حطوني في الحجز اليوم 6 ساعات على شي ماسويته .. الله ياخذ شرطه مدينة التخلف !!

[DSL]

والله العظيم وبكل صدق ... حجزونا من الساعة 12 الي 6 الصبح على شي ما ندري عنة ؟؟
الفترة ... (( يوم الخميس الساعة 12 الليل الي 6 صباح الجمعه )) ...
يعني اليوم !!

القصة بالتفصيل من اول مامسكونا الين ماطلعنا :
الي كان معي أربعة اثنين من عيال جيرانا وواحد ولد عمتي والثاني ولد خالي ... شباب تعرفون شارع الأمير عبدالله وحنا طالعين من مطعم البحصلي نبي نديور نتجه شرق على نفس الشارع نبي نروح بيت اخوياي
وقفنا عند الأشارة وعلى يسارنا سوق صحارى ...وحنا واقفين فجأة تشوف ضباط يهجمون على كل السيارات (( سيارات الشباب )) ويمسكونهم ...
أنا جاني واحد وصقع الكبوت حق موتري .. وفتح الباب علي .. وجرني مع يدي وأشوى اني كنت رابط الحزام ... وتركني ونفخ علينا وقال (( اثباتاتكم )) .. عطينه المهم قال انزلوا ماعدا السواق يقصد الي يسوق السيارة الي هو (( أنا )) .. المهم نزلوا الي معي وديورت عند السوق علشان اشوف وش القصة (( ياليتني منحاش )) ... ....
وقفت على جنب مع البشرية ... ونزلت ورحت عند الظابط وشفت شي غريب والله ماتصدقون ...:! والله والله العظيم انهم يمسكون العالم الي نزلوهم ويدخلونهم في سيارات المرور كل شوي تجي سيارة وتاخذ مجموعة ... وفي ناس طقوهم طق الين ماركبوا معهم .. و أنا يوم شفت الموقف كذا ركضت ابروح سيارتي (( في ناس يركضون معي حوالي عشرين واحد )) .. وأسمع ذاك الصوت .. يقول : هييييه وقف وقف !!
وبطئت سرعتي ويجي يتركني ويهجم على واحد ويرفع مسدسه والله العظيم ... (( شي غريب )) :! ... (( الي اعرف ان مايسوون الشرطة ذي الحركات الا ان في وراها بلا )) المهم كان ولد جيرانا يمشي بشويش للسيارة جاه العسكري :غضب: ... وقاله هييه وقف ماتسمع ورفع السلاح وعلى باله يقنص على رجله ... وبعد ذي الحركة تجمدت رجولي مدري وين اروح ؟؟ وقفت في مكاني (( واشوف البشريه تركض والشرطه تركض من قدامي )) ولا احد مسكني (( من خوفي )) ماتحركت (( الدعوه فيها سلاح )) .. تصدقون عاد اخر واحد حطوه في سياره الشرطه انا لا مب سيارة شرطه بعد بحث ... انا وثلاثه ماعرفهم ..
وحنا في الطريق لمرور الناصرية قاعد يقولنا الظابط .. وش تسوون هاه ؟؟
... وشرحنا له اننا كنا ماشين في أمان الله وماندري وش الي يصير .. وقال : خير انشالله ...
اهم شي : وصلنا الي المرور وخلونا ساعتين في الشارع ينادون اسامينا عشر مرات .. (( زي تحضير المدرسة )) ... وحنا في داخل ساحة مرور الناصرية .. جا ولد جيرانا وقال لنقيب ان في واحد من العساكر رفع السلاح في وجهي ...قال لا مو معقول انت نصاب ؟؟ شف الأستهتار بس ,,
وراح بعد ربع ساعه الظابط الي كلمه ولد جيرانا .. راح عند ظابط اكبر منه متعلم مثقف .. (( نقيب )) .. شف الرد الي قاله ذا المتعلم السفية الغبي المنحط ((قال كلمه وسخة وماودي اقولها هنا .. للعسكري)) .... (( قال رح ناد *** هذا )) ...
وسمعه ولد جيرانا وهو يقول الكلمة القذرة ... وسكت وماقدر يسوي شي الحاله داخل قسم المرور ...
قاله العسكري وش عندك تقول سلاح ؟؟ قال ايه هذا رفع علي السلاح ... ورد عليه النقيب المنحط وقاله انت ماقد جا كف في وجهك .. ؟؟؟
(( وش ذا الرد ياجماعه )) ؟؟

وأستمرينا على ذي الحال الين مادخلونا جو الحبس ,, الين الساعة 4 الفجر
نترجاهم يطلعونا ,,
يقول مافي طلعة الين يجي واحد يكفلك ,,, كل واحد جاب ابوه (( الله ياخذهم فشلونا والله استحيت من ابوي مقعدة يوم عطلته الين 6 الصبح ))
ساعتين في الشارع والله لا قوة ولا شي ينفعك الي ابوه في الديوان الملكي والي ابوه في المرتبة 15 عشر في التعليم والي ابوه عسكري ..!!
كلهم جالسين برا ... يحترون قرار شي يصدر ... (( قال ايش هذي اوامر الأمير نايف )) ؟؟ انواع النصب ...
وبعد التعهد وكفالة وخربطة طلعونا ...

(( وش صارت القضية ان فيه ناس يفحطون وانتم متجمهرين ؟؟؟ ابي افهم وشلون متجمهرين موقفين عند أشارة !!! يقول لنا وش عندك هنا ؟؟ ابي ابفهم ذا الشارع اليحن مايدخله الا العوئل وش ذا التخلف !! ))

المهم في اخر شي مرينا الساعة 6 ونص لشارع الامير عبداللة .. ومالقيت سيارتي ولا سيارة لقينا ... كلمنا المرور قالوا شلناها .. للحبس ...
سمعت انهم يقصدون وادي لبن ؟؟ والله مأدلها ...بس قبل مأروح لازم امر على الشرطة وانواع الخربطة وشكلي منب رايح ... الا بعد الأختبارات الله ياخذهم من شرطة قال ايش الشرطة في خدمة الشعب .. والله ان الشرطة في خربة الشعب ...
في ذيك اللحظة تمنيت ان مسوي شي علشان ادخل الحبس ,,,
:غضب:
:"
والله اتمنى صاروخ على الرياض جاي من امريكا ... :غضب: تراني منقهرررررر
ابي افهم ليش ادخل الحبس ...
من الفضاوى قاعدين نصور بجوال الكاميرا داخل الحبس وودي احط الصور هنا تضحكون هههههه

شباب الي كان معنا هناك بالصدفة ... يرد !!
===
أهم شي كيف اجيب سيارتي .. ماادل وادي لبن مدري حليب !!

@(( للمعلومية اسم النقيب ذا راح للديوان الملكي واحد من الي معي ابوه يوم جا يطلعه اخذ اسم النقيب الوسخ معه ... ابوه يشتغل في الديوان ))
:غضب: :"

[مهند الريس]

هذا دليل على تخبط جهاز الامن عندنا

وما دروا بافعالهم هذه انهم يولدون الحقد والكره والتحريض الغير مباشر على فعل اعمال تخريبية


اما انك تمنيت صاروخ من امريكا على الرياض

فحما الله بلدنا العزيز من هذه الامنية الحقيرة

تتمنى ان تدمر بلدك

تتمنى ان تحتل بلدك

مهما فعل بك انت وغيرك فهذا لايبرر لك ان تتمنى لبلدنا العزيز بأن يضرب

من راس الكفر امريكا

والسلام ختام

اللهم اجعل هذا البلد امنا واحمه من عبث العابثين

[moar741]

أخي الذي يقول لك أن هذه أوامر الأمير نايف الله يحفظه هذا كاذب وملفق الذي نعلمه ونسمعه أن سمو الأمير نايف ما يأمر أخذ الناس بهذه الغلظة واشهار السلاح بوجوه الناس لكن ربما تصدر بعض التجاوزات من بعض الأشخاص الله يهديهم

[الكنـ22ـج]

يارجال نصاب الي يقولك من الامير نايف

اصلا الامير سلمان مانع اشهار السلاح فمابالك بالتهديد بالسلاح

اما عن وادي لبن فهو بداية طريق الطائف
الله يعينك

[hitman]

ايه شوف في اليوم الي امسكوك فيه كان في مجموعة شباب كانو راكبين
كامري سوو هجوم على موكب الامير عبد الله ولا تزعل يا بعدي

[سنفورة مسنفرة]

هذه الموضوع في كم منتدى حطيته؟ قرأته في منتدى ثاني باسمك
الله يعينك كل هذا قهر ..من جد مااحد يلومك قوة قهر 6 ساعات حجز :واو:
على العموم لا تسوي شئ احتسبها اجر وخليها على الله ..لو اشتكيت ماحد حيفيدك

[Trapped Inside]

لا حول ولا قوة الا بالله الله يهدي جميع المسلمين

[DSL]

:" hitman ... كمل..

[((دهن عود))]

للاسف هذا الكلام لو كان صحيح فهو صادر من ناس استلموا اوامر ونفذوها بطريقه سيئه فقط
يعني اشهار السلاح هذا ممنوع تماممما فمابالك تنزيل الخلق بالشكل هذا من سياراتهم واعتراضهم بشكل مهين بلا سبب

في كثير من الاحيان لا نعرف السبب الظاهر لنا ونقول كلام جزاف ويمكن الحاصل انه وصلهم تبليغ عن سياره مشبوهه واضطروا يمسكون كل عابر سبيل مشتبه خاصه اذا كان شباب عددهم كبير
والله ستر عليك
احمد ربك جلست تصور في التخشيبه ولا كانت علوم وعلوم

الله ساتر دووووم

[DSL]

خلاص من اليوم ... بصور صورة للأستمارة والرخصة والأحوال ...
(( واذا عرفت ان في الدعوة تفتيش بس .. بعطيهم الأصل البطاقات ))
(( اما اذا كانت الدعوة خرابيط زي الي صار لي )) بعطيهم الصور مب الأصل ..
.. واذا عطيته الصور ...بيقولي وقف على جنب ... يحلفون بوقف والله لأنحاش ..بخلي الصور معه !!

* ملاحظة هذا مع تقفيل الأبواب ...
(( لأن طريقتهم يفتحون الباب ويمسكونك )) .
:غضب:

[SNIPER.COM]

الحمدلله عالسلامه...

زين انك قدرت تمسك اعصابك ولا سببت لنفسك مشاكل..

<====منحاااش :0)
ازين من اللي انحاش واثباته معهم والمشكله قلت لابوي ماصدقني :غضب: قال انت مسوي شوي اكيد :"

حسبي الله عليهم

[DSL]

شباب ترى العضو ... SNIPER.COM كان معنا.. اقصد معنا بالسيارة يوم القفطة ... بس انحاش !!!
:غضب: والله لو اني داري في ذاك الوقت اانه منحاش كان :غضب: قتـ.... لـ...*** :غضب:
على العموم بتجي معي لوادي زبادي علشان نجيب السيارة

[D0WN~T0WN]

خخخخخ ياحليلك والله تخلف امننا

قبل ثلاث ايام صار تجمهر كان فيه تفحيط وانا كنت معهم بس ماامدى امينهم يمسكون ولا واحد

انصحك تروح وادي ميلك شيك باسرع وقت لان سياراتك بتغبر تغبير تحس انهم موقفينها داخل طعس

[MandN]

الرسالة الأصلية كتبت بواسطة سعـــ2002ـــودي
لا حول ولا قوة الا بالله الله يهدي جميع المسلمين

[الهدجان]

بسم الله الرحمن الرحيم

الحمد لله على سلامتك

وما تشوف شر

وان شاء الله ما تكون فوت على نفسك صلاة الفجر في التوقيف

او كان صليت الوتر دامك في وقت اخر ثلث الليل وتستغل وقتك بما انك مظلوم وتاخذ وقتك بالدعاء تدعو الله تعالى بكل ما تتمناه من خير لنفكس وان يبعد الله تعالى عنك كل شر

وتدعو لاهلك ولاخوانك وكل من تحب


ثم اذا كنت مظلوم واردت ان تدعو على ظالمك فافعل دام انك تدعو الله تعالى فلا يقدر احد على ردك

ذلك افضل من ان تفقد اعصابك وتاخذ تدعو على بلدك الرياض بالصواريخ


ويمكن ياخذون عليك قيمة رفع السيارة بالونش جهز فلوسك وانت رايح ...والله اعلم

وما تشوفون شر ان شاء الله