منذ مبطي كان يدرس معي واحد في الفصل اسمه دليحان وعليه براطم كبار كانها دش في وجهه وكانوا طلاب المدرسه يعيرونه بريطم وما كان يزعل من العياره كان عارف انه لايصح الصحيح
بريطم كان دايم مبتسم ووجهه صافي ( براطمه استقبالها دي جي )
وكان يجلس في اخرالفصل ووجهه للجدار ومعطي ظهره للسبوره والسبب لانه مره كان جالس في اول كرسي في الفصل وكان المدرس يشرح لنا درس على السبوره عطس بريطم وطلع هواء قوي وسمعنا صوت صفقه وضربه الصفقه كانت صوت براطمه يوم تصافقن مع بعض والضربه كانت صوت راس المدرس ضارب السبورة
وكنا في حصه الرياضه نطلع من الفصل نركض فرحانين وبريطم يستحي يركض معنا لان براطمه تصفق اذا ركض
وندخل غرفه التربيه البدنيه ومدرس الرياضه ينادي بريطم ويسدحه على ظهره ويخلينا نطامر ونسوي حركات جمباز على براطمه واذا خلصنا من الجمباز ناخذ كوره وندرعم ملعب القدم بس مانلعب بريطم معنا براطمه تضايقنا داخل الملعب واذا حطيناه حارس مشكله يسد الباب ولا نقدر نسجل اقوال كنا نخليه يقعد ورى الحارس يرد الكوره لاتبعد ( شبكه)
وكانت اداره المدرسه مانعته يصف طابور الصباح معنا لان مرة كنا صافين طابور وبريطم كان واقف اول واحد في الطابور وكنا نتمرن تمارين سويديه مثل العاده قبل ندخل الفصل المهم قال مدرس الرياضه استرح واسترحنا استعد استعدينا الا هنا كان كويس اللي ماهوب كويس يوم قال المدرس للخلف در
دار بريطم ودارت براطمه وقشت طلاب الفصل اللي جنبنا ثاني (ب) وصمخت روسهم بروسنا
نسيت اقولكم ان اهله حالتهم الماديه تعبانه وعايلتهم كبيره ومصاريفهم كثيره بس بريطم كان مكافح في العطله الصيفيه يشتغل عند عمدة حارتهم يقعد جنب العمده متى مابغى العمده يختم يمسك بريطم بشعره ويغط براطمه في الحبر ويختم
ويشتغل في وقت الفراغ مساح كان يركب فوق سطح الفله اوالعماره مع ثلاثة هنود ويملون اثمه اسمنت ويربطونه ثمن يدلدلونه بالحبل من فوق وتدهر براطم بريطم تلييس ومساح وبالقده بس امنعوه البلديه من تالي يقولون ماعنده رخصه ونش مادري وش دخل الونش
وبعدها اشتغل في الطب الشعبي يمرخ ويسوي حجامة ابراطمه بس وقفوه لانه سوى حجامه لواحد شايب مع ظهره شفط يبي يظهر الدم الفاسد بس كانت الشفطه قويه شوي اظهرت كرشه الشايب وصارت مشاكل مع المسيكين وصارت قضيه الشايب كان رافض انه يدفع حق الحجامه وفي الاخير الضعيف بريطم تنازل عن حق الحجامه والشايب هالحين كرشته في ظهره (يستاهل عقوبه ليه مادفع حق الحجامه )
وابوه كان مستفيد من براطم ولده كان يبطح بريطم على بطنه وبراطمه على البلاط ويرفع رجليه ويدور فيه على البيت يلمع البلاط
ومغاسلهم اذا انسدت مايحتاجون لا سباك ولا مسلكات ولا خساير مالها داعي بريطم موجود يحطون براطمه على فتحه المجلى ثمن يرعصون راسه من دجته ثمن يسحبونه من اذانه على فوق على طول تسلك المواسير دوا وحده بوحده
وامه بعد مستغله براطم ولدها بريطم تنظف فيها الدرايش وفي الليل تستعمل براطمه دوشق ( فراش ) تنوم اخوه الصغير عليها
مرة من الامرار كان يفر الانتل فوق بيت الدرج في الدور الثاني اخوة يصارخ يمين شوي وبريطم مايشوف من براطمة يبي يمين اثرة على طرف الجدار وزلت رجلة وجاك محدر طايح من فوق اشوى انه طاح على براطمة وسبرنق رجعتة طاير فوق بيت الدرج لا وفر الانتل يمين وصفت المحطه بعد
مع كل اللي صار له والتعب كان بريطم صابر وشامخ براطمه فوق مايهزك ريح
الموقف اللي ماانساه يوم كنا في المركز الصيفي وكنا طالعين رحلة في باص المدرسه وكان الباص مليان طلاب وبريطم راكب قدام وكان شامخ براطمه فوق مثل العاده وكان سواق الباص مسرع وفجاه طلعت علينا تريله وتصادمنا معها وتقلب الباص وتطايرنا كلنا بس براطم بريطم كانت موجوده انتفخت من الضربه وغطتنا ونزلنا مافينا شي والباص انعدم وصار قوطي وكانت معجزة تكلموا عنها في الاعلام وجميع الفضائيات والمحطات العالميه وجابوا برامج ومقابلات عن براطم بريطم وجات شركات من امريكا وصوروا براطمة وصوروا الباص وصورونا واخذوا عينه من براطمه ورجعوا امريكا ومن بعدها اكتشفوا air bag الوسادة الهوائية للسلامة وعطوا بريطم براءة الأختراع
وهالحين بريطم ربي انعم عليه ولا نسى معروف براطمه فتح لها مغسله سيارات مجانيه سبيل وسماها بريطم لغسيل وتلميع السيارات
منقوول
والله براطم خدمية 
