اعترفوا ايها الخليجيون انه لن تصلوا للعالمية ابدا مهما عملتم و بذلتم !
لن تطرقوا كاس العالم الا من باب المشاركة فقط لا غير !! و لن تتجاوزوا الدور التمهيدي لكاس العالم الا بمفاجاة و من العيار الثقيل بعد. ولن يحترمكم ايا كان في العالم لضعف مستواكم هزالة اجسامكم التي لن تتحمل الطحن و السحق الموجود الان والذي نراه في كاس العالم.
رحم الله امرء عرف قدر نفسه, لوكنت مسؤلا عن الرياضة في الكويت او قطر او عمان او غيرها من الدول الخليجية لسألت نفسي سؤالا:"ما هو هدفي من الرياضة؟" هل هو المشاركة في المسابقات القارية و العربية؟ ام المشاركة مع اشوية منافسة؟ ام مشاركة لكسر اخشوم بعض العرب اللي بينا و بينهم ثار بايت ( او هكذا يخيل الينا بعد ان نرى كاس العرب!) ...ام ان الهدف من الرياضة عندنا هو منافسة الدول المتقدمة و مقارعتها و رفع كرامة شعبنا الخليجي؟
نص مليون نسمة في الكويت و ثلث مليون في البحرين و مادري كم في قطر ومادري كم في الامارات و عمان و مستانسين و قاصين على روحنا "احنا غلبناكم 6-1" و يرد الثانيين "اي بالحظ ..نسيت لما غلبناكم 4-0 !!؟ " على من تضحكون !! يا ناس يا هوووووه !! الجميع سخر من السعودية بعد خسارتها من المانيا .. صورتنا في الغرب الحين ان احنا فاااشلييييييين ! ما ننفع للكورة ...لكن القهر ان احنا مو فاشلين ...احنا بس ناقصنا ناس شجعان تتخذ قرار شجاع بوقف شغلة اسمها كاس الخليج ..هذي اولا و ثانيا فتح الاحتراف على مصراعيه للاعب الخليجي (مع احتفاظه بجنسيته و هويته) للاحتراف في اي نادي يشاء. ثالثا تكوين لجنة مشتركة من الدول الست لاطلاق الدوري الخليجي الموحد. وبعدها يتم اختيار المنتخب الموحد ليمثلنا في كاس العالم ...وبعدها كلكم راح تتمنون اتصير المانيا في مجموعتنا علشان نلقنها "درس" في كيفية اللعب مع الخليجيين !
بس لاعت جبدي لاني ادري ان شيوخنا اللي ماسكين الكرة عندنا مو هامهم هالشيء انه يصير لانهم راح يفقدون كراسيهم وبالتالي فراح يكون هدفهم احباط هالمشروع من بدايته لو صارت في مجرد نية لتحقيقه!
عيل خلونا انرد حق مدرجاتنا الخالية و ننطر كل سنتين كاس الخليج و نتهاوش عليه وبعدها تجي تصفيات كاس العالم اللي راح نتهاوش عليها بعد وبعدها راح يصعد فريق ينطق بكاس العالم ( الامارات - السعودية و حتى الكويت انطقت لا اترقعون) و بعدين نقعد انحر بعض احنا صعدنا و غيرنا ما صعد.
وسلامتكم.
منقول من منتدى الازرق لي الكاتب : النــاقــــد
