هل تنصحونني ان اشتري هذا الجهاز؟؟؟

[abd700]

بسم الله الرحمن الرحيم اما بعد
انا من الكويت ويوم امس الموافق 28/6/2003 ذهبت الى السوق وبغيت اشتري كمبيوتر تجميع يعني انا اجمعه واركبه بنفسي وخذيت هذه الأسعار عن القطع الي بركبها وحبيت ان آخذ رايكم بالأسعار وبالقطع فأنا ابي كمبيوتر سريع وسعره مناسب اليكم الأسعار:
proccesor: p4 2.8 = 83 kd
فهل يوجد فرق بين p3.06 و p2.8 قصدي يوجد فرق كبير بالسرعة؟؟؟
vga 128mb ddr =22 kd
للأسف ماعرفت نوعه بس انا انصدمت يوم شفته بهذا السعر وهو ايضا tv out ولكن لسؤال هل تتوقعون يشتغل على جينيرالز؟؟؟
ram 512 = 20 kd
مناسب السعر؟؟؟؟
mother board original intel ddr = 28 kd
هذي المذربورد بس كرت صوت بدون شاشة
h.d 60 gb = 22.5 kd


بغيت اعرف كم اسعار cdrom drive و disk drive و dvd rom???وكم اسعار الشاشات 17 بوصة و19 بوصة؟؟؟

وشباب تعرفون مكان يبيع افلام dvd copy بالكويت غير محل الأمريكي؟؟؟ وبكم اسعارهم؟؟ يعني فيه بدينارين؟؟؟؟

وشكرا

[باهاموث]

الهارديسك لو تاخذ 80GB or 120 GBأفضل

وش اسم كرت الصورة اللي عندك بالكامل حتى ماتشتريه وتتحسف بعدين تأكد من نوعه

[Kasser]

على خبرتي بنتيوم 3 يجي على سرعة 800 ميغاهارتز والبنتيوم 2 يجي 400 وهالحدود

خذ لك بنتيوم 4 اذا تبي سرعة زي كل الناس " سرعة 2000 وكذا "
خذ لك رام على الاقل 256 ميغا , واذا عندك فلوس اكثر ارفعه للـ500 (نسيت كم بالضبط) .

اذا تبي تنعم بالالعاب بكارت قوي وعندك فلوس خذ لك GeForce FX 5900 ULTRA اخر مافي السوق اذا انا مو غلطان بالاسم
وبعد فيه منافس للكارت وهو RADEON 9800 pro وقريبا بينزل 9900 ((فيه نوعين وااحد PRO وواحد عادي والبرو زي مايقولون اسرع وافضل قليل من العادي عشان كذا اغلى))

هادر دسك مو لازم 80 او 120 الا اذا من النوع اللي يحط برامج وايد على الجهاز

وزي ماقال باهموث جيب اسم الكارت اللي لقيته ولاتتحسف بعد ماتشتريه لان الكروت ميب لعبة اذا كل شوي تغير فيهم لان راح يأثر على جهازك كله :واو:

[[c.o.d.e.x]]

abd700

السلام عليكم

أخوي

المعالج ممتاز إذا كان بسرعة الناقل 800FSB إنت ماعليك الا تقول للمحل كم سرعة البص حق البروسسر 533 ولا 800 .. وأنصحك بقوة إنك تآخذ اللي سرعة الناقل حقه 800 يعني إسم المعالج بالكامل Pentium 4 2.8GHz 800fsb .. لكن والله العالم إن سعره مرتفع بحدود 95 - 100 دينار .. حاول تحصل 2.4 بسرعة الناقل 800 .. إن حصلته بحدود هالسعر 65 - 70 دينار خذه بدون تردد (لكن إنتبه ! تأكد إن المذربورد اللي بتآخذها تدعمه .. والموديل اللي بأنصحك فيه يدعم لا تخاف)

وبالنسبة للمذربورد أنصحك بالمذربورد ASUS P4C800 وسعرها بحدود 60 - 80 دينار .. لكن مدمج معاها كرت صوت متقدم ويدعم إلى 6.1 قناة صوتية, ويكفيك إنها من أفضل المذربوردات أداءً بالعالم , إن كانت غالية عندكم فكر بالموديل ASUS P4P800 بحدود 40 - 50 دينار , أو MSI 865PE Neo2 30 - 40 دينار

512MB للرام ممتازة وتأكد إنها DDR400 أو إذا تبي تكلفة أقل خذ لك 256MB وتأكد أيضاً بأنها DDR400 .. الـ DDR400 512MB سعرها بحدود الـ 30 دينار أو خذ لك 256MB DDR400 بحدود 17 دينار .. وتقدر تآخذ باكج يحتوي قطعتين 256 بـ 30 دينار إن طار سعره

الهارد دسك زي ماقال لك الأخ باهاموث .. واضح إنك من هواة الألعاب .. في هذا الوقت اللعبة الواحدة تصل مساحتها إلى 1 جيجا وإنت طالع ..

جينا للأهم كرت الشاشة .. لا يغرك السعر أخوي .. أقدر أجيبلك كرت شاشة 128MB بـ 16 دينار لو تبي بس ما أظمن لك أدائه ولا يشغل لك جينيرالز بعد .. عشان كذا فكر بكرت قوي أول شئ .. بعدين فكر بسعره .. عندك خيارات من الـ ATI Radeon 9500 Pro يتراوح سعره من 50 - 65 دينار .. أو عندك GeForce4 Ti4200 40 - 50 دينار أو GeForceFX 5200 بنفس الأسعار للي قبله

الـ CD-ROM سعره مايتعدى الـ 10 دنانير

الـ CD/RW رايتر سعر نوع ممتاز مايتعدى الـ 20 دينار وهو Lite-ON 52x 24x 52x وقوي جداً بنسخ وفك حمايات الألعاب الأصلية

الـ DVD/R رايتر سعره مرتفع هاليومين ويتراوح بين 80 - 120 دينار على حسب الأنواع

الـ DVD Reader اللي هو مشغل أقراص الدي في دي سعره مايتعدى 16 دينار لأنواع ممتازة

إذا كنت ممن يهتمون بدقة الشاشة وأهميتها لعرض الألعاب بشكل عالي الدقة أنصحك بالموديل ViewSonic 19 بوصة ورقم الموديل هو G90f وسعرها بحدود 80 دينار .. أو الموديل G75f بحدود 55 دينار, إن كانت غالية خذ لك أي شاشة 17 بوصة وتكون قليلة الإشعاع وتعرض بدقة عالية أقصاها 1600x1200 أو 1280x1024 على الأقل

في النهاية أتمنالك التوفيق بالنسبة للجهاز وإعذرني يمكن تكوت الأسعار غير متطابقة عندكم (وحتى عندنا بالسعودية) لكن هذه أسعار تقريبية .. وأتمنى إنك تحصلها بحولي - شارع بن خلدون زي منت عارف (مجمع ولاء) أو اللي مقابله

ولو ماجاز لك شئ من اللي أنا كاتبه سواءً بالسعر أو النوع ؟؟ قوللي وأنا حاضر أعطيك البديل .. علماً إن اللي كتبته لك مواصفات " توب " ومن أفضل الموجود في هذا الوقت .. وأتمنى من بقية الشباب التفاعل مع الموضوع وإنشاءالله راح يفيدونك أكثر مني

تقبل تحياتي

[abd700]

مشكورين وماتقصرون على ردودكم وتفاعلكم معاي وانا ان شاء الله بروح ويه واحد عنده خبره بالكمبيوتر ويعرف بالهسوالف وان شاء الله آخذ من آرائكم وردودكم

وجزاكم الله خير