ياااا حسرة XD

[ODIN]

ههههههه بدون سلام ولا مقدمات


صارلي موقف ما مر عليه عشر دقايق من الحين بالضبط وللحين ميت ضحك مو قادر اسكت هههههه

وانا على الجهاز الحين السالفه تقرقع بقلبي ابي اقولها لاحد .. مافي الا انتم يالمنتدى قدام وجهي الله يعينكم

ابد باختصار السالفه .. انا وصديق لي عندنا طموح نسوي وكالة تصميم واعلان ( بعد ما تسمعون الموقف راح تقولون مو وجيه وكاله انتم ))

صارلنا تقريبا شهرين واحنا نجمع بالمصممين حتى نغطي كافة المجالات .. فوتوشوب و ثري دي ومونتاج فيديو حتى هندسه صوت !!!

وبعد كفاح طويل من تجميع المجموعه ..سمينا المجموعة

مجموعة Odinya للتصميم والابداع

وانواااااع الحماس مشعللين


ويجينا اليوم أول مشروع لشركتنا الكبييييرة


طلب مننا دكتور بكلية الطب تصميم بحجم A0 يعني حول المترين مساحته

المشروع الاول كان جدا خطير ودقيق .. لازم نسلم البضاعة ( التصميم مطبوع ) الساعه 10 بالليل لانه راح يحتاجه ضرووري الساعه 7 الصبح من بكره ..


وهذي خدمه جديده بشركتنا توصيل طلبات مجاني in:

وابد المشروع الاول صار بوجهي انا وصديقي .. سوينا التصميم بساعتين تقريبا خلصناه الساعه 9 وجلسنا نص ساعه نتخيل الفلوس الي راح ناخذها بالبدايه ومستقبل شركتنا المزدهر


صارت تسع ونص .. وكلفت خويي يروح للمطبعه ويطبع التصميم بعدين يروووح طيران لبيت الدكتور ويسلمه التصميم


وعند السيارة قبل ما يروح خويي.. صار بينا نقاش قوي كم نطلب فلوس على التصميم هذا ...

مع العلم انه دكتور بجامعه ودكتور بمستشفى وسعودي بعد شوف كم راتبه يطلع .. يكفي جواله ولا عمره انقطع

لذلك قلنا لازم نطلع الفلوس من خشمه

وراحت ربع ساعه بس عشان نتفق على المبلغ ..

بعدها راح طيران خويي وطبع التصميم .. بـ 90 ريال ..


ههههه والله يرجه من وراي راح سوى فاتورة رسمية عليها شعارنا وزحمه وكتب عليها 400 ريال


ويروح على طول لبيت الدكتور .. ولما نزل من السيارة ...



قدام بيت الدكتور .....





كان اليوم المغرب نازل مطر .....


ومع الهواء القوي ... طـــــــــــــــــــــــــار التصميم ويطيح ببركة ماي من مطر


وطارت معه كل امالنا وطموحاتنا


هههه السالفه ما انتهت الى هنا .. لاننا التزمنا بالوعد وقلنا لأول زبون ان التصميم راح يوصله اليوم ...

دق خويي على الدكتور عشان يطلعله ...


وعرض له التصميم وكله مبلل ماي والالوان خربت واختلطت مع بعض


وقاله الدكتور / .. ايش هذا

صديقي / التصميم


الدكتور / وش صار فيه ..

صديقي / ابد طاح بالماي .. اعذرنا من جد منحرج منك

الدكتور / وش اسوي فيه .. وهقتني الحين وش بسوي بكره ..

صديقي ( نسيت ما اقولكم ان وجهه صبيه ما يستحي )/

والله تعبنا على التصميم .. وخســــرنا على طباعته .. وشاء الله وقدر انه يطيح بالماي ..

بعد ما حقد الدكتور وبغى يذبح خويي .. انكسر خاطره وعطى خويي 50 ريال


ههههههه وخويي شين وقوة عين .. قاله الطباعه كلفتنا اكثر من كذا

وراح الدكتور .. ورمى التصميم بزباله الشارع .. وقال لا يهمك اذا احتجت تصميم ماراح انساكم مرة ثانيه ...


===========



وهكذا يكون الفشل بداية مجموعتنا الطموحه ... وأول تصميم لنا ينرمي بالزباله ...


جمعت الشباب وخطبت فيهم خطبة عشواء .. سوف تخلد في تاريخ الشركه للأبد ..

وقلت لهم ولا يهمكم .. صحيح ان اول مشروع لنا فشلنا فيه وانرمى بالزباله .. لكن الفشل بداية النجاح .. ومن كانت بدايته بالزباله كانت نهايته بالمحرقه .


صحيح اننا سوينا التصميم هذا في ظروف صعبه وامكانات معدومه .. ويكفي اللابتوب الي صممنا عليه متسلفينه من واحد من الربع ..



لكن ولا يهمكم انا اعدكم باذن الله بمستقبل مشرق .. بس انتم خلوكم وراي واتكلوا علي ولا تصميم راح ينقط بزباله بعد كذا


احنا شباب موهوبين ومافي احد معطينا وجه .. وش نسوي هذا قدرنا الله قطنا هنا : ( لكن اتكلوا علي انا بطلعكم من هذا المستقبل المظلم ..
-------------


وهذه بداية مجموعتنا الكريمة .. اول تصميم لنا ينرمي بالزباله


ملاحظة /

نسيت ما اقولكم ال 90 ريال حقت الطباعه تسلفها خوينا من امه

شركتنا صارت مديونه والله يستر ما نعلن افلاسنا ونخسر كل حلالنا

[محمدS.M]

ههههههههههه
صبابا
بالتوفيق العيب مش في الفشل لكن العيب في الاستسلام للفشل
ولا يهمك اودين عادي بل جيتس كانت بدايته فاشله اهم شي استمر
صحيح وين التصميم ارفقه خلينا نشوفه يستاهل 400 ريال او لا
مره اخرى يجب عليك ان تتفق مع الزبون على السعر قبل البدء في العمل

[Yamato]

لوول..
عيل انرمى بالزبالة يا فتى الاستشارات... (معليش على ضحكة الشماتة.. ترا الحال من بعضه.. احيانا)

وعلى قولة مراقبنا ام اس ام

مره اخرى يجب عليك ان تتفق مع الزبون على السعر قبل البدء في العمل

لازم يكون في مقدم.. مثل ما في مؤخر...

ومشروعك عليه العوض.. خيرها في غيرها... ما دام بتقود فلول المصممين..

[darkitp]

يحليلك ..

موب مشكلة ان اول تصميم ينقط بالزبالة , عادي يصير فيني أيضا نفس الحالة ..
فعدة تصاميم تم رفضها و نقعد نصمم شي جديد و احلى كل مرة ..

المشكلة وين تكون ؟
ان كان المشروع ما يعتمد على الكمبيوتر بشكل اكبر فما نقدر نتراجع عن الخطأ
و لازم يكون الشخص متدرب عليها كحرفة وطنية قومية , و أي غلطة يحاكم و تقطع رقبته ..

و معليش , خيرها بغيرها و تكبر الشركة و تاكلون وحدة غيرها ,,

[Lezard Valeth]

يلا ما عليكم تعوضونها ان شاء الله , ويا معود لو مكانك جان قطيته بالزبالة مثل ما قط التصميم

طريق الالف ميل يبدا بخطوة , keep going guys والله يوفقكم ^^

[sT]

خخخخخخخخخخخخخخخخخ

ههههه والله يرجه من وراي راح سوى فاتورة رسمية عليها شعارنا وزحمه وكتب عليها 400 ريال

هذي العقوبة .

[ODIN]

سوبر مان /

هذا نظامنا اصلا احنا متفقين اننا ناخذ دفعه اولى قبل كل شي .. لكن هذا اول مشروع لنا وما شعرنا باننا مستقرين فاما جت على بالنا ..


وبالنسبة للتصميم .. كاتب عليه رقمنا عند الشعار .. وبعدين اخاف تشوفه وتفهم غلط اني ارقمك يالحلو


Yamato //

اضحك اضحك وتشمت بتشوف ان شالله هوليود عربية بنسوي بالمستقبل


darkitp /

شفت كيف يا دارك طاحت مطايحي .. انا طحت بصخر الحين وخسرت بالسوق ..



عندك سلف؟



D-Ken/

ههههه انت فاهمني .. انا اكثر شي رفع ضغطي انه رمى التصميم بالزباله .. احنا شركة اودينيا ينقط لها تصميم بالزباله !! والله اهانه صراحه ... بس وش نسوي سخرية القدر


ScOrpi[0]n/

تصدق يمكن عشان كذا



مشكورين يا شباب على ردودكم وزيارتكم الطيبه

[ODIN]

صح ما باركتولي اول مرة استعمل الابتسامة هذه ---> XD

احس اني كشخه و برستيج لما استعملتها

[Ralf]

هههههههههههههههه

ماشاء الله مسوين شركة وانا ما ادري

المهم اخوي ODIN في مثل يقول طريق الألف ميل يبدأ بخطوة

لهذا خليك متنفائل

سلام

[Empress uae]

مسكين ODIN تعال أنا بعطيك ميزانية زينة. باخذها من أموال الدولة و إن شاء الله ما نقصر معاك.


بس تضمني للشركة التي أسمها "إمبراطورية ODIN"


و نسوي تحالف و نقضي على الأعداء <<< متأثرة من الأنمي.

[MadlucK]

هههههههههههههه ....يعني الحين انتو مطلوبين 40 ريال لام الرجال!! ....الله يعينكم .....

بس المشكله ما لقيتو غير صاحبكم هذا يوصل التصميم .... ما حصلتو واحد اكشخ منه >_<

بس اللي استفاد بالاخير تدرون من ؟ ......الزباله طبعا لانها حصلت على التصميم ببلاش ههههههههههههه

[leopard_1]

ههههه
هذا اللي ما عنده حظ
ومثل ما يقولون لو كان الحظ رجلا لقتلته
على العموم تعيش وتاكل غيرها

[asf4ever]

طلعت خطييير وأنا ما أدري XD
الله يفك ازمتكم وديونكم
بس إن شاء الله تكبر شركتكم وتصير (ديونكم بالملايين):P
بس هذا أخرة الظلم تعب ساعتين بـ400 يالمستغلين -_-
&
Keep up the good work

[Pr.Game]

يالله فشيلة من أولها ><
بعدين المطر شلون طاح على التصميم ومش معقول ما عندكم نسخة سابقة تسوون غيره وتعطوه للدكتور ..
على كل حال الله يعينكم والمرة الجاية بطلوا من خدمات التوصيل خل الزبون يجي يستلم بنفسه
والديون 40 ريال طلعوها من مكافأة الجامعة .

[Angel whisper]

اودينيا؟ ذكريات والله ..

بس يحليلكم والله كسرتو بخاطري .. لو انا .. كنت الصراحه بصيح من القهر T_T

ههههه ويحليله ربيعك متدين من امه .. T_T

يلا الله يوفقكم .. وان شاء الله هالشي ما بيستوي مره ثانيه .. وانتبهو عاد ..

وبس من هالـ clumsiness ..