هل انت سخيف ..!

[The Night Baron]

السلام .........


قبل ماكتب هذا الموضوع ترددت لان من قبل كتبت موضوع مشابه

في منتدى الــ Video Games والمراقبين قفلوا الموضوع و طردوني

لكن راح اجازف هذي المره <=== ترى موضوعي سخيف بس معناه عميق

ـــــــــــــــــــــــ

ماتحس نفسك سخيف وانت عارف معلومات عن الانمي الي تحبه او

بالاحرى كل المعلومات قبل ماتشوف الانمي نفسه

راح اوضحلك شوي الي انا اقصده عندك كونان مثلا يمكن كل المعلومات

والشخصيات الي راح تطلع بعدين عرفناهم قبل ما نشوف الحلقات مثل

اي هيبرا وساكورا هاكوبا عرفنا قصتهم وكل شي عنهم قبل

مانشوف صورتهم حتى يمكن نعرف النهاية قبل اليابانيين

لدرجة اننا يمكن نشوف خمس حلقات مع بعض في النت او نقراها مانجا

كل شي سار سهل حاليا

اما ايام زمان لما كنا نشوف الانمي نتحمس ايش راح يصير بعدين بالاحداث

وننتظر اليوم الثاني عشان نشوف ايش صار ونحط افكار يمكن راح تصير

في المسلسل

و مسلسلات الانمي حاليا نقول عنها سخيفة ومكرره من كثر ماشفنا انمي

صحيح اننا في البداية فرحنا بالي يصير لكن لو فكرت شوي مافي متعة

مثل اول الي قاعدين نسويه كله غلط X غلط

وانا من وجهة نظري اقول ان هذا كله عشان تقول انا شفت اكثر منك

وانا عرفت معلومات اكثر منك وانا ... وانا .....

هل هذا عشان تتفاخر على الاعضاء انك تعرف اكثر منهم لكن اعتقد انك في نفسك

تحس انك اكبر سخيف في العالم لان الغرور لاعب فيك لعب

وانا ما استثني نفسي من هذا الكلام

واتمنى انكم تكونون فهمتو قصدي

و ياليت تعطونا يا المراقبين فرصة عشان نعبر عن آرائنا في الموضوع

لأنه موضوع مهم بالنسبة لي واحب اشوف آراء الاعضاء في هذا

وأوعدكم ان هذا الموضوع ماراح يخرب سمعة المنتدى

لانه لو سار شي انا بنفسي راح اطالب بحذف الموضوع <=== واحد متعقد

[Last_Angel]

لا مو شرط..


انا ما اقرى اي معلومات عن الانيمي قبل ما اشوفه...

حتى احيانا ما اقرى ايش مكتوب على علبة الديفيدي من ورا...



بس الحين وناسه اكثر لمن تشوفلك 4 او 5 حلقات ورا بعض.. او حتى المسلسل كله


يعني تخيل لازم تستنا اسبوع كامل عشان تشوف حلقة انو ياشا (مع العلم ان المسلسل فوق 150 حلقه)

يعني احلى شي انك تسهر وتشوف 8 او 9 حلقات ورا بعض




هذا رايي

[Yurilin]

الرسالة الأصلية كتبت بواسطة Last_Angel
لا مو شرط..


انا ما اقرى اي معلومات عن الانيمي قبل ما اشوفه...

حتى احيانا ما اقرى ايش مكتوب على علبة الديفيدي من ورا...



بس الحين وناسه اكثر لمن تشوفلك 4 او 5 حلقات ورا بعض.. او حتى المسلسل كله


يعني تخيل لازم تستنا اسبوع كامل عشان تشوف حلقة انو ياشا (مع العلم ان المسلسل فوق 150 حلقه)

يعني احلى شي انك تسهر وتشوف 8 او 9 حلقات ورا بعض




هذا رايي

والله نفسي.....;-)


آنه بعد جذي بس في شي راح ازيده....


آنه احب اطالع شكله الخارجي .....اذا كان حلو راح اشتريه....
و اذا كان مو حلو ما راح اشتريه...او اذا شفت غلافة مو حلو والناس يقولون
عنه حلو راح اشتريه....
و شكرا

[Shin Kyo]

أهلا ذا نايت بارون...

الرسالة الأصلية كتبت بواسطة The Night Baron
السلام .........

ماتحس نفسك سخيف وانت عارف معلومات عن الانمي الي تحبه او

بالاحرى كل المعلومات قبل ماتشوف الانمي نفسه

راح اوضحلك شوي الي انا اقصده عندك كونان مثلا يمكن كل المعلومات

والشخصيات الي راح تطلع بعدين عرفناهم قبل ما نشوف الحلقات مثل

اي هيبرا وساكورا هاكوبا عرفنا قصتهم وكل شي عنهم قبل

مانشوف صورتهم حتى يمكن نعرف النهاية قبل اليابانيين

لدرجة اننا يمكن نشوف خمس حلقات مع بعض في النت او نقراها مانجا

أن كنت أنت عارف النهاية و كل الشخصيات اللي حتجي قدام
لكن انا ما أعرفها لسا ولا أحرقها على نفسي عن طريق النت او شئ ثاني.. ( وانا ما أقصد كونان بس بل أغلب الأنميز)
......

الرسالة الأصلية كتبت بواسطة The Night Baron

كل شي سار سهل حاليا

اما ايام زمان لما كنا نشوف الانمي نتحمس ايش راح يصير بعدين بالاحداث

وننتظر اليوم الثاني عشان نشوف ايش صار ونحط افكار يمكن راح تصير

في المسلسل

طبعا أولا لمن كان الأنمي صعب انو يتوفر و يجي واحد يلاقيه أكيـــــد راح يحس في متعة و يكون له طعم مختلف عن الشئ اللي تلاقيه بسهولة... وهذا امكن يكون شئ عادي ماله دخل أبدا في السخافه أبدا...
مجرد فرح على سلعة صعبة الوجود و انتهى...

الرسالة الأصلية كتبت بواسطة The Night Baron

و مسلسلات الانمي حاليا نقول عنها سخيفة ومكرره من كثر ماشفنا انمي

صحيح اننا في البداية فرحنا بالي يصير لكن لو فكرت شوي مافي متعة

مثل اول الي قاعدين نسويه كله غلط X غلط

مدري بس أنتا اللي تشوفه سخيف و مكرر أبعد عنه وخلاص ....

وبعدين ليه الواحد يفكر انو اللي يسويه غلطX غلط !!

المسأله عاديه جدا مجرد وسيلة ترفهية زيها زي بقية الأفلام السينمائيه
و أي شئ ترفهي ثاني....لاتفكر كذا يا أخي..

الرسالة الأصلية كتبت بواسطة The Night Baron

وانا من وجهة نظري اقول ان هذا كله عشان تقول انا شفت اكثر منك

وانا عرفت معلومات اكثر منك وانا ... وانا .....

هل هذا عشان تتفاخر على الاعضاء انك تعرف اكثر منهم لكن اعتقد انك في نفسك

تحس انك اكبر سخيف في العالم لان الغرور لاعب فيك لعب

وانا ما استثني نفسي من هذا الكلام

واتمنى انكم تكونون فهمتو قصدي

امكن في أشخاص زي كذا لكن ليش الواحد يحس نفسه سخيف ..
هوا برضو حيستفيد من الأنميز اللي حيجمعها اما اذا كان يشتري أنمي بايخ بالنسبه له عشان يقهر فيه فلان اللي يحب هذا الأنمي فهذا أهبـــــــــــــــــــل...



و شكرا على الموضوع أخي...

[waytomoon]

السلام عليكم..

الصراحة ان الموضوع حلو ... ليه ؟؟ لأني أنا دايما في صراع مع نفسي لما احب اطالع شي سواء كان انيمي او افلام سينامائية او مسلسل تلفزيوني... من ناحية احب اعرف شو راح يصير الحلقة القادمة ومن ناحية احب اتفاجأ واستمتع باللي اشوفه ... المشكلة ان اللي يعانون من ها الصراع هم اخواني و خواتي ..... متعقدين مساكين خصوصا اذا قاعدين نطالع شي مع بعض و انا عارفة شو بيصير , اقعد اتفلسف عليهم وما عندي غير الا بيصير جي و ما بيصير جي .... لدرجة انهم اذا عرفوا اني قريت عن الحلقة مسبقا , يحلفوني ويترجوني ما اقول شي ... احيانا امسك عمري واحيانا لا....

وكمان عندي ها الطبع.. احب اجمع تقارير عن الانيمي وحلقاته ونبذة عنها.... لكن اذا كنت احب الشي اللي اطالعه وايد ما اقرا الحلقات مسبقا علشان ما احرق المسلسل علي....وسلامتكم...

[weiss_girl]

من ناحيه ان الواحد حلاته لين يشوف المسلسل يشوفه كله وحلقه بحلقه مايقعد يحذف حلقات ولا يشوفها وفي بعضهم يشوفون الأجزاء الأولى وعقب يملون ويشوفون الجزء الأخير او الحلقه الأخيره وعقب خلاص مايتابعون الحلقات اللي ماتابعوها الا اذا تفرقوا له .........

اما المعلومات من الأنترنت فأعتقد ان الواحد لازم قبل مايشتري مسلسل او يحمله من المواقع فأفضل له ان يشوف القصه والشخصيات اذا عجبه ولا لا عشان مايضيع وقته وماله سدى

اما من ناحيه ان كل واحد يتحدى الثاني فكل واحد حر بنفسه مثلا البعض ينافس في اخبار الانيم و عن الاشرطه اللي تنزل وهكذا والبعض ينافس الثاني عن الانيم المفضل لديه وعن الشخصيات ومعرفة احداث المسلسل وهكذا..............

واتمنى تقبل الأراء بروح رياضيه وشكرا............

[Ranma Saotome]

هاي

انا بالنسبه لي.. ماشوف انيمي على الانترنت ولا انزل اي شي الا اذا كان فيلم.. لكن حلقات مانزل من الانترنت ابدا..
حتى المانجا.. نادر ان اشوف مانجا من الانترنت..
دايما الاشياء اللي اشوفها اطلبها من الانترنت... احس بشعور راااائع لما يوصلني الطرد وافتحه واشوف الاشياء اللي طلبتها..
ومثل كل سنه اطلب طلبيتين...

والاشياء اللي اطلبها ماقرأ عنها وايد.. يعني انا اتعامل مع تقريبا 3 مواقع للانيمي فقط... واقرا المعلومات عن الانيميز من عندهم.. لأن الكلام اللي يحطونه مايخرب على الواحد القصه.. لكن يعطيه مجرد فكره عامه عن الانيمي.. او اسأل اصدقائي.. اذا في ناس وايد شافوه واحبوه اطلبه.. لكن ماقرأ عنه وايد...
وبعد ماحس ان في انيميز وايد متكررين.. يمكن من بعض النواحي في تكرار.. لكن مستحيل ان يكون في 2 animes متكررين كليّا..

يعني ذكرت ان الواحد يشوف انيميز وايد بس عشان يتفاخر.. مع ان الواحد يشوف قصص مكرره.. مابي اقول عدد الانيميز اللي شفتهم لكن الحمدلله وايد.. وبصراحه ماشفت اي مسلسلين متكررين ابدا.. مافي.. لو الواحد يفهم قصة كل مسلسل عدل.. راح يشوف اشياء مختلفه.. طبعا في نقاط مشتركة لكن محور القصه الاساسي يكون مختلف.. او نفس الفكره لكن طريقة طرحها يكون مختلف...

اتمنى لو تعطينا امثله على كم مسلسل انيمي تقول انه فكرته متشابهه.. لأني مافهمت هذه النقطه 100%..

ايه ونقطه اخيره.. الاحسن ان الواحد لما يشوف مسلسل انيمي.. يشوفه كامل من غير مايشوف معاه في نفس الوقت مسلسل ثاني.. وبعد مايخلص هالمسلسل.. يقعد مثلا 3 ايام او اسبوع قبل مايبدا يشوف انيمي ثاني.. هذي احسن شي عشان الواحد يفهم الانيمي عدل ومايحصل اختلاط بينه وبين انيمي ثاني

[orange road]

آنا معاك رانما...
الواحد لما يجوف مسلسل انيمي الاحسن يعطي نفسه اسبوع فراغ على الاقل قبل لا يبتدي يجوف غيره علشان يقدر يفكر في القصة عدل..

افضل اني امتلك الانيمي على اشرطة فيديو او دي في دي والمانجا اطلبها من النت.. يعني نفس رانما.. ^^ صراحة الشعور حلو لما توصلك الطبية ...

لكن انا مع الاخ صاحب الموضوع في ان في ناس تحسهم سخفاء.. يجوفون الانيمي بالهبل.. مب حبا فيه بس علشان يقولون احنا جفنا وجفنا..
طيب .. هل فهمت القصة؟ هل حللت الشخصيات؟؟ هل تعمقت فيها؟؟
لا.. تلقاه يجوفه على الطاير ولا قبض شي من القصة...

هني هاي تقول عنهم سخفاء... لان تفكيرهم سخيف..

بالنسبة حق نقطة انك تعرف القصة قبل ما تشتريها...
غالبا اقرا القصص من الموقع اللي اشتري منه.. لان مثل ما قال رانما انهم ما يخربون عليك القصة...
ومكتوب عليها التصنيف ^^ فاعرف اختار القصة اللي ابيها..
بعد ما اقرر اني ابي هالانيمي اروح مواقع تقيم الانيميات وتعطيها تقادير وتكتب مختصر القصة بدون ما تخربها عليك.. من هناك اقعد افكر اذا راح اخذه والا لا..

طبعا هاي ما يغني عن نصايح المعارف والاصدقاء من متابعي الانيمي

اما بالنسبة للانيمي اللي استعيره.. استعير اي شي يطيح تحت يدي.. يعني ما اتشرط.. (ما هو ببلاش :6 ) وحتى لو ما عجبني وايد انسخه على شريط فيديو احتفظ فيه.. لان ممكن القى حد يبي يجوفه فاقدر اعيره اياه..
^^

[Al-RaQmi]

والله كلامك حلو كمان مفيد جدا جدا وجميل
وفي محله
بس يمكن اعارضك في حاجه هي ان الانمي الحين ما تقدر تلحق عليه بالاااااالف وعددها كبير
اتوقع ان الوحد لما ياخذ فكرة عامة عن الانمي بشكل مجمل وعام يكون احسن
اذا كان يناسبه يدور عليه او يتركه اذا ما صلح له
وطبعا الناس اذواق وصعب يقول لك واحد انه حلو او مو كويس
المهم هو ذوقك انت بنفسك

فأخذ الفكرة العامه عن الانمي من التقارير او المواقع الخاصة هو الحل اتوقع ...
بس تاخذ المسلسل وتطحنه حلقة حلقة وحدث حدث اتوقع هذا راح يبطل عليك متعت المشاهدة

وتسلم على كلامك الروعه

الرقمي

[The Night Baron]

السلام ...........

ردودكم حلوه و مقنعه صيحيح بعض الردود استغربتها

لكن مثل ماقلت كل و احد له وجهة نظر



وبالنسبة لسؤال الاخ Ranma Saotome عن انمي متشابه

عندك مثلا خماسي وفولترون نفس القصة ونفس الهدف ونفس محور القصة

حتى نفس الوان المركبات والاتحاد بس الفرق الوحيد ان فولترون

مركباته نمور وخماسي مركباته عادية

[Rewayah]

أعتقد إنه أغلب الأعضاء كتبوا بعض الردود اللي جالت في بالي.

وبالنسبة للي مطروح في الموضوع, أنا أتفق مع ذا نايت بارون في 75%, وأختلف في 25%.

أنا من الناس اللي يفضلون متابعة المسلسل "خمس حلقات في الأسبوع".
...
أنا ضد "كل إسبوع حلقة" كما يفعل اليابانييو.
وأكره "كل يوم حلقة"... سبع حلقات على سبعة أيام بالأسبوع.

أنا أفضل "كل يوم حلقة عدا الخميس والجمعة".

والصراحة في كلام وايد أبغي أقوله, بس ماكوا وقت.

حياكم.

[SAZABI]

من ناحيه انه الواحد كم حلقه يشوف تعتمد على المزاج بمعنى انه الانمي لو عجبك حتنفلت وتخلصه بسرع مثلا انا خلصت بيرزارك في يوم واحد بينما اياشي نو سيرس قعدت شهر اتفرج شويه ويجيني اكتئاب منه واوقف وارجع ما اظن انه فيه قاعده لكيف تشوف الانمي مثلا الان حتجي super robot wars alpha 2 فحا احاول اخلص برين باورد (ليوشيكو تامينو) بسرعه قبل لا يوصلني القيم ومساله انك تشوف انمي كثير او قليل راجعه لك 100 % بينما الشباب هنا في بعضهم يتفرج بطريقه بشعه ما يصدق يرجع من العمل علشين يتفرج, انا واللي ساكن معايا في الشقه لاء نتفرج بس الشيء اللي متوقعين انه جيد او ممكن يعجبنا مثلا امس وصلنا انمي اسمه جوشن رايدر لغوناغاي مسويه مع استيديوهات سان رايز الانمي نادر وتعبنا لغايه ما جبناه من اليابان لكن شيء لغوناغاي يستحق بالنسبه ليا التعب بينما ليا يمكن اكثر من اسبوعين ما شفت انمي جديد لكن حابداء جوشن رايدر,ويجونا الشباب يدوشونا يقولولنا كيف تعتبروا نفسكم محبين انمي وما تتفرجوا كثير ونقولهم لازم محبين الانمي ينقلبوا تازامانيا يبلعوا اي انمي يقابلوه لاء اختار اللي يعجبك وخلاص ويقولولنا احسن من سنفور غضبان نقولوا اتفرج الشيء الفلاني تردولنا "اكره الشوجو" طيب شوفوا الانمي العلاني وتردولنا "اكره شعل البزوره" ................


المهم نقاشات ما تنتهي ومساله اسبوع او ثلاثه ايام علشين تهضم الانمي الكلام في نظريه لكن في الخر يعتمد بالدرجه الاولى عليك طيب مساله انك تدور في الانتر نت وتقراء قبل لا تشوف الانمي انا انبح صوتي من زمان وانا اقول الكلام ده ما ينفع ياجماعه الشيء ده مو كويس علشين صحتكم ما احد كان يسمعني انا اذا عجبني الانمي ادور عن معلومات زيارده عنه في الانتر نت او اسال الشباب لغايه ما نجيب قراره لكن من قبل لا اشوفه ادور واعرف القصه والنهايه لاء اذا عرفت القصه والنهايه ليش اتفرجه اصلا.

مساله التباهي بالمعلومات ترجع للشخص ممكن في ناس تحب تتباهى لكن في ناس زي اشيتانو جو انجل اون ايرث وغيرهم كثير القصد الاول والاخير من كتابتهم للموضوع الفايده للاعضاء انا ما عندي اي شك من دي الناحه ابدا فليش نظلم الناس دي علشين شخص او شخصين قصدهم غير الغرض ده انا ما انكر اني واجهت كذا واحد كان ما يكتب الا علشين يبين انه فاهم واو يعرف وفي نظره ما احد فاهم غيره لكن كان يمكن واحد او اثنين بس فبلاش نفتح السيره علشين ما يجوا ناس يفهموا غلط ويقولوا انتا تقصد مين اوا ماتقصد مين ونسبب اشكالات ما لها داعي.


عموما ده راي ممكن اكون غلطان او ممكن اكون صح الله اعلم واسف على الاطاله والعفو منكم

[Rewayah]

سازابي,
كلامك عن أشيتا نو جو وآنجل أون آيرث سليم, فهم كذلك يستعرضون مسلسلات منها القديم اللي نعرفه, وهذا دليل إنهم ينوعون وإنه مو قصدهم التخريب أو التباهي, لأنه القصة معروفة.

بالنسبة للنقطة اللي أنا كتبتها فوق في ردي.
أنا كنت أتكلم عن مشاهدة الأنيماي على شاشة التلفاز.
وليس عن إقتناء الأشرطة وإسطوانات الـ DVD.

فعلاً, في الحالة الثانية الواحد يقدر يشوف المسلسل كامل ويسهر عليه وينهيه مثل ما يبغي.
وهذا راجع له 100% كما تفضل البعض.

لكن بالنسبة للعرض التلفزيوني, فهناك عدة طرق للعرض.

منها:
- كل يوم حلقة - (العرب).
- كل إسبوع حلقة - يوم الأربعاء مثلاً أو الثلثاء (اليابنيين والغرب).
- كل يوم حلقة عدا الخميس والجمعة.
- ثلاث حلقات بالإسبوع - يوم نعم ويوم لا عدا الجمعة.
- حلقتين بالإسبوع - الأثنين والأربعاء.
- 14 مرة بالإسبوع - سبع حلقات (كل يوم حلقة تنعاد مرتين في النهار وفي المساء).

بالنسبة لي, كل يوم حلقة عدا الخميس والجمعة <== المفضل عندي, عشان نقدر نستريح ونناقش في عطلة نهاية الإسبوع القصة والأحداث اللي إنعرضت خلال الإسبوع.
ونلقى فرصة للحديث عنها في الإنترنت والمنتديات.

(يخطر عل بالي الآن فكرة خروج العوائل للنزهات والرحلات مع أبنائهم وهم يحملون معهم ما شاهدوه في المسلسل)... <== هذا اللي أبيه يصير بالنسبة لإنتاجاتي.

أما بالنسبة للأشرطة والـ DVD, فأنا من النوع اللي يفضل إقتناء المسلسل بعد العرض التلفزيوني وأظيفه ككلكشن.

أما إني أشتري مسلسل كامل ولا مرة شفته على فترات "طبيعية", أحس إنه يصير ماله نكهة, ويصبح ذو طابع عابر ولا يكون له "إمباكت".

وبالنسبة لتوزيع الحلقات في المواد التسويقية, فأنا أفضل خمس حلقات لأشرطة الـ VHS (أكره الطريقة الغربية المتبعة واللي هي ثلاث حلقات للشريط الواحد), وسبع حلقات لإسطوانات الـ DVD مع العروض الأخرى والتقارير وأفلام إنتاج المادة المطروحة "Making Of".



بالإضافة, أنا أنصح أي واحد إذا إشترى مسلسل على إسطوانات DVD, "فليحاول" أن يشاهده على فترات "منتظمة" إذا كان فعلاً يود أن يشعر بالمسلسل كما شعر به اليابانييون أو أراده المنتجون.

يعني بالعقل, المسلسل ما بيطير من إيدك!
خلك تشوفه كل يوم حلقة وعط نفسك فترة "راحة" كل إسبوع! -_^

وهذا الشيء فعّال جداً خصوصاً لما يكون المسلسل من إنتاج رسام أو مخرج أنته تحبه.
أنت ما تبغي تخربه! صح ولا لأ؟
وتبغي تاخذ "The most out of it". ^^

حياكم. ;-)

[Touya]

الرسالة الأصلية كتبت بواسطة Ranma Saotome
ونقطه اخيره.. الاحسن ان الواحد لما يشوف مسلسل انيمي.. يشوفه كامل من غير مايشوف معاه في نفس الوقت مسلسل ثاني.. وبعد مايخلص هالمسلسل.. يقعد مثلا 3 ايام او اسبوع قبل مايبدا يشوف انيمي ثاني.. هذي احسن شي عشان الواحد يفهم الانيمي عدل ومايحصل اختلاط بينه وبين انيمي ثاني

همم... بالنسبة لي ماشفت انمي من زمان... وبالعادة انزله من النت عن طريق الp2p وكذا يجيني المسلسل حلقة حلقة ويطلع له طعم.. مثل Ayashi no Ceres.... شفته في مدة يمكن تعدت 7 شهور وانا انزل فيه!! @@ لن بعض الحلقات نادرة... بس مستوى التنزيل يمكن كان حلقة منه كل يومين او ثلاثة.. او حلقتين.. بس نشبت لي الحلقة الأخيرة.... قاعدت 3 شهور عشان اككملها.. رحلة عذاب كانت بس كانت تستاهل:"

بالنسبة لي أنا أندمجت في عالم المانجا أكثر.. بس سويت الغلط اللي نبهوا عنه الشباب... صرت تازمينيا مانجا.. اول شي اقدر اصيده اجيبه من النت.... وبعدين انقطعت فجأة.. مدة اربع شهور لني توظفت في منطقة نائيةة... واللحين مو عارف وين كوعي من بوعي ووشلون اكمل بعض القصص... باين علي لازم ارجع واقرى 7 جيجا من المانجا وحدة ورى وحدة:"

والله يكون بالعون:!

بالنسبة لي انا افضل اني احلل ابو القصة والشخصيات.. سواء في لعبة أو انمي او مانجا... وع شي زي المانجا يكون التركيز على القصة مهم وانك تقرى افكار الشخصيات ساعات.. او ماتقراها (على حسب نوع المانجا.. يعني ممكن فيه شخصية ماتدري وش يدور في باله)

وكان على القرايه عن القصة من النت.. ساعات اقرى.. بس الشي الوحيد اللي اتجنبه هو الtxt translation.... يعني تشوف ترجمة انمي او قصة بلف نصي.. ذاك الوقت انحاش...
واني اقرى نبذة عن المنتج قبل ماشتريه هو شي عقلاني عشان ماتخرب القصة او تشتري شي مايستاهل...

وبعد ماتخلص من المنتج.. روح وفتش في المواقع واقرى على كيفك وتخاطب مع الناس.. لكن تجنب تخريب قصته على غيرك وحذرهم فبل ماتتكلم النقاط الحساسة... وأحياناً تتحتوي المواقع على معلومات.. ماتشوفه لا في ألأنمي ولا في اي شي مرتبط بالمنتج... ومع كذا هي توضح ملابسات كثيرة عن القصة وتوضح امور خفت على المشاهد... يمكن تصريحات رسمية.. او غيرها من هالأمور.. او حتى ظهور ثاني للشخصية في مسلسل ثاني...
مثال... لو رحت لموقع suikoden source وشفت كثير من الشخصيات.. بتلقى بعضها ماظهر لا في الأجزاء الثلاثة ولا في ال text games اللي نزلوا في اليابان... وبعض الأمور من التصريحات الرسمية كال True Runes وغيرهم... أنا انصدمت بأشياء كثير ماكنت اعلمها مع اني لعبت معظم الأجزاء واعطتني معلومات اكثر ساعدتني على فهم بعض محاور القصة.

[اي هيبارا]

لا يا The Night Baron
كلامك خاطئ .....

أنا أحب مشاهدة كونان اما عبر الانترنت أو قراءة المانجا والتلفزيون ما أحب العرب مصخوه وخربوه واااايد وانت تعرف السبب مركز الزهرة ..

يعني مشاهدة كونان المترجم الي يطلع على التلفزيون ما أحب مشاهدته بس ما اعرف لازم أشوفه لأني من أشد المعجبين بهذا الأنيمي ومحبيه لدرجة أني ما أحب أن يطوفني

وبعدين لما أدخل الانترنت أعرف معلومات عن شخصيات مو بس الي ذكرته ساجورا وهايبرا في وااايد شخصيات يديدة ولهم معلومات وااايد أدخل أكثر من مئة موقع وأبحث عن المعلومات ....


وبعدين أنا أفضل مشاهدة الحلقات وأخذها من النت ولو تصدق في حلقات سبشل خاصة ما لها دخل بالمسلسل ...شلون راح نشوفها بالتلفزيون مستحيل والافلام بعد شلون ....?:

لازم الانترنت أهو الحل الوحيد الي نقدر نحقق الشئ الي نبي نشوفه والله
بدلا من الشراء ... هذي فرصة للمشاهدة والله ;-)

وكلامك خاطئ ان نشوف الحلقة بالاسبوع مقطع ومحذوف وتبي نستمتع بعد لا والله مستحيل نستمتع يا أخ