وا تلفزيوناه ..

[Kubaj]

السلام عليكم ورحمة الله وبركاته .. اما بعد .. السيد المكرم .. صاحب الفاتورة

سدد يرحم ابوك تراك طفرتنا كل يوم مرسلين لك مسج !!

الحقيقة هذولي الجوال غاثين ابو جوالي المسكين

كل يوم مسج عزيزي المشترك تراك وصلت الحد الإئتماني

افهمها واستح على وجهك مطلع خمسة خطوط

ثلاثة على حافة الحد واثنين في عداد المفقودين

..

طيب وانا مالي ؟

يعني وش ذنبي اذا عندي واحد الله يستر عليه - مهوب خالي -

مصاب بالنرجسية وكل شوي مطلع رقم ينطح الثاني وبشدة

يعني الله يعين زوجته عليه ..

مايمشي عنده يشتري شي واحد .. لا لازم اثنين .. او ثلاثة

لذلك منطقياً بيتزوج اثنتين .. وحدة منهم بيتركها على باله

انها فاتورة جوال ممكن تنفصل بأي وقت ..

اوكي انا بدأت اخرج عن اطار الموضوع ..

( لا والله خرجت واشتريت عشا ورجعت ووقفت عند تفتيش بعد )

طبعاً ماقلت عشا الا لإنه الوقت الوحيد اللي يصلح الواحد يطلع

فيه بمدينة الرياض في فصل الصيف بدون الخوف

من ضربة شمس .. او التعرض المباشر لأشعة الشمس

اللي ممكن يسبب عطب دائم في المخيخ مما يؤدي

الى جلطة في المخ والوفاة دماغياً ..

وعاد يالله شف المستشفيات بيتسابقون عليك كأنك

نتفة من خبزة تميس طاحت جنب حصن للنمل ..

على طاري النمل .. انا اكتشفت مؤخراً ان النمل الي في البيت

يحب السمسم .. لإني اصبت بحالة ذهول مؤقت الى ان ما يتمكن عقلي

من شراء ذهول فل كامل فتحة وجنوط بالتقسيط المنتهي بالتمليك ..

صحيح !!:drive:

عنوان الموضوع ..

معليش بس عقلي يصير معطوب بنسبة 70%

مجرد اني طلعت افتح الباب ورجعت .. يعني ..25 ثانية .

لذلك صحيح .. ايوه

مرحباً بكم اعزائي واحبابي سكان جزيرة المنتدى العام

انا احييكم هنا من صحراء الربع الخالي

من على ظهر بعيري الوردي ..

وقيل لي بإن هناك احسن نقطة لإستقبال البث الفضائي

لجميع القنوات الفضائية .. والأرضية .. و .. و .. المالطية

والحقيقة اجدها فرصة بما انه فصل الصيف

منها سياحة .. وفرصة الإلتقاء بالمخلوق الإسطوري

نعمان .. ورفيق دربه قرقور ..

ومن هنا اجدها فرصة لشكر خادم الحرمين الشريفين

وولي عهده الأمين والنائب الثاني

على حراستهم لهذه المنطقة جيداً من ايدي العابثين

والنعامات السائبة .. و.. و ايضاً

من المخلوق الفضائي الذي يتشكل على شكل اي مخلوق يقتله ..

الا على طاري نعمان ..الجميع يتذكر افتح يا سمسم

وكيف اننا حتى بالتقليد مانفلح ..

البرنامج العربي الوحيد اللي افخر فيه

هو المناهل ولو انه كان يجيب لي الكآبة

لكن يظل انتاج عربي .. ولا يهون ابو الحروف بطلي المفضل

وزيد وعمر .. والمقطع اللي يجيبلك اثنين يمشون ويكررهم كل مرة

بس يزود كل عدد طبقة جديدة ..

بصراحة بقول شي قديم .. اقدم من النائب الثاني بس صراحة الحق حق

اعلامنا العربي .. فاشل !!

معقولة مافيه موقع لإفتح يا سمسم ؟؟

يعني صحيح هو برنامج يقلد الا ينسخ البرنامج الأمريكي

واللي by the way يعني له اكثر من 5 مواقع كل واحد يقول للثاني انا احلى منك

تدرون مالقيت له الا صورة كحياااااااانة من جد حتى الوانها صافقتها شمس قوية

تحتك بشمس الرياض لكن ناقصها خبرة واحتراف خارجي ..

ناظروا بالله .. شوفوا نعمان كيف صار

ايش هذا ؟؟؟؟؟ فلم مرعب؟؟

حرام عليكم خربتوا ذكريات الطفولة ناظروا بدر كيف يناظر كأنه بيسوي جريمة

ونعمان ناوي يقتل الببغاء مدري عصفور مدري وش قصة امه

بعدين ليش بدر وجهه بنفسجي سلامات الأخ متسمم ؟؟

الله يخلف علينا .. مشكلتنا .. نبدا الشي مثل اي بلد ثاني

لكن مانعرف نستمر ونتطور يعني النجاح مو صعب

الصعب انك تحافظ عليه .. زي الكلام هذا بالضبط ..

المشكلة بكل شي واكبر مثال هو منتخبنا الله يرحم ايامه

ويخلف علينا بمنتخب زيه .. ( keep dreaming )

يعني عام 94 كنا ننافس هولندا ونفوز على بلجيكا

ونؤدي بشكل جميل مع السويد ..

وبعد عشر سنوات بس يعني مارحنا بعيد ..

صرنا نتمنى الفوز على اهلستان ؟

على كل حال .. مافيه احد يقدر يحافظ على النجاح بدون تخطيط

ومن هنا ارسل تحياتي للإتحاد العماني اللي يعرف كيف يخطط بهدوء

موب مثل الأخ خطة مدروسة ..

السيد خطة علمية مدروسة .. مافيه شك آل سعود

يوم تأهلنا لكأس العالم 2002 قال بندخل كمنافسين .. - كثر لي منها مع شوية كحل من عيونك -

وبعد عشر سنوات بنحقق الكأس ..

لا والله البجاحة وقوة الوجه ..

صدق المثل .. شين وقوي عين ..

نرجع مع المخرج وناخذ U-turn

ونرجع لسالفة افتح يا سمسم .. ناظروا كيف الفرق بين الصورة اللي وريتكم

والصورة من البرنامج الأصلي ..

ما اقول الا الله يخلف حتى نعمان طلعنا ملفقينه .. ههههه ..

بس كله كوم والأزرق الحلو حق الكوكيز كوم ..

والله انه انسان منسم .. بصراحة

بدري على طاش ماطاش يجيبون زيه ..

حتى قرقور .. شخص لطيف جداً

يعني هم كثنائي اصرف من السدحان والقصبي

اللي هو صورة اخرى للنجاح الغير محافظ عليه ..

بالله تحية يا شباب وشابات لهذا الثنائي المرح

الله يخلي القناة الثانية الفاشلة كانت تجيب لنا من هالبرنامج

لا والمشكلة البرنامج العربي المقلد

يجيبون فيه ممثل بايخ يغني بالعود

بالله هذي اشياء تعلمها اطفال ؟؟

لعنة الله على شياطينكم عرب مافلحتوا الا بالغناء والرقص

والليالي الحمراء والزرقاء .. !!

انا انسان ما اتابع التلفزيون الا اذا جت مباريات ..

اما المسلسلات والأفلام والى آخره .. اشوفها بالجهاز يا انزلها من النت

يا يجيبها لي واحد .. ( طيب بتعلمنا بالقوة يعني ) ايه .. بالقوة

ومع سبق الإصرار والترصد للأحوال الجوية لمدينة راس ابو قميص .

ولكن مع الغزو الجوي لبطولة اوروبا وآسيا والأولمبياد القادم

فتحت التلفزيون .. وشفت قنوات ( بدات بالموضوع اللي كنت ناوي اكتبه من البداية )

شفت من هالقنوات ..

الهز والرقص والتميع والتمايل ..

والتمكيج والتقبح ..

وطبعاً ماجبت شي جديد ..

كلها شي متعودينه من فارغين العقول العرب ..

اغاني ورقص وتبذل وقلة حيا

وانحلال وتقليد ..

كل هذي هجمات عادية ..عند الجمهور جنب القائم بالكثير ..

لكن الشي اللي ارتطم بعارضة وجداني ..

واهتزت لها المفاهيم الإنسانية ..

انه فيه تشات بالمسجات على هامش هذه القنوات الماجنة .. !!!

مو معقول ابداً

وحدة ترسل تقول - انا مجهولة .. ابحث عن مجهول -

طبعاً فيه زليون حمار بيرسلون .. - مجهول هنا .. من يتحدث - ..

ولا واحد ماصل يكتب رقمه ..

يعني والله لو الواحد يضيع وقته بمنتديات طول اليوم ما اقول له شي

الأخ اكيد يستفيد خبرات ومعلومات ..

حتى لو يدخل تشات نقول يرفه عن نفسه شوي ..

بس يرسل مسجات - طبعاً ليست مجانية - عشان يسوي تشات ..

وطبعاً .. مستحيل التشات يكون مفيد او حتى مسلي ولقتل الوقت

لا .. دام ان طرفي المعادلة الكاملة موجودة ..

وصانع لعب هذه المعادلة متواجد 24/7 ..

الهدف هو واحد لم يتغير منذ فجر التاريخ ..وهو الكسب المادي

لكن الطرق تعددت الى روما .. حتى ان بعضها ااضاع روما ..

الطرق الخبيثة .. للكسب المادي .. شيء مقزز فعلاً ..

وا تلفزيوناه !!

لهذا الإعلام السطحي الفاشل الغبي المتخلف المنحط المبتذل

المنغمس في الرذيلة ..

والذي يجعلنا مادة دسمة للعالم كله ..

ولو سخرنا ربع وقت هذه الفضائيات في قناة ناطقة باللغة الإنجليزية

تشرح الوجه الحقيقي لديننا وتشريعات الله

والبدء في الأمور الأكثر انتشاراً عن الدين الإسلامي

على سبيل المثال القصاص ، وتعدد الزوجات والى آخره من المواضيع المهمة والحساسة ..

لأختلفت نظرة العالم لنا ..

ولما اصبحنا اليوم مصدر قلق وخوف

على الرغم من وداعتنا وبؤس حالنا .. !

وصدق ولد حارتنا صاحب الوجه البشوش

إبراهيم سويد الملقب بروماريو

هيه..تراني لعبت بكاس العالم !!

( روماريو العرب )

عندما قال

" انشغل الناس قديما بمقدمة ابن خلدون اما حالياً فقد اشغلتهم مؤخرة روبي "

مع اطيب التمنيات بالشفاء العاجل لفرانشيسكو توتي ابو تفلة ونص

:rose:

[MoaeD]

من جد .. حنا فرضنا على انفسنا اننا ما نتطور ..وهذا اللي صاير

اننا ما نتطور شي .. واننا نتخلف هذا شي ثاني .. يعني بالله الفيديو كليبات اول ما عرفناها واحد يغني عند ناقوره ويحز راسه ويدينه بعدين صار يجي معه رجال يرقصون

ثمن دخلو معهم الحريم اللي واقفين وتدور الكاميرا عليهم وبعدين صارو الحريم يرقصون

وعلى شوي شوي .. حتى صارت الفيديو كليبات دعاره اعوذ بالله ..

وهذا الحين ولا شي.. اكتشفت اننا حنا ما ناخذ الا الشين .. ولا نشجع الا الشين (كمعظم الناس كعرب)


كثير من البرامج الثقافيه اللي عرضت وما لاقت هالأهتمام

اما برنامج ماجن ووقذر وهدفه اوضح من نور الشمس زي ستار اكاديمي يصير مجال الحديث 24 ساعه لا وموب من الشباب وصغار السن بس حتى الشياب يتابعونه ...

يعني مثل هالبرنامج ما يحتاج فتوى انك ما تتابعه اصلا لأنه ماله اي هدف راقي يخليك تتابعه..


اوافقك الرأي 100% اخوي خوباج واحييك على هالطرح الأكثر من رائع والصراحه تطرقت الى مسأله خطيره ووضعنا فيها مزري ..

مشكور على الموضوع الرائع اللي نضمه الى ابداعاتك المتعدده ..

[البـاحث]

بعدين ليش بدر وجهه بنفسجي سلامات الأخ متسمم ؟؟

اسمه أنيس وليس بدر

الببغاء مدري عصفور مدري وش قصة امه

اسمه ملسون

[Anima]

الله يخلف علينا بس

اناس تطلع لفوق وحنا ننزل

الدول تتقدم وتتحظر وحنا زي ما احنا

يا مؤيد لا تحرق دمك على الفاضي ترى ما فية فايدة

المشكلة بكل شي واكبر مثال هو منتخبنا الله يرحم ايامه

انت لين الحين تسمي هذا منتخب

من بعد مونديال94 معد صار لنا منتخب



وشكرا على الموضوع


مع اطيب التمنيات للموت العاجل لفرانشيسكو توتي

[Pr.Game]

خخخخخخخخخخخخخ
لسه نحنا من دول العالم الأخير ..
قنواتنا "نكد1 ونكد2" مسوين قناة رياضية ودامجينها مع الانجليزية
وقناه إخبارية ومالها داعي ..
ومنتخب مفشلنا ورايح مسوي شديد بالصين ورجع خايب على أول طيارة..
الله يخلف علينا بس ..
وعن الاتصالات الله لا يوريك كل شهر والتاني لا هطين 120 ريال على لاشيء
والحين مسوين توزيع شرائح مجاناً يبونا ناخذ مليون جوال بلوشي بس هم أهم شي ياخذوا المية وعشرين
خلنا ساكيتن وخلها على ربك ويقولون في شركة جديدة الله أعلم وش حتسوي ..
وبالنسبة لإفتح يا سمسم أذكره من 13 سنة وهم كل سنة يعيدوه ههههههههههههههههه ..
على كل حال .. ماكو إضافات أخرى ..
هذا بعض من كل لسه ما تكلمنا عن الانترنت وغيره
ومشكور على الموضوع الملامس لحالنا ^^ ...

[نيو ايرفين]

منتخبنا طير حر والكورة عنده ثواره

مع تحيات مصطح كور

أما التلفزيون فالحقيقة نادرا ما اشاهده

اذا قعدت عليه اقعد أصقع في أخوي في الوننج الفين

[RPG_master]

جبتلي الكآبه :raincloud

[Da S.O.S]

you make me sad man
i'm trying to forget that things
and then u remind me
god bless u man
don\t ask me why i'm writing in english coz i don't have an arabic keyboard
about our saudi team
our team in the school is playing better than them
about our tv it's there ia noting new
the chat on the tv is just for the stupid people and really i feal sorry about them
and thaaaaaaaanx for the really funny into
and the important subject

[Kubaj]

اخوي الباحث اسمه ميسون موب ملسون

[البـاحث]

اخوي الباحث اسمه ميسون موب ملسون

يا عزيزي العزيز كنت أحب هذا البرنامج لدرجة كبيرة وأعرف كل شخصياته

والطائر كان يقوم بدوره توفيق العشا واسم الطائر

ملسون وليس ميسون كما يتوهم البعض

بامكانك التأكد اذا رجعت لإحدى النسخ هذا اذا حصلت على وحدة

[FARES360]

Too long topics , too lazy to read

[ثريول]

تصدّق أنك سويت فيني مثل ماسووا بالشاعر اللي قال :

إن مواضيعه اللي في هذا الموضوع كدقيقٍ **** بين الجبال نثروه
ثم قالوا لحفاة **** يالله اجمعوا هالحب بسرعة ترانا جوعانين !!

لحظة باجمّع ... أوكي :
في البداية اعلن إمتعاضي -مثل إمتعاض جورج بوش يوم سمع عن أبو غريب- , إمتعاضي عن ذكرك للمطاعم بين دواعيس موضوعك المهيب .. فقد نكأت جرحاً توه مجروح , هو حرج جوعي الحالي حيث أنني لم أأكل منذ العصر والبطن يصرخ .

ثم أعرّج على مستشفيات الدولة ومستشفيات الحرامية , وأعلن امتعاضي كذلك عن اسلوبهم اللاحضاري مع المرضى , ووضع المال في الأولوية على حساب أي شيء آخر , وأشيد من هنا بناصر القصبي على الدور الخالد "الدكتور عدنان" .

وأخالفك كذلك عن نعتك لنعمان بالمخلوق الفاشل والبطّالي , فيكفيه فائدة أني منه عرفت كيف أكتب حرف العين في أيام الطفولة , ومن هنا أشكر من علّمني هذه المعلومة , ومن هنا كذلك أشكر معاشر البط والوز لأنهم علموني كيف أكتب حرف الياء .

أرى نعمان كمصدرٍ للإلهام , ومصدر للعلم بطريقة جميلة سلسلة هو وذاك الطير الأخضر الذي أظن أن أسمه "ميسون" وليس "ملسون" , والعم عبالله وفاطمة وباقي الشلّة التي كنت أحبها , وكعكي وأغنية : إن قالوا واحد .. أقول بيب .. ألخ .

المهم ماعلينا , نعمان به من الضرافة ماليس في علاء ولي الدين برأيي . لكن العتب كل العتب على ذاك الرسّام الفاشل الذي رسم الصورة , ولكنها تصلح لإخافة الأطفال على أية حال .


هذا بالنسبة لليوم , ولكن لي عودة لموضوع الإعلام لأن في نفسي "حرّة" ودي أطلعها , وعندي كلام كثير فيه , وبكره الجمعة وورانا صلاة وطقوس عائلية قبل الصلاة .

تحياتي .

[البـاحث]

أظن أن أسمه "ميسون" وليس "ملسون"

نو أنت غلطان بعد


ملسون أنا متأكد ولو تآخذها بشكل منطقي اسم ميسون يطلق على الأنثى والطائر كان ذكر !!

وأيضاً ملسون تعني كثير الكلام أو الثرثار وفعلا هذه كانت شخصية ملسون بالبرنامج ثرثار


هذه مقالة كتبت عنه في احد المواقع

بدأت مؤسسة الانتاج البرامجي المشترك لدول الخليج العربي تخرج باكورة الانتاج (مسلسل افتح ياسمسم ) وكان يحاكي شارع السمسم الاجنبي مع تحريف في بعض الشخصيات مثل نعمان بدل البطة الصفراء وبدل السخيف اللي داخل برميل القمامة اعزكم الله كان لدينا ظهور ملسون الطائر الحكيم الثرثار اللقوفي وبقيت شخصية انيس وبدر والضفدع كامل وقرقور
هذا المسلسل حطم المسلسلات المكسيكية وظهر في اكثر من قالب

توقف في القالب الاول فاطمة (المعلمة) و(هشام) الكهربائي و(سعيد وخليل) صاحب المطعم والكافتيريا
وظهر بدلا عنهم (مريم) معلمة و(عبلة) مجسم قطة مثل نعمان

وهكذا كل مرة يتغير مجموعة من الممثلون وبعضهم بقي اساسيا مثل الدكتورة (ليلى) و( العم عبدالله ) بائع العربية و (حمد) النجار وغيرهم كثير ومن المجسمات البارزة كان كعكي المشاغب وعبدو الحنين والمحتال اللي يضحك على انيس وينتقم لبدر ههههه وغيرهم ..



البـاحث

[aoks]

صراحة يا خوباج مااضيف على كلامك شي

والله يخلف على افتح يا سمسم

هههههه اجل الببغاء اسمه ملسون :P

[MoaeD]

اسمه أنيس وليس بدر





اسمه ملسون

محد عطاك ريالك للحين انت هههههه

يعني خليت الموضوع كبر بعرض ما لقيت الا هالمعلومتين اللي ما تسوى من يعرفها...