قصة بنيه لاحقتني لحد الداااير السااابع
أنا عارف أنكم جايين تركضون على وجيهكم بعد ماجبت طاري البنت وعلشان كذا انا ماراح اطول عليكم وابقول لكم السالفه .
هذا اللي يسلمك مرة من المرارير قمت من النوم على العصريه ( العصريه = وقت العصر ) المهم قمت من النوم وأنا ماسكه معي ببسي إلا اشرب ببسي رحت وفتحت الثلاجه ودورت يمين يسار ياولد في الدرج مالقيت شيء طيب سن توب أو سن كولا على الأقل مافيه ( على فكره كرتون الببسي من زود الشفاحه ماياخذ عندنا يومين ) قلت ياولد مابدهاش مالي إلا تموينات الصميدي اللي جنب بيتنا قلت ابروح كعابي اغير جو ( اغير جو في ذا القايله حشا ضب ) المهم قلت ابروح على رجليني منها رياضه ومنها ارجع لياقتي ( منتب عاقل ياإختراق ضاحية الحين ) المهم وأنا ماشي للتموينات وطاق الهواجيس حسيت إن فيه أحد يلاحقني ( امش يالحاسه السادسه ) المهم أنا قلت في نفسي ياولد أخاف التفت يحس فيني لأني بصراحه خفت وانتم عارفين إني شديد الشفافيه قلت ياولد ابلتفت من دون مايحس على بالي إني مادريت عنه والتفت بهدب عيوني ( التفت بهدب عيونه وشلون ماادري ؟؟ نصبه تمشي الف ) يوم التفت ماتتصورون مدى الصدمه اللي صارت لي لقيت ذيك البنت اللي لابسه العبايه المخصرة والعبايه على الكتف المهم أنا من الروعه وزود الحياء هجيت وصرت اركض قلت ماله داعي يطلع واحد من الجيران ويشوفني أنا وذا البنت وتصير سالفه ( وانتم خابرين ربعنا ماشاء الله يبي يقول شفت ولد فلان الله لايوريكم وخذ من هالخرطي ) المهم وأنا صرت اركض وذا البنت وراي بصراحه تعبت ومع الخوف والروعه جيتك مجاوب على وجهي ( مجاوب يعني صفطت على وجهي ) فك الله عيني بس .
المهم أنا بعدها قفلت معي قلت بلا بنت بلا جيران انا مخربها مخربها التفت ابصطرها بذا الكف واقول لها وش تبين انتي الحين ؟؟
( ايه هين تصطرها هات غير ذا الكلام )
المهم يوم التفت تدرون من صارت البنت ؟؟؟؟؟!
اقول ولا ماله داعي
وجع كل ذي شفاحه
خلاص رحمتكم ابقول من هي ؟؟
طلعت لابنت ولايحزنون ( اجل من طلعت يابن اللذين )
طلع الي يلحقني ظلالي ( والله ياأنتم تسحبتم على وجيهكم بس عادي ) مع ذا القايله والشمس جايه على جبهتي بزاويه 45 درجه الظاهر جتني ضربة شمس وضاعت علومي .
طبعاً الواحد منكم يسأل نفسه سؤالين :-
1) وش قصة العبايه اللي على الكتف ؟؟
ابد بس انا كنت لابس ثوب والثوب على الكتف والظلال يعكس الشيء نفسه .
2) وش سالفة العبايه المخصرة ؟؟
الظاهر اني يوم التفت بهدب عيني ( الا مصر على هدب عينه ذا النصاب ) كان فيه هواء وأنا طبعا ممشوق القوام والظاهر بان الخصر وانا حسبتها كذا .
تـبـيـه :-
أنا عارف أنكم حاقدين علي وإني سحبتكم زي ماتسحب ذا الضعيف وفيه بعض الناس المساكين جايين يركضون واللي ماخذ ساعه في مقهى وخلصت الساعه وهو في نص السالفه وراح وخذ ثانيه يبي يشوف وش نهايته بس عادي تصير في أكبر العائلات وياما تسحبت على وجهي وأسألوا ( س 2 ) .
ان بعض الظن إثم ) صدق الله العظيم
