حرام عليكم يادكاتره ... والله حرام
أنا الحقيقة واحد من الشباب اللي منبطه جبده من بعض الدكاتره اللي يدرسون في كلياتنا واللي يظهر انهم حاطين حيلهم علينا وكانهم ما يبغونا ننجح او نتخرج . فبعض الدكاتره هداهم الله يتفننون في وضع امتحانات تعجيزية وكانهم يبغون يورونا انهم اشطر منا (طبعاً اشطر منا ولاّ كيف خذوا الدكتوراه)
واللي قاهرني ان هالامتحانات ما ينفع معها دراسة لأنها وباختصار ما تمتحنا في الشي اللي درسناه خلال الكورس كله بل انها تمتحن ذكاءنا وكاننا داخلين امتحانات قياس الذكاء .. وعلشان كذا يستوي الدارس مع اللي مو دارس وقت الامتحان لانهم كلهم ماراح يحلون الا اللهم كم سؤال من اسئلة الامتحان.
عجل تصوروا يا جماعةالخير ان في أحد الكورسات رسب عند واحد من الدكاتره 33 طالب من أصل 40 طالب تقدموا للامتحانات ،، يعني 7 بس اللي نجحوا لا وأعلى واحد فيهم تقديره -c .
طيب معقوله إنو كل هال33 طالب اللي ارسبو في المقرر كلهم ما درسوا أو كلهم مايفهمون الماده ؟!!!!
طبعاً لا ولو بحثنا عن السبب راح نلقى ان صعوبة الامتحانات هي السبب وأحب أزيدكم من الشعر بيت إن هم غالبية طلبة الشعب الأخرى اللي يدرسون نفس هالمقرر ارسبوا في الماده أيضاً .
وأنا ما قاعد أتكلم عن هالماده اللي هي فيزيا 2 وبس أنا قاعد اتكلم عن مواد ثانية درسناها في كلية العلوم وكلية الهندسة أحلف بالله الكريم انه الدراسة وحتى المدرس الخصوصي ما ينفع معها وكم من طالب اعرفه حط أحسن المدرسين المشهود لهم بالكفاءة ومسكين سهر هالطالب وواصل الليل بالنهار حتى ينجح في المادة وفي النهاية يرسب بسبب صعوبة الامتحانات.
أعرف واحد يدرس الهندسة في أمريكا ولمن سألته عن طبيعة امتحاناتهم في أمريكا جاوبني علطول وقالي إن امتحاناتهم مباشرة وما فيها لف أو دوران لأنها تقيس مستوى فهمنا للمادة وليس مستوى ذكاءنا مثل ما يسون دكاترتنا هداهم الله. ولمن سمعت كلامه ايقنت انه الدراسة في امريكا احسن مليوون مره من الدراسة في كلياتنا ويقولون ليش خريجين أمريكا احسن من خريجينا بلاه منكم يادكاتره وحرام عليكم والله حرام.
Re: حرام عليكم يادكاتره ... والله حرام
