قصه نكتـــــــــــــــه خسرانين اذا ما قريتوها

[راعي الفايبر]

حلم مرعب

الساعه 1 الفجر ..وتوني راجع من هارديز شاري لي عشا وزي العاده انتظر الجوال يرن وتكلمني (خويتي) هيفاء بصوتها المخملي زي كل يوم سواليف في كل شي وضحك وزعل وخرط يعني من كل بستان زهرة ...المهم وانا وهي نتكلم قالت لي ياعبدالعزيز ودي اقول لك شي مهم مرة ....انا قلت في بالي بس الاسطوانه القديمة اشتغلت زيها زي اللي قبلها ولا اللي قبلها بعد تلقاهاملت مني ولا جتها ظروف بتقول يا عبدالعزيز لازم نفترق ولا جاني واحد وتقدم لخطبتي واهلي وافقوا وماني عارفه وش اقول يعني مافي شي جديد طلعت يدي وبديت اقبص نفسي علشان اتقمص دور الحزين واللي بيطقها بكوة يعني ما اقدر على فراقك ياحياتي....بس من قرادة حظي قالت لي شي ثاني...قالت لي ياعبدالعزيز وش نهاية علاقتنا ...وقتها جاني ابا الوجيه يعني بلمت مدري وش اقول قالت لي يعني بتتقدم لي وتخطبني وترضى تتزوج واحدة كنت تعرفها على التيلفون ومن هالحكي وانا ماسك السماعه بيدي وادربي عيوني في غرفتي لين بدت تصارخ عبدالعزيز وينك ..عبدالعزيز قلت لها هلااا معك قالت وش ردك وقتها صرت زي مصطفى محمود جلست امطط الحكي والف وادور واقول يعني ..وتونا ووش اللي جاب لك هالافكار قالت لي يعني ماتقبل تتزوج واحدة كنت تعرفها على التيلفون بيني وبينكم بغيت اقول ايه وافك نفسي وانا الف وادور ومادريت الا البنيه طقت بكوة من جد وقالت لو تدري وش كنت احبك واعزك واغليك ..و...و... وانا انقلبت عنزة ما غير امئمئ وماسمعتها الا تقول الله يسامحك وارجوك لاتتصل بي مرة ثانيه وتسكر السماعه في وجهي وانا وبكل بساطة شغلت الدش وجلست اقلب بين المحاط والا الوالد يدق علي بالسنترال (شكله كان رايح لدورة مياه) وقال لي عبدالعزيز وانا ابوك بكرة ابيك تصحى بدري ابيك في موضوع مهم نتناقش فيه...غريب ابوي يقول هالحكي ابوي مرة مرة اذا كان راضي عني قال لي حول جعلك الضعفة ....وفعلاا الساعه 11 الصباح حلوة الصباح وانزل له في الصاله الا وهو وامي يتقهوون وجيت وقالت امي اقبل المعرس وانا اتلفت من معرسه وش القصة....والا ابوي وبصوت فيه نبرة حزن كانه عماد حمدي ولا ال باتشينو يقول لي ياعبدالعزيز ودي اشوف عيالك قبل ماتغمض عيني انا شفت عيال اخوك وباقي عيالك ..وانا اقول وش عياله وش عيون وتغميض قالت امي ابوك قرر يزوجك بيني وبينكم كنت رافض لين بدى الوالد يتعهد لي بانه يصرف على تكاليف الزواج كلها ويصرف علي وعلى مدامتي لين اتخرج السنة الجايه(وجهي مو وجه واحد ناوي يتخرج 24 ساعه على الانترنت) و اشتغل وجلست امي تعدد لي فوائد الزواج لين ملت راسي وجلست اتخيل اني راكب حصان ابيض وفي بنيه حلوة على سجي (مالت علي الى الحين احلم بحصان ادب ابو 3 عجلات ما اعرف اركب) وقلت خلااص ابشركم وافقت يالله ابدوا بالحث لي عن بنت ومادريت الا ابوي ويرفسني يعني منتظرينك توافق قالت امي بصراحة ابوك وصاني من اسبوع ادور لك ولقيت لك البنت اللي تناسبك ..وبنروح اليوم كلنا نخطبها لك رسميا ....ابتسمت وافطرت وبعد ساعه تغديت زي أي شاب سعودي يوم الخميس ومن صلاة العصر عند خويي الحلاق التركي ابيه يضبطني (زي باقي الشباب يعني) المهم بعد صلاة العشا رحنا لبيت سعيدة الحظ الا هو بيت ابو صالح صديق ابوي (ابو صالح =شايب مقطن معفن ,الله يعينيي عليه نص اسئلته عن الصلاة والتتن) المهم قاموا هالشياب مع بعض يكهكهون وسالفة منا وسالفة منا ابيهم يجيبون طاري الخطبة

يتبع ..

[راعي الفايبر]

ولا كن عندك احد واخر شي نطق ابوي الدرة وقال يابو صالح :عاد وانا اخوك الولد –اللي هو انا –يبي يشوف البنت وانبسطت اوه فيييييها شوفات لاوفاتشة بعدواهمس لابوي لو حصل يعني اجلس معها شوي اعرف طريقة تفكيرها وثقافتها ....وعينكم ماتشوف الا النور كوع من ابوي على شاسلتي(شاسلتي =الخصر الجانبي حول الكليه) والعقال يطيح والتطقيمة تخرب ابو صالح قال عسا ماشر قالت ابوي ابد الولد جته شرقه وقمت اكحكح يعني ابي ارقعها ولا ابو صالح ينادي ولده خالد الوسطاني ويقول له ادخل بالرجال للمقلط ومن قال رجال وانا ادور في المجلس من يقصد ...اثره يقصدني بس مقلط ليه يبون يعشوني المهم قمت مع خالد وانا شبه محيوس من كوع ابوي واتذكر الافلام المصريه اني باشوف بنت مستحيه القط لها نظرة على الطاير قبل ما تستحي البنت وتدخل حجرتها وجالس ازين نفسي ...وما امداني ادخل المقلط الا وش اشوف ...وجه بن فهرة بنت حلوة مو حيل بس عينها في عيني ماطاعت تنزل عينها لاو وتناظر فينيي وبعدين بدت تتمقل فيني من فوق لتحت وشوي وتقول لي بالله لف يمين شوي -تبي تناظر ظهري – وش ذي البنت لحظة شباب من المفروض اللي يناظر الثاني وشوي والبنت تطقها ضحكة قال خالد وش فيه قالت لا بس نسى يشيل رقم المغسله من الشماغ وتخر هي واخوها ضحك وانا ابتسم يعني اني ظريف المهم مرت دقيقة ..دقيقتين ابي البنت تدخل ابد ولاكنها تحس وفجاة قالت لي هاه شفت كل شي تاكدت ان البضاعه سليمة...قلت نعم وش هو بضاعته قالت انا يا دوك قلت ايه لاحلوة قمر ماشاء الله عليس قالت اجل خلاص وش تنتظر ارجع للمجلس قمت على وجهي ورجعت –مالاجظتوا ان البنت ملسونه بس ولو نتحمل وش ورانا- وارجع الا والشياب طايحين على قدوع(القدوع =عنقود تمر)وقهوة جلست جنب ابوي كاني في رابع ابتدائي مؤدب وساكت وتمت الخطبة على خير....وبعد يومين وانا توني بانزل علشان مواعد ربعي بنروح نشوف مباراة المنتخب في مقهى (على فكرة يلعن ابو التشفير واللي ابتكره ) والا مرت اخوي تناديني قالت لي عبدالعزيز تليفون لك قلت لها من ..قالت بنت ...واطمر على غرفتي .اوف من ذي البنت اللي بايعتها لو تدري امي تعلقني بالمروحه ثانيا خلاص صار عندي خط خاص ليه تدق على رقم البيت المهم حولت الصوت لناعم وقلت لها مرحبا والا واحدة ترد ياهووة مابغيت ترد ...قلت عفوا من معي ....قالت ايه يحق لك من كثر البنات اكيد بتضيع وزي العادة انا درديخ قلت اكيد هيفاء لا منى لاسوسن ولا هي تقول بس بس انا ياحسرة خطيبتك خلود ولا تجمدت وحسيت اني غبي غبي غبي وبديت ارقع قلت اكيد خلود يعني من اصلا انا حبيت افلفلك شوي ولا انا ماعمري رفعت السماعة على انثى الا امي وخالاتي قالت ايه طيب صدقتك ...قالت هاه ياعمري وش عندك قالت ابد حبيت اتكلم معك اتعرف على عقليتك واشوف عريس المستقبل قلت هلا وغلا ومسهلتين وافك الازارير أي والله بلامنتخب بلاهم خل اللي شفرها يشبع بها واجلس اسولف معها حوالي ساعه وانا امدح واشلخ لها اني شاب مستقيم وعلى نياتي ولاخلق الله لي زي وهي كانها اقتنعت ....ومرت ايام الخطوبه وانا كل يوم في نفس الوقت انتظرها تدق وهي ولاكنها مهتمه الى ان جا موعد كتب الكتاب وكتب الكتاب وصارت زوجتي شرعا بس بقا اسبوع على حفل الزفاف الا وتدق خلود مرة ثانيه بس هالمرة في العصر ابد وانا امدحها واقول لها يام سعود وش اخبارك يام سعود ردت علي ...سعود؟؟؟؟ يوووه اسم قديم الناس طاحوا في فارس ,حاتم ,حسام وانت توك سعود ...المهم ماعلينا وش رايك


يتبع .

[راعي الفايبر]

تمرني اليوم بعد العشا ونطلع نتعشا ؟؟؟والله قوية المهم هي قالت ولا ماقالت قلت ابشري يابعد كل من قام وقعد هوا ..وما امداهم يصلون العشا الا وانا مرتز عند باب بيتهم ومعي ورد(فالنتينوا غرب الرياض ) واطق الجرس ويفتح اخوها الصغير مساعد واقابله بابتسامه كبر خشتي ويقوول يووه هو انت الى الحييين ماخلصت كل يوم جاي كل يوم جاي وانا اقول له يابو نسب وحشتني (مساعدعمره 10 سنين)واطلع له مارس وجالكسي من مخباتي وكت كات من جيبي بس كوده يسكت ) قال لي وش تبي ..هاااه قلت له ابد باسلم على خالتي امك يعني (وووع مابقى الا اسلم عليها عجوز راسها كلها حنة وبراطمها ديرم ...وريحتها مقطنة ..بس لاجل عين تكرم مدينه) رح قلها عبدالعزيز رجل خلود عندالباب قال لي رجل ولا يد وانا اللي قمت اضحك طبعا هي بايخه بس لازم تجامل انسبائك واقول له ظريف ابونسب والله ويدخل مساعدوهو يصارخ يمّه يمّه الولد اللي بياخذ اختي عند الباب وشو ي وادخل قالت لي خالتي ياهلاا برجل بنتي وبدت ترطن تراك يا عبدالعزيز بمثابة ولدي والله يعلم لولا معزتك ولا ماكنت باقبل احط بنتي عندك- ايه هين قبلتي الله يخليه خالي ابو صالح ولا من زين بنتك اصلا- وترا بنتي غاليه عندي وهي ..وهي وتطقها بكوة وانا امسح دميعاتها بشماغي وتمش خشمها بكم ثوبي وانا اتحمل لاجل عيون خلود....وشوي واقول لها ياخالتي طلبتك قالت ابشر قلت لها ودي اخذ خلود ونروح نتعشىونرجع وان بغيتي خذنا مساعد معنا قالت وشو وتقوم ظفايرها كانهم انتلين قلت وش فيك ياخالتي قالت ابد ابشر بس كذا اصبر انادي لك خلود ...وشووي الا واسمع خالي ابو صالح وهو جاي مسرع وهو يقولو ينهو هالداشر ماقى الا ياخذ بناتنا ويدشر بهم ومعه ذيك العجرا ومعه ولد صالح صالح على فكرة مطوع ...وانا من شفت الوضع كذا واعط وتطيح نظارتي الشمسيه وانسى نعالي لانه من الصعب ان تنجلد قبل عرسك باسبوع ويصير لك تشوهات في وجهك ....و من الروعه صرت الف في الشوارع بالسيارة ساعتين وارجع البيت الا الوالد يناديني وهو في الصالة والنور مطفي واجي له بشويش الا وهو مزهب لي الزبيريه(الزبيريه=نعال فيرساتشي) وطننن على وجهي ثم ينط علي ويقول لي يالهيس انت وش سويت وانا اقول لحظة نتفاهم بس نحل المشكله ودي وكفخني بس على خفيف ثم يتصل على بيت ابو صالح ويقول له هلاا ابو صالح عقلت لك الولد وادبته ولاعاد يتعودها ذا الهابق الهابق يعنيني انا... واقول له اسئلهم عن نظارتي الشمسيه ويقولون لابوي ماطاح عندنا شي وانا متاكد بس قلت يالله كله فدا خلود....المهم مشى الاسبوع وجا العرس ...واشوف مساعدوووة كاشخ بنظارتي الشمسيه هالمجرم الصغير بس يالله العوض من الله شريت لي واحده ثانيه ...بس انا انا متشوق يدخلوني عند الحريم اكثر من شوقي للعرس نفسه لان اخر مرة دخلت عند الحريم في عرس كان يوم كنت في سادس ابتدائي...و يدخلني ابوها ومعه كل اخوانها والتفت الا الشباب من وراي يطلطلون على الحريم قلت لنفسي واش معنى انا واقوم اطلطل وما امدى خلوودتي تمسكني الا تقبصني من يدي يعني اعقل المهم ونجلس على الكوشة ويازينها من جلسه كاشف كل الصاله بس الغريب ان المدام كانت مؤدبه وهادية ذيك الليلة وانا استغليت الفرصة طول ماحنا جالسين وايديني تملس على يدينها رايح جاي بالطول وبالعرض ولو يحصل رحت لاماكن ثانيه بس عيب قدام الناس ...وشوي وتنغزني خلود على خفيف وادربي راسي يمها اللي يشوفني وقتها يقول بيرضع مو بيكلم زوجته قلت: هلاا حياتي قالت لي:مو يالله قلت لها يالله ايش ..قالت نمشي للبيت خلاص بنقعد هنا الى متى ولا جازت لك الجلسة هنا وقزقزة الحريّم قلت يالله ومشينا سوا ووصلنا بيتنا العامر طبعا انا باسكن مع اهلي واطمر مسرع لها بافتح الباب لها يعني اراعي كونها بتصير خجوله ولا والله ماعندك احد البنت كانها داخله سوق انطلقت لفت البيت لف ونروح لجناحنا وما امداني اقول زي الافلام برجلك اليمين ياعروسة الا الغاليه دخلت ورمت الطرحة على جنب وجلست وانا بالبشت تقول واحد يراجع في الاحوال المدنيه محيوس وحالتي حاله وادخل العشا الللي وصية اخوي عليه الا وتصكني المدام بسؤال عالطاير ماعندك مناديل ....وبس ساعتها جتني النفاضه وجلست اتعتع (وش وش وش منا منا مناديله )واقول في نفسي يلعن شكلها وش يعرفها بالمناديل يخرب بيتها الله يستر بس وتقول لي وش بلاك ابي مناديل ابي امسح المكياج وانا كن الهم كله انزاح

يتبع ..

[راعي الفايبر]

عني قلت ايه مناديل قولي كذا من اول لحظة اجيب لك واخم لها 3 علب مناديل وتضحك وتقول لي بالله شغل الدش ولا راشد الماجد في الكويت وتقول بصووت عاالي يااااااه راشد راشد ارفع الصوت ياقلبي ياراشد يابعدهم كلهم وتلتفت علي مو كيوت شكله ؟؟(كيوت=مقطقط) قلت هااه الا بلا وانتي صادقه والبنت متنحه في راشد وما امدى اغنية راشد تخلص الا ينط لي تاركان (حلاق تركي فتح الله عليه وصار مطرب) وتصرخ خلود بصوت عالي لالالا ياربي ما اقدر يلعن ام الحلا كله ياناس هالادمي وش مخلوق منه يعني اللي قدامها واسمه رجلها شيفة وانا من القهر صرت اكل خبز حاف من الصدمه نسيت الحمص ...ويوم جت الساعه 12 وقت الاخبار في كل المحطات قالت بالله سكر التلفزيون بدت البياخه وانا صرت اقدم لها لقمات منوعه من الكباب والبطاطس والروبيان قالت لي وش دعوى عزووووزي موفر الكابوريا لروحك ليه محتاجها الليلة ياحبيبي عادي فيجرها (يعني خذ لك فياجرا والفياجرا ترى دوا للصداع من مصانع القصيم مو اللي يقولون عنها في الاخبار..يعني لاتظنون شي ثاني) قلت لاوالله تبين كابوريا قالت لي لا خلها لك كود يثمر يالله حياتي سكر النور نبي ننام......ياحبكم لهالاشياء ....بس مافييه سررر....................................المهم ثاني يوم الصباح قمت من النوم واتلفت يمين ويسار مالقيتها ادورها في الجناح كله ولا لها اثر وانزل تحت في الصاله والقاها مع امي وحريم اخواني واخواني تنكيت وسعة صدر وفلة حجاج وما امداني ادخل الا قالت ههههه شوفوه هذا شكل معرس بالله شعر محيوس ووجه ماغسل واخواني فاطسين من الضحك ناسين اشكالهم الواحد اذا قام كانه فيل ماغسل وجهه ...وشوي وتقول ولا امس ياخالتي واحنا جايين عزوووزي كان مرتبك ينتع بالسيارة تنتيع وامي تكرّها من الضحك وفجاة قالت لي عزوووزي لو تربي لك سكسووكة صدقني بتصير احلى وقتها بتنفع للمغازل ....وزي العاده تطقني النفاضة وش مغازله ...اصلاا انا عمري مافكرت اغازل ولا طرا لي بال ابد اني اغازل وترد علي على مين تلعبها ويردد الكورال(امي واخواني وحريمهم )على مين يابن الناس واهمس في اذنها اقول لها لو سمحتي بلاش عزووزي قدام الخلق يعني بيني وبينك فووق الا وتكرها ضحكة خالتي يقول لاتناديني عزووزي بالله وش كنتوا تنادونه يرد اخوي الكبير عزيّز والله الشباب مطيحيين الميانه المهم قبصتها من جنبها وقلت لها اووه تذكرت شي فوق خلود الحقيني بالشاهي قال اخوي الثاني وامداك تعرف الشاهي بعد ....ياخي ناس يحرجونك ...المهم على المغرب قالت لي عزوووزي وش رايك نتعشا برا قلتها وين قالت اللي يعجبك ...ههه اشوا البنت بدت تسمع الكلام وتصير وش حليلاتها ...قلت لها بيانو كويس قالت ايه حلو وليه لا ...ونروح هناك وندخل قسم العوايل ..ياناس شعور حلو لما تدخل قسم العوائل بصفة شرعيه مو زي كل مرة تخاف واحد من اهلك يكفشك ..جار لكم مع بناته داخلين عليك الجلسة اللي جنبك في هرفي واحنا هناك وانا اشفط العصير والصوت واصل لاخر الدنيا(ستتتتتتششششووت) ويمرون 3 بنيات كل واحده تقول الزين عندي وكاشفات وعطورهم فايحه والتفت (مابعد تعود على الزواج وعيشته )وتقول لي عزوووزي لاتستحي الحقهم ولا اقول لك رقمهم عادي تراني بس زوجتك يعني لاتستحي منهم قلت لها وانا في عيوني الحسرة والله ودي هاه لا بس مستغرب

يتبع ...

[راعي الفايبر]

كيف بنات في هالعمر يمشون كذا ياشيخة البنات للاسف معظمهم مدري وش صار فيهم وترد علي وش فيهم ابد بنات عاديات وان جيت للحق هم حلوات وخصوصا الوسطى من جد ترويقة ...قلت ترويقة وش الترويقة؟؟؟قالت لالالامومعقول ماتعرفها يعني بتفهمني انك ماقدر تعرفت ولا شفت ترويقة قلت لاوالله قالت ترويقة ياطويل العمر يعني بنت هاديه وحلوة كلاسيكية مرة يعني تشوفها وتسرح لعالم الخيال شوفتها تهدي اعصابك ...وشوي وتقول لي الاولى مثلا بنت هاي مبين عليها قلت طيب والثالثة –ماتلاحظون اني طيحت الميانه مع زوجتي- وتضحك وتقول لي بصراحة الثالثة لايقة عليك وابتسم من الثقة....... ليه؟؟ قالت كلكم سمر ومبين عليكم بصراحة ولاتزعل قراوا ودهم يتطورون يعني تحطيم عيني عينك وتلتفت مدامتي على رجال وزوجته وزوجته كانت دبه قالت ولا اقول لك هذي تنفع لك الدبه لايقة عليك اكثر نفس ستايلك ...كل ذا وانا اقول في نفسي البنت مقهورة تبي تبين لي انها تتريق بس... قلت لها على بالي باقهرها طيب وانتي؟؟؟ ابتسمت ابتسامه خفيفة استانست انا ....قالت انا وهي مستغربه قلت ايه قالت انا بصراحة عقلي مو معي فكيت خشتي عاد من الفرحة وكملت من يوم شفت الولد اللي جالس على الطاولة اللي برا وعقلي مو معي الولد يجنننن ما شفته انت (كشششش كطح)منتهى التحطيم قلت لاوالله وجيت على بالي باتميلح ولا بارقعها طيب مين احلى انا ولا هو ....قالت لا ويييين لاتزعل عزوووزي بس والله انك جنبه ماتاكل عيش الولد ربي خالقه يفتن به قلوب البنات (العن والديها يعني اكب كاس المويه في وجهها واطلع) عزوووزي لاتزعل هي تحكي انت حليو ..هههه اذا استثنيينا شعرك وجبهتك قلت وانا اكل الرز بالشوكة والتحطيم مبين على وجهي الله يسلمك كلك نظر والبنت استرسلت في وصف الولد تخيله لابس جينز وتي شرت بني ولا شورت وعلى البحر... قلت بس ...بس بنقضي الليلة في وصف معاليه(رييننننيج ريينيينج)صوت جوالها ..قالت لي من ذا رقمه رقم جديد ياليته ذاك الولد انا انكب كاس العصير علي من طيحة القلب هااه وشو؟؟...هااي ريما كيفك شلونك حبيبتي ماعرفت رقمك هذا رقم جديد غيرتي رقمك بعد اكيد غثوك الشبابات يعني الشباب يابختك انا خلاص استقريت على رقمي هذا وش اسوي خلاص صرت مدام هههه الشكوى لله, الله يرحم ايام اول الرقم مايجلس معي اكثر من شهر (ياناس هذي عربجية ولاتبي تحرق دمي) اييييه ايام الكليه تذكرين هههههه ايام وقدامها واحد دلخ ياكل الرز بالشوكة وعصير منكب على ثوبه واعصابه نار شابه ...ايه انا مع زوجي ...وشو تبين تسمعين صوته وتسلمين عليه عزووووزي ريما صديقتي تبي تسلم عليك ..وانا مثل المسبه وشو وش تبي طال عمرها وليه؟؟؟؟ قالت خذ كلم عادي وش فيها صديقتي ...واكلم ريما على فكرة صوت ريما مو غريب بس من الحاله ماكني سمعته من قبل واكلم ريما ولا اللي تخش فيني عرض هاي عزوووزي كيفك مبرووك منك العيال ومنها المال هههه لاتخاف امزح معك منك المال والعيال سوى لاني اعرف خلووده عجازة بس طيبه وقلبها ابيض وربكم المعبود ان كان اشارة تقاطع العليا مع شارع الثلاثين ناطقه فانا متكلم ولا ريما تقول لي يالله باي...وتسكر واعطي الجوال لراعيته –والله مستحي اقول المدام- المهم ونطلع من المطعم وماصدقت وانا في الطريق اقترحت عليها نروح ناخذ لنا ايسكريم وتضحك بيني وبينكم احيانا احس مايصبرني عليها الا ضحكتها قالت مافي احلى من ايسكريم الثمامة آآآآه يالثمامة زمان مضى قلت ايه ايام الاستراحات قالت لا وانت الصادق ايام التطعيس (حوووووووههههاااا صوووت فرامل قوويه) قلت وشو قالت ايه تطعيس وش فيها انا وصاحباتي وبنات خالاتي كانا ناخذ اللاندكروزر حقتنا ونطلع نطعس ايه ونروح ننصا الشباب ونتحرش فيهم والله يانا كنت سواقه ...بس مرة لحقونا الشباب لين وصلنا مخيمنا بس كان في راعي باترول شكله واصل بقوة دخل المخيم ولا على باله لين قابله اخوي صالح ههههههه ياناس ازنطها بحزام الامان اللي ماربطته ..قالت ماعمرك شفت بنات في الثمامة يسوقون قلت لا والله بس اسمع ان البنات يسوقون هناك قالت لي طيب وش رايك في ان البنات يسوقون سيارات قلت مهزله

يتبع ..

[al7zena]

مشكووور يا راعي الفايبر وحلوة القصة

[Pr.Game]

حلوووووووووة


أصلا ما قريتها

ومشكور .

[راعي الفايبر]

القصه هذي محفوضه لـ قصيمي نت

والتكمله بعدين .. القصه بقي طويله

[راعي الفايبر]

هذي القصه كاااملهموجوده بالملف الي تحت

ارجوكم تقرون القصه والله حللللوه

[xtreem]

والله قصة حلوة وتجنن بس ياليت تكملها بسررعة ههه
وتقول لنا هذي من راسك ولا من كراسك :P

[Pr.Game]

جاري تحميل القصة

مع انها طويلة شوي

لكن بسلي نفسي في الليل.

[بهجت الأبصيري]

ههههههههههههه قصه ميه ميه من الكلام الى قريته الان

لازم انزل القصه كامله ما يعتاز عليك بالعافيه

[KJF]

قصة حللللللللللللللللوة

كملها بالمنتدى لاني ما اقدر اقرا عربي بالنوتباد ومشكور