( تكفى ) .. استشارة بخصوص الجيم كيوب .. ( تكفى )

[camry_007]

بسم الله الرحمن الرحيم ..

حيا الله أحلى وأرق وأجمل أعضاء المنتدى.. وخصوصاً قسم الجيم كيوب ( مصلحة )

أنا ودي أكون من الناس اللي يملكون الجيم كيوب ، لكن عندي مشكلة بسيطة .. وهي إن عليمي ..

يعني كل اللي أبيه منكم ( الله لا يهينكم ) معلومات عن الجهاز .. ويا ريت تجاوبون على الأسئلة هذه

1- هل للجيم كيوب أنواع مثلاً ( NTCS ) أو ( PAL ) ( ياباني ) أو ( أمريكي ) .. وما هو أحسن نوع ؟
2- سعر الجهاز .. وهل السعر ثابت ولا يختلف من محل لمحل ؟
3- إذا شريت الجهاز .. وش يجي معه .. يعني ( يدين تحكم ) .. ( ميموري كارد ) .. ( سيديات ) .. إلخ ؟
4- بكم أسعار سيديات الجهاز عموماً .. يعني ما فيه مثل البلاي ستيشن من 10 وأنت طالع ؟
5- هل عمر الجهاز طويل .. وهل له مشاكل مثل البلاي ستيشن ؟
7- فيه جيم شارك
8- وش أحسن الألعاب اللي تنصحوني فيها؟
9- أنا من الشرقية .. وودي بأحسن محل في ( الدمام ) أو ( الخبر ) يبيع لي الجهاز وألعابه .. وراح أتعامل معه دائماً ؟
10- إذا عندك نصائح ثانية لي قبل لا أشتري الجهاز ( تكفى ) لا تبخل

على العموم يا شباب آسف إذا طولت عليكم .. لكن إذا ما تحملتموني انتم .. من اللي راح يتحملني ؟

[Black Box]

1- أكيد له أنواع عدة والنوع اللي تنزل عليه ألعاب بإستمرار بالسعودية الـNTCS

2- على حسب المحل بس أنت رح بيت الكمبيوتر بمجمع الراشد بالخبر سعره 490ريال مع يد تحكم

3- يد تحكم

4- الألعاب كلها أصلية مو مثل البلاي ستيشن2 , وهي تتراوح بين 100 إلى 220 والمحل اللي يبيع لعبة تتعدى 220 لا تاخذ منه (خصوصاً بعض محلات الراشد يشترون الألعاب من بيت الكمبيوتر على مئتين وشوي ويبيعونها على 250!)

5- إيه نعم طويل إذا حرصت عليه بس

7- نعم

8- زيلدا ويند ويكر وماريو سن شاين وماريو كارت وسوبر سماش (هذا اللي جا على بالي الحين)

9- بيت الكمبيوتر بمجمع الراشد (لا تروح النسر اللي بمجمع الخليج الهنود اللي فيه نصابين مو زي الفروع الأخرى بالرياض)

10- تأكد أنه الجهاز اللي بتشتريه عليه ضمان

بس أنصحك تروح عند سيد في بيت الكمبيوتر بيعطيك عروض حلوة خصوصاً إذا كنت بتشتري منه أول مرة (عشان يخليك تاخذ عن المحل فكرة زينه ودايم تشتري منه ).. أي أسئلة أخرى حنا حاضرين وحياك الله

[camry_007]

الله يعطيك العافية أخوي balck box

طيب الجهاز ويجي معه يد تحكم واحدة .. واليد الثانية أشتريها منه وبكم سعرها

وبكم أسعار ( الميموري كارد ) وَ ( الجيم شارك )

يا شباب إذا فيه معلومات إضافية تكفى لا تبخلون علي فيها ..

[Black Box]

سعر يد التحكم الأصلية من نينتندو العادية يتراوح من 90-100 ريال أم الويف بيرد (اليد اللاسلكية) سعرها 150 ريال , أما الميموري كارد فلا تأخذ غير حقت ننتندو لأنه كروت الذاكرة الأخرى تصير فيها مشاكل (اختفاء تخزينات الألعاب وكذا) وفيه واحدة من هالماركات في بيت الكمبيوتر مساحتها 118 خانة بخمسين ريال وأنا اشتريتها سابقاً وكانت ماشية تمام معي ثمن قريت في موقع أجنبي أنه بعض اللعيبة انمسحت تخزيناتهم بسبب هالميموري كارد فاشتريت أخرى من نينتندو , أما الأفضل وهو اللي من نينتندو فهو على نوعين:

1- 59 خانة وقيمته خمسين ريال

2- 251 وقيمته مئة ريال

أما الجيم شارك فما أعرف قيمته بالضبط بس إذا تبيني أسألك ما عندي مانع

[Golden_Sun]

اول شي حياك معانا بالمنتدى ..

وبحاول اجاوب على اسئلتك ^^

1- هل للجيم كيوب أنواع مثلاً ( NTCS ) أو ( PAL ) ( ياباني ) أو ( أمريكي ) .. وما هو أحسن نوع ؟
فيه انواع واحسن شي امريكي NTCS .. لأن كل الالعاب الموجودة بالخليج نوعها امريكي (ونادر ما تلقى ياباني)
واذا كنت من الناس اللي يشترون العاب يابانية انصحك بتطويرة خارجية لتشغيل الألعاب اليابانية على الجهاز الأمريكي

2- سعر الجهاز .. وهل السعر ثابت ولا يختلف من محل لمحل ؟
هممم بحدود 90 - 100 دينار كويتي .. وسعره ممكن يختلف من محل لمحل آخر ..

3- إذا شريت الجهاز .. وش يجي معه .. يعني ( يدين تحكم ) .. ( ميموري كارد ) .. ( سيديات ) .. إلخ ؟
اذا كنت شاري جهاز عادي مو باندل او اصدار خاص بكون معاه
- يديتين تحكم
ميموري كارد (احياناً يكون الحجم العادي واحياناً يكون ذو حجم 251 بلوك) والأفضل طبعاً ذو 251 بلوك اكبر (هذا يعتمد على المحل)
- لعبتين انت تختارهم ..

4- بكم أسعار سيديات الجهاز عموماً .. يعني ما فيه مثل البلاي ستيشن من 10 وأنت طالع ؟
من 18 دينار كويتي وانت طالع
مافيه كوبي ..

5- هل عمر الجهاز طويل .. وهل له مشاكل مثل البلاي ستيشن ؟
بكون عمره طويل اذا حافظت عليه .. وعموماً بالنسبة لتجاربي الشخصية مع الجهازين الجيم كيوب اقوى من ناحية التحمل وحتى الاعطال ..

7- فيه جيم شارك
يوجد ..

8- وش أحسن الألعاب اللي تنصحوني فيها؟
هذا يعتمد على الالعاب اللي تفضلها ^^ ..
لكن طبعاً انصحك بألعاب ماريو الجماعية (سوبر سماش وماريو بارتي وماريو كارت وواريو وير)
مع جزئين رزدينت إيفل .. وجزئين زيلدا وايترنال داركنيس .. ومتريود برايم .. وان كنت من محبي الآربيجي عندك لوست كينجدوم وسكايز اوف اركيديا وبعد اسبوع وكم يوم بنزل Tales of Symphonia وبيبر ماريو بشهر اكتوبر وبيتن كايتوس بشهر نوفمبر ^^
ومن البلاتفورم عندك بيلي هاتشر .. ومن العاب الـracing افضل شي اف-زيرو .. والعاب محاكاة الواقع انيمال كروسنج وهارفست موون ..
وفيه غيرهم كثير ..

9- أنا من الشرقية .. وودي بأحسن محل في ( الدمام ) أو ( الخبر ) يبيع لي الجهاز وألعابه .. وراح أتعامل معه دائماً ؟
ما اقدر اساعدك للأسف >< انا من الكويت ..

10- إذا عندك نصائح ثانية لي قبل لا أشتري الجهاز ( تكفى ) لا تبخل
اشتر 4 يدات تحكم من البداية لأنك راح تحتاجهم في اللعب الجماعي

[camry_007]

يعطيكم العافية

بس أخوي golden_sun فيه نقطة ما فهمتها وهي ..

واذا كنت من الناس اللي يشترون العاب يابانية انصحك بتطويرة خارجية لتشغيل الألعاب اليابانية على الجهاز الأمريكي