وش أهدافك في الحياة؟

[Arsene Lupin]

سلام عليكم...

الي في بالي موضوخ ضخم جدا... لكن ما أدري وش راح اكتب وش ما راح نكتب... عموما نبدا باسم الله.



كثير منا عندنا أهداف في الحياة... الي يبي يتخرج... و الي يبي يتوظف... و الي يبي يتزوج. تقريبا هذي اغلب الاهداف الموجوده عند شبابنا...

حلو... كلنا نتمنى هالامور... لكن ما تلاحظ علاقه مشتركه في كل هالأهداف الي ذكرتها؟

كلها تعود بالفائده لك انت بس!



دائم نتشكى و نسب في انفسها بسبب التخلف التقنى الموجود عندنا... بدون ما نقدم اي حلول عمليه تغير الحال الي حنا عليه...

ليش ما يكون عندنا هدف حقيقي يرجع لنا بتقنيه او تقدم؟ من اي ناحية من النواحي... ليش اهدافك كلها لنفسك؟

و المشكله انه حتى لو ظهر واحد من الندره الي عندها مثل هالاهداف يتم اغتيال هالهدف بسبب الاحباط الناتج من التشكي الدائم من هالتخلف... فيحب يتناسى هالشي بأي وسيلة ترفيه... سواء فيديو قيمز او جوالات او حتى بنات و مغازل...الخ

و سبب ثاني لندرة مثل هالاهداف هو السخريه من أصحاب هذي الافكار... و احباطهم من قبل انهم حتى يبدون مشروع تحقيق الهدف...

مثال: بعد ما تخرجت من الثانوي... الحمد لله جبت نسبة عالية... الكل كان يتوقع اتخصص طب او حاسب او هندسه... لكن فاجأت الكل بأني قلت أبي اتخصص في الفيزياء!... كنت دايم اقرا نظريات و كتب في الفيزيا فكنت فعلا مهتم فيها...
لكن وش كان ردة فعل الكل؟... طبعا استنكروه بشده... كل كلامهم ان مالها مستقبل وظيفي!.. و حسافه ان النسبه العالية تروح في تخصص عادي مثل الفيزيا... و محد عبر الفائده الكبيره الي ممكن يجيبها عالم فيزيا للبلد...
عموما هذا موضوع كامل ممكن نناقشة في موضوع ثاني... و هو حصر العقول في بعض التخصصات...

الشاهد من هالكلام هو ان الناس تستنكر مثل هالافكار و يحبطونك الين تنساها... و تمشي على الاهداف القديمه الي هي الوظيفه... و هذا الي صار لي طبعا و تخصصت في علوم الحاسب الآلي... و الحمد لله على كل حال.




اوكي الحين عرفنا نوع الأهداف الي نتكلم عنها... و عرفنا سبب ندرتها عندنا... و بعدين؟

الواحد منا يفكر الحمد لله عايشين في رخاء في بلدنا ما فيه شي نحتاجه. وش الهدف الي ممكن اسويه؟

للمره الثانيه نفكر بأنانية... انت عايش برخاء صح... لكن فيه ناس غيرك ممكن يحتاجون اشياء... ليش ما تبحث عن الي يحتاجونه الناس و تطوره... منها يستفيدون منه... و منها تحصل على هدفك و هو الوظيفه.

عشان اوضح الفكره... اعطيكم المثال الي سمعته من واحد من الرجال الي قابلتهم في امريكا... و المثال بصراحه هو الي خلاني افكر بجديه في هالموضوع و مع الوقت صرت افكر اكتب عنه.


المثال هو:

أنا ساكن الحين في مدينة اسمها لورنس... مدينة صغيرة جدا في وسط امريكا...
عندنا سكة حديد بعيده عن المدينه شوي يمر فيها قطار كل ربع ساعه او نص ساعه تقريبا... طوال ال 24 ساعه. نسمع صوته غالبا بين نص الليل الى الفجر... اذا كانت المدينه هدوء... ولا عمره حرك فينا ذرة تفكير...
قال لي هالشخص انه مره كان عند سكة الحديد و انتظر الين يمر القطار... و يوم مر اكتشف انه قطار بضائع مو ركاب... عد المقطورات الي موجوده على القطار... لقا انها لا تقل عن 70 مقطوره!!... تخيل... 70 مقطوره كل نص ساعه... يعني 140 في الساعه... اضربها في 24 عشان نعرف كم مقطوره يتم نقلها في اليوم!!...
تخيل حجم البضاعة الي يتم نقلها في هالقطار البسيط الي جنب مدينة صغيرة جدا في امريكا...

تخيل ان عندنا شبكة سكة حديد لنقل البضائع منتشرة في السعوديه... راح تصير نقله جذريه في وسائل نقل البضائع!
راح نفتك من هالشاحنات الي اعدمت شوارعنا... و راح يكون توصيل البضائع اسرع و ارخص و اسهل...
اذا راعي البضاعه يدفع رواتب عشرين سواق شاحنة بالاضافة الى قيمة العشرين شاحنه نفسها سواء مستأجرها او شاريها... ارخص له بكثيييير انه يدفع قيمة عشرين مقطورة في القطار و تاصله بدون اي مشاكل. و راح تكون البضاعة ارخص بكثير على المستهلك.

السؤال هنا هو: كيف نصنع شبكة سكك حديد مثل هذي؟
الجواب: مثل هالمشاريع الضخمه تحتاج انها تبدا عن طريق مجهودات فرديه... يبدا الشخص بالفكره و تخطيط المشروع... و ادارته بشكل عام... ثم يبدا يبحث عن الي يدعم و الي يطبق.
الي يدعم كثيرين و لله الحمد.
الي يطبق... العماله مهنا اكثر منها... و يكون افضل لو يطبقون ابناء الشعب (هذا موضوع آخر ايضا نحتاج نفتح له موضوع خاص)


النقطه الي ابي اوضحها... ليش ما يكون أنت هذا الشخص الي يبدأ بالفكرة؟...

كيف تبدا؟ ادخل تخصص هندسه و تخطيط... بعد ما تتخرج حضر الماجستير و الدكتوراه عن موضوع قريب من سكك الحديد...

بعد كذا؟

خلاص.. هذا كل شي!... أنت مهيأ انك تبدأ مثل هالمشروع... ممكن تستفيد طبعا من بعض الدروس في الاداره... أو يكون معك فرد آخر متخصص في الاداره.

غير الانجاز الي راح تسويه بهالمشروع... راح تجد لذه خياليه اثناء اداء المشروع... و اخلص النية لله في أدائك للمشروع... و تخيل الأجر الي يجيك بعد انجازه!

[Arsene Lupin]

عموما سكك الحديد هذا مجرد مثال للانجازات الي ممكن تسويها في البلد. في غيرها كثيييييير بس حنا يبيلنا نفكر شوي بس...

عندكم جامعة الملك سعود من أهم الأمثله... وضعها مأساوي... تحتاج تغيير جذري... كيف ممكن تكون هالتغييرات؟
مو لازم بعد يكون التغيير و التطوير في شي تقني... ممكن يكون اجتماعي... وش الاشياء الي ممكن تعدلها اجتماعيا؟...
الواسطه؟ ...
الترف الزايد؟... بمعنى الاهتمام الطاغي بالوناسه على الفائده... لدرجة ان حياة الواحد كلها وناسه
ندرة القراءه؟
الانحلال؟
... الخ



عموما نقطه اخيره بالنسبه للتغييرات الاجتماعيه. اذا تبي تغير اي شي غير في نفسك و الي حولك من اهل و اصحاب... مثل الواسطه... اذا تبيها تنمحي امحها من نفسك اول... لا تقبل بأي شي اذا كان واسطه... سواء تخصص او وظيفه او غيرها... حاول تجيبها بتعبك انت. بعد ما تسوي هالشي حاول توصل كرهك للواسطه في البلد لغيرك... و كيف تضعف الكفاءه لأن الواسطه تخلي الواحد ياخذ منصب موب قده... و تصير نوعا ما تتقرف من خويك اذا جاك و خشته كذا >>> و يقول انه دخل الجامعه الفلانيه و هو مغمض لأن ابوه يعرف العميد.




و في الختام:

أظن الفكرة وضحت من الموضوع بشكل عام... و هو اننا نهتم بحياتنا أكثر و نستفيد من هالوقت الخيالي الي نضيعه في الدجه... و نحاول نوجه حياتنا لهدف معين نقدر نغير منه في أمتنا... و حتى لك انت نفسك في حياتك والله تحس بتغيير و لذه في حياتك... دايم نتشكى من الملل و الطفش... حياتنا كلها انترنت و سهر و نوم... و دوام نص يوم ثم طلعة شباب.. ثم انترنت ثم نوم...الخ
حاول تغير في نمط حياتك... عود نفسك انك تسوي انجازات ولو بسيطه... جرب مره تشتري كتاب مهتم فيه و اجلس اقراه كله... لا تحس انك تغصب نفسك... لكن حاول تجيب كتاب يشدك عشان تسهل قراءته...
جرب تتعلم تصميم مواقع و صمم موقع...
جرب تنتبه لصحتك و تترك أكل الفاست فود لمدة شهر!...
جرب تفكك كمبيوتر و ناظر الي جواه قطعه قطعه و ركبه ثانيه!...
جرب اسبوع تصير تنام بعد صلاة العشا و تقوم على الفجر...
جرب ما تتضايق او تتهاوش مع احد من اخوانك مدة اسبوع...
جرب و جرب و جرب...

كل هالاشياء تعودك على انك تسوي انجازات بسيطه... ممكن واحد او اثنين منها ينجحون و تستمتر عليه دايم و تصير غيرت شي مهم في حياتك...




شكل الموضوع طال بزياده...

اهم شي وصول الفكرة...

آسف ان الموضوع صاير حوسه... ما كنت مرتب ابد لفكرة كتابته... مجرد افكار ترد في بالي و اكتبها...

ادعي الله من قلبي انها تأثر على قلب او تفكير احد و يستفيد ولو بشي بسيط منها...

و اترك لكم التعليق او الزياده في الموضوع... او النقاش على اي نقطه فيه




سلام عليكم... و اسف على الاطاله

[The Noble]

موضوع جميل وحلو ..

والحقيقة أنا اقتنعت بكلامك وخلاص من اليوم ببدأ بشوية تغيرات أهمها اني بغير جوالي ..

لا امزح والله أولا ولكم باك ..

ثاني شي اللي قلته والله مضبوط .. لكن صعب انك تقيس الحياة التي تشوفها بمكان على الحياة اللي نعيشها حنا العرب ..

في الدول الغربية اذا أحد قدم فكرة ولو كانت غريبة تلقاهم مهتمين فيها سواء من مسؤولين أو أفراد أما عندنا -__-

ولا تنسى هالأمور بحاجة لتعاون .. مجهود فردي هالأيام صعب تحقق من وراه شي مفيد الا بما ندر واذا طلبت العون تلقى قدامك الف عائق وعائق..

بالنسبة لحكاية التجارب فالحقيقة أنا احب أجرب دايما اشياء جديدة وودي أجرب أشياء أكثر وأكثر لأن بالتجربة يزيد عداد الخبرة <== حلوة عداد

والخبرة اذا زادت قللت من حدوث الأخطاء والهفوات ..

نقطة ثانية انت تكلمت عن الوقت اللي نضيعه في حياتنا .. لكن الصراحة موب الكل مضيع وقته أنا الصراحة ناقصني وقت ابي وقت لو يبيعونه كنت شريت لي كم ساعة زيادة .. وبالذات هالأيام ..

في الجامعة اذا طلبوا بحث يعطوك مهلة بسيطة حتى تنجزه وهو بحث يبيله ايام.. يعني أنا استغرق بكل بحث بما لا يقل عن اسبوع كامل حتى أنال الدرجة اللي ترضيني .. وثانيا حاليا عندي وظيفة بسيطة اطلع فيها مصروفي .. يعني وقتي مليان على الآخر والسبب عدم التنظيم .. موب مني بشكل كامل لكن حتى من اللي حولي من الآوادم سواء الدكاترة في الجامعة أو الزملاء أو غيرهم ..

يعني الدعوة كلها حوسة .. ولا تنسى العوائق الثانية (ولا تستهين فيها) يعني اذا جيت الظهرية من الوظيفة ومن زحمة السير ...الخ والحر اللي يحرق الأبيض واليابس .. ارجع البيت مهدود الحيل يا دوب أتغدى وارقد ثم يجي العصر واصحى وأصلي وأرجع الوظيفة..

حنا العرب مخنا تصلب من هالروتين البايخ والممل ..

حاولت القى طريقة تخليني أوفر شوية وقت من خلاله اقدر أبدع بالشي اللي أبغاه .. لكن -__-

حياتنا زي ما قلت نصها ضايع على لا شيء .. حتى احيانا يضيع يوم كامل عليك وانت تنتظر دورك في أحد الدوائر الحكومية أو غيرها .. يعني الإبداع عندنا صار شوي صعب ..

والتغير صعب يجي من الفرد نفسه مهما حاول انه يغير ويجرب حيرجع للنقطة اللي بدأ منها لأن اللي حوله توهم على ما هم عليه من التخلف ..

ثانكس على الموضوع ..

[Kubaj]

جرب اسبوع تصير تنام بعد صلاة العشا و تقوم على الفجر

بصراحة تقوم وانت مرتاح ونشيط وودك تروح تدرس !

انا جربت النوم من بعد العشا لمدة اسبوعين وناسة وتصير تهتم بالوقت اكثر من اول . .

الله يبارك فيك موضوع يحسس الواحد بالوقت اللي جالسين نضيعه..

[Lena]

واو..


كلام روعة ومن قلب.. وبالعكس ليش تعتذر احس فهمته واحسه مرتب.


همممم مدري وش اقول.. فعلا انت الصادق.. الظاهر خلاص صار الكسل , الخمول ,الروتين المتكرر ,العقل المنحصر في اشياء ولا يتعداها ,, هالاشياء صارت تمشي بعروقنا للاسف


من جد لما اعيد سنوات عمري.. ماذكر اني سويت شي مهم ومفيد جدا " ما عدا بعض الاعمال الفنيه والتصميمة الي افادت اهلي في اغراض معينه" ولا اظني بعد فكرت بعمق اني اسوي شي مستقبلي


واعترف اني كل مافكرت بشي فكرت زياده على انه مفيد بالمردود المادي الي بيجيبه ._. بصراحه

مثلا لكوني احب البرمجه..دايم كنت افكر اسوي برامح كبيره ومفيده بعدين اذا تخرجت تصير عربيه ومبسطه للعرب يفهمونها واكسب منها..او اصير بعدين اكتب برامح وساعد طلاب البرمجه...واستفيد منهم وافيدهم... ومرة تخيلت اني اشترك بشركه تصميم دعائية كبيره ..
بس لاحظ كل هالاشياء مب زي ما قلت مفيده فائده عظيمة صح؟



ودايم اقعد افكر ثم ازهق من التفكير واقول ايه بس انت تخرجي واقعدي ببيتك احسن <== تحطيم ذاتي.-.


مدري وش الزين وتقدر تخططه البنت؟

بصراحه مع نسبتي العاليه وقدراتي الحمدلله اقدر اسوي شي الظاهر "باذن الله"..
بس داخلي مدري ليه رغبه دايم وهدف واحد اني اتزوج وانجب عيال واربي عيال "صالحين" و ارعى زوجي واعينه في دنياه.. هذا هدفي "ادري انه مب بروعه الي وصفتهم بس مدري ليه القى نفسي مركزه فيه هو بس مع اني لي نسبه عاليه وقدرات"..مدري اذا ذا غلط ولا صح..وهل يكفيني؟ لان الله خلق المراه ووعدها انها اذا رعت زوجها بالجنة؟.. ولا يعتبر اني حاطه حدود لقدراتي؟؟





مشالله اختي..ومرت اخوي..سووا مع بعض مشروع صغير "بس عالاقل سووا" اعدوا كتاب طبخ كبير مرة وباعوه ووزعوه وانتشر في الممكله ! والله بس مب بشكل خيالي... وبنات كثثييييير مرة استفادوا وفيه بنات ما يعرفون يطبخون حبوا الطبخ معاه..واختي ومرت اخوي كسبوا ماديا.. احس كذا حلو مع انه مثال مبسط....زي كذا يعجبني وودي اسوي مثلهم بس مجال اخر انا بارعه فيه



بالنسبه لنصايحك الاخيره...روعة!!
من جد تغيير نمط الحايه يعيطك تفاؤل وشي حلو..
الاكل الصحي ..الرياضه..الاجتهاد في الدروس.. تغيير الاخلاق والتعامل للافضل..الاتصال بوالدينك واهلك اكثر والتقرب لهم.. ممارسه شي جديد لم تتعود عليه
بالنسبه لي حسيت بفرق خيالي واحس حبيت عيشتي مع هالاشياء.. وللحين ولله الحمد ماجتني لحظه اقول اف زهق حياة متكرره.. لاني قادره استغل كل لحظه.. انشالله




بالنسبه لفكره عالم الفيزياء..احس فيك..
ممكن الي يحبونك قالوا لك كذا عشان خايفين عليك من الrisk الي فيها.. لانه مجال قليل داخلينه ومب مضمون وهم يبغون لك حياة مستقره ومضمونه..ولا قدروا يحسون برغبتك الشديده لتكون شي مميز ومفيد..




finally
! we are so proud that we have -at least- someone like u thinking like that


وسوري عالاطالة....(#^^,#)

[Trapped Inside]

عليكم السلام^^..

موضوع تحفه..من رغن انه تكرر علينا مئات المرات..

صدقك يوم قلت "الكل كان يتوقع اتخصص طب او حاسب او هندسه"..هذي الثلاث مهن هي اهم الاشياء بالنسبه للشاب السعودي ذي الايام...يعني انا ابوي يقولي محمد ترا منيب جايبلك سياره الا اذا دخلت الطب ولا الهندسه..
هو صحيح ابوي يقولي اقرا كتب وحاول انك تنمي قدراتك بالرياضيات والفيزياء>>>>كان يحبهم..
بس يظل اهم شي المهنه وهي احدى الثلاثه الي ذكرتها..

وبالنسبه الى الابداع والافكار..انا برايي ان هنا عندنا صعبه الواحد يبدع بشي او بفكره او باختراع..ليش..لاننا عندنا هنا الشاب اذا كان بعمر ما بين 6-15 لازم يصير مع ابوه يروح ويجي معه..يودي اهله ويجيبهم(مو شرط بالسياره)..يقعد مع الرجال ما يروح يمين ويسار...وهذا العمر بالذات هو العمر الي تطلع فيه مواهب الناس..يعني الحين اغلب الرسامين والمبدعين بالفن كانت عندهم الموهبه من يوم هم صغار..واهلهم يساعدونهم على تنمية هذي الموهبه..اما عندنا لو ابوك يشوفك ترسم يقول "وش قاعد تسوي انت..الي يشوفك الحين يقول بتطلع خليفة ديفنشي قم بس جبلي جرايد"..يعني صعبه الواحد ينمي قدراته وهو صغير..وكما قلت هذه الفتره العمريه للشخص هي اهم فتره لموهبة الشخص..
طبعا الكلام الي فوق مو لكل الناس يعني انا مثلا ما كنت مشغول كذا بوقتي..بس حتى ولو قليل راح تشوفهم يساندونك بهوايتك او موهبتك..بس كثير عندنا بالسعوديه عيشتهم كذا..خاصة البدو..وهم يعتبرون نسبة كبيره من شعبنا...
وبالنسبه للوقت...فالاشخاص الي مثلي يمديه يسوي اشياء كثير الحين...يقدر يقرا ويتعلم ويستفيد..بس من حولك..يعني انا يومي بكل اختصار اجي من المدرسه على النت..بعد العصر على النت...المغرب فديو جيمز..بعد العشاء النت وبعدين اناظر فلم وانام..اغلب ايامي هذي السنه كانت كذا...حتى بايام الاختبارات..الحمدلله بس الاختبارات الشهري عدت على خير وجبت ممتاز...
المهم مثل ما كنت اقول كثير مثلي كذا...بس للاسف خلاص ما يصير يبي يتعلم ويتثقف(الا نسبة قليله) كلي الي نبيه الحين الدجه والمهايط هذا الي فالحين فيه...يعني بالمدرسه بصراحه ما اشوف الا الاجانب هم الي يهتمون بالتعلم من جد..ونسبة قلييييييله جدا من ابناء وطننا يهتمون بهذا الشي..

على كل انا ان شاء الله بحاول ارجع مثل اول (مهتم بالرياضيات) والفيزياء...لاني انا كنت اموت بالمسائل الحسابيه والمعادلات..وان شاء الله ابقرا كتب...لعل وعسى

مشكور ارسن على الموضوع^_^.

[ثريول]

السلام عليكم ورحمة الله , كيف حالك أخوي ارسين ..

صراحة موضوع يتحدث عن فكرة مهمة ودايم أكلم نفسي عنها , أولاً الطموح ..
المشكلة ياعزيزي بوجهة نظري هي في محدوية الطموح , ولايتعدى أرنبة أنف البعض .. بل حتى لا توجد له أي تصورات "بتاتاً" لحاله بعد سنة أو سنتين فقط ! . لكن ليش ما يحط طموحه على "التوب" الممكن .. فالموظف في الشركة يصل طموحه إلى عتبات باب المدير العام , والمدير العام يطلق نظراته على كرسي الوزير ..وهذا الطموح يؤدي إلى الإنتاج وهو المطلوب .

عن نفسي كنت ومازلت حاط أمامي طموح ممكن يكون ضخم و عملاق .. ودايم أحاول أوصل له وأسم الطريق له .... الله يعين ! .


وفيه نقطة مهمة أعتقد أنها الـ"إختلاف" بيننا وبين الغرب بشكل عام .. وهو ((التخصص)) ! , فهم كالآلات "يعيشون ليعملون" وليس "يعملون ليعيشون" كما هو هنا .. ومعرفته ماتتجاوز كثيراً تخصصه , فهو العالم الهمام في تخصصه , والساذج الأحمق في غيره بشكل عام .. روح مثلاً للدول المتطورة عموماً , تلقاة مهيأ "أوتوماتيكياً" لتخصص من يوم ولادته .. ثم يصادق هو على هذا المخطط إن أراد , وهذه الطريقة هي اللي أستعملوها اليابانيين في نهضتهم عقب الحرب العالمية , وتشوفون مدى نجاحها .. ..

فهم (يعرفون كل شيء في شيء محدد) ونحن (نعرف شياً في كل شيء) وكلها للأسف معرفة نظرية .. والعملي مفيش !, لكن الأفضل لنا أن نكون (نعرف كل شيء في شيء محدد وشيء في كل شيءٍ آخر ! ) .

تحياتي وفائق إحترامي .. ثريول.

[Lena]

فهم (يعرفون كل شيء في شيء محدد) ونحن (نعرف شياً في كل شيء) وكلها للأسف معرفة نظرية .. والعملي مفيش !, لكن الأفضل لنا أن نكون (نعرف كل شيء في شيء محدد وشيء في كل شيءٍ آخر ! ) .

بالضبط ..
احسه عامل كبير في فشلنا العقلي

[alex]

بالنسبه لحياتك اليوميه .. تقدر تغيرها على كيفك ..


اما بالنسبه للمجتمع .. انسى هالشي .. لأنه ما يجي ولا 10% منهم يفكرون بجديه مثلك ..


وبعدين الدوله ما تعطيك .. الدعوه كلها واسطات وسرقات فلوس .. حتى لو بتسوي مشروع بسيط يبيلك واسطه ...


كل شي عندنا يمشي حسب علاقاتك الاجتماعيه مع الكبار ...


ياخي تخيل .. 0.28% من ميزانية جامعة الملك سعود تروح للبحث العلمي .. تخيل .. اقل من نص بالميه .. الباقي وين يروح طيب .. الجامعه هي نفسها ما تغير فيها شي من مليون سنه .. مو معقوله كل الميزانيه رواتب ومكافآت

تدري انه في الطب عندنا الدكاتره متقاطين وشارين بروجيكترات ولاب توبس علشان الشرح -__- ...

[Lucky guy]

صراحة كل كلمة كتبتها صادق فيها يا أخي العزيز ..

بس في نقطة نسيتها أن الموهوب أو المفكر العربي نلاحظ أنه ما يقعد في وطنه يهاجر الى البلاد الغرب ويفيدهم بأختراعته أو بفنه أو بأكتشافاته و أذا سالته قاللك أن شعبي متخلف ولا يعرف شيء وأني وأني وأني ... الخ يعني شيء يرفع الضغط أنه ما يفيد بلاده بشيء ويفيد بلاد الغرب لانه مستانس هناك ومأخذ حريته ونسى وطنه ..

ومشكور على الموضوع -____- ..

[Argandir]

كلامك صحيح بس السؤال هل البيئة الي نحن عايشين فيها تساعد؟؟؟

انا مرت في نفس الشي الي مريت فيه...بعد الثانوي كان امنيتي (وما زالت) اني اشتغل في التصمم الفتغرافي

بس اش كانت ردت فعل اهلي؟؟؟

هذي خرابيط وكلام فاضي...وين راح تشتغل بعد ماتخلص؟...خل عنك الاحلام وعيش الواقع...الخ

وغيري وغيرك كثير...يعني تتوقع د.احمد الزويل لو استمر في مصر راح يحقق الانجاز العلمي الي قام به في امريكا؟؟؟

واعطيك مثال اخر الدكتور حمد ال تميم اخترع جهاز لمساعدت مرضى البواسير (وانتم بكرامة) جته عروض من امريكا لكنه رفض واستمر في السعودية
هل حصل اختراعه على اي اهتمام؟؟؟
يمكن في البداية اهتمام بسيط من احد المسئولين...لكن هل استمر الوضع كذا؟؟


البيئة و الوضع الى نحن عايشين فيه تجبرنى على الانانية وان الشخص يفكر في مصيره ومصير اهله

وعلينى ان نتقبل هذه الحياة ونعيشها بافضل طريقة ممكنة...

[Lezard Valeth]

تسلم اخوي على الموضوع والله يعطيك العافية .. وفعلا كلامك كله عبر وصحة اخوي .. وانا الحمدلله افكر بنفس طريقتك .. وضع الهدف هو اهم شي في حياتك .. لازم تعيش لسبب راقي ويكون لصالح الجميع وليس لنفسك .. وبهذا انت تسوي كل شي لنفسك ولربك وانت ما تحس .. كان ودي اطول في الكلام لكن مظطر اختصره وقتي قليل ..

انا اخوي الله يسلمك طبعا شفت انا شنو في مقدرتي وشفت شنو اقدر اسويه .. وقررت من زمن ان اسخر حياتي للآخرين والحمدلله .. انا مخطط ادرس الادب الانجليزي وعلم النفس في الخارج وفي امريكا تحديدا .. وانا اخوي الحمدلله قوي في الانجليزي لاني تعلمت في مدرسة امريكية .. هدفي باذن الله هو بعد ما ادرس هذا كله واتفرع بكل جهودي الي انا املكها غير الدراسة .. اني ابتدي احسن صورة الاسلام هناك .. راح احاول اغير فكرة انه الاسلام ارهاب وهذا هدف من اهدافي .. غيرها مساعدة المسلمين جميعا على حل مشاكلهم في جميع المجالات وهذا سيتم عن طريق علم النفس ان شاء الله .. وساحاول اني دائما اخترع ما هو مفيد لهم في كل شي ان شاء الله .. والله يعيني والله الموفق والمقدر ان شاء الله ^_^ ..

اشكرك اخوي على هذا الموضوع مرة اخرى .. وادعوا الله تعالى ان يهدي جميع اخواننا الى هذا التفكير ..

والسلام عليكم

[Tidus]

روعه!!

شي فعلا يفرح... موضوعك بالعكس اتوقع باسلوبك قدرت توصل الفكره بشكل وافي ^^ و الكل شاكرلك و الله.

بعد قرايتي لكلامك كانت لي نظرة لذاتي... مثل ما نظر الكل لنفسه بعد قرايته هالكلام يعني فعلا حتى صرت مو عارف لو اهتماماتي و الكتب اللي اقراها تصنف للمصلحه الشخصيه و الا العامه...

عن القراية... و لله الحمد نصيبي فيها كبير
يعني انا انسان ماني قادر اقعد على بعضي الا بيدي كتاب تعليم لغة... اي لغة من لغات العالم المهمه و ما ارتاح الا لما يكون الكتاب قوي و يعتمد عليه و يركز على ال Grammer... و فعلا يعني أعاني مرات يعني حتى افضل هالكتب على الكتب اللي تهمني و ادرسها بدراستي... يااااااما كان علي كويز او شي و انا قاضب هالكتب و مو بس لغات... اي شي عن الفلك انا ما اخليه يعدي... و كل ما لذت و طابت قراءته

و نظرة على هواياتي... ما لقيت الا الرسم @@
شغلي الشاغل هالايام قصة... مو قصيره... و المشكله و لا بسيطه >_<... تتبلور براسي و مابي اطلعها مجرد قصة... ابيها مانجا او قصة مصوره يعني تكون مدعومة برسوم من مجهودي تجسد المشاهد... و مو توني بادي انا الحين بنص الدرب و مستمر و خلصت منها كذا آرك

قعدت اقلب نفسي يمين... يسار... غير هالاشياء و اي شي يخص هندسة الكمبيوتر فانا خالي منه. و انشاء الله نوصل للي نطمح له ^__________^

ثاني شي اللي قلته والله مضبوط .. لكن صعب انك تقيس الحياة التي تشوفها بمكان على الحياة اللي نعيشها حنا العرب ..

همممم مدري وش اقول.. فعلا انت الصادق.. الظاهر خلاص صار الكسل , الخمول ,الروتين المتكرر ,العقل المنحصر في اشياء ولا يتعداها ,, هالاشياء صارت تمشي بعروقنا للاسف

تصدقون يا لينا و بوب انا ما قد شفت سبب لانحطاط العرب غير هالكلام... و كنت اتمنى لو ارسن ضاف نصيحه من النصايح اللي قالها بالاخير... و قال : لا تقولون حنا العرب... و هم الغرب

جد الواحد من يسمع هالكلام كل ذرة حماس فيه تلقاها تموت _-_ يعني الحقيقة "حنا البشر" قادرين نسوي... و المهم ان الواحد يسوي اللي عليه... حزتها ما اظن بيلقى الشي اللي ما راح يسره... لانه مجرد كونه انجز هالشغله هالشي يسر

و معليش لو طولنا بالكلام... و على فكرة... لطالما كنت اقول... للاعضاء نظرة ، و يبقى لعضو بالمنتدى نظرة غير ، ارسين لوبين

و سلام ^^

[Arsene Lupin]

آسف على التأخير في الرد لكن كل مره أشوف الردود أقول متى ما لقيت وقت انشالله أرد

فلقيت أحسن شي أبرد على الي اقدر عليه الحين.. ثم أكمل الردود بعدين انشالله...

و قبل كل شي أشكركم على التفاعل مع الموضوع... و أحرجتم تواضع شخصي الكريم




بوب:

خخخخخخخ حلوه سالفة الجوال... و صراحه هذي ذكرتني بشي مهم دايم نسويه عند الكآبه. و هو الإشتراء... لأن الانسان عند الرغبه في التغيير و انه يسوي شي في حياته... فدايم أول شي يروح في باله هو شراء شي مهم... لأنه أسرع وسيله. فيشتري جوال أو كمبيوتر أو سياره...الخ...

فياليت الواحد يعود نفسه انه مو لازم يدفع شي عشان يغير... جرب مجرد انك تسوي شي جديد غير روتينك اليومي... فكر في أغرب شي ممكن يستغربونه أهلك عليك (وما فيه تحريم شرعي طبعا) و سوه.



نقطه ثانيه: مثل ما قال أحد الاخوان ان الكلام "حنا العرب ما راح نقدر نسوي شي لأن ما فيه أحد معك" هو الي يخلي الواحد يبطل من البدايه... فأتمنى من كل قلبي اننا ننسى هالكلمه.. يعني لو مقتنع تماما ان فلان ما راح ينجح في الشي الي في باله وماتبي تشجعه... أقل شي اسكت و لا تحبطه... خله يجرب و يفشل...

و انا قلت المجهود الفردي هو الي يبداها... لأن مستحيل يجيك مية واحد فجأه من اللا مكان يشتغلون في نفس المشروع. لازم الفكرة تطلع من دماغ فرد منهم... ثم يبدا يبحث فيها و يدرسها و كيف راح يطبق المشروع... بعد كذا يبحث عن الجماعه الي تساعده انه يكمل المشروع. هو المشكله الي اشوفها عندنا هو ندرة الافراد الي يبدون بالفكره. فإذا ما فيه فكرة مشروع في الاساس.. كيف بنسوي تغيير؟



بالنسبه لنقطة الوقت: فيه نقطة قالها دكتور عندنا في الجامعه عن تشكي بعض الطلاب ان مافيه وقت... و هي "دايم عندنا وقت، لكن نحتاج تنظيمه". نقطة بسيطه جدا و الكل عارفها لكن من يطبقها.
أول شي أخوي بوب حاول قدر الامكان انك ما تلوم أحد غير نفسك. اقصد كلامك انك مو انت السبب الكلي في ضياع وقتك. يمكن يكون لهم تأثير... لكن حط في بالك انك انت السبب في ضياع وقتك. لأنه وقتك و انت الي تتحكم فيه.
و ذكرني هذا بمثال كلمني فيه واحد من الشباب و هو إذا جت مشكلة في اي شركة عندنا وش يبحثون عنه أول شي؟ من الي سبب المشكله!!.. لكن في اليابان مثلا... أول شي في بالهم هو كيف نحل المشكله... مو أرميها على واحد و خلاص اختفي من المكان وكأن المشكله ما لها علاقه فيني.

و بعدين ماشالله عليك شكلك مسوي شغل كبير... سواء في الدراسه او في العمل. و بعدين ما ننسى الدراسه... لأنها هي بحد ذاتها أحد الانجازات الي انت تسويها. يجيني أحيانا حماس و أقول أبي أتعلم على برامج و أقرا كتب و اسوي شغلات كثيره... و في الاخير أتذكر ان علي مشروع برنامج نسلمه آخر الاسبوع ما بعد كتبت فيه ولا سطر!!... يعني لغة C++ قدامي أقدر أتعلمها في الجامعه... ليش جالس أفكر في غيرها و انا توني ما خلصتها؟ لو صار و لقيت وقت فراغ اوكي اتعلم غيرها..
يعني لا يتحسف الواحد على الوقت الي مضيعه في الدراسه... ولا يصير يتحمس انه يسوي اشياء كثيره و ينسى شي رئيسي في حياته...
هذا مثل الرجل الي جا للرسول صلى الله عليه و سلم و سأله عن ما يدخله الجنه... و ذكر له الاركان الخمسه... فقرر الرجل انه ما يعمل الا هالاركان فقط... فقال الرسول عليه الصلاة و السلام انه راح يدخل الجنه لو فعل مثل ما قال.
الشاهد من هالكلام ان فيه ناس يهتمون كثير بالنوافل و قراءة القرآن و الصدقات...الخ... و صلواته يجمع الخمس صلوات كلها مع صلاة العشا... هذي مصيبه. أظن وضحت النقطه.



الكلام باختصار... لا تفكر انك ما راح تلقى وقت اذا كان في بالك مشروع... انت ابدأ فيه... و لا تيأس...و انشالله مع الوقت تشوف انك تتقدم... و استمتع بكل لحظه اثناء ادائك للمشروع.. ولا تحط في بالك انك تنهيه بأسرع وقت.


و شكرا جزيلا على التعليق

[Dr.Lucifer]

الموضوع جيد و مشكور عليه ..
لكن المشكلة موجودة بالأنظمة و الآليات الي موجودة بالمجتمع ..
و بالنسبة للطب .. أعتقد إنه لسا نحتاج أكثر لطلاب بتخصصون بالطب .. لأنه نسبة الأطباء عندنا بالسعودية لسا بسيطة مقارنه بعدد السكان ..
أما التخصصات العلمية زي الفيزيا و الرياضيات و الكيميا .. مالها محل بمجتمعنا .. و هذي هي المشكلة ..
يعني تتخصص بواحد من هالتخصصات مالك إلا إنك يا تشتغل مدرس للمادة الي تخصصت فيها أو إنك تجلس بالبيت عاطل أو فرصة ضئيلة إنك تلاقي شغل ..
لو صار فيه معاهد بحوث و دعم من رجال الأعمال و الدولة للبحوث و يشوفون كيف باقي الدول إستفادت من خبرات الي قبلهم راح يتغير وضع المجتمع ..
و اليابان كانت على مفترق طرق مع عدة إمبراطوريات في القرن التاسع عشر .. و جميعهم سقطوا- بما فيهم الدولة العثمانية- ما عادا اليابان .. و السبب لأنهم شافوا كيف الدول الغربية تشتغل و أخذوا من أنظمتهم الي يتناسب مع حضارتهم .. و نجحوا بالشي ذا ..
و أهم شي .. إنه يصير فيه تنظيم و ناس تعرف كيف تخطط .. و أنظمة تتطبق على الكل .. و نكمل الطريق من محل ما وصلوا له الباقين .. مو نبدا من الصفر ..