بسم الله الرحمن الرحيم ..
الهيئة .. اسم لطالما سمعتم به .. ولطالما شمته بعضكم .. ولعنه أكثركم .. وأدى ذلك الى انطباع صورة سيئة عن هؤلاء الأبطال جزاهم الله عنا خير الجزاء في أذهان أكثرنا ..
وانا منهم .. حتى تغيرت الصورة تماما بعد ما حصل .. بعدما أمسكت الهيئة .. بي ..
السلام عليكم ورحمة الله وبركاته .. الصراحة مقدمه ما أدري كيف طلعت مني ساعة وانا ابغى اكتب شي لين جت على بالي .. على كل اكثركم ما يداني اللغة العربية الفصحى وما يندمج
معها تمام لذا وللأسف راح اكتب موضوعي هذا كالعادة باللهجة العامية ..
على كل .. زي ما اسلفت اكثركم ماخذ فكرة شينة عن الهيئة .. وانهم ما يبون الخير لأحد وغالبيتهم خريجي سجون وكلام فاضي .. صراحة انا اقول لراعي ذا الكلام ماله حق .. انا عارف انه
كثير منكم راح يقول عني غلطان لكن صراحة انا حبيت ابين الصورة الحقيقية لهم ..
القصة وما فيها حصلت في آآخر أيام اختبارات الثانوية العامة .. بداية مرحلة العطلة الصيفية .. كنا خمسة شباب .. والشيطان الظاهر كان بيصير سادسنا .. على كل ..
طبعا عارفين الشعب السعودي طالعين فرحانين بعد الاختبارات وهييي خلصنا ثانوية ومعرف ايش .. طلعنا كلنا بسيارة خوينا واللي هي جمس .. ومافي إلا دوران .. للأسف كان معانا واحد
مخه ماش .. وما خلى بنت بالشارع ما غازلها .. عارف اكثركم بيقول طيب وانت يا دراكولا وش سويت .. الصراحة والله انا تضايقت من الموقف بس للأسف كلمته مرة ولا كلمته بعدها ولا
نصحته ولا منعته عن اللي يسويه بالقوة .. عشان كذا عاقبني الله بعدها زي ما راح تشوفون ..
نرجع لحديثنا .. طبعا اتضايقت انا من الموضوع ودقيت على واحد من الشباب هنا بالمنتدى ماذكرت اسمه أخاف ما يبغاني اذكره .. وكنت ابغاه يقابلنا على أساس اني اركب واطلع معاه لأنه
كانت صراحة موصلة معي من الأخ المغازلنجي اللي معي ولنسميه على سبيل المثال "سعد" مع ان هذا ماهو اسمه الحقيقي .. على كل قابلت خوينا اللي بالمنتدى وبعدين طلع الظاهر ماله
خلق لشي في الدنيا فقلت ما احرج الرجال ولا اطلب منه يوصلني وسلمت عليه وشوية دردشة ورجعتا للشلة ومشينا .. ورجع "سعد" يغازل ويعاكس ومبسوط ..
على كل بطريق الملك فهد عند مجمع الفيصلية شاف بنتين الظاهر بس ناقص يكتبون لوحة "تعااااااااااال غااااااازلني الله يخليك" ويعلقونها ويمشون .. طبعا سعد ما صدق .. يا جنز يا
حركات انتي وانتي بعد يا كرز يا مدري ايش ومن الكلام هذا .. شوي والف راسي والا جمس الهيئة .. يا سعد يا غبي انزل "صراحة كان جسمه كله طالع مع الشباك وما بقى الظاهر الا
ابهام رجله باقي في السيارة" .. يا فيصل "اسم رمزي لخوينا اللي كان يسوق" اهرب بسرعة ولا توقف هذولي لو مسكونا ماهوب احسن لنا .. والهرب .. يمين يسار .. الشيطان اضلنا والله
وفق الهيئة وحجروا لنا ومسكونا واقتادونا لمركز الهيئة ..
دارت في رأسي انا وسعد وفيصل والأخويين الباقيين س وَ ص الأفكار المرعبة اللي تنداولها .. الهيئة يسوون شوربة لحوم أدمية باللي يمسكونهم .. الهيئة كانوا الجستابو أول "المخابرات
النازية الألمانية سابقا" .. الهيئة يجلدون بدال الـ100 جلدة 21000 جلدة بعد التخفيف .. الهيئة طالعين استخبارات روسية "KGB" يصفقون الواحد ويعطونه من هالكفوف ويخلعون
اظافره لين ينبسطون ..
شوي والا حولونا لغرفة التوجيه والإرشاد .. والله ثم والله ما قد شفت ناس أرحم من الهيئة هذولي .. السلام عليكم .. كيف الحال .. الله يهديكم والله هذا ماهو تصرف لائق وانت باين عليكم
ناس طيبين وأخلاق .. الله يصلحكم .. انا شاب زيكم واعرف كيف الحركات هذه بس قوو علاقتكم بالله .. ومن الكلام الهادي هذا .. ادب واخلاق واسلوب ..
وبعده جا شيخ ثاني .. يا شباب تبغون موية تبغون شي ؟ .. طيب يلا الله يصلحكم نصلي الظهر ..
وجانا شيخ ثالث بعد الصلاة .. اعطانا كم درس وموعظة .. والله ان اشكالكم ماهي اشكال ناس حقين سوء .. وجيهكم فيه نور ما شاء الله عليكم .. بس الشيطان الظاهر لعب عليكم وعسى
الله أن يصلحكم ويغفر لكم .. وكمل موعظته
وجا شيخ رابع وخامس وكل واحد احسن من اللي قبله .. يذكرك بالآخرة وبالنار وان الشيطان ما نفعك ولو الشيطان ينفع كان نجانا من الهيئة وما مسكونا ..
بعدها كتبنا تعهد بسيط .. طبعا تم تحويل سعد للقسم لأنه مخطيء ولازم يتعاقب .. وسلموا علينا واعطونا كتيبات واشرطة ودعوا لنا بالهداية والتوفيق واعطونا ارقامهم وارقامنا على أمل
اللقاء واللي يقول لو تحتاجون مساعدة قولوا لنا .. تفضلوا تغدوا معنا يوم .. مروا علينا على الاقل تقهوو ان كنتم فاضين ..
ما أنكر انه صحيح لو كان الواحد مثلا باين عليه انه صاحب سوء المفروض يعاقب .. وهم يعاقبون ليش لأ ماهم مخولين من ولاة الأمر ؟ ..
ولا اذا عاقب الواحد منهم رجلا قال الناس عنه انه ظالم وانه ما يفهم .. عمر بن الخطاب رضي الله عن كيف كان يعاقب الخطاة ؟؟ ومع ذلك كان من أعدل الحكام بالعالم ..
اسمع اكثركم يقولون هذا نصاب الهيئة يودون الأحداث والسجن والشرطة ويجلدون .. طيب .. هذا ماهو حق لو حصل ؟؟ ليش تحوج نفسك للشي هذا بعدين تقول ليه يجلدوني ؟
ليش تغازل وتقول ليه الهيئة يورطني مع أبوي ويدق عليهم ويحطني في موقف محرج .. ليه وليه وليه ؟
كيف تفعل المعصية وتستنكر العقاب ؟ .. اذا سويت حاجة غلط فكن رجلا وتحمل اللي بيجيك ولا تقول والله مالهم داعي والحكي الفاضي هذا ..
اذا جلدوك ولا شهروا فيك ولا دقوا على ولي أمرك ولا حولوك لجهة حكومية أو للإمارة .. هذا لأنك أخطأت ولازم تتحمل خطأك ..
يقول لك المثل "طبعا المثل من تأليفي وهو من جعبة الأمثال الغبية اللي عندي اللي بفرد لها موضوع بالمنتدى ان شاء الله" على كل يقول المثل :
اللي يدخل يده بجحر الثعبان لا يقول أح لو انعض ..
وفيه اشكال يجيك الواحد منهم مبسووووووووووووووووووط خلاص بيتشقق .. أنا أديت في اليوم 850 مرة ولا مسكتني الهيئة أبدا ..
طيب يا فالح مبسوط يعني ؟ أول شي انت مسكين لأنه فيه اية تفسيرها ان الله يستر على العبد والعبد يفضح نفسه بنفسه .. وهذا من جد المسكين
ثاني شي على سالفة الديت وما الديت انت عارف الحكم فيها وليتك مستفيد شي إلا انت الخسران .. ماني داخل في الموضوع هذا لأن النقطة هذه يبغالها موضوع كامل
ثالث شي .. وش بتستفيد لو مسكوك الهيئة وقعدت تقشر بصل .. لا تقول انا محترف وما عمرهم الهيئة مسكوني .. يا بابا مهو كل مرة تسلم الجرة ..
افرض ما مسكوك .. وش بيكون موقفك يوم القيامة.. خل الديت والبسطة ينفعونك وقتها ..
الموضوع طويل وعريض وماهو انا بالشخص المؤهل للقيام بهذا النقاش فهناك من هو أعلم واحكم مني ..
ياليت يا شباب من كل واحد قرى الموضوع انه يعلق عليه أو يذكر الصفات الإيجابية اللي يشوفها بالهيئة ويتمنى تتطور والصفات السلبية وكيف طريقة علاجها وبإذن الله أنا راح أوصل مقترحاتكم لمشايخ الهيئة بدون ذكر اسامي طبعا
اسال الله انه يوفقنا واياكم لما يحب ويرضى .. سبحان الله والحمد لله ولا إلا الله والله اكبر والصلاة والسلام على سيدنا محمد صلى الله عليه وسلم
الرجاء الإلتزام بالأدب والإحترام في حال الرد .. والرجاء الإبتعاد عن الردود "مشكور - ما تقصر - موضوع حلو" الموضوع للنقاش وليس للتفاخر
