قدر الله علي .. وفتح جنبي محل ابو ريالين .

[Kubaj]

السلام عليكم ورحمة الله وبركاته

أما بعد ، أعتقد بكتابتي لهذا الموضوع .. أني أتحدث بإسم جميع الشباب الرازح تحت

سيطرة للعوائل فقط .. وبديت احس أن الدعوة فيها مافيا .. لإنه فيه منظمة جديدة تحت إسم

محلات كل شيء بريالين

هي حركة جديدة إندثرت منذ سنوات عديدة وهاهي تعود بعد

أن تم إحيائها من قبل مصدر مجهول ..

ربما يجول في خاطرك عزيزي القارئ.. سؤال اعتيادي

" طيب وش فيها بالعكس أسعار رخيصة و كل شيء بريالين يعني وين المشكلة ؟ "

أحب اقول لك .. يا عزيزي .. بإن المسألة أكبر من درزن صحون بلاستيكية

تم شحنها من ميناء سانغ شوا تيبنياكي ويذ مشروم الصيني .. بريالين فقط ..

لا لا .. المسألة فيها غاية .. والغاية هي أم الوسيلة كما قال المفكر الكبير

أبو وليد الذي تنبأ بنزول السوني 3 قبل عدة سنوات ..

الغاية أعزائي .. هي تدمير الشباب .. نعم نعم تدميرنا بكل ما تحمله الكلمة من معاني

وانا لا أقصد هنا فئة محددة من الشباب لا بل المصيبة أكبر

أنه حتى الشباب المتخرج اللي يبدأ مشروع حياته ك على سبيل المثال مقهى ..

ويروح عند مهندس ديكور فاشل يقلب له المقهى الى مشتل .. ولمن لا يعرف منكم معنى كلمة مشتل

هي محل محبط للأطفال .. كله فسائل وسماد ونباتات خضراء كثيرة .. وعلى وقتي كان نبات الصبار

مسموح به .. الى أن حدثت الحادثة المآساوية بوفاة السيد بلونة وشركاه ..

الوريث الرسمي لشركة غندور لتقليد جميع أنواع الحلويات في العالم ..

وبعد أن يأتي ذلك الشاب ويفتتح الكوفي شوب .. ويبحث عن أكثر الأسماء رومانسية

وشاعرية .. ليحاول أن ينقذ مايمكن إنقاذه بعد كارثة المصمم الكوراثي ..

ويبدأ اول يوم من العمل الفعلي .. مع طاقم العمل الهندو-فلبيني وهو في المقدمة ..

يحمل أفكار عديدة .. أولها سعودة الطاقم بعد النجاح الذي يمني نفسه به ..

وبدء سلسلة من الكوفي شوبس .. ينافس بها ستاربكس .. ودكتور كيف الحال وغيرها

من المقاهي الذائعة الصيت حالياً ..

اليوم : الأربعاء

الوقت : الثامنة صباحاً .

المناسبة : أول يوم عمل رسمي للمقهى .

العمال يقومون بعملهم على قدم وركبة .. وصاحب المحل مبتهج متفائل على الرغم من حرارة الجو

الطبيعية بالنسبة لمواطن من مدينة الرياض ..

يتصفح الجريدة اليومية الأولى في مدينة الرياض <<< مسوي يلمح

ويحتسي كوب من الموكا - آل باتشينو الذي إخترعه هو بنفسه .. لعشقه الشديد للقهوة ..

وفجأة ...........................

توقفت حركة السيارات .. وبدأت الرياح تهب .. والجو يبرد بصورة غير طبيعية !!!

وإذا بذلك الصوت البعيد .. تسبقه عاصفة من الغبار - شلون جت ذي مدري -

وبعد إن أنقشع الغبار .. ظهرت تلك الديّنا ولمن لا يعرف ماهي الديّنا ..

هي سيارة أوتوموبيل .. ذات غمارة طويلة جداً .. يعني سيارة شحن ..

وخلف مقعد القيادة .. يقبع ذلك الشخص العملاق وسحنته تحكي قصص بلقيس ليل نهار ..

وبجانبه عدة أشخاص نجحوا في تكوين خط وسط محكم ..

وفي الخلف أدوات كثيرة جداً .. وكلها بلاستيكية ..

وفوق هذه الكومة من الأدوات يقف ذلك الشايب وهو يتغنى بالأناشيد الشعبية ..

واضعاً يده فوق حواجبه الكثيفة ليرى أسرار الطريق .. من مطبات وقطاوة .. وحفر .. وناس .

توقفت الدينا بحركة ررررراااااائعة .. بعدما أخذت مساحت ثلاثة مواقف من امام مقهى اخينا في الله

الذي توقف ورحب بالجيران الجدد بنية طيبة صافية ..

وفي لمح البصر .. بل وفي غمضة جفن شخص توه شارب جالون كافيين ..

فتح محل كل شيء بريالين .. وكان ذلك في وقت قياسي قدره .. خمسة ثواني إلا ربع الثانية ..

والشايب لا يزال واقفاً في نفس مكانه .. مع العلم بأن الأشياء التي كان يقف عليها

أصبحت داخل المحل ..

دلف الشاب الطموح الى محل كل شيء بريالين وهو يتذكر ذكرياته الجميلة في هذه المحلات

عندما كان طفلاً يعشق الأكواب البلاستيكية ..

وقال : السلام عليكم ..

مضت لحظة صمت .. وبدأ صوت الرياح من جديد .. والجو يزداد برودة ..

حيث رمقه جميع العاملين بالمحل .. بنظرة باردة ..

وكان الشايب بطريقة أو بأخرى إلتف في مكانه نحو الشاب وهو ينظر ..

فتح جهاز لا سلكي وصوبه على الشاب وضغط زر مكتوب عليه تحليل وظهرت النتائج التالية :

1 - زبون . . . . . . . . لا .

2- شخص مضيع بيتهم .. أو وزارة التخطيط .. لا .. لكن محتمل .

3 - صاحب المقهى الملاصق لمحلنا . . . . نعم !!!

وفجأة ظهر تحذير على شاشة الجهاز اللاسلكي وكان على هذه الصيغة :

خذ الحذر خذ الحذر .

وأشار الشايب للبقية بعينه إشارة ذات مغزى ..وبشكل آلي رفع كل شخص بالمحل

خنجراً صغيراً كان مختبئاً في مكان ما ..وتم توجيهه نحو الشاب الطموح البردان ..

الذي تراجع الى الخلف .. بعد أن تم تهديده بكلمة رنانة مفادها :

قدام ..قداام .. إرررررجع !

فهرب الشاب بسرعة .. الى محله وقلبه يرقص خوفاً ..

وفي نفس اليوم .. بعد صلاة العشاء .. كان الإفتتاح الكبير لمحل كل شيء أبو ريالين ..

وكان هناك عروض ليزر وموسيقى روك صاخبة .. ومساهمات

من جميع مطاعم المندي والمظبي بالجوائز التي يسيل لها اللعاب .. حيث قدم المحل

جائزة .. مثلوثة مجاناً - مع السلطات - لأول خمسين شخص يدخل المحل ويشتري شي بثلاثين ريال

ومثلوثة مجاناً - بدون سلطات - للشخص رقم واحد وخمسين .. وأي واحد يجي بعده

ياخذ كوبون شرائي هدية بقيمة سبعة ريال من هرفي اللي مدري وش دخله .

وهاهو هناك .. الشاب المسكين .. مكلوماً .. يغمس الصامولي البارد في اللبن الدافئ ..

ويأكل والدموع تنهال من خشمه .. بعد أن تم إحتلال جميع المواقف لزبائن أبو ريالين فقط ..

وقرر يومها .. أن يحاول بكل ما أوتي من قوة .. لتدمير هذا الكيان الشرير .. المسمى بكل شيء بريالين

ولكن هيهات .. هذا موب محل واحد .. هذولي وراهم ظهر .. إلعب بعيد انت ومقهاك ..

بدأ الشاب يدور في المناطق المجاورة .. وشاهد بأم عينه .. محلات كل شيء أبو ريالين

تحتل كل شارع وكل موقف .. لدرجة انها تجرأت وفتحت محل كل شيء أبو ريالين

دورين !!

ياللمصيبة .. الشق أكبر من الرقعة ..والكوفي والنسخ بعد ..

بعدين هدت أعصابه يوم شاف هرفي فاتح دورين ..

وأستشرى الوباء .. محلات كل شيء أبو ريالين .. في كل مكان ..

وليتها تبيع كل شيء بريالين .. الا أحلف أن ثلاثة أرباع المعروضات بالمحل تتعدى العشرة

والعشرين ريال بالريوس .. اللي مايعرف وش يعني ريوس يعني ريفرس ..

طبعاً .. ريفرس باللكنة السعودية الأصيلة اللي أفتخر فيها وهي تأويل لكلمة reverse

إستمرت معاناة الشاب المسكين .. حاول أنه يرسل الفلبينو المرتبين على طرف الرصيف

ويأشرون بقائمة الطلبات للسيارات اللي تجي ماشية 80 - 100 ميغا هيرتز في الساعة ..

يتبع

[Kubaj]

يعني مسألة انه الواحد بيوقف مستحيلة .. خصوصاً .. بعد أن تحول الطريق

من ثلاثة مسارات بقدرة قادر الى مسار واحد في إطار مشروع التوسعة العكسية للطرق

وصار كل رصيف في هذه المنطقة يحتل ثلاثة ارباع الشارع في حركة ررررررراااااائعة

للإستفادة من المساحات لتخفيف حمى الزحمة التي خنقت الرياض وإستسلمت من أول عدة ..

طبعاً لإننا ما نسوق سيارات والعياذ بالله .. بل المشي تحت درجة حرارة تتعدى الخمسين

كيلوجرام أصبح هواية الشعب والمقيمين الوحيدة في هذه المدينة ..

وكانت الطريقة الوحيدة للطلب من المحل هي مشابهة لطريقة أخذ المهمات في

مسلسل Last Exile حيث كانوا يأخذون المهمات اللي كانت على هيئة رسالة

من أشخاص واقفين على سفح جبل ويجيك ماغط بالطيارة ويلقط الرسالة

فكانت هذه الطريقة الوحيدة اللي تعامل معها قناصين محل كل شيء أبو ريالين بكل أريحية ..

بأسلحة الساكتون التي تعمل بالطاقة الشمسية .. مما أثار تعجب عاملي النظافة

في صباح كل يوم .. لماذا كل هذه القوائم امام هذا الكوفي شوب تحمل نفس الشق

في نفس المكان .. بل بعضها وجد عليها قطرات من الدم .. والقليل من الأصابع .. وعين واحدة .

وبهذا .. كتب على مشروع الشاب الطموح الفشل الذريع .. ليس لذنبه هو .. بل لعوامل مهمة ..

نفوذ كل شيء أبو ريالين .. و المصمم .. وأمانة مدينة الرياض .. وهرفي .

والله يدي تحكني على هرفي .. اللي سرق شعار مطعم مزار المسكين ..

لكن خيرها بغيرها .. تصبحون على خير .. مدري تمسون على خير ..

دمتم دائماً .. بكل خير . وعافية .

[ODIN]

ابو رياليييين !!!


هذا اكبر حرامي بالعالم ...


يعني يكفي ذاك اليوم مريت بموقف وتجربه قاسيه معاه !!!


كنت ماشي بسيارتي وانا بوسط السواقه وابحر في التفكير بقطوتي المسكينه .. كل القطاوة في العالم عندهم العاب وكور صوف الا قطوتي المنحوسه .. ماابي اعيد فيها ذكريات طفولتي الحزينه ماكان عندي الا لعبه وحده .. وانا في وسط معمعة التفكير .. اذا بوجهي يصطدم بمحل ابو رياليين !!!

وقلت بس هذا الي عنده الحل ..


طبعا دخلت محل ابو ريالين وحاط في بالي اني راح ادفع رياليين بس ..


لكن المصيبه اني طلعت منه بثلاثين ريال !!! كيف صارت مادري


صدقوني فيه غش وخداع للزبون ومستحيل اكبر محاسب يعرف كيف يسرقونك هذه السرقه العلنيه

[الكونت دراكولا]

وكان هناك عروض ليزر وموسيقى روك صاخبة

صاخبة ؟ اقول عن الغلط ..

[I`m HeRe]

بعدين هدت أعصابه يوم شاف هرفي فاتح دورين ..

ههههههههههههههههههههههههه اما هرفي ذا ما بقي احد ما يذب عليه
لو انه شخص كان اخذ انواع الحسنات من هالعالم

اما عن المحور الرئيسي واللي هو ابو ريالين
اول كان في مكه محلات اصغر من البقاله من هالقبيل
بس عشر محلات جنب بعض كانت مسيطرع على المعتمرين دااايم مليانه حتى الفجر مدهرين

طبعا أنا اعتقدت ان هالشي بمكه فقط ممكن انه ينجح نتيجه للوفود من خارج المملكه

لكن بعد ما شفت في الفتره الاخيره كثره هالمحلات بالرياض وكيف تسبب زحمه بالخط<<ولا اللؤلؤه تسويها

اكتشفت ان الوضع اكثر من ما كنت اتصور

لا والأدها والأنكا من هذا كله انك تشووف اللوحه كل شي بريالين كبر الحمار وبزاويه مكتوب بخط ما ينشاف و 10 و50 و100
يقالهم لأحقاق الحق وإقامت الحجه على كل من تسول له نفسه انه يتكلم

لا يوم العيد اعوذ بالله السيارات توصل للسيد الثاني من الشارع

وانواع الزرف من العالم ومع كذا يطلع الزبون وهو يعتقد انه الرابح الاكبر من هالعمليه

[Master ArNab]

^^

ما شاء الله عليك أخوي .... إسلوبك ممتع و جعبتك مليئه , وقدره إبداعيه في تصوير الفكره .. ما شاء الله

مضت لحظة صمت .. وبدأ صوت الرياح من جديد .. والجو يزداد برودة ..

... ويصير لونه أبيض ...
( دائماً نشوفها بمواقف الأنمي . لحضة صمت , صوت رياح ... هههه ... لا تنسى أن تضيف إضافة سيلان الدم من الأنف في المواجهات الحرجه .. )

وكان هناك عروض ليزر وموسيقى روك صاخبة

ذكرتني بـ full moon

أما محلات أبو ريالين ... المفروض تمنع ...
- لما تسببه من زيادة الإستهلاك لشعب غير منتج وإستهلاكي للأسف السديد
- ترويج السلع الطقطاقيه , اللي ممكن تلقاها مكسوره قبل لا تشتريها

أنا المحيرني , كيف يجيبون من الصين ؟ اللي أعرفه من أكثر من شخص انه أي شيء يجي من الصين يصادر بغض النظر عن محتوى الشحنه . هذا يعني انه الصين في البلاك ليست

إحتمال البضاعة تمر بدوله ثانيه قبل لا توصل السعوديه. يمكن يستخدمون الشحن البحري

[HArb200]

مقهى

اثرت افكاري وشجوني

اعتقد ان المستقبل .. هو للمقاهي العربية .. تجهز لك القهوة بالطريقة العربية .

وانا اظمن لها النجاح 100% ..

و ارحم من الكباتشينو ولا النسكافه .. ياااااااااساتر .. كلها سكر او مبيض .. وبدون السكر .. ماتقدر تشربها.

اما ابو ريالين .. والله انه يفك ازمات .

صح انهم نصابين .. بس والله لولا فقر هالعالم .. او على الاقل حاجتهم للتخفيضات .. ماشفتها تدهر زي كذا .

[Kubaj]

وزي مانشوف جميعاً .. معنا أحد ضحايا هذه المنظمة التي سببت الإرهاب الإقتصادي وهزت

كيان الإقتصاد السعودي الصلب .. المشرف القدير أودين ..

والله انا أتعاطف مع حالتك .. يعني ثلاثين ريال من محل أبو ريالين ؟!

الحين بدأت أقدر إيكيا و آي دي ديزاين - ولو ان الأخير عليه أسعار كونية - كان الله في عون الجميع .

الكونت كوكا كولا

أصمت أيها البرجوازي .

I`m HeRe

ياخي .. هرفي وشركة غندور .. ومحلات كل شيء بريالين .. ومنتخبنا بينهم رابط ..

فيه شيء معين .. مدري هي .. السياحة .. ولا التقليد ..

انا انتبهت لحركة الأسعار الجانبية اليوم .. لا وكاتبينها بالذهبي بعد ..

يقال لهم الأسعار الذهبية .. اللي يقهرني .. أن تصاميم محلات ابو ريالين .. أطلق من إعلانات هرفي

بمرة ونص .. هذا اللغز اللي محيرني .

Master ArNab

حياك الله عزيزي .. أشكرك على المديح اللطيف ..

بالنسبة لسيلان الدم من الأنف .. هي مسألة محرجة بالتأكيد ..

متى ما تفاديت ال eye contact او الأشياء اللطيفة التي تمر امامك كل يوم ..

فأنت بخير وعافية .. ولا .. إلبس ثوب شتوي داكن ، بالنسبة للصين ..

شلون في البلاك لست .. ومدينة الرياض مكتوب على كرتها made in china ؟ .

[Master ArNab]

متى ما تفاديت ال eye contact او الأشياء اللطيفة التي تمر امامك كل يوم ..

ههههه ..

شلون في البلاك لست .. ومدينة الرياض مكتوب على كرتها made in china ؟ .

أقصد , في حالة طلبيه شحنة شخصيه لي أو لغيري . يصادرونها الجمارك علطول ومن غير تفاهم .. صارت لواحد أعرفه ...

أما البزبس والطلبيات للشركات .. إحتمال هذا اللي يمر ويستثنى .. بعد بهذلة البيبر ورك الحكومي ودفع الجمرك

[smigle]

بصراحة نحن نستنكر ونشتنجب و نستستنبع بشدة على هذا الوضع المسآوي الواجد واجد يعور الكلى.

نحن الشعب القطراوي نتساند وندعمكم بكل ما أوتينا من( في أكس آرات) يا أخواننا في الرياظ (وعلى فكرة رياظ يعني رياظة وأحنا نحب الرياظة ونسوي ألمبيادات ودورات ودوريات شرطة بس ما نمارس الرياظة على قولة عبد الحسين عبد الرضى حياكم في الدوحة)

على العموم ما راح أطلع برى الموضوع.

أنا لما قريت الموظوع لم يبقى في أنفي أي دمعة لأخرجها. فالوضع والموضوع وكاتب الموضوع يَنِمّونَ عن حالة جيوفيزيقية لا محل لها من الأعراف الدولية والمناخية.

أنشاء اللة تجد صرختك يا أخي الغالي الآذان الصاغية . أقول ليش ما تفتح كوفيشوب (كل كوب قهوه بريالين, وبالمرة تهدم الطوفه بين محلك ومحل كل شي بريلين وتسمون محلكم (كل وتسوق بألربع ريال)

بس على فكرة أسلوبك مرة مرة حلو من زمان ما ظحكت من قبل (خصوصاً ردك على مستر كوكاكولا). الله يخليك إذا عندك أي مقال سابق قول لنا علية.

معليش لازم أترككم الحين علشان أمسح الدموع اللي غرقت شنبي وفمي وحظني (بس غريبة الملوحة شوي زايدة هاللمرة؟؟؟

[Angel whisper]

يا أنها هالمحلات سالفه ..
حتى عندنا احتلت وايد شوارع..
مره دخلت واحد .. الفصول وما يسوي ..
ياخي حسيت كأني دخلت الهند ولا جنوب شرق آسيا :|
*موقف مشابه للي يستوي في ثاني حلقه من yakitate japan يوم يسوي الخبز الهندي XD*
وغير عن هذا الواحد ما يضمن بضايعهم .. يعني شامبوهات ومواد تجميل وبطاريات بريال وبريالين ... الله يعلم شو من البلاوي فيها !!
ومشكور عالطرح الرائع


اودن:
انا شاريه لعبه وحده حق قطوتي بـ15

[نيو ايرفين]

ويأكل والدموع تنهال من خشمه

خشمه!! هههه

.................................................................................................

انا حصلت بعض الفنايل مكتوب عليها مصايب ما ادري كيف تدخل البلد

[Yamato]

يا اخي.. هذا يعتبر تطور ومن دلالات الرقي..

مثلا احنا عندنا ولله الحمد مثل هالمحلات... وعلى فكرة (لا تطيح من الكرسي اوكيك).. هالمحلات بنفس احجام السناتر وبدورين كمان...

ما اقول غير الحمدلله اني ما ادخل الا الحلاق ومحل الالعاب..

[Kubaj]

خشمه!! هههه

.................................................................................................

انا حصلت بعض الفنايل مكتوب عليها مصايب ما ادري كيف تدخل البلد

تدري .. على طاري الفنايل .. مرة شفت واحد من الشباب .. يدربي رأسه جنب مركز صحارى ..

وعلى فنيلته مكتوب .. Gay and proud وهو مشخص على باله cool

[نيو ايرفين]

تدري .. على طاري الفنايل .. مرة شفت واحد من الشباب .. يدربي رأسه جنب مركز صحارى ..

وعلى فنيلته مكتوب .. Gay and proud وهو مشخص على باله cool

اجل Gay and proud

هذي تنبلع لكن انا شايف بعيني بلوزة مكتوب عليها Se.. Girl !!