{ .. نَصْنَصَ يَتَنَصْنَصُ تَنَصْنُصاً !!! .. }

[ثريول]

أخباركم ياشباب؟ , من زمان عن المواضيع في العام ..

أرسين لوبين كتب موضوع عن معنى كلمة بجلي, اللي شافها كلمة غريبة مثل نص الأعضاء. حالها حال مئات الكلمات المنتشرة في مناطق في الخليج أو في الوطن العربي, بس متى ما يسمعها أحد من غير أهالي المكان اللي منتشره فيه الكلمة, يصير وجهه مثل هذا >> ( ).

فكرة الموضوع, هي أن الأعضاء يكتبون بعض الكلمات الغريبة اللي سمعوها, أو يمكن منتشرة عندهم بس هي غريبة على الأغلبيّة.. يعني فرصة لإثراء الـ"فوكاب" الخليجي أو العربي. آنا بابدأ :

الكلمة : تنصنص .. وتعني "تحنطم".. وتعني "تحندى" .. وتعني "يتذمّر بالفصحى".

هالثلاث كلمات وبالذات الأولى من الكلمات قليلة الإستعمال "تنصنص" .. يعني أقدر أقول أنها "شبه منقرضة" لكن بعض الأسر اللي عايشة في جو "شيّاب" مازالوا يستعملونها في النادر هنا في قطر. الثانية "تحنطم" شوي أكثر انتشار, وأظن أنهم يستعملونها في الكويت والبحرين. تحندى كلمة أقوى في الــ"تحنطم", مثال في جملة مفيدة : هالشيبة سندرنا (1) على أدنات الدون (2) يتحندى , مادري يحسبنا ملائكة !.

(1)- سندرنا = أزعجنا.
(2)- أدنات الدون = على أقل شي.

يالله, الباقي عليكم .

[Angel whisper]

غريبه الكلمه ..
بس احنا ترانا نقول "تحرطم"
بس على فكره .. مب احسن لو كبدايه نحدد كلمات ونطلب طريقة نطقها باللهجات المختلفه وبعدين نتوسع بالموضوع؟
وتشكر عالموضوع حلوه الفكره ^^

[.Atlas.]

وتعني "تحنطم"..

بس احنا ترانا نقول "تحرطم"

عندنا ننطقها (تحلطم ) باللام

اما عن الكلمات ..فية كلمة (سحله ) بتسكين السين وفتح الحروف الباقية ...وهي تعني طاسة ...وتعني قرشة...اعتقد تعرفون معناها
مادري صراحة ...بس ماعاد اشوف احد يستعملها

[golden_sky]

أهلن أهلن

فكرة الموضوع, هي أن الأعضاء يكتبون بعض الكلمات الغريبة اللي سمعوها, أو يمكن منتشرة عندهم بس هي غريبة على الأغلبيّة

فيه كلمة ( سنَـايدِي ^^ )

كثير يسألوني عنها

مالها معنى محدد

تجي بمعنى " ما فيه مثله " و " سنافي " و " بايعها " و " راعي مواقف " ... etc

حسب موقعها بالجملة

على كل حال .. تُــشكر على الموضوع ^^

ومثل ما قالت آنجل .. الفكرة حلوة ^^

سلام ^^

[The Noble]

بس على فكره .. مب احسن لو كبدايه نحدد كلمات ونطلب طريقة نطقها باللهجات المختلفه وبعدين نتوسع بالموضوع؟

يس يس

[Mada Mada Dane]

الكلمة : تنصنص .. وتعني "تحنطم".. وتعني "تحندى" .. وتعني "يتذمّر بالفصحى".

اول مره اسمعهم , تحنطم
انا الي اعرفها يتحلطهم وهي الي نقولها

مشكور على الموضوع اخوي

[NsaN]

احنا نقول يتحلطم و في روايات اخرى..يتحرطم..

سندرنا = قذانا (القاف تنطق G)....او حتى أذانا..

بس حتى عندنا بالامارات و بين سكان الامارة و المدينة الوحدة..اللهجات تختلف..
في الفاظ معينة ما يقولونها الا شباب من عايلة فلانية..فيوم تسمع شخص يقولها تعرف انه من ذيك العايلة..
تقريباً كل قبيله لها مصطلحاتها..

مثال:

احنا نسمي (المنشفة): فوطة
في عايلة ثانية تسميها: فودة

و نفس الشي البودر (Powder)..في ناس يمونه فودر..

شكراً على الموضوع المميز..و بانتظار المزيد..

[ثريول]

ههه, السلام عليكم..

أنجل ويسبر ,
هلا بمراقبتنا أنجل, بالنسبة للأقتراح.. أظن أنه طريقة النطق "ناتجة" عن الموضوع, بمعنى أني لقيت أن كلمة "تحنطم" مثل ما أقولها هي "تحرطم" عندكم, وتحلطم عند بعض الشباب هنيه.. وتشكّرات على المرور.

لتل أنجل ,
سْحَلَهَ .. ما دري أحس أنها مرت علي من قبل .. وشكراً على الرد أختي.

قولدن سكاي ,
سَنَايدي.. أنا سمعت ناس يقولون "سنايد راسي" , وبنفس المعنى.. سنايدي يعني أنه -أي اللي تمدحه- ينشد به الظهر.. هذا اللي أعرفه, مادري إذا كان نفس المعنى عندكم.
وتشكر على الرد أخوي .

مادا مادا دان -عليك أسم - ,
مثل ما قلت لك, فرصة أنا نعرف شلون طريقة نطق الكلمات من منطقة للثانية -لاحظ كلمة منطقة, لأن كلمة "دولة" غير دقيقة مثل منطقة-. وشكراً.

ناسان -مبروك تغيير الإسم... بس السابق أحسن - ,
بالنسبة لقذانا .. أحنا نقول قثانا , بالقاف العاديّة ..
وصحيح كلامج عن الاختلاف بين القبايل , عندنا مثلاً أهل شمال لهم كلمات خاصة, وطريقة في الكلام. مثل "ربّك بخير" هذي الكلمة "شبه" حصريّة للعبدالرحمن ال ثاني أهل الوكير.
فودة ..حسب معلوماتي أنها كلمة لأهل ابوظبي.. صح ؟, والبودر أحنا نقول له فودر .
شكراً على الرد, رد مفيد حقيقة.

____________

لي فترة أفكر في طريقة وفترة اختفاء الفصحى وحلول العامية محلها .. وأتوقع أن أكبر تغيير صار في ما بعد 1400 ميلادي, وبالشكل التدريجي. والملاحظ أن التغيير شمل كل الدول العربيّة بلااستثناء.

مثلاً منطقة الخليج, تأثرت بالثقافة الهندية والفارسية والبلوشيّة والبرتغاليّة والبريطانيّة.. واللي بيلاحظ في الكلمات الغريبة بالمقارنة مع الفصحى بيلقى أن غالب الكلمات أصلها من هذه اللغات.. والنادر قادمه من مناطق ثانية. -باحاول أبحث عن بعضص الكلمات وأصولها-.

لكن للي بيبحث, بيلاحظ أن منطقة الخليج بشكل عام و"نجد" بشكل خاص أقل المناطق تأثر بالألفاظ الدخيلة.. وأكثر الألفاظ الغير فصيحة جذورها فصيحة.. يعني كلمات عاديّة تلقى أصها كلمة عربية فصيحة ,.

يرجع ذلك بدون شك لأن منطقة نجد متوسطة, وبعيدة عن الساحل, وماجاها أي احتلال إلا في فترات بسيطة .. هذا غير أن نسبة كبيرة من أهل نجد بدو رحّل.. والمجتمعات البدويّة مجتمعات مصغّرة مكونة من القبيلة إتصالاتها بالقبائل الأخرى بسيط جداً, وهذا يجعل اللغة مصانة في الإطار القَبَلي. لذلك نشوف أن بعض القبائل في نجد وغيرها لها كلماتها الخاصة , ولو أن هذه الكلمات "ذابت" في المجتمع الكبير بصورته الحديثة, فبعضها ببساطة "أختفى" وبعضها أنتشر في المجتمع كله. وموضوع الكلمات القبلية يبغيله بحث كذلك.

هذا بالنسبة لنجد والخليج بشكل عام, لكن لو أخذنا كمثال مصر , فهي تأثرت بألف ثقافة , هذا غير أنها -أي الدولة- أصلاً كانت تحت يد غير العرب, وهذا سبب منطقي مستتر. ومصر مطلة على البحر المتوسط, تأخذ من اليونان والإسبان والطليان والأتراك -الذين حكموها فترة مب بسيطة- وغيرهم وغيرهم ؛ هذا غير الحكم الإجنبي للدولة على مر سنين طوال من أيام المماليك ثم العثمانيين ثم محمد علي وذريّته -وهم من اليونان- إلى الحكم البريطاني.

فلو قارننا بين هذين القُطرين.. لكان من المنطقي لنا أن نرى أن لللغة الفصحى جذورها قوية هنا , وضعيفة هناك.

[NsaN]

ناسان -مبروك تغيير الإسم... بس السابق أحسن - ,
بالنسبة لقذانا .. أحنا نقول قثانا , بالقاف العاديّة ..
وصحيح كلامج عن الاختلاف بين القبايل , عندنا مثلاً أهل شمال لهم كلمات خاصة, وطريقة في الكلام. مثل "ربّك بخير" هذي الكلمة "شبه" حصريّة للعبدالرحمن ال ثاني أهل الوكير.
فودة ..حسب معلوماتي أنها كلمة لأهل ابوظبي.. صح ؟, والبودر أحنا نقول له فودر .
شكراً على الرد, رد مفيد حقيقة.

الله يبارك فيك..عقبالك..
بس اسمي ينطق انسان..

قثانا هل هي نفسها غثانا؟؟
يعني من كلمة غث؟؟

لاحظت انكم بقطر و حتى بالكويت و البحرين وايد تعكسون بين القاف و الغين..
البرتقال يصير عندكم برتغال..
و صغير تصير صقير..
بس تصدق انها قامت تنتشر شوي شوي عندنا هني بالامارات بعد؟؟
بس هالتغييرات البسيطة مالها علاقة باختلاف اللهجات..
هي مجرد تحويرات بسيطة ابتدعوها الشباب اللي قبلنا..
شراتنا احن ببوظبي..ما نقول "مب" (بمعني ليس) نقول "هب"..

و على فكرة..حتى احنا عندا ببوظبي يقولون "ربك بخير"..سبحان الله امس كنت ويا واحد من الربع و كنا نحاول نفسرها..
اغلب اللي يقولونها من العين..و من المنطقة الشرقية (ليوا..بدع زايد)..

بس اكثر اللمصطلحات الغريبة عندنا تكون صادرة من الامارات الشمالية..
لدرجة انه صاروا معروفين بكلمات معينة..
يعني كدعابة قمنا نطلق بعض الالقاب على الشباب اللي من هناك..مثل قوم الـ"عاد نحط اي كلمة من عندهم"..

بالنسبة للقسم الثاني..الخاص بأسباب التغير..انا معاك..
و اشوف اكثر لغة تأثرت بها اللغة العربية عندنا هي الفارسية..
في الكثيييييييير من الكلمات العربية (الخليجية بشكل خاص) انصدمت يوم عرفت انها بالاساس من فارس..
و اعتقد السبب في هذا مثل ما ذكرت..كون مناطقنا ساحلية..
و بحكم التجارة الي كانت تتم بينا و بين ايران كان يصير اختلاط..و احياناً كثيرة زواج من هالبلاد..و بالتالي تتأثر اللهجات..

حتى بعض الاسامي جاية من هناك..مثل اسم المذيعة المتكويتة "حليمة بولند"..

بولند بالعيمي (و بالنطق السريع..حيث انك ما تمد الواو وايد) معناها رفع (As In Lift)..
و اكتشفت بعدين انها اسم منطقة بايران..و اعتقد انها بالاساس من هناك..


احم..حاس اني طلعت شوي عن الموضوع..
اشكرك مرة ثانية على موضوعك المميز..و السموحة عالاطالة..

[ODIN]

غظارة


هههههه هذي الكلمة يجيني اشمئزاز لما اسمعها .. الحروف ابد مو راكبه مع بعض مدري مين الرايق الي الفها


هذي مصطلح ثاني للي قالته ليتل انجل طاسه او سحلة .

[Lena]

حنا نقولها تحلطم مثل ليتل انجل

في موضوع ارسين طرحت انا كلمةوشحيثه ..انتا نفر في معلوم ايس معنى؟


نغْبِقّة ><.. ( ياربيه يا هالنغبقة) للبنت نطقها الي كتبته
يع الكلمة مقرفه نطقاً ...بس تعرفون وش معناها؟؟ هي نطلقها على بنت اختي الصغيره


ابجيكم انشالله بعدين واقول معنى الكلمتين هذا اذا ماعرفتوه
وبعد ابجي ومعاي كومة من الكلمات الغريبه..انشالله.. القصمان عندهم كنز وافي منها ^^ سلام

[أفلاطون]

في موضوع ارسين طرحت انا كلمةوشحيثه ..انتا نفر في معلوم ايس معنى؟

هل تعني.. وش قصة اهل امّه؟

ـــــــــ

(خَنْبِقَهْ) القاف تنطق زي القاف في (برجر)..

استعمالها: كلامك خنبقه..وش قاعد تخنبق

معناها..كلام موب مفهوم..خرابيط ..الخ

[eyes4ever]

اما عن الكلمات ..فية كلمة (سحله ) بتسكين السين وفتح الحروف الباقية ...وهي تعني طاسة ...وتعني قرشة...اعتقد تعرفون معناها
مادري صراحة ...بس ماعاد اشوف احد يستعملها

سحـــــــــــلة...قبل كـــاانت تنطق بمعنى (االطـــااسة)... أالحين االكلمة دارجه لــوصف نوعــية من االشبـــااب.
لـــو جــااء وااحـــد وقــاال لك (أانــت سحـــلة)!!.. فلاا تجـــااوبــه إالاا بطـــرااق!!..
سحـــلة في (سلم االشبـــااب)... يعني مـــاا عنـــدك أاحـــد..

يرجع ذلك بدون شك لأن منطقة نجد متوسطة, وبعيدة عن الساحل, وماجاها أي احتلال إلا في فترات بسيطة .. هذا غير أن نسبة كبيرة من أهل نجد بدو رحّل.. والمجتمعات البدويّة مجتمعات مصغّرة مكونة من القبيلة إتصالاتها بالقبائل الأخرى بسيط جداً, وهذا يجعل اللغة مصانة في الإطار القَبَلي. لذلك نشوف أن بعض القبائل في نجد وغيرها لها كلماتها الخاصة , ولو أن هذه الكلمات "ذابت" في المجتمع الكبير بصورته الحديثة, فبعضها ببساطة "أختفى" وبعضها أنتشر في المجتمع كله. وموضوع الكلمات القبلية يبغيله بحث كذلك.

كــلاامك صحيح..


في (االجنــوب)..أاي جنــوب نجـد، نحصــل قــباائل (قطحـان) و(الدواسر).. يسمــون (الأاطفــاال)... (عـــواال)!.
في (الوســط).. نجـد قبـائل مثل (عتيبة) و(مطير)... يسمــون االأاطفــال ( ورعــاان)..
شمـاال نجـد.. منطقة القصيم.. عنــدك (االقصمــاان).. يقــاال للأاطفـاال.. (غــراان).. ومفـردهـاا.. (غــر)..

في االغــاالب االإاختــلااف بين هـذه االقبــاائل يكــون بسبب (تضخيم بعض الحـروف).. مثـلاً هنــااك بعض القبــاائل التي تنطق االيــااء مضخمــاًا.. فتشعــره أانــه أالف... لتصبح كلمة مثل بيض إالى (بــااظ).. وليس (بـااض)..!! والله أاعــلم!.

[Electro M]

عندنا ننطقها (تحلطم ) باللام

و في رواية اخرى
يبرطم
مأخوذة من البراطم و هي الخشة

[.Atlas.]

في موضوع ارسين طرحت انا كلمةوشحيثه ..انتا نفر في معلوم ايس معنى؟


نغْبِقّة ><.. ( ياربيه يا هالنغبقة) للبنت نطقها الي كتبته
يع الكلمة مقرفه نطقاً ...بس تعرفون وش معناها؟؟ هي نطلقها على بنت اختي الصغيره

مو كأنه هالكلمة مركبة ..وش حيث
وأعتقد ان معناها ..(شمعنى أو ليش)<<<أدري تحليل عبيط

اما الثانية أعتقد أن معناها ...مزعجة

غظارة


هههههه هذي الكلمة يجيني اشمئزاز لما اسمعها .. الحروف ابد مو راكبه مع بعض مدري مين الرايق الي الفها


هذي مصطلح ثاني للي قالته ليتل انجل طاسه او سحلة .

نفس المعنى عندنا...مادري شلون نسيتها ...ونستخدمها قبل..بس اللحين هالكلمة شبة منقرضة

و في رواية اخرى
يبرطم
مأخوذة من البراطم و هي الخشة

معروفة عندنا..بس استخدامها أقل من كلمة تحلطم

مادري إذا تعرفون كلمة (أرضخ )<<ماني متأكدة من طريقة الكتابة
بس معناها ...أضرب او أطق