كيف الحال ؟؟
ياخي مشكلة هالاختبارات ..
لا هي تجي بسرعة ..
و لا هي تروح بسرعة ..
كل شي فيها بطيء و يجيب الهم ..
الا اذا صرت داخل قاعة الامتحان و كانت الاسئلة كثيرة تلقى الوقت يطير :6 ..
لي ساعة جالس افحط في فراشي ..
انطل هنا ..
و اخمس هناك ..
و اجدع على الوسادة ..
لكن النوم موب راضي فيني ..
اخ من عمايل الحب <== امش يا اسماعيل يس :6 <== يسمع بالرومانسية !!
قلت اكيد ان السبب شي من ثلاثة ..
اما انه ما فيني نوم !!
و الا اني لازم اكتب موضوع !!
فطبعا استبعدت الاول لانه واضح ان هالشي موب صحيح ":" ..
و رحت للسبب الثاني ..
الموضوع يقول ..
و احنا بزارين ..
قبل جيل النيدو طبعا ..
كنا اذا اجتمعنا مع البنات ..
نسمعهم يغنون البنات البنات الطف الكائنات ..
و احنا يالاولاد نسوي نبي نقهرهم و نقول ..
البنات البنات اشين الكائنات ..
قبل ما نضيعكم بسواليف التراث ..
نرجع لموضوعنا ..
السؤال يقول البنات هل هم فعلا الطف الكائنات ؟؟
و راح ابين وجهة نظري ..
فاللي تعجبه حياه الله و الي ما تعجبه ياليت يثبت العكس عشان اعرف وشلون اتفاهم معاه ":" ..
الحين البنت ..
مفرطة في احاسيسها ..
يعني كلمة تبكيها و كلمة تضحكها ..
موب احنا يالسطول ..
و الله لو نندبغ من اليوم لبكرة ما عرفنا وش المفروض نسوي ..
لكن ..
البنت لما تزعل ..
وخصوصا لو كان الزعل جرح لمشاعرها سواء بشكل مقصود و الا لا ..
فان الاغنية الطفولية تتحول الى ..
البنات البنات اشرس الكائنات !!
و هالشي طبعا اكتشفته خلال متابعتي لبعض الاخبار ..
مثلا ..
زوجة تذبح زوجها زي الخروف و تقطعه الى 44 قطعة و تضعه في ثلاث اكياس و ترميه في المجاري !!
السبب ..
انها اكتشفت انه ناوي يتزوج عليها !؟
سالفة ثانية ..
زوجة تقطع اكرمكم الله اللي انتم خابرين لزوجها ..
لانه قرر يطلقها !!
لكن ..
هل عمرنا سمعنا عن رجل سوا في مرته كذا ؟؟
عشان الاسباب هذه مثلا ..
يعني الرجال اذا زعل زعل ..
قتلها بدون تقطيع و لا حومان كبد ..
لان قلبه رهيف و يالله يالله يقوى على القتل ..
لكن المراة اذا زعلت وخر عنها !!
تقطع و تفرم و تعجن بعد !!
فبعد هالاخبار و اللي ما اظن انها خبر و الا اثنين لا بالعكس تقريبا اسبوعيا في جريدة الرياض الصفحة القبل الاخيرة يتحفوننا بخبر و الا اثنين عن هالسوالف ..
و خصوصا سالفة تقطيع اكرمكم الله اللي انتم خابرين !!
تقول الدعوة حلا ؟!
ايضا قريت مقال يقول ..
ان الحب بالنسبة للمراة يعتبر الهدف الاساسي لها في هالدنيا ..
يعني الحب ياتي اولا ثم الوظيفة و غيره من الاهداف الثانية ..
مما يؤكد نظريتي و هي ان المراة مفرطة في احاسيسها <== تكفى ياللي مكتشفها :6 ..
بينما الرجل فان هدفه الاول هو تامين وظيفة مناسبة له ..
و الحب بالنسبة له هدف ثاني ..
بعض الاحيان ما يهتم فيه ..
لكنه يجربه من باب انه شي جديد و حاب يشوف وش سالفته ..
و اذا حس انه شاف كل جوانب هالشي الجديد يمكن يمل و يتركه ..
و طبعا لكل قاعدة شواذ ..
و ما في شي ينطبق 100% على الكل ..
لكن محد ينكر ان هالنظرية تحمل شيئا من الصواب ..
عموما الله يحفظ بناتنا من كل شر ..
و ترى ما لنا دبرة بدونهم <== خرها :6 ..
و لا تفهمون من هالموضوع اني ضد حركة الضحك على ذقون المراة ..
لا و الف لا ..
لكني حبيت اشاركم وجهة نظري من جراء خبرتي التي اكتسبتها من قراءتي الدائمة للصفحة القبل الاخيرة من جريدة الرياض ..
و دمتم بالف عافية ..
و عساكم من عواده ..
إن الوحده لا حقدت حقدت والله يكفيك شرها ..
"
..
..
