ما قد صار لاحد منكم بانه حس بكل مشاعر الدنيا في لحظه وحده؟ ?:
او على الاقل في فتره قصيرة؟
امس صراحه كان يوم غير طبيعي... ما ادري اذا كانت كل مشاعر الدنيا... بس اللي اعرفه انها كانت زحمة مشاعر... ما ادري وش ابدي منها...
لا و الي زاد الطين بله اني كنت اشتغل على بحث... فجمع لي بعد كم شعور فقلطوا كلهم عندي... البطين الايسر جاه فتق، و الاذينين خارج الخدمة مؤقتا... باقي البطين الايمن عايش عليه....
صراحه حتى الحين ما ادري وش قاعد اكتب... يعني وش الهدف من هالموضوع؟؟ مدري... بس اظن اني على قولة هارب... قاعد افضفض :6 ...
بس افضفض ايش؟ المشاعر؟؟ حتى انا مدري بالظبط وش كانت!! اذكر كانوا زحمه.. و احس كنه حلم امس... اظنه تأثير المواصل...
اذكر كنت مبسوط لان الراتب نزل... و كنت متضايق لان عندي بحث و مدري ابقدر اخلصه ولا لا... و كان فيني نوم لاني مواصل... و كنت جوعان و الثلاجه فاضيه و كل المطاعم مسكره...
و كنت اترك البحث شوي و اقعد ادور في المنتدى... و شوي و يقلط مستر طفش... فحجرلي بين النت و البحث...
و فجأة و أشوف عمو "حب" يشر لي من بعيد... بغيت اروح له و اجحد الشباب اللي عندي بس جاني قبل ما اجيه...
مع هالزحمه... فكرت أألف شعور ثاني افتك به منهم... قعدت افكر في ايام ال KSA... جاني homesick ?:
كلهم يجون ما عرفت اروح لاحد...
و تجمع بعد كذا يأس... و فخر... و اشفاق... و تتنيح (اذا احد يعتبر ذا شعور) ..
و غيرها كثير...
بعد كذا قلت اكيد هذا من المواصل و الشغل على هالبحث... خل اروح اتروش اطير هالنوم و اكمل هالبحث...
و اقعد شوي تحت الدش... و ما ادري الا و انا مالي البانيو... و حاطه على الحار... قلت خل ناخذ غفوة شوي في هالجاكوزي :6 (امحق جاكوزي)
و ما دريت الا و انا نص نايم و نص قايم... خدر جسمي كله مع الموية الحاره... و فوق كل ذا نصي نايم... و جوعان... و ستين واحد مقلط في القلب... و الدماغ بغا يعلق لوحة للتقبيل معد يعرف وش يسوي...
ابي ارقد بس المخ يقول وراك بحث اعقل...
في اخر شي قررت اني اطلع و اكمل البحث... بس لاحظت شي...
ما اقدر اتحرك ?: ... ما اقدر اشيل نفسي...
منهد حيلي على الاخير... و ما في بطني شي... و نصي نايم... و زود على كذا الموية حااااارة و خدرت جسمي... لا و غايص جواها ما طلع الا راسي... فزادت الثقل...
موقف غبييييي... بس مع ذلك حسيت بالموت :":
المشكلة مفتاح الموية من الجهة الثانيه ما اقدر اسكره... (ابغرق هههههههه)
في الاخير... ما لقيت اي حل ثاني...
لازم اشيل نفسي وآقف...
اسهلكت كل الطاقة المتبقية من شلخة البيتزا اللي تعشيت عليها... و حالوت اقوم في لحظه وحده...
قمت... المخ طفا الكهرب عنده... صار يشتغل على بطاريات حاطينها في الثلاجه باقي فيها شوي طاقه...
الدنيا بدت تطفى قدامه... مسكت الروب و التفيت فيه و انحشت من الحمام و يالله اشوف الي قدامي... و اشوف الكنب من بعيد... و اركض و الدنيا قدامي خلاص ظلام معد اشوف شي...
و اجدع نفسي عليه...
قعدت كم دقيقه اخذ نفس... و افكر وش صار تو... بدت ترجع على خفيف الطاقة الكهربائيه للمخ...
رحت شربت لي كاس موية بارد يصحيني شوي...
و تظبط على خفيف الوضع... اخر شي قررت اسحب على الكلاس.. لاني ما اقدر اكمل سهر بعد كذا... خلاص شفت الموت...
كمل الباقي من البحث و ارسلته للمدرس بالايميل...
حسيت الدنيا مقلوبه فوق تحت بعد هالموقف...
ارتحت شوي بعد ما خلصت البحث و ارسلته...
قلت لازم القا صرفه لهالشباب المقلطين في القلب... ناظرت لي حلقة من ساينفلد (مسلسل كوميدي للي ما يعرفونه)... تدربيت من الضحك زي العاده ...
حسيت الوضع اريح من قبل... قلت خلاص الحين اعرف انام... و نمت و دخلت طبعا في عالم ثاني و ما قمت الا قبل اربع ساعات تقريبا.
احس اني افضل من امس... بس الى الان احس فيه مشاعر باقية من امس.
بالنسبه لمشاعر امس... ما ادري كيف اعبر عنها... بس يمكن يكون افضل اني اسرد الاحداث الي جمعت هالمشاعر... يمكن تقدر تفهم منها المشاعر ذي...
لان صراحه مدري وش بالظبط الي احس فيه... بس اعرف اني احس بشي... احساس عميق (باقي آثار من البانيو :6 )
و يمكن اكون اعرفه بس مدري كيف اعبر عنه...
... اظن هذا الي في راسي...
في احد قد مر عليه هالكم الهائل من المشاعر؟ ?:
و معليش فيه مشاعر كثير ما ذكرت اسباب حضورهم... لان بعضها يطول الكلام عنها و بعضها اسباب شخصيه...
على العموم... مدري وش الهدف من هالموضوع... بس ممكن تخلونه مكان فضفضة مشاعر
فاللي في راسه شي يكتبه... بس لا يقعد يشعر ولا يكتب خواطر علينا... هذا يعني تعرف تعبر عن مشاعرك... هالموضوع خلوه للي ما يعرف يعبر عن مشاعره...
و اذا ما تعرف كيف ما تعرف تعبر عن مشاعرك... فانت فعلا ما تعرف تعبر عن مشاعرك... <=== (تراها سليمه هالجمله:6 )
اما اذا تعرف رح لموضوع الخواطر و اكتب الي في راسك...
<مدري اضحك ولا افكر?: 
ابدا:# 
....
<<اسكتي لا تصكينه عين مرع ثانيه:": 
