السلام عليكم
لي شهور أحس كأنها سنوات ما كتبت فيها موضوع واحد، كلها كانت ردود بس
بس اللي استوا لي امس يحتاج وقفة وانتباه من المسؤولين في الأمن ورجال المباحث ولكل واحد مهتم بقضايا المعاكسات.
كما تعرفون ، أي شاب يضبط بمعاكسة بنت أو وحدة ما تقرب له بشيء تنشر صورته في الجرايد بتعاون مع دائرة مكافحة السلوكيات المخلة بالآداب بالشرطة، وتكون كارثة لشاب المعاكس ، إذ يخسر ثقة الناس فيه حتى اهله وتكون المصيبة أكبر اذا كان أعزب . هذا القانون مطبق في الإمارات بس ما أعرف اذا كان مطبق في دول الخليج المجاورة كقطر. لكن......
هل من المعقول مع كثرة المعاكسات ان يكون الشاب المواطن هو الضحية دوما مع انتشار الخفيف والقصير بين البنات مع أطنان وأطنان من المساحيق و أحمر الشفاه اللي خلت بعض البنات للأسف كأنهم من المريخ أو مريضات بالجرب أحسن شيء؟؟؟؟
يوم الثلاثاء وتحديدا الساعة 7 بالليل كنت جالس عند المطاعم في الطابق الأخير في العين مول، مستني اختي وبنات عمها اللي يتسوقن في محلات العطور كنت ساعتها أكتب رسالة لواحد من الشباب عن سبب تأخره عن الدفع حق اللابتوب في الكلية يوم الإثنين.
ومن مكان ما دري ويش يكون لكن على ما أعتقد انه من المصعد طلعت مجموعة من البنات المواطنات لابسات عبايات أقل شي ينقال عنها انها قشور البصل لا أكثر. وقبل ما يجون جهة الكراسي كانوا واقفات يتكلمون في شيء بعدين قامت وحدة فيهم اشرت اصبعها ناحيتي.
حسبت انها اشرت على المطعم الوراي (ماكدونالدز) ، لكن حدث الأغرب !!!!
اختاروا طاولة تبعد عن طاولتي بمترين و قعدوا يتكلمون عن الحب والشباب وآخر الأفلام اللي نزلت بصوت عالي ومسموع وفجأة ضحكوا كلهن في وقت واحد تقول كأنه قصفن اسرائيل !!! وحسيت وحدة فيهن كأنها تطالع في.
كنت وقتها مشغول بكتابة الرسايل للربع. وبعد أقل من ربع ساعة سمعت وحدة فيهن تقول :
( شوفي الحليو الماسك الأرنوب!! نفسي اشوفه يلف راسه يهتي)
(صدج متبخترة قالوا عليج!! ليش هاالأنانية !!؟؟ مب وحدج تتأملين فيه)
(يعني مالنا قسمة ونصيب فيه!!!)
وانفجر دوي قنبلة من ضحكتهن، وعرفت اني انا المقصود كيف ولا و و يهي والحمد لله و أعوذ بالله من الكبر ومن شر الحاسدين يقولون عنه أعمامي والأهل كأنه البدر!! أضف إلى ذلك لم يكن أحد قريب منهن سواي حامل الأرنوب( تلفون نوكيا الأزرق 3210)
بس زودنها عن اللزوم يوم قامت وحدة فيهن طلعت قدام الطاولة وقامت الله يقطع ابليسها ترتب شيلتها ويه لويه!!! كنت ناوي أقوم من الطاولة واروح . فاضين فتن على الليل ...لكن الرياح مثل ما يقولون تأتي بما لا تشتهي سفن ووقع شيء ما بيدخل على بال واحد فيكم !!! البنات كان عددهم 5 انضمت لهن بنتين طوال من جهة اليسار وقاموا يحاصرون الطاولة بحركة عجيبة . اول شيء قامت 2 من القاعدات عالطاولة وراحوا على يساري يسلمون على البنات الجدد وقاموا يتسلفون وهن واقفات من مسافة متر تقريبا من الطاولة اللي أنا فيها والثنتين الباقيات تفرقوا حواليني بحيث كانت كل وحدة مسكرة أي جهة أطالع فيها.
الحين المسرحية وصلت نذالتها. اللي قاعدة ترتب شيلتها رمت ورقة على طاولتي وقبلها حاولت انها تكلمني لكني كنت صريح وياها وقلت لها (لو فيش ذرة احترام انقلعي احسن ولا بدق 3 تسعات (الشرطة) عالتلفون وتوريج شو الأدب بالضبط). السافلة ردت باسلوب وقح وقالت (اوكي يا وسيم القفل!! بس بسيب هالورقة ولو كان جاد في اللي تقوله اقراها علشان تعرف نفسك ) وبعدها انصرفت وانصرفت عصابتها وياها و أكيد هي الزعيمة أو البيج بوس حقها.
الحمد لله انه اختي جات هي وبنات عمي بعده متأخرات بوقت طويل وكالعادة كن يتمشين بين المحلات انتم تعرفون طبع الحريم السوق حبيبهم ولا يشبعون منه. كانت هذه المرة الوحيدة اللي فرحت فيها بتأخرهن . شو بيصير لو شفن حركات البنات قدامي!! كانت بتستوي حرب بس ربنا ستر
من هالواقعة حسيت بمدى الظلم الذي يقع على الشباب من اتهام الدراسات الإجتماعية لهم بأنهم هم من يبدأ أولا،
ويمكن ان يكون احد من تنشر صورهم على انه معاكس انما هو ضحية لفئة ماكرة من البنات لا يستهويهن إلا كلمة من شاب حتى لو كانت الكلمة لمصلحتهن
هل نشهد اليوم اللي يغطي الشاب ويهه هربا من مضايقة البنات له !!!
ارجو معرفة أرائكم في الي حصل لي !! وشو بتتصرفون لو وقع حادث مشابه للي صار لي
وشكرا لكم
المشاركة الأصلية كتبت بواسطة Soul Calibur2
Re: واقعة مرة تكشف وبكل وضوح كيد البنات في قضايا المعاكسات
