السلام عليكم ورحمة الله وبركاته ---
اليكم اخوتي في الله قصيدة تناشد الابن الذي ابكى مدامع والدته ونسي ما قدمت يداها وما افضى اليه قلبها وماشغل فكرها ( وهو ابنها ) ---
تذكيييييير لمن له قلب او القى السمع وهو شهيد ---
( واعبدوا الله وبالوالدين احسانا ) -( ووصينا الإنسان بالوالدين احسانا) -
القصيدة حفظكم الله :-
الله يومك صغير لوتذكرها *** كنت اصغر عيالها وأكبر امانيها0
كنك مرية لها لو ماتناظرها *** ما كحلت عينها ولا حنة ايدها 0
مرت عليها ليالي لو ماتصورها *** لو قلت ماقلت ماصورت ماضيها0
وتحملت من همومك في خاطرها *** من وين مارحت ولا جيت مانيها0
من اول الخطوة اللي في تعثرها *** حتى آخر الخطوة اللي تو ماشيها0
تسقيك منها وتلعب في ظفايرها *** الين تروى عروقك من سواقيها0
ونامت الليل صحت لك مشاعرها *** تخاف تحتاجها ولا تنـــــاديها 0
كانت تحطك في يدها مثل اساورها *** ولو لحظة غبت عنها باح خافيها 0
كم لعبة قد شــــرتها وانت تكسرها *** ومرة ثانية ترجع وتشــــريها 0
تقدر على كل شيء بس خاطرها *** مايحتمل دمعة في عين غاليها 0
ماتذكر دروسك اللي ماتذاكرها *** وخوفها وانت وسط البيت ترميها 0
بشرتها بالنجاح وهل ناظرها *** يادمعة للفرح ســـــــيري ورنيها 0
كم ليلة غبت وابطيت ساهرها *** نامت وقامت وخافت من تواليها 0
تجلس وراء الباب وتقلب ستايرها *** وتذوي مثل شمعة بالبيت ناسيها 0
تذوب وتجفف الدمعة على آخرها *** ياخوفي انك على هالحال تنهيها 0
ماهي بحمل السهر حتى تسهرها *** اليوم شابت وحق انك تراعيها 0
ماهو بحق عقب هالعمر تنهرها *** مادام حتى ربك قايل فيـــــــها 0
اخفض لها من جناح الذل واشكرها *** لاتطير عنها وريشك حطة ايديها0
وليا تزوجت خذ بنت تقدرها *** تبر فيها مــــــــثل برك وتـــــــغليها 0
حتى لو الزوجة اخطت دون خاطرها *** وسوت لها حاجة ماهي بترضيها 0
ولا حذفت كلمة تجرح مشاعرها *** او عاملتـــــــها بنفس ماتراعيها 0
حتى لو امك ما قالت وش يكدرها *** عشان خاطرك وشالت جرحها فيها 0
قل يامرة هذي امي في ضمايرها *** شيء ولا ودها تقول وما ليها 0
ولايكدرني الا اللي يكـــــدرها *** ولا يـــعـــنيني الا اللــي يعــنيها 0
وشلون ابي اصبر على اللي مايقدرها *** الله لايخلي ترابي من مواطيها0
وصــــية الله علي ماتـــــــــنكرها *** اول حقوقي حقوقي وثانيها وثالثها 0
والزوجة اللي على المعروف اعاشرها *** إن ماعرفت حقها والله لا اخليها 0
ماني بمن يترك امه مايشـــــاورها *** يتبع رضى زوجته والأم ناسيها 0
وصية قلتــــــــها للي تذكرها ***الوالدة كلمة صـــــــعب معانيــــتها 0
في سلعة الله وخير الناس تاجرها *** يقول له قولة بالحق موفيها 0
ياللي عيونك على الجنة تناظرها *** طلبك غالي ولكن تحت رجليها 0
واعتذر اخوتي الكرام لكتابتها بالعامية ،،، ولكن كماهي في الشريط ( توقيع ) للأخ عبد العزيز الاحمد حفظه الله ---
اختكم في الله 000
