته
اليوم يخلف عن ممشاه ممشاي .... والله ما اظمن من عذابه نجاته
لو اتعلّق فيه ماينفع بكاااي .... خلاص فات الوقت واعلن فواته
اليوم بعطيه العزا عقب فرقاي .... عندي خبر وش قيمتي في حياته
وانا العزا مابيه من كبر بلواي .... ماينفع اللي عاش واعلن وفاته
يارحمه الله ساعديه بسلواي .... يعوضه الله بإنكسار امنياته
اليوم ياهمي وياطول مسراي .... ويافرحة العذال واهل الشماته
