>> The Return Of Al-Cid <<

[Neo Cid]

السلام عليكم و رحمة الله و بركاته

وايد مندمج بعودة الملك .. ما عليه ما عليه .. حالة و تروح .

كيف أحوالكم أحبائي أعزائي أشقائي أخواني خواتي ربعي أرباعي أنصاصي كلكم ببوكي حبايبي ..

والله اشتقت لكم واجد واجد ( و اشتاقت لي العافية أدري ) ..

يمكن مجموعة قليلة جدا منكم زاروا موضوعي عن الفن الزخرفي و بدايتي بعصر جديد بالرسم الحر ..

ألا و هو عصر اللعب بالألوان .. والله متعة ما يتصورها أحد .. غرامي اللعب بالألوان و تشكيل لون منها..

عالعموم .. المادة وايد مستانس معاها لي درجة اني ما أخلي اسبوع إلا و غايب يوم عنها ..

* الجملة السابقة غير مفهومة .. الرجاء عدم قراءتها مرة أخرى*

احم احم ..

و أشكر كل من نصحني بالموضوع السابق و حقا نصائحكم أقادتني وايد و خلتني على اطلاع واسع بمجال

الفن الزخرفي ..

امتحاني الثاني باجر .. وأول مرة بتاريخ مواد الفنية ندرس كتاب .. كتااااااب .. محد قادر يصدق ان مادتنا

الفنية تدرس بكتب .. الله كريم و ينصرنا على الظالمين ..

حبيت أعرض لكم لوحتي قبل ما أوديها و أبروزها .. حسب اداعاءات المدرس ( هيمو ) انه بيعلق لوحتي

بقسم ادارة المدرسة .. انا ودي اصدق بس قوية قوية ..

المهم .. أنا ببروزها له لوجه الله .. و وين ما يبي يعلقها يعلقها .. لأنها بتجيب الأرف ..

أبي الصراحة و كل صراحة .. امتحان الفاينل العملي بعد اسبوعين ولازم أهيئ نفسي من الحين له ..

أبيكم ما عليكم أمر .. تنتقدون اللوحة بشكل يزيد من مستواي .. ارجوكم ..

مع العلم اللوحة مرسومة بألوان قواش ..

لا تضحكون

و شكرا ..

peace

[g. byte]

وعليكم السلام ورحمة الله وبركاته
أهلا نيو سيد ومرحبا وسهلا ومسهلا ^^
نيو سيد أولا ودي أقول انه لازم تشارك معانا بالمنتدى أكثر وأكثر بقليل لأننا اشتقنا لطلتك في المنتدى والله

بس بخصوص الرسمة اسمحلي , عشان نكون صريحين مع بعض يعني , لأني ما أبغى أخدعك وأقص عليك , لأنك انسان ذويّق واختيارك للألوان دائما موفق ماشاء الله عليك ^^ الرسمة هذي تستحق انها تتعلق على باب المدير ^__- ماادري يمكن ذوقه يختلف عشان كذا مااتحمل المسؤلية من الحين ترى انا شخصيا أعجبتني بساطتها وهدوئها ..
ألوانها هادئة ومريحة , هذه هي الألوان التي أود رؤيتها دوما , و يبدو واضحا أن خلفها ذوق مصمم

شيء واحد لاحظته هو أن شكل جذع النخلة التي على اليسار مختلف عن التي على اليمين , كل شيء متناسق ومنسجم في اللوحة ماعدا هذا الجذع , هل هذا مقصود ؟ ^__^

الله يوفقك يانيو سيد في دراستك وفي الامتحان والرسم الزخرفي ^^

وفي أمان الله .

[alucardracula]

سيد صديقي العزيز:shakehandكيف حالك؟
اشتقنا لك يا أخي..
الألوان حلوة مرة و لو كانت مبسطة الرسمة هي حلوة من هذا الإسلوب..
الله يوقفك في دراستك..
بالتوفيق

[Rex]

ويلكم باك أخ نيو سيد!!
وينك قطعتنا ومالك حس ولا صوت
الحمدلله عالسلامة , ولازم تستمر معانا من ألحين اوكي

بخصوص الرسمه رأي مقارب لما قاله الأخ جيجابايت ,
خاصة ملاحظته عن جذعي النخلة المختلف! أكيد انته متعمد هالشيء , ولازم في سبب...

شيء آخر...
النخلة عاليمين تحسها بعيده... أما اللي عاليسار ما نشوف قاعدتها , يعني قريبه مو؟
يعني المفروض الأقرب يكون حجمها أكبر...
أو يمكن!
تكون النخلة اللي عاليسار منحنيه للداخل!؟
لكن بالحالتين لازم تكون اللي عاليسار أكبر شوي

هاي ملاحظاتي
ان شاء الله كانت مفيده...

[لوجــــــين]

ولكم بااااااااااااك اخوي Neo Cid


يا فنان رسمتك روعه

[Taja]

السلاااااااااااااام
اهلا فيك نيو ولكم باك اهلا بعودتك بعد هالانقطاع

وانا مع ملاحظات جي بايت وريكس ..ولو تزيد شويه بالتفاصيل بتطلع اجمل
الالوان جدا هاديه تذكرني بوقت الظهر .ايام ماكنت بالابتدائي ...ياليت تلك الايام تعود يوما
عجبتني ..ان شاء الله نشوف اعمال اكثر ..وبالتوفيق

[-][HaNa Sun][-]

أهلا" بعودتك أخ نيو سيد

ماشالله عليك اللوحه حلوه ..خصوصا" إستخدمت ألوان القماش ..طريقه يديده

انا اموت على الطبيعه و الوانها ..و رسمتك تستاهل تتعلق في المدرسه

بس لو زدت من الحشيش..بيعطي منظر طبيعي احلى

نبا نشوف اكثر من إبداعاتك

[Neo Cid]

ما توقعت أني بحصل على هالكمية من الردود .. شكرا شكرا ..

g. byte :

يا هلااااااااا بأخوي العزيز جيجا بايت .. المفروض أنا اللي انصحك بزيادة مشاركاتك بالمنتدى مو انت ..

الظاهر احنا الاثنين مقصرين ..

تسلملي والله أخوي .. كلامك وايد شجعني .. و أتمنى أنه يكون انتقاد قبل انه يكون مدح باللوحة ..

ذوقك الأحلى أخوي .. و بالنسبة للجذع .. أنا كنت راسم الجذع اليسار قبل اليمين .. و كانت فكرة الجذع اليمين داخله براسي

أكثر من اليسار .. فقلت ابتعادا عن التكرار ( لأنه يملل بس يعلم الشطار ) .. حبيت أني اخلي كل جذع له شكلة

الخاص .. عرضته على المدرس وما علق على الجذعين .. و هذا يدل على تقبله للفكرة .. ( عاد المدرس لا يحوشك لو الفكرة

مو داشة براسة يخليك تعيد اللوحة من الصفر ) .. و الحمد لله ..

والله يوفقنا جميعا بالامتحانات ان شاء الله .. و شكرا على طلتك الحلوة اخوي .. و ان شاء الله تكون لك زيارات أكثر و أكثر ..

موفق

alucardracula :

its a bird .. no its a plane .. NO .. its alucardracula

هلاااااا بعزيزي وائل .. وين هالغيبات أخوي ..

وصلني خبر من اخوي جيم انك تارك النت للأبد .. و انصدمت اني أكون آخر من يسمع بالكلام هذا .. ما يصير ياخوي ..

اشدعوه ..

المهم .. طلتك هذي تبعث الامل فيني مرة ثانية ..

ذوقك الأحلى اخوي الوكارد .. و شكرا على رأيك باللوحة ..

ان شاء الله أعوضكم بلوحة اقوى بكثير من هذي بعد ما اتقنت و الحمد لله مزج الألوان ..

و الله يوفقك بدنياك أخوي لآخرتك و يوصلك للمستويات اللي تبيها ..

موفق

REFLEX :

حبيبي سعيد .. الله يسلمك من كل شر أخوي .. لا هي ضروف بالاضافة إلى عدم توافر وقت على النت .. وبالاضافة إلى

انشغالي بلعبة فاينل فانتسي 11 ..

لا تطمن أنا تأكدت اني مقصر بحقكم تجاهي وقلت لازم أرد لكم الجميل ..

بالنسبة للاختلاف ذكرته بردي على الاخ جيجا بايت .. و أما البعد .. هذا شي ما فكرت فيه أصلا .. شلون ما يت على بالي .

ملاحظتك حلوة أخوي . بل ممتازة .. أبرزت عيب كبير باللوحة ما يلاحظة إلا الفنانين مثلك ..يا سلام عليك .. صحيح ..

انا ما فكرت بأن النخلة البعيدة بتكون أصغر ولا شي .. مع العلم أني رسمت البعيدة قبل ما ارسم القريبة .. لأ لأ ..

ملاحظتك مفيدة بالتأكيد .. و مشكور ما قصرت .. لا تبخل علينا بردودك الفذة عزيزي ..

موفق

[Neo Cid]

لوجــــــين :

يا هلاااااااااااااا ... ثانكيوشين .. و ولكم باك لج بعد ..

شكرا شكرا ... هذا من ذوقج ..

يا جاطعة .. موفق

Taja :

يا هلااااا فيج أختي تاجا .. ثانكيوشين ..

تبيني أدخل بالتفاصيل أكثر ؟ .. عيل انتي ما شفتي الرسمة بالرصاص .. نصها كانت تفاصيل .. عانيت

من صعوبة تامة بتلوين السعف .. بعدين الاستاذ طلب مني الاستعجال بالرسمة فابتعدت عن التفاصيل ( لأني

ما كنت مخلص من ربع اللوحة و كان باقيلي يوم على انتهاء فترة التسليم ) .. حاليا .. ما فكرت بالتفاصيل اكثر مما افكر

بالدرجات .. و حتى التفاصيل مع ألوان القواش بتكون صعبة شوي .. حتى فرشة رقم 1 ما تقدر ترسم التفاصيل ..

بس ان شاء الله فيه تفاصيل أكثر بالامتحان الأخير .. و شكرا على الرد ..

موفق

-][HaNa Sun][- :

يا هلااااا فيج اختي هانا سون .. و شكرا سوري على الانقطاع ..

انا قلت انج تحبين الرصاص فلازم تحبين هالنوع من اللوحات ..

شكرا على رأيج أختي .. هذا من ذوقج ..

و ان شاء الله المزيد قادم ..

موفق

[Bu Laban]

حيالله نيو سيد .. و يلكم باك .. و بالتوفيق في جميع الإمتحانات .. خلنا نشوفك في المسينجير أوكي ؟

[Neo Cid]

حيالله نيو سيد .. و يلكم باك .. و بالتوفيق في جميع الإمتحانات .. خلنا نشوفك في المسينجير أوكي ؟

الله يسلمك اخوي بو لبن .. long time no see dude ..

اوكيك .. عالمسنجر ان شاء الله .. و الله يوفق الجميع ..