وهقني مبنى المملكة بالرياض
وهجني الوليد بن طلال .......
يوم أمس الثلاثاء الموافق 13/8/2002م كنت داخل للرياض أنا والوالد الله يحفظه من الشر على طريق القصيم الرياض وبعد ما تعدينا التفتيش بربع ساعة وأقبلنا على الرياض وبانت العمائر عند حي الصحافة .... قام الوالد الله يحفظه من الشر يكبس مره مرتين ثلاث قلت سلامات قال ترانا ملزومين نمر أقرب مستشفى يا وليدي تلحق على ولا يمكن ما تلحق ....
عاد آنا ما صدقت خبر من شهر وأنا ما نطلت في الهايلكس .... واسحب جلنط وادخل عرض على المستشفى السعودي الألماني على بالي مستشفى حكومي ....دخل الوالد واستقبلنا خمسطعش دكتور وممرضه المهم قلت أكيد ما عندهم أحد وفاضين في هالليل وتجمعوا على الوالد الله يحفظه وش فيك سير"يعني سيدي باللغة الفليبينية" قال الوالد أنا عيوني صارت تشكل علي وما فيه إلا تحاليل وأشعة وأنا ادعي ربي أن الله يعافي أبو فيصل ويرحم ولده فيصل عن النار اللي حط هالمستشفى في درب المسلمين والخدمات المميزة فيها .....
دقائق ولا الدكتور يدخل علينا في غرفة الانتظار ويعلن أسماء الناجحين فلان الفلاني حاضر .... المهم عدو اسم الوالد الله يحفظه وآخذنا الدكتور إلى العيادة حقته وقال للوالد الله يحفظه إن التحاليل كلها سليمة والحمد لله قال الوالد للدكتور بس يا دكتور أنا أشوف الفيصلية ثنتين حتى الآن قال الدكتور وشلون تشوفها ثنتين قام وطل من عند عيادة الدكتور وشاف الفيصلية وقال للدكتور شفت يا دكتور أن المشكلة لا زالت قال الدكتور الله يخلف عليك هذا مو الفيصلية هذا مبنى المملكة بس اليوم مدبل ومشغلين الإضاءة الداخلية للمبنى ومسوي حركة الفيصلية .
اعذروني اللي مو ساكن الرياض ما راح يفهم القصة ؟؟؟؟
الموت يوم جينا نمشي قالوا الحساب وصارت الفاتورة قصة ثانية انتظروا قصة الفاتورة في الحلقة القادمة .
هبت هبوب شمال وبردها iiشيني" "ما تدفى النار لو حنا شعلنا iiها
مايدفى الا حشا مريوشة iiالعين" "والا عطشنا شر بنا من ثنايا ها
.. 
..
