طبعا الموضوع قصته حقيقيه وكنت انا من ضمن الاحداث وقد وقعت هذه الاحداث قبل رمضان الماضي بعدة ايام...........
ناخذ القصه من اولها.....
المدرسه اقامت رحله الى المدينه المنوره وجده فكان موعد اللقاء الساعه 4 العصر بمطار الملك خالد الدولي وطبعا كالعاده صار في تأخر باقلاع الرحله ويوم جينا نركب بالطياره انا حسيت ان هالطياره مو مضبوطه ---->قاعد اتكلم صدق ما امزح وهذا لانها من طراز آير باص air bus وهذا الطراز نادر بطائراتنا (ما فيه الا طراز واحد من الاسطول السعودي)والباقي كله بوينج و md المهم الطياره صغيره مو من الكبار ركبنا وكل شي عادي باستثنا التأخير من جديد.........
المهم بدأت الطائره بالتحرك وجا وقت الاقلاع واقلعت
كل شي كان عادي الا انها كانت تهز شوي زي الطيارات القديمه مع انها جديده الطياره الحين في الجو ولسه ما اخذت الوضع اللي نقدر نفك فيه اربطه الحزام والغريب انها طولت على الحاله هذي وخصوصا اننا كلنا حسينا بعدم قدرة الطائرة على الارتفاع..........
وفجأة:
بدت الطياره تميل الى جهة اليمين اكثر بشكل واضح جدا ومحسوس ايضا
وفي اللحظات هذي تكلم كابتن الطائره وقال :يوجد عطل فني بالطائره وسوف نعاود الهبوط بمطار الملك خالد الدولي..............:! هنا كلنا عرفنا ان احساساتنا صحيحه ميه بالميه والله لحظه عمري ما راح انساها بحياتي وازيدكم من الشعر بيت ان الكابتن قال سوف نعاود الهبوط بعد عدة دقائق ليش انا مدري المهم الطياره جالسه تنزل شوي شوي وكل ما جت تنزل تفقد التوازن اكثر فاكثر وتتمايل (خصوصا على اليمين) والطيار شكله ما عنده سالفه والين ما قربنا ما الارض قدرنا نشوف سيارات الاسعاف و سيارات الشرطه والمطافي بعد وهذا مو مزح وهبطنا في ابعد مدرج يمكن (المبنى الرئيسي بعيييييد) المهم الهبوط كان شين بعد لانه هبط على الكفرات اليمنى قبل اليسرى وهذا سبب في صعوبه التحكم وهي تهبط والله تحس شوي وتنقلب معك ...........................
بعد كل هذا ويوم دخلنا المطار كان واحد ما اقاربي يشتغل بالمطار وجا يطمن علي وسألته وش اللي صاير؟!؟
وش تتوقعون كان الرد كان الرد سخييييييييييييييييييييييييييف في البدايه الا وهو...........
ان احد الكفرات ما دخل بعد الاقلاع
انتم راح تقولون هذا كل اللي سوا المشاكل والجواب نعم تخيلوا هذا الكفر
ما دخل كاملا هو دخل نصه (يعني مايل) اذا تبون تعرفون كيف لازم تعرفون وشلون يدخل الكفر اصلا وهذا شرحه صعب المهم الاشياء اللي سواها هالكفر هي:
1- فقدان التوازن بالطائره وهذا ادى للميلان اللي كان صاير فيها
2- التقليل من سرعه الطائره وهذا ادى الى عدم ارتفاعها بالمستوى المطلوب وهذا عشان الكفر يحتك بالهواء فيقلل من السرعه
ممكن انكم تحسون هالتجربه اللي مريت انا فيها سهله
لكن العكس هو الصحيح تماما لانك وانت بالطياره ما تدري وش السالفه لان الطيار ما علمنا وش المشكله بالضبط وتقلب الطياره لدرجه انها كادت تطيح فينا
طبعا باقي اشرح شي واحد اللي هو كيف هبطت الطياره والكفر لا هو اللي داخل ولا هو اللي طالع (نص نص) طبعا مساعد الطيار نزل تحت عند الكفرات عن طريق باب خاص في حجره القياده ونزل الكفر يدويا
عموما اتمنى انكم ما تمرون باللحظات اللي مرت علي (تحس ان هذي آخر لحظات حياتك وان اهلك بيجون يفتشون على الجثه والاخبار تنقل الحدث و...و...و......الخ------>تحمست شوي)
واللي صار اي نوع من هالتجارب يكتبها هنا وشكرا.............
ســــــــــــــــــــــــــــــــــــــــــــــــــــــــلام
...
