الماسنجر... او الانترنت بشكل عام... اشوفه صاير يسبب مشاكل... او يكبر مشاكل سخيفه جدا...
اعطيكم مثال يمكن تاضح الفكرة احسن...
كنت مع احد اخوياي في السعوديه... جالسين في مقهى انترنت... خويي داخل ماسنجره و لقى احد اخوياه في الجامعه فيه...
المهم يسولف معه... و مخلي اسلوبه جفس... و بعدين قلب سب و شتم... يا حمار... على تبن... و استمر في السب الين استخدم كل مفردات السب العربيه و الانجليزيه و بعضا من اليابانيه
المهم انه كله مزح طبعا... مستحيل انسان يقلب في لحظه كذا...
الرجال المسكين ارتاع ما يدري وش السالفه... يقول والله ما هقيتها منك... وش صاير فيك اليوم... وش مسوي لك ياخي... و من هالكلام...
المهم يوم طلعنا من المقهى دق عليه بالجوال و قعد يضحك معه و يقول ترا امزح و طفشان و جلست اسب فيك لا تكون زعلت... الثاني صار يضحك و يقول لا عادي وش دعوه...
======= ينتهي المثال هنا =========
افرضوا خويي هذا ما دق على خويه و تركه على ما تركه عليه في الماسنجر..
الولد بيقعد يفكر وش فيه ذا وراه قلب علي كذا... و من هالكلام...
و الخوف انه يصير يتجنب خويي و ما يكلمه يحسبه زعلان من جد... و ما وده يناقشه في اي موضوع...
الموقف هذا كان على الماسنجر...
فيه مواقف كثيره ثانيه صارت على الطبيعه... اصير طالع مع خويي هذا و خويه... و سب و شتم بين بعض بس كله ضحك و مزح...
لاحظوا الفرق بين الموقفين...
ليش زعل من المزح على الماسنجر... و صار يضحك على المزح في الواقع؟
انا ما طرحت الموضوع عشان اقول الحل وشو بالظبط... بس فيه افكار اظن انها ممكن تفسر هالشي...
احدها ان الماسنجر...او حتى المنتدى... ممكن ما ياضح اذا الشخص يمزح ولا لا... صح فيه ابتسامات... بس احيانا الواحد يخلي اسلوبه كأنه جدي... و ما يحط ابتسامات... او انه ينسى يحط شي... او متعود يكتب بدونها... اسباب كثيره انها ممكن تؤدي الى ان الطرف الثاني ما يفهم هل ذي مزحه ولا لا...
النقطه الثانيه... ان الي نشوفه في الماسنجر او المنتدى... عبارة عن كتابه... اقدر ارجع لها و اقراها مليون مره...
فرضا قال لك واحد كلمه يعني يمكن مزحه ثقيله شوي... لو كانت في الواقع... سمعتها ثم مشيتها و خلاص بعد فتره تنساها...
بس افرض انها مثلا مكتوبه في المنتدى... و كل شوي تمر على هالموضوع و تلقى كلمته لك... في كل مره راح تفكر فيها... و ما راح تنساها... و كل مره تقراها كأنها تنقال لك من جديد... و يمكن بعد تستنتج منها كلام ثاني... و تقول الي قايل هالكلام فأكيد يقصد كذا و كذا...
هذي نقطتين اظن انها ممكن تكون أسباب مثل هالمشاكل...
المشكله هذي مو بس تعتمد على المثال الي صار مع خويي... يمكن حتى كثير من الاعضاء يصير لهم مثل هالشي...
و ياما طلعت مشاكل في هالمنتدى بسبب كلمه و جنبها هالخشه>>
او اقل شي يصير سوء ظن...
فحتى بديتوا تلاحظون ان الواحد صار يكتب امزح تقريبا بعد كل مزحه... كله خوف من ان الثاني يفهم ان الكلام جد و تصير هوشه و يقول كلام... و الثاني يضطر يرد عليه بكلام... و تستمر بسبب شي غبي...
من رأيي اظن انه المفروض الواحد يقدم حسن الظن دايم بدال ما يعتبر الكلام جد و انه غلطان عليه... لانه لو كان خويك.. صعب انه يرد عليك بهالرد كذا بدون سبب... و لو كان ما تعرفه... صعب ايضا انه يجي يغلط عليك بدون اي سبب
بس المشكله هنا ان كثير من الشعب السعودي المليء بالعاهات يسويها... اقصد انه يجي من الباب للطاقه و يذب على ذا و ذاك... لا لسبب الا الكبر... او انه ينبسط اذا سوا هالشي...
و هذا الي يخلي الواحد يقدم سوء الظن... لانها ميب غريبه من واحد من هالشعب...
على سيرة العاهات في الشعب الرائع هذا... واحد يقول لي سالفه صايره في احد الاسواق في السعوديه... ناسي والله اي سوق...
المهم ان فيه شباب على الاسكليتر... الدرج الكهربائي..
و حاطين يدينهم على الي على جنب الدرج... (مثل الدربزين في الدرج العادي)... يكون اسود و يتحرك مع الدرج....
المهم انه صار يمسكونه كذا استهبال يحاولون يوقفونه... و مدري وش صار بالظبط بس خرب الدرج و صار يوقف و يمشي و يسوي اشياء غريبه...
لا و تدربت عجوز على الدرج و هم جلسوا يضحكون فوق...
ماش ما ينعطون درج كهربائي... اظن المفروض يعطونهم حبل يرقون عليه بين الادوار... او ما يحطون عندهم سوق من الاصل...
المهم شكلي طلعت بعيد عن الموضوع :6
نرجع للموضوع...
باختصار الي اقوله... انه المفروض ما تحكم على احد من كلامه معك في الماسنجر او في المنتدى... و انك دايم تعتبر الكلمه مزحه او شي زي كذا ما دام انك ما تشوف سبب مقنع انه يقولها من جد...
اظن اني وضحت الفكره الي في راسي... يمكن بعدين اضيف كم تعليق...
عموما الي عنده نقطه يضيفها... او يختلف معي في نقطه... او يبي يعطينا مثال صار له او صار لاحد يعرفه.... او اي اضافه يبي يحطها... يتفضل
(ما عدا شكرا على الموضوع :6 )...
سلام
:": المهم صارت عدة 
؟
