بدر بن عبدالمحسن
أحــبــك
انا احبك مابها زيف وخداع .... رغم الذي نخفيه واللي نخافه
أودعك ليت الالم لحظة اوداع .... والى مضت ننسى الالم والحسافه
أفارقك كان السفر يم واشراع .... وبعد الفراق اللي نحبه تعافه
لا صار مافي البعد راحه لملتاع .... بالله وش نفع التعب والكلافه
من الجفا والصد .. يكفيني اذراع .... لا جف نهر الحب ماتت أضفافه
أي والذي خلا لي عيونك أوساع .... بدونك تصير الارض ضيق وكسافه
املي يدك رمل وترى هذي القاع .... ومدى النظر تدرين وشهي المسافة
وجهك ظلال
آه من لـيـل التجافي ما طولــه .... ليلة العاشـــــــق ثوانيها ليال
مــن يقول الشمس باكر مقبله .... كل شمس مالها وجهك ظلال
بسالك باللي خذى منك الوله .... وحطف أف صدري وأعطاك الجمال
حاكني لجــل الليالي الأولـــه .... آه أنا بمـــــوت من ذل السؤال
هو صحيح أنك حبيبي اللي دله .... واستوى عنده فراقي والوصال
كل جرح غير جرحك بقبله .... وكل ظلمٍ غير ظلمك لي عدال
بحر العيون
تقول اللي طرف عينك انا مدري هدب او عود
احس اني من اللي صابها ماشوف قدامي
همست و قلت لا تخافي على بحرالعيون السود
على شط الكحل مريت و هذا موضع اقدامي
ادور عن ذهب عمري بقايا كنزي المفقود
و اشوف الموج يطوي الموج و يبحر مركب ايامي
عيوني بسمة عيونك ولو صارت مطر و رعود
ابشرب من ضما دمعك و بغسل جرحي الدامي
عطيني عيونك الليله و باكر ياعساه صدود
امانه لا مسحتي الكحل خلي طيف احلامي
أحبك كان يكفي الحب جروحي في هواك شهود
انا اللي راس مالي حلم و هم الدنيا قدامي
من زعــلــك
من زعلك بعيونك السود نظره .... لا شفتها حسيت بالحزن ، بالياس
من زعلك طاحت من الليل قمره .... خلى الطريق من المواعيد والناس
حبيبتي ارجوك في القلب حسره .... كافي زعل اشغلتي الفكر هوجاس
والله لو تدرين هالحب جمره .... بين الضلوع تشب من حر الانفاس
غديت طفلٍ ضايع فيه عبره .... ومحدٍ سأل وش فيه قال لا باس
هذا الهوى الله يكفيني شره .... بعيش باحساس .. وبموت باحساس
تعبت أسافر
تعبت أسافر في عروقي ومليت .... من جلدي اللي لو عصيته غصبني
ياما تجاوزت الجسد و استقليت .... عن الألم .. لا شك جرحي غلبني
أنا سجين الحال .. مهما تسليت .... وأنا الطليق وكل شيٍ قضبني
حريتي لا عل .. ياكود ياليت .... ماشفت حيٍ جاد لي ما سلبني
وليت ياليل التباريح وليت .... أما محاني الحزن و الاكتبني
كل السما في دفتري وان تجليت .... مثل الشموس .. غبار قبري حجبني
لي صاحب وان ما تخلى تخليت .... لابد ما نهدم .. ولا بد نبني
