صراحة انا شارنها من يوم الخميس اللي فات لكن بسبب بعض الظروف الصحية و امتحانات المدارس (( كل هذا في اسبوع واحد )) قل دخولي للمنتدى و الماسنجر ..
---------------
ما اعرف صراحة ليش المواقع الامريكية عطت هذي التقديرات للعبة .. ؟؟
اللعبة حلوة صدق و انصح انه كل واحد يحب العاب البلاتفورم انه يشتريها ..
تبدا اللعبة بعرض مرسوم بدقة رهيييبة يكون فيه بيلي توه قايم من النوم تسمح صوت شي يسقط من داخل البيت و بعدين يطلع بيلي بسرعة منه و يقابل اصدقاءه في الغابة و يحصل دجاجة مسكينة يحاول غراب انه يضربها فيقوم بيلي و يضرب الغراب و يدافع عن الدجاجة ... و تتابع القصة و تعطي الدجاجة الزي العجيب لبيلي اللي يخليه يتحكم بالبيض و يسوي اشياء عجيبة ..
اسلوب الكاميرا عادي و شبيه بلعبة ماريو سن شاين يعني بتحتاج تعدله في بعض اللحظات .. تختار المراحل عن طريق خريطة و هذا يذكرني وايد بالعاب البلاتفورم القديمة و ذكرياتها ..
في اكثر من خمس عوالم مختلفة كل عالم فيه اكثر من خمس مراحل منفصلةفي المرحلة الاولى في كل منطقة لازم تنقذ كبير الدجاج الخاص بها و بعدين تطلع الشمس على المنطقة و تبدا المراحل الثانية اللي تهزم فيها الوحوش و تلعب الالعاب المضغرة ..
اسلوب تعدد اللاعبين في اللعبة ممتع جدا يوم تلعب مع اربعة لاعبين و يذكرني بشكل كبير بلعبة سيغا الرائعة على الدريمكاست ( اوغا بوغا ) ..
الرسومات في اللعبة هي يمكن نقطة الضعف الوحيدة اللي اعتقد انه سيغا ما ركزت عليها وايد في اللعبة يمكن تلاحظ بعض التباطؤ فيها و بعض التفاصيل السئيئة .. اما الاصوات في اللعبة و الموسيقى بشكل عام فهي حلو واااااااااايد .. هي اكثر شي عجبني .. اغنية اللعبة الرسمية CHANT THIS CHARM اللي تغنيها المغنية اليابانية المميزة Yukari Fresh من افضل اغاني الالعاب عندي حتى الان .. يعني لا تتوقعون اقل من ممتاز ففريق سونيك تيم اعتدنا منه الخبرة في هذا المجال بعد الموسيقات الرائعة اللي قدمها في فانتسي ستار و سونيك و العابه الاخرى ..
لين الحين ما حصلت الا 10 جواهر اعتقد هي تقريبا 60 جوهرة في اللعبة كاملة .. يعني باقيلي واايد .. و ما فتحت العاب الجيم بوي ادفانس و لا حصلت شخصيات سوينك تيم الثاينة ..يعني اللعبة عمرها طويل ..
اكثر الاشياء اللي عجبتني في اللعبة :
- في اداة اسمها ( قبعة السيرك ) تمكنك من ان تدحرج البيضة تحت رجليك حتى تمشي بها في ارجاء المراحل او على الماء .. هذي احلى قبعة عندي حتى الان ..
- تعليقات بيلي الرائعة يوم تبدا المرحلة يقول ليتس غوو بطريقة مبهجة و لو خليته واقف فترة بدون ما تحركه بتسمعه يغني لحن اغنية اللعبة الرسمية (( لا لا لا لا .. لا لالا لالالا )) ..
- بداية اللعبة التدريجية ففي البداية تلقى نصايح في استخدام قدرات المخلوقات لكن في المراحل المتقدمة ما بتعطيك نصائح و لازم تكتشف استخداماتها بنفسك و هذا يكون صعب في بعض الاحيان .
- عروض اللعبة الكارتونية الرئاعة .. حلوة واايد و خاصة عرض البداية اللي يطلع اذا انتظرت مدة في شاشة البداية .
الرسومات : 7
الاصوات : 8
العمر : 9
المتعة : 9
انصح كل محبي العاب البلات فورم بشراء هذي اللعبة .. حلوة واايد ..
(( غلاف السي دي الخاص باغاني اللعبة الرائعة اللي بيباع في اليابان بعد صدور اللعبة )) :
