أهلا جميعا ^^
هالموضوع إن شاء الله بقول رايي عن موضوع مهم همني أول ما دخلت المنتدى هذا أو أي منتدى آخر ...
كيف تبرز أهميتك بالمنتدى..
طبعا أول يشترك أي عضو بالمنتدى يفرح وايد لوجوده بالمنتدى ومشاركته فيه وفي البداية يقعد يكتب مواضيع وممكن ما يلاقي أحد يرد عليه فاللي يخطر بباله إنه لازم يشوف الأعضاء كيف يكتبون التقارير والمواضيع وشو اللي يخلي الأعضاء يتوجهون للمشاركة بموضوع محدد بالذات .. انا هذا كان شعوري لمن اشتركت بأول منتدى وكان منتدى المنتدى ما كنت أعرف شي كنت أحطي مواضيع مالها معنى مثل خلفيات وصور للعبه فقط .. وردودي كانت بسيطة جدا .. حتى بالمنتدى محد كان يعرفني إلا كم عضو .. بعدين غيرت اسمي وصار RPGgirl .. ساعتها بديت من أول ويديد والحمدالله صارت لي مكانة خاصة بالمنتدى وإن شاء الله تصير لي مكانة بهالمنتدى.. والفترة اللي استغرقيتها لإثبات وجودي ما تعدت ال3 أشهر .. وما كملت سنة بأي منتدى ومع ذلك أعتبر مميزه ( على قولة الاعضاء) في أنا بكتب الأشياء اللي راعيتها وهذي على حسب وجهة نظري وإن شاء الله تستفيدون ^^
* اعرف قيمة مشاركتك قبل ..
المشاركة في المواضيع شي مهم ولابد أن يدرك العضو أنه يشارك لهدف وليس الهدف هو أن يفرح فلان او يزيد مشاركته او للمصلحة .. بالاول حط ببالك إنك تشارك لإثبات نفسك وتميزك بالمنتدى فقد ترى عضو لم تتعدى مشاركاته 200 وله مكانه عالية في المنتدى والاعضاء محترمينه جدا .. في حين ترى عضو موصل 2000 او حتى 7000 وماله معنى وجوده .. انا الصراحة استغربت لمن شفت مشاركاتي كانت 2000 وشوي وكنت مشاركة من شهر 1 في حين شفت عضوة ثانية مشتركة من شهر 9 ومشاركاتها 7000 داشه 8000 استغربت والله ... ومحد يعرفها وايد هنه تكمن أهمية العضو وأهمية إثبات نفسه بمشاركاته بالمنتدى ..
*الغاية الأساسية من اشتراكك بالمنتدى..
هذا عامل مهم جدا فقد ترى أعضاء يسجلون بأسامي وبعد فترة يردون يسجلون وهلم جر .. لازم أي أحد يطمح في إنه يصير عضو مهم إنه يدرك قيمة تسجيله بالمنتدى ويفكر كيف يرتقي بهالاسم اللي دخل فيه حتى يكون اسم له بالمنتدى ...
*الردود الهادفة ..
هذا عامل مهم جدا نفتقده في كثير من المنتديات وأهم عامل وله تأثير جدا على اسم العضو .. اذكر مرة عضو قالي لمن اشتركت في منتدى الرسم .. قالي لازم تبدين رايج وبكل صراحة تظهرين الإيجابيات والسلبيات ولا الاعضاء ما راح يحترمونج .. فقلت له أخاف أضايقهم .. قالي بالعكس تفرحينهم.. ومن ذاك اليوم تغيرت مشاركاتي كليا أصبحت أهتم بإبداء الراي أهم نقطة في أي رد إنك تبدي رايك وبكل صراحة لكن تقدر تراعي مشاعر الكاتب شوي وما تثقل عليه وايد وفعلا في ظرف 4 أسابيع أصبحت من أهم العضوات بذاك المنتدى ..
*المواضيع التي يجب أن تطرحها..
أهم شي هو إنك تفكر بالموضوع اللي راح تحطه وتسأل نفسك شوية أسئلة .. هل الموضوع مفيد..؟؟ هل سيجذب الاعضاء إليه ..؟؟ هل يرضي جميع الاذواق..؟ للاسف اكتشفت إنه من الصعب إرضاء الاعضاء بسهولة والمشرفين على المنتدى .. فمثلا لو جيت تكتب تقرير عن لعبة (سوري بس هذا اختصاصي لازم ابدى فيه^^) لازم في البداية تحدد اللعبة ..لازم تجمع معلومات عنها .. لازم تكون جربيتها .. رايك باللعبة مهم النسبة المعطاه لها .. لا تخلي شي ما تكتبه عنها .. لازم تعطي القصة والشخصيات وغيرها حقها في الكتابة.. ولمن تكون فكرة عن الموضوع توكل على الله وأضمن لك 100% إنه بينجح..دائما المواضيع الهادفة هي التي تجذب الاعضاء لقرائتها ..
*قلل من نقل المواضيع واعتمد على جهدك..
هالنقطة تطرق لها الأخ أورون بموضوعه وفعلا هذي مهمة وانا بعطيكم أكبر دليل عليه .. انا كنت أبي أشارك بمنتدى يديد فاخترت منتدى الجيم بوي .. أول موضوع حطيته كان مترجم ترجمته من موقع عجيب.. وحطيته وماشفت ردود أبدا ساعتها واحد نبهني إني لازم أكتب الموضوع بمجهودي دائما والله رحت وغيرته كله وكتبته على حسب فهمي لان اللعبة كانت يابانية والله ساعتها 10 ردود انحطت .. كذلك المواضيع المنقولة نفس الشيء هي أكيد مهمة بس لازم تنقل الموضوع اللي يستاهل فعلا النقل وصدقني محد بيقولك شي لو كان الموضوع هادف..
*العزيمة الارادة الاصرار..
ثلاث صفات لا تنساها مهمة جدا للعضو الناجح قد تجد موضوعك في اول مرة محد يرد عليه طبيعي لانك عضو يديد ومحد يعرفك وهذا صارلي وايد خصوصا بمنتدى فاينل فانتسي بكل المنتديات ومنتدى الجيم بوي .. لكن وبتكرار مشاركاتك المهمة من اخبار مواضيع تقارير وصور جديده وعروض في لحظة بتلاحظ إنه الكل بدى يهتم فيه وصرت مهم جدا بالمنتدى وأحد دعائمه فلو ذهبت لنقص الكثير من المنتدى..فأنا أنصح أي عضو إنه ما يترك هالصفات أبدا ..لانها طريق النجاح..
*التوكل على الله ثم على قدرتك..
هذا الأمر مفروغ منه فشي ضروري أن تتوكل على الله في كل أمر النقطة الثانية إنك تثق بقدراتك وبقدرتك على صنع المستحيل ساعتها بتحس إنك ملكة كل شي ومب صعب عليك التفوق..
شجع نفسك دائما ولا تكن بائسا..
دايما لازم تكون متفائل تشجع نفسك بكل وقت على الإستمرار وتقديم كل ما هو مفيد .. وما يهمك شي حتى لو قعدت تشارك وماصرت مراقب ومع إنه كان حلمك لكن بالمقابل تعتبر أفضل من مليون مراقب وبتشوف إنه الناس يوثقون فيك أكثر فأنا أقولك حتى لو ما صرت اللي تبيه بس إنت وصلت له من دون ما تعرف وقد أصبحت عضو لو راح راح فيها 50& من مواضيع المنتدى المهمة..
اسعى دائما للتميز ولا تنظر خلفك..
خل عنك الماضي حتى لو كان ماضيك ماله معنى واقهر الحاضر واصنع لنفسك مكانة فلو حطيت في بالك التميز صدقني إنك بتوصله لو شو يصير ومحد يقدر يوقفك عنه ..
بعض الردود تغني عن الأخرى..
هذا يعني لو مثلا احد شارك قبلك بالموضوع وجيت إنت متأخر لظروف وحطيت رد توب صاحب الموضوع بيرد عليك وبيعطيك حقك وزيادة بعد فحتى لو تأخرت بالرد على إحدى المواضيع لا يكون تفتح الموضوع وعلى طول تحطي رد "مشكور على موضوعك" أبدا لا تسويها واقرى الموضوع على راحتك وحط رد يستاهله الموضوع ..
(تكسرت إيدي^^)
احم في النهاية هذي شوية أشياء بغيت أعرضها لكم وانا تعمدت أحطها كوني عضوة عشان يقتدي الأعضاء بالكلام الموجود وإن شاء الله أكون فاديتكم ولو بشيء بسيط وهذي ناتجة عن تجربة أقل من سنة وأكيد في أشياء كثيره ولكن هذي الاشياء التي صنعت RPGgirl وصنعت الكثير من الاعضاء المميزين ومتأكده إنها كانت بدايات مشرفينا الكرام
^_^
وجيتي هونا
