اسأل الأعمى..
إن كان في نومه يشوف..
ليه صحا؟!
واسأل اللي..مادرت عنه الهموم..
اللي درى..إن العمر محدود..
وإن الفرح مهما اختفى...موجود..
اسأله...ليه ينوم؟!
وإن جاوبوك..اسألني..
ليه حنا افترقنا؟!
ياصاحبي..
قلوبنا والله سليمة..
ومابه سبب لفراقنا..
غير اننا..جينافزمن..ماهو زمنا!
مابه سبب..غير اننا..
في حبنا عشنا الصدق..
وفي وقتنا..لجل اللقا تكذب..
ولجل تاصل ماتبي..تكذب..
ياصاحبي..
خذها من جرحي نصيحة..
كانك تبي تاصل..
اكذب ..اكذب ..اكذب!!
الصدق في وقتنا..اصبح فضيحة!
في وقتنا دايم تهيم..
في شى ما تعرف مداه..
دايم تهيم..
في اللى بعد عن سكتك..
فى اللي ف يدك..
ومتحمل جروحك معك..
ما يهمك..تنساه..
ولو تقتله ..مايؤلمك..
وبأقدامك..تاطي..على دماه!
ياصاحبي..
وقتنا في أوله..
ضيعنا أولى القبلتين..
وفي آخره..الله أعلم..وش بيبقى؟
في وقتنا صار الغدر شى عظيم..
والوفا ما ظنتي..
إن كان بتدور بتلقى!
في وقتنا..أطوال مسافة ممكنة..
تمشيها بين النقطتين
الخط المستقيم!
ياصحبي..
في وقتنا وققت الألم..
من يسمعك ؟مهما حكيت..
من ينصفك ؟ مهما شكيت..
من هو اللى مايضحك..
إذا .. ذلتك دنياك وبكيت!
ياصاحبي..
في وقتنا..وقت الألم..
وقت الكلام..وقل الفعل..
لامات أحد..وانتقل لاعلى رفيق..
من طيبنا نحزن..نصلي عليه..نحزن عليه..
ناصل معه للمقبرة..
وفي المقبرة..غير الدعاء..وقولة ((الله يرحمه))..
مابه كلام..
وندفنه..وإلى دفناه..نبكي..
بدون دموع!
أو بدموع..المهم..بعد مانبكي..
نتركه ونروح..مع نفس الطريق..
وتلقانا نقول:مسكين..يافلان مسكين..
من دنيتك..وش اللى خذيت؟
وبعد باب المقبرة..بشبرين..
وأقل من دقيقة..
لا من دخل فينا الزحام!
من طيبنا...نضحك ونسمع أغنيه..
لجل نتسلى..في الطريق..بين المقبرة والبيت!
وأحد يقول:ياليت..ياليت...
تسرع..نبي ناصل..
تبي تاصل؟!لوين؟!
الله يا وقت الألم..
الله...كم احنا مساكين..
المهم...
لامن وصلنا بيوتنا..
لجل نتسلى..نلعب ورق!!
وبعدها يمكن ننام..
ويختفي ليلتها..شي اسمه أرق!
ياصاحبي..تبغى الصدق؟
فرق بسيط..بين الزحام..
في المقبرة..
وزحمة الاموات خارج بابها!
الفرق ياصاحبي.مما تتظن..أصغر
كل اللى صار انا تركنا المقبرة..
للمقبرة الاكبر!!
ياربي سبحانك
ياللى تجير من العذاب..
قلوبنا وش صابها؟
ياربي سبحانك..
في وقتنا غدا بين الحياة والموت..
وبين البكا والضحك..
شبرين ودقيقة وباب!
ويديننا..يديننااللى..قد حثت..
في وجه ميتنا التراب..
هي نفسها..اللى بعد شبرين..وأقل من دقيقة..
اختارت شريط وحطته..
لجل تقتل طول المسافة..بين المقبرة والبيت!
ياصاحبي..
في وقتنا صار الأموات احسن كثير..
من بعضنا..
في المقبرة..على الاقل..ميت وندري..
المشكلة..
إننا متنا..وإلى هالحين..ماندري!!
ياصاحبي..
في وقتنا..ضاع احترام الموت..
في وقتنا..حكينا ما اكثره..
وللاسف..كل الحكي..من غير صوت!
وإن كان به فم..صدق..
واسمحوا..يحكي بصوت..ما نسمعه..مانسمعه!
ياصاحبي..
قدامنا كان اختيارين..
يانجاري وقتنا...ونكذب..ونخدع نفسنا...
يانفترق..
ولأن الفراق..
في وقتنا هو الصديق..
افترقنا!
ياصاحبي..
كانك تشك في صدق اسباب الفراق..
دور لك اعمى..ولا صحى..اسأله..
إن كان فاحلامه يشوف..
ليه صحى؟!
وليه افترقنا؟!
_______________________________________
ايش رايكم ظهري اتكسر وانا اكتبها....طبعاً مو انا الى مألفتها....
للأمير:عبد الرحمن بن مساعد
صحت اصابعك ولسانك
