نظرة الناس لمحبي الأنيم

[tooya_girl]

ماتتضايقون لما يشوفكم احد تتابعون أنيم ويقعد يتمصخر عليكم ولا يتحولون محللين نفسين ويستنتجون ماشاءالله ويقولون انك تعيش طفولة متأخرة
كيف تتعامل مع هولاء وهل حصلت معك مثل هذه المواقف؟
انا تصير معي كثير لأني انا الوحيدة من معارفي اللي تهتم بالأنيم وعلى قد ماأحاول افهمهم ماتتغير وجهة نظرهم 12
شاركوا وجاوبوني
وشكرا

[Best Star]

عيل انا العكس....معارفي اللي مثل سني ((او اكبر شوي)) اهم اللي شجعوني اكثر على الانيميشن ^^

[ثمرة]

بالنسبة لي كانت أمي تهزأ بي وبشدة منذ بلغت الثامنة عشرة ، وبقيت على هذه الحال إلى أن أنهيت الجامعة ، وقد ملّت أخيراً خاصة وأن إخوتي جميعاً مثلي يحبون الأنيمي ، وهم أيضاً في الجامعات الآن ، ولا زلنا نشاهد ونشتري الأنيمي الرائع .

[اليسون]

بصراحة انا ادافع بشدة عن الانمي وبصراحة النمي احسن من الخرابيط الثانية
و الكل يقولون لي بصير اسوي انمي لما اكبر وانا عندي كل الي حولي صاروا يحبون الانمي
و يدافعون عنه وعني

[heiji_4ever]

السلام عليكم....
أولاً بغيت أشكرك أختي على هذا الموضوع....
الصراحه أنا الوحيده في البيت تتابع الأنيمي و كل اخواني يضحكون و يستهزئون و يقولون انتي ما كبرتي؟؟ لازم تهتمين بالدراسه " لأن هذي السنه الأخيره لي في المدرسه وبعدين بروح الجامعه " ...وانا ما اصبر عن الانيمي....اذا مر يوم ما شفت فيه انيمي تصيبني حاله من الجنون.......على العموم...ما بطول ومشكوره مره ثانيه...


from:heiji_4ever
from the one who love heiji hattori from her deep heart

[jeanne]

اوووه انا ماقدر اعيش من دون الأنمي اذا فاتتني اي حلقه يخافون الناس يقربون جنبي فما بالكم اذا احد استهزء فيني :vereymad: او في الأنمي يكون اخر يوم في حياته

[ثمرة]

كم أنت مميزة يا jeanne بتعليقك هذا عن حبك للأنيمي ، لقد أعجبني .

[jeanne]

كم أنت مميزة يا jeanne بتعليقك هذا عن حبك للأنيمي ، لقد أعجبني .

احم احم اشكرك اختي ثموره على هذا الأطراء

[tooya_girl]

(عيل انا العكس....معارفي اللي مثل سني ((او اكبر شوي)) اهم اللي شجعوني اكثر على الانيميشن ^^)

عيني عليك باردة

(بالنسبة لي كانت أمي تهزأ بي وبشدة منذ بلغت الثامنة عشرة ، وبقيت على هذه الحال إلى أن أنهيت الجامعة ، وقد ملّت أخيراً خاصة وأن إخوتي جميعاً مثلي يحبون الأنيمي ، وهم أيضاً في الجامعات الآن ، ولا زلنا نشاهد ونشتري الأنيمي الرائع .)

اكثر شخص مسبب لي ازمة امي تشوف اهتمامي بالأنيم تافة اخواتي هم الوحيدين اللي ممكن تعجبهم بعض المسلسلات أم الصديقات وباقي المعارف مستغربون كثيرا من اهتمامي المفاجاء بالأنيم(انا ما بديت اتابع من بداية الأجازة الحالية يعني من 3 شهور) وبدا الأستهزاء خاصة اني من النوع اللي اذا اهتميت بشي اتكلم 24 ساعة عنه
(بصراحة انا ادافع بشدة عن الانمي وبصراحة النمي احسن من الخرابيط الثانية
و الكل يقولون لي بصير اسوي انمي لما اكبر وانا عندي كل الي حولي صاروا يحبون الانمي)
عقبالي
(الصراحه أنا الوحيده في البيت تتابع الأنيمي و كل اخواني يضحكون و يستهزئون و يقولون انتي ما كبرتي؟؟ لازم تهتمين بالدراسه " لأن هذي السنه الأخيره لي في المدرسه وبعدين بروح الجامعه " ...وانا ما اصبر عن الانيمي....اذا مر يوم ما شفت فيه انيمي تصيبني حاله من الجنون.......على العموم...ما بطول ومشكوره مره ثانيه...)

اجل انت ثالث ثانوي مثلي الله يعينا امي بتقفل على النت لما تنتهي الأجازة (على فكرة النت وسيلتي الوحيدة لمشاهدة الأنيم ) يعني بتجن رسمي وشكرا على ردك ونورت الموضوع

(اوووه انا ماقدر اعيش من دون الأنمي اذا فاتتني اي حلقه يخافون الناس يقربون جنبي فما بالكم اذا احد استهزء فيني او في الأنمي يكون اخر يوم في حياته )
لوووووووووووووووووووووووول ياحليلك انا اذا بغيت افتح فمي عشان ادافع يقضون علي ويصير اخر يوم في حياتي
شكرا جميعا على مشاركتكم اللي تونس

[Pan]

ههههههههه...هيه هاذا الموضوع جدا صراحة متكرر..مثلا في المدرسة..

"إنتي عندج عقدة نفسية؟"

"كم عمرج؟"

"والله بس رسم...مب صدق"

و من هاذا الكلام و أكثر بعد..و في بعض من الكلام يكون جارح بعد بس أنا مثل ما يقولون..

طنش تعش تنتعش!

أما بين الأهل صراحة لا في وايد من أهلي مهتمين بالأنمي و هاذا شيء له سلبياته و إيجابياته..

أما في البيت هاذا شيء طبيعي صار يعني أمي تعودت عليهم و بعض الأحيان تناديني "باااااان!"

أو أي اسم ثاني هي تكون ذاكرته!

طبعا الواحد يتضايق من مثل هاذي الأشياء أكيد ما ترضون إن أي حد يتمصخر على الشيء إلي
إنت مهتم فيه..بس لا تحطون في خاطركم ما عليكم منهم! كل واحد عنده إهتماماته!
و إذا هاذا الشيء مب عايبنهم والله عاد هاذي مشكلتهم مب مشكلتنا! :eviltongu


^_^ باااايز!

[ahmed06715]

السلام عليكم......

السنة اللي فاتت كان عندنا واحد بالكلية ... يقول لي ( شو انتو ييهال بعدكم تشوفون هالرسوم ) !!

المهم، اذا واحد تسمع منه هالكلام ، كيف ترد عليه ؟؟؟

أنا الصراحة قطعته بكلامي و خليته يسكت و يضحك ( يغير السالفة ) .. :mad22: .

: هو كان من النوع اللي يسمع ( ياليلا دانه ) و ( حبيبي ) و هالخرابيط ...يبي يتفلسف بعد !!!

وأنا الحمد لله ما أواجه أية مشاكل مع الأهل.....مرة كنت يايب شريط جونكر من عند واحد من الربع
وكنت مشغل الشريط و الأغنية ( جونكر جونكر البطل الجبار ...) ...

وتزامن دخول أمي الغرفة مع الأغنية ، سمعتها و قالت: ( مال أول) !... يمكن تذكرتنا و احنا أطفال نشوف ذلك المسلسل الرائع......

المهم أنا عمري تقريبا 20 واخوي الأكبر عمره 24 وهو الى الآن شغوف بالأنيمي....

___________ اسمحوا لي بطول عليكم شوي ______________

أعرف بعض الشباب الايطاليين و أعمارهم 30 و 31 و 32 و 25 يموتون على الأنيمي ...
و ترى نفس الكلام يحصل معاهم ، واحد منهم قالي مره : أمي تقول لي متى بتترك هالأشياء !! بس طبعا بالايطالي
___________________________________________

أنا متأكد ان اليابانيين يتابعون الأنيمي من ولادتهم لين ما يموتون !

آسف على الاطالة و عاش الأنيمي

أخوكم : أحمد

[orange road]

ما استحمل اي حد يسب الانيمي

على العموم انا مرتاحة لان كل صديقاتي يحبون الانيمي ويجوفونه
وفي من اهلي اللي يحبونه بعد
واللي ما يحبه عندنا يحترم اللي يحبه.. يعني ما يعيب عليه ^^

مرة وحدة من الاهل كانت تتمسخر على الانيمي وانه مال يهال بس
حطيت لها انيمي واستخفت عليه وعلى القصة ومن يومها وهي كله تبي مني انيمي ( تحسفت اني راويتها من البداية.. لو ما كانت جافته وتمت تكرهه احسن لي انا)

مدرستي اليابانية تقول انها تموت على الانيمي (هي اكبر مني بسنة ^^) وان الكبار عندهم في اليابان ما يحبونه ويقولون لهم هاي مال يهال (جوفوا.. نفس اللي عندنا هني)
وان اللي من جيلنا هم اللي يحبونه اما الكبار ما يحبونه الا نادر...

[weiss_girl]

لو انها مش امي مادري شنو كنت بسوي فيها دايما تطنز علي وتفشلني في مجلس الأمهات في المدرسة وتقول جدام المدرسات اني كله مبققه عيني على الرسوم المتحركه من جذي ما اجيب علامات ضعيفه/قصدها مش علامه كامله(يا اخي لازم شرط علامات كامله شنو انا ميزاوا مثلا خير الأمور اوسطها) وبما اني احب الجلوس في البيت واكره الطلعه مالي شغله غير الانيم والانترنت الكل يحسبني اني معقدة نفسيا وانطوائية و مخرفه للحين تشوف كرتون دايما هم كذا وأنا كذا ما اعطيهم وجه كل واحد حر في نفسه اللي يحب يشوف اخبار واللي يحب يشوف كرة قدم واللي يحب يسمع اغاني لذا انا خايفه لو علمت امي اني اصرف فلوسي كلها على الانيم شنو بتعمل :mad22: :vereymad: :smashfrea :hitwithro وفي النهاية انا كذا (هههههه) طبعا اكره احد يحتقر الأنيم لأنه لو كان للأطفال لماذا اذا يتعبون انفسهم من فنانين وكتاب ورسامين وممثلين وغيرهم لماذا لا يقومون بعمل مسلسل توم وجيري مادم الكرتون للأطفال :eviltongu وشكرا لكم

[Yurilin]

وييييه صارت فيني وايد.....

كانت إختي الكبيرة تقول لي: إنتي لما الحين تشوفين الببايات؟؟

عاد آنه حقرتها ....
لأن عندنا بالكويت مثل يقول:الحقران يقطع المصران

عاد كنت أحرها وكانت تعصب وايد ....
وكنت اضحك عليها

[Ralf]

أنا أهلي كلهم يحبون الأنمي حب مهو بطبيعي حتى أبوي بيحب الأنمي وهو لما يسافر برا يشتري أنمي معاه وهو يحب مسلسل Dragon Ball Z حتى عندنا كل أفلامه اللي نزلت

وهذي قصة صارت معي :
دق ولد عمتي وقال لي تعال معنا نلعب كرة قدم في النادي فلت له أوكي بعدين جا الوالد من السفر ومعاه حلقات أنيوشا وقعدت أشوفه وبعدين جاء ولد عمتي قال لي يلا نروح قلت له انا ما ودي أروح قلي أنت طفل صغير تشوف أفلام الكرتون وقام يسب الأنمي وبعدين قام فصل سلك جهاز DVD عد أنا صرت كذا :vereymad: بعدين أنا هجمت عليه وطقيت فيه طق لاصار ولا استوى حتى شرد مني بعدين دق علي وقال والله ما قصدت بس أن ودياك تلعب معنا
يخسي أن أعرف أنه يبي يخليني حارس مرمى لأني أنا ممتاز بحراسة المرمى