Adventures

[Trapped Inside]

Konichiwa ^^ ..

نرجع للذكريات

المغامرات الي سويتها من اول او الحين ؟ .. يعني تقريبا الاشياء الخطيره الي سويتها ؟ .. موضوع فضايح ..

Watashi

- ولد وبنت خالتي كانوا نايمين عندنا .. كنا تقريبا برابع ابتدائي .. طيب نزقح من 6 الصبح .. والبطل الي يقوم اول ( خخخخخ تغير الحال تماما الحين -_- ) .. المهم .. وكنا دايم اذا قمنا نطلع نلعب بالمراجيح الي حول بيتنا .. وذات يوم .. مدري من جاب ذي الفكره .. قلنا خلنا نفترق كل اثنين مع بعض .. وندور بالسكن ( ساكنين بمجمع سكني ) .. ولله من الدلاخه .. طبعا ما كنا ندل اي شي .. يعني كذا على عماها خلنا نفترق ونحوس بضواحي السكن ..
وسوينها .. انا وبنت خالتي ( كبري ) .. وهو واختي ( كبر بعض ) .. وقعدنا نحوس .. اذكر شفت اشياء كثير جديده من مراجيح اخرى والعاب اخرى وناس اخرون .. سبحان الله .. بالصدفه تلاقينا ببعض ( لو ما قابلنا كان اكلنا زق -_- ) .. المهم .. وقررنا اننا نرجع .. وبالصدفه بعد دلينا البيت .. الوالده الله يحفظها كانت قامطه من جوا ومن برا مجهزيتلنا النعله -_- .. وعند الباب كل واحد وعلى " أفاه " .. خخخخخخخخخخخخ .. وما عاد سونها ثانيه -_- .. يمكن فتره هروبنا كانت تقريبا ساعتين او 3 ..


- همممم .. هذي صارت قريب .. قبل يمكن سنه او كم شهر .. ابوي كان طالع .. واهلي مب بالبيت .. وكان عندي ولد خالي .. " نفسه الي فوق -_- " .. وذيك الايام كانت ايام الـ"ـزرف " .. يعني كنت كثير اخذ السياره من دون ما يدري ابوي .. الله يخلي لي ولد عمي هو الي علمني اياها .. وقلت لمحمد ورا ما نروح التميمي " سوبر ماركت " .. وقال مشينا .. وركبنا السياره .. وانطلقنا .. سبحان الله عند بوابة السكن وانا لاف مع الاشاره ابطلع من حدود بيتنا .. يقول محمد ورا ما تدعس .. وانا الحمار ادعس البنزين كله -_______- .. وتنطل السياره .. هذي اول مره انطل فيها .. عشان كذا كنت عليمي مدري وش اسوي .. وكسرت الطاره يسار واستفهمت :icon6: .. خخخخخخخخخ ولله من الدلاخه بعد .. وفحطت السياره وصكينا بالرصيف .. T_T .. يا اني قمطت ذاك اليوم .. الباقي منيب قايلكم وش صار -_- ..


- امممم .. ماش ذاكرتي تخونيي -___- .. ما اذكر شي غيرهم .. المهم لين ما اتذكر بقولكم عن :

Ottosan

ابوي ..

- تسولف لنا جدتي .. عن عيالها .. وكانت السالفه عن ابوي .. كان في عرس لاحد من قرايبنا .. وكان بالزلفي " المدينه الي انا منها " .. وجدي كان بيروح له .. ومعيي على ابوي .. الظاهر ان ابوي كان صغير مره .. يمكن بثالث ابتدائي .. ابوي كان وده يروح ( الله يخلف علينا .. اموت ولا اروح عرس -_- ) .. المهم .. ابوي كان مصمم الا يروح وش سوا ؟ .. يوم جدي كان يجهز السياره عشان يروح ابوي نقز بالشنطه وتخبى فيها !! ( اكيد كان يفكر بناروتو يوم جته ذي الشجاعه والفكره ) .. وقعد فيها لين ما وصلوا مكان العرس .. عاد تقولنا جدتي ان يوم جدي شافه قعد يضحك وخلاه يجي معه .. بس ولله مدري احسه لعنه لعن مب صاحي وجدتي ما ودها تفشل ابوي ..

- سولافة اخرى .. بس عن عماني .. يحبون يلعبون مطاقات .. وانواع الهبل .. يرمون على بعض اشياء ويصقعون اشياء .. المهم وفي يوم من تلك الايام .. كانوا يلعبون .. ابوي وعمي محمد وعمي عبدلله ( ابوي البكر بعدين عمي محمد والاخير عبدلله ) .. كان فيه دولاب بالغرفه ويلعبون حوله .. عمي محمد كان مقابل الدولاب .. المهم مدري وش صار والظاهر واحد منهم صقع بالدولاب والدولاب طاح !!! .. وسجااااااااان الله .. توقعوا وش صار ؟ ..
صح الدولاب يكون فيه فتحات ؟ .. عشان تحط فيها اشياء .. يوم طاح عليه الدولاب ماجاه شي .. لانه ومن حظه كان بنفس مكان الفتحه .. لووووووول يلعن ام الحظ الي زي كذا ..

- ومن سوالفيهم .. عمي عبدلله ومحمد زرفوا الدتسن ودزوا فيه الى اعالي التلال وقعدوا يطعسون .. وهم بالابتدائيه -___- ..



نرجع لـ :

Watashi

- بعزايم الحريم الي تصير عند خوالي او جدتي من امي .. ما كان مسموح للتماسيح بالدخول -___- .. خخخخخخخخ وانا ومحمد الا ندخل بالغصب .. كنا نجي من ورا الحديقه الي يكونون فيها الحريم ليتعشون .. طاولات وكراسي والبوفه وذي الخرابيط ..

طبعا عزيمه حريم انواع الثرثره والقلق والازعاج >>>> احم هذا الواقع .. فـ باليالله ينتهبون لنا .. وش كنا نسوي ؟ .. نبطح ونتخبى تحت وحده من الطاولات -___- .. لا والمشكله يكون فيها حريم " انواع القز " .. بس انا اذا كنت افكر بناروتو .. ما اخاف من شي .. وكثير نزرف لنا كم قطعه كيك " تراني ما احب الكيك ما عدا كيك الفراوله .. وما احب الفراوله بعد بس اكل الي تحت -___- " ..

ترا ما كنا صغار مره .. كنا بالمتوسطه اخر مره سويناها .. وفي احد المرات قزتنا حرمه .. بس اشوا قعدت تضحك وما قالت شي T_T ..

على طاري ذي العزايم .. كنا دايما اذا قضت العزيمه نلعب بالعصيرات والاكلات الي بقت منهم .. ونخلطهم ببعض .. اذكر من جد كنا نتحمس وانواع الهواش مع الشغاله عشان ما تشيلهم .. ههههههههه ..


- فتره جت الرياض " قريبه " .. انتشرت البانشيات بشكل كبير " الدبابات الي بارع كفرات " .. انا ومحمد دبرنا فلوس وجبنا وحده " شلون ؟ Dont Ask " ..

وشرينا وحده .. وما في الا قوة تفحيط وتنطيل وسرعه ^____________^ .. من جد كانت فله .. طبعا امهاتنا دايم يقولون لا تطلعون ولا تروحون بعيد ومن ذا الكلام .. بس ذيك الايام كنت انام عنده كثير .. وكل صبحيه طلعنا .. كم مره وقفتنا دوريات .. بس اشوا يمشونا .. وابشركم ما انقلبنا ..


وكثير مواقف غيرها وازحف .. بس اخليها لنفسي


So Wut About U ?

[شتاينر]

هههههههههه .. والله مواقف حلوة , الله يعين اهلك عليك ..
تانيا تعال هني , انا كنت رح أسوي موضوع مثل هاد بس إنتا سبقتني .. هئ هئ هئ .. انا الحين مش فاضي بس إن شاء الله ممكن بكرة أكتب شوية مواقف , ترى عندي مواقف ولا بالأحلام .. تشكر على الموضوع الرائع , وبالمناسبة شوف موضوعي لانه اضفت عليه إضافة جديدة

[megaman]

يوم طاح عليه الدولاب ماجاه شي .. لانه ومن حظه كان بنفس مكان الفتحه .. لووووووول يلعن ام الحظ الي زي كذا

نفس الشي صار معي وانا بعمر 8 سنين تقريبا ... اتذكر كنت على المقاس بالضبط


مواقفك حلوة انت وولد خالتك ...... بالنسبة لي ما يحضرني شي الحين, لكن إن شاء الله إذا تذكرت كم موقف حلوين جيت كتبتهم هنا


سلام

[FARES360]

انا مادري اذا مواقف هاذي ولا لأ or whatever المهم ..

انا لما كنت أيام الأبتدائي .. المدرسه كانت بعيده فكان الطريج يأخذ 40 دقيقه .. عاد كنت أطالع سيارات وايد ولا يطق براسي عن الباصات .ز فمع مرور الأيام كان باص ورانا .. وكنت طالعه من طرف المنظره في السياره .. سألت أبوي " الباصات ما تنقلب ؟ " ولا بنفس اللحظه الباص أنقلب ورانا وطاح عالجنب وهو بنص الشارع -_- مادري شلون صارت


والموقف الثاني كان في بولندا وهالشي صار قبل 3 سنين.. عندنا شلة شباب غير قانونين وانا منهم والشي الغير قاوني اننا نرسم على الطوف .. المهم أذكر كانت الساعه 9 بالليل .المهم الشباب ميميعن الspray لوول ولقينا طوفه ومكانها أستراتيجي مبينه عالشارع العام .. عاد اشتغلنا هناك واثنين كانو يراقبون .. عددنا بالأساس 5 ..المهم كنا قاعدين عالرسمه أسبوع .. والعاده الشرطة ما تفتر هالحزه .. بس فجأه ما نشوف الا شرطة يايه ! عاد ههه شوفوا الأكشن أحلى يوم كان .. كنا خايفين بس بنفس الوقت أكشن لووول بما انه المنطقة الي كنا فيها its full of short Cuts .. المهم كلنا تفارقنا بصوب .. والشرطة توهقت شكلها .. فوقفوا السياره واثنين طلعوا من الشرطة ولحقوا اثنين من العصابه .. والشرطي الي كان يقود السياره لاحقني المهم .. كنت أركض طاير ههه ! ما عمري ركضت هالسرعه .. الناس كانت تطالع من البلكون لووول .. عاد لقيت شبك وصعدت فوق وكملت طريجي والشرطة وقف في بداية الزاويه الضيقه . ومشى شكله كان يبي يصيدني من مكان ثاني .. المهم ضيعناهم وانا ضعت بعد ! .. لأنه هالمنطقة يديده كانت علي ! فلحسن حضي اعرف اتكلم بولندي فقت أسأل كم واحد وين منطقة besketska .. ومن واحد لي واحد وصلت هناك (( طبعا بتقولون ليش ما دليت المنطقة مادام انا ياي من هناك )) لني ييت بالباص ويا الشلة وما كنت اهتم بالطريج نتكلم عن طريقة الخطه .. المهم بعد ما سألت حوالي 6 أشخاص دليت المكان .. الناس خوافه هناك .. سألت واحد اذا يقدر يوصلني وهو يتجاهلني ههه وشكله مرتبك .. تدرون المنطقة هناك كله سرق خاصه الشباب .. فمعذور اذا كان خايف وخاص التوقيت مو مناسب ههه 10 بالليل كان .. في النهايه وصلت الى بر الأمان ههه وطاقتي صراحه منتهيه ! احس اني بطيح عند الباب ..


هممم وبس .. هذي من المواقف الي ما أضن اني راح انساها

[Yamato]

نايس ميموريز..

بالنسبة لي.. ما في شي.. -_-

[Tidus]

ههههههههههه سويت

ذكرياتك حافله, تسرق سيارة الوالد و تهيت و من هالحركات... لما كنت صغير ما كنت اسوي جذي @@ بس و مع ذلك الله لا يوريك المواقف اللي تصير



أذكر اول سنه درست فيها بمدرسه ابتدائيه كنا ساكنين فبيت جديد و بمنطقه جديده بعد, والبيوت فيها توها مبنيه... فكانت فيه ساحات و براحات كلها تراب حيل وسيعه قبال البيت و حواليه, كنت اكره المدرسه بشكل!

المهم جا اليوم اللي كنت فيه مريض... و تعال اسمع الصياح! "مااااااااااابي ادراااااااااااس... راسي بينفجر!" توقعت الموضوع بياخذ وقت على ما اقنع اهلي اني مابي اروح, بس رضو @@ يا كبرها فرحتي! كان تقول امي "بس اللي ما يداوم ماله مصروف... "

...

استنيت خواني لحد ما داومو و قمت من افراشي رايح لامي @@ "يماااااااااااه... جوعان!", قالت "رح وراك الثلاجه مليانه~" قلت "لاااااا لا... جوعان جوعان ما اشتهي من الثلاجه ابي من المطعم " بعد فترة اقناع رضت تعطيني ربع دينار _-------------_

رحت المطعم فرحان! شعلي غايب و فالها... بس جد كنت تعبان و مريض >_< المطعم كان بعيد... و يبيلي امشي مشوار و اقطع الساحات اللي قبال البيت على ما اوصل... اذكر من رواقه المزاج كنت اصفر~

الا اسمع صوت سياره! ما عدى وقت كثير الا و بينت غبرة السياره و من الصوت ميزت انها دتسن! و طلعت فعلا دتسن... تمشي يمي و موجهه لوراي, بتعديني يعني... لما قربت الدتسن اتضح لي انه رجال يسوق, و مركب عياله ورى بالبدي @@ و العيال فالينها! يضحكون و يتنططون و السياره تمشي, كانو ولد و بنت...

لما قربو بين ان الولد ماسك بايده نباطه! و معاه صخره... يبيله نيشان بس يعين عليه و يرميه اول ما وصلو لي شافوني, كان البنت تستانس... عبالي من حلاة وجهي اعجبتها و الا شي الا تقول "هذا هذااااااااا!! صيده!"

نعم ؟

كان الولد من دووووون اي تردد... يعين علي و جا بيرميني الاخ بالنباطه!

نحشه يا ولد!!...

... بس وين ؟ و ما حوالي شي ؟ ساااااااحه فاضيه خاليه مافيها شي, وين بنحاش ؟

وقفت مكاني... مبتسم في أمل اني بكسر خاطره, و اقول لا لا مستحيل يرميني مستحيل...

الا البنت تضحك و تقول "يالله يالله بسرعه!! "

O____________________________________O"""

و قرشااااااااااااااااع!!!

.....

ظلمت الدنيا بوجهي... عدتني السياره على اصواتهم يضحكون, الولد يقول صدته! و البنت ميته ضحك...

طحت عالارض ما قدرت اوقف انا... و ما طلع مني غير "آي.... >_________________________<" بعد ما راحو... الحقير, ضربني بالنباطه بفخذي! و انا مريض... احس طلعت روحي ×________________×

انسدت نفسي للمطعم و ارجع لبيتنا... و انا بصيييييييييييح!! ما علمت احد, رحت اسبح بشوف الضربه شلونها >_< الا طلع مكانها كدمه كبيييييييييره زرقا و الدم مو راضي يطلع... ندمت على الساعه اللي قلت فيها بغيب, و الساعه اللي قلت يالله للمطعم!




بعد فتره, بالصدفه رحت لنفس المطعم... و القى نفس الولد جالس مع واحد من ربعه و متكي الاخ! ما صدقت انه نفسه لحد ما دخلت المطعم بنفسي @@ الا صج هو! حتى شافني و تخرع كان حارق قلبي طول هالفتره و ناوي عليه نيه! ابي اعوره نفس ما عورني ابيييييه يصيح! كنت اقدر اروح بكل بساطه و اطقه... بس لا, ابي اذله >___________________<

قعدت اتلفت الا كان فيه صندوق مشروبات غازيه بزاوية المطعم @@ كله بطول ميراندا, رحت لا شعوريا اخذت بطل و بسرعه للولد و...

قرشااااااااعوووووه!!!

على راسه!... كسرت البطل على راسه... عورته! قاعد يصيييييييح!! بردت حرة قلبي!

بلحظه استوعبت انا شسويت @@ مدري شلون تفجر البطل على راسه بهالسهوله... ما ضربته حيل! الظاهر لان البطل كان حار... الولد ما صار فيه شي براسه بس طلع برى المطعم منحاش و متغرق و الموجودين يضحكون عليه...

... تهزأ...

بس ما حس باللي حسيته انا! وقتها كنت للحين احس بضربته




عاد اللي صدمني ان الولد جا و معاه ابوه لبيتنا... طلع جارنا و انا مدري! صالحنا مع بعض و صرنا حبايب, بس حقدي على اخته للحيييييييين بقلبي لانه فعلا طلعت نحيسه و من طبعها دلوعه

الحين ويييييين... من خيرة الربع صاير... يعني صج مالك صاحب الا بعد الهواش




و بث مأساه مو مغامره ها ؟ هههههههههههه بس و الله مع هالولد اروع الذكريات

و ثانكيو عالموضوع ^_______________________^

[Macho Man]

هلا فيــــــك ..

هههههههههههه ذكرياتك حلوة والله يعطيك العافيـة على الموضوع ..انا حصل معي موقـف لايمكن انساة وصار ايام المطر في الرياض قبل شهر تقريبـاً ..

كنا طالعين انا ومجموعـة من العيال كان عددنا 5 ومعنـا سيارة Maxixma 2001 كانت طلعتنا بهدف التمشيـة في الجو الحلـو بعد المطـر كانت الساعـة على ما اعتقـد مابين الساعـة 11 والساعـة 1 .. وقتها كنا في طريق الملك فـهـد اقترح واحد من الشباب انا نروح الملـز نتمشى هناك وافق راعي السيارة وطلـع مع المخرج كان الوضع عادي حتى الان لكن قبل ما ندخل في حي الملز قررنا نترك الملز ونتجة لحي ثاني ازيـن منـة فـطلعنا مع الكبري ومشينـا ومن شارع لشارع الى وصلنا حي النهضـة عند الملعب المشهور "الدائري" جلسنا نتفرج على اللي يلعبـون شوي ثم قمنـا وركبنا السيارة رحنا لشارع قريب من الملعـب اسمة شارع الحرس رحنا نتمشى فيـة ......

المهم هنا

بدأ الموقـف خوينا الله يصلحـة اللي يسوق المكسيمـا شاف الشارع وسيـع ومافيـة أحـد قام ونطل نطلـة خفيفـة بالسيارة واكرر نطلـة خفيفـة لكـن بسبب المطـر زحفت السيارة بقوة :shock22: :shock22:



واتجهت لـ ماصورة الاضاءة والمشكلـة انا كنت عند الباب اللي متجهـة نحو الماصـورة وقتهـا شفت المــوت لـكـن الله رحمنـا واللي يسوق عرف كيف يتصـرف ويهجـد السيارة .. كان هذا اخر موقف حصل لـي طبـعـا موقف مخيـف




واكرر شكري لـك على الموضوع التحفــة


MacHo

[Trapped Inside]

شتاينر ..

مواهاهاها سبقتك .. ومنتظرين رجوعك ^^ ..


Megaman

لوووووول حتى انت ! .. من جد حظكم حلو ^^ .. الحمدلله جت سليمه ^_^ ..


Faros X

هلا ولله ^^ ..

لوووووووووول فله اجل .. عشان كذا تحب JSRT .. خخخخخخخخ .. طلعت واحد منهم ..

كووول تعرف بولندي بعد :icon6: ..



Yamato

معقوله ؟ .. ولا وحده -___- ؟ !


Tidus

لوووووووووووول.. عليهم نجاسه ذوليك -__- .. شي مره حلو انكم صرتوا اصحاب .. شي ما كنت متوقعه ابدا !! ..

غريبه جتك الجراه تصكه بقوطي


Macho

يا شين التفحيط -___- .. بس بنفس الوقت فله



والف شكر على مروركم ^^ ..

[Electro M]

Konichiwa ^^ ..وشرينا وحده .. وما في الا قوة تفحيط وتنطيل وسرعه ^____________^ .. من جد كانت فله .. طبعا امهاتنا دايم يقولون لا تطلعون ولا تروحون بعيد ومن ذا الكلام .. بس ذيك الايام كنت انام عنده كثير .. وكل صبحيه طلعنا .. كم مره وقفتنا دوريات .. بس اشوا يمشونا .. وابشركم ما انقلبنا ..


وكثير مواقف غيرها وازحف .. بس اخليها لنفسي
So Wut About U ?

ذكرتني بواحد قلق ازعج دين اهلي ليلة عيد الاضحى و مستدلخ بدبابه و لابس لي فيها جاكيت مموه - جيشي - لمدة ساعتين
و جالس يسعسع عند حارتنا المشكلة مو من سكانها هو :vereymad: !
و كنا انا وعيال عمي مجتمعين ويننج اليفن و فلة و جالسين في الملحق لذا انواع الازعاج كنا ساكتين له الى الساعة 12 و طبعا لازم ننام عشان صلاة العيد و الاخ ما زال مستدلخ
و اجيك و اطلع عليه و اعطيه ذيك النظرة الي بغى يطيح منها من الدباب طبعا قمط و ما عاد رجع بعدها
المهم طبعا طار النوم و رحنا نتعشى من بيتزا ان الساعة 1 بالليل و احنا راجعين الا نشوفه الى الحين جالس يستدلخ لكن بمنطقة ثانية
الزبدة
لا يكون انت اللي عطيته ذيك النظرة ؟
ترا وقتها لما طلعت عليه كان شكلي ارهابي من جد شعر طويل و حوسة على دقن مو مرتب لاني كنت بضحي و نظرة قاتلة :icon6:

[Mista Koo]

ما اذكر شي حاليا >_<

بس ذكرياتكم حلوة ^_^
كمشور طرابط

[Darkness withiN]

-السلام عليكم ورحمة الله وبركاته-
-ههههه ذكريات روعة ماشاء الله..أضحك الله أسنانكم وضروسكم كلها -

-موقفين على السريع بذكرهم..-

-الموقف الأول:كنت يمكن بثاني أو ثالث إبتدائي,وكان عندنا عزيمة ببيت جدي,فعمامي مجتمعين وعيالهم..وعمي كان مشتري مجموعة من المسدسات والبنادق..ألعاب مو حقيقيه بالرغم إن العايله إجراميه ..فالمهم كنت حاط عيني على بندقية طويلة وودي أنثر فيها كل البزران المجتمعين وأبرد حرتي بولد عمتي الي مو لاقي غيري يستقوي علي..فأخذتها وبديت الشغل..نثرتهم كلهم ولا حتى دانتي يعمل نص شغلي :icon6: ..ولا بنت عمتي الكبيره تلحقني وأنا طــــيران...ومانتبهت لزواية الجدار الحادة أمامي...فطـــراااااخ..وشفت الموت أمامي بصراحة وإلى الآن أذكر كيف إنشق رأسي .....وإلى الآن الأثر في جبهتي..وبارز ويلفت النظر,كأني من شخصيات الإنمي -


-الموقف الثاني بذات الوقت كان كما أعتقد,وكنت رايح لعرس أحد أقاربنا,وأنا كنت مهجد البزران والزعيم والأب الروحي لهم وقتها :icon6: ..فالمهم كان فيه عصابه شباب كبار يحذفون صخر على رعاياي,وفلقوا راس واحد من جنودي..فمسكت جسم ثقيل معدني أسود حاد..على الأرض وحذفته عليهم وهربت,بعدها أشوف شيئ يطير بالهوا ويطيح على راسي من ورا..وقعدت أنزف مثل الموقف الأول ..وإلى الآن الأثر براسي وبارز على شكل خط صغير-


-تذكرت الموقفين لإن أمس واحد من الزملاء بالفصل,كان قاعد خلفي ويتمسخر,يقول الي راسه منفلق من ورا,هذا دليل إنه كان يهرب من معركه,وأول مالتفت عليه وشاف الأثر الثاني براسي..الأخ سكت تلقائي -


-آآآخ..إختبارات.ودراسة سحقاً..للمدرسة..دعواتكم ياشباب>مو كاتب الرد ألا علشان يطر دعوات -

-في أمان الله-

[Kubaj]

[CENTER]يا حليله ابوك.. so cute يبي يروح للعرس.. اجتماعي جداً.. من يومه برعم


مغامرات لطيفة.. وطبيعية .. كل واحد مر بها اكيد.. لكن انا ماسرقت السيارة - صبور .. او ممكن دجاجة - ..


لكن.. من يوم ماابصرت النور.. كنت مرجوج.. ملقوف.. اعشق شي اسمه البقالة.. ونتج عن هذا المواقف التالية :

1- في بيتنا المؤقت في حي الربوة.. قبل 17 سنة.. تقريباً.. كان آخر ما تحتاجه عائلتنا الفتية.. هي ان يطلع

ولدهم الملقوف - انا- في عز الظهر.. ويدخل مطعم بخاري.. ويطلب ايسكريم كواليتي ..

نشبت لحق الكاشير الين وداني البقالة اللي جنبهم واشترى لي اسكريم فأتجهت عائداً

بعد ما رجعت للبيت.. حبسني الوالد - الله يرحمه - في الحمام - اعزكم الله - وقبل ما يطلع عصر الآيسكريم قدامي

في المغسلة.. وجلست اصيح.. واطق الباب.. افتحوا لي.. ومدري كيف.. وفتح الباب خالي.. ومع كذا.. ماتأدبت.


2- نفس الحي.. هالمرة حركة انتقامية الظاهر.. - مدري عن عقلي يومني صغير شيطاني - طلعت من البيت

في العصر.. وانا حاط هالآيسكريم في بالي.. بالقوة.. وضيعت الدنيا.. لا مطعم بخاري.. ولا بقالة ولا شي..

خيّم الليل بسكونه.. وانا تائه.. دخلت عمارة توها عظم.. وطلعت.. الين صادني عمي بالصدفة.. ورجعنا البيت

والقى امي المسكينة تبكي.. تحسبني انخطفت ومحد عاقبني وقتها.. لأنهم عرفوا.. عاقبة العقاب .


3 - في نفس البيت.. رقيت فوق الدور الثاني.. كان عمي متسدح ويدخن.. فقام اعطاني سيجارته وقاللي..

خذ عادي.. ماتحرق.. وانا بطبعي ملقوف وحب الإستطلاع عندي وقتها كان يفوق حب شركة الاتصالات للسرقة..

فأخذت السيجارة.. ونزلت للصالة.. لقيت امي تصلي.. وعلى حظي البايخ الوالد كفشني ماسك ماتبقى من السيجارة

فسألني من وين جبتها.. قلت بكل براءة : عمي عمر.. قال طيب.. وطفاها في يدي .


4 - ايام الإبتدائية.. سرقت سنكرز من بقالة.. وصادني الهندي.. وجلس يضحك علي مع اخوياه.. :vereymad:

يعني.. احس ان هذا اقسى عقاب لأي سارق.. انك تكفشه وتضحك عليه .


باقي الكثير.. لكن سأذكرها لاحقاً [/CENTER]

[Trapped Inside]

E-mad

ههههههههه .. ياهو ملحوس بعد .. على ليلة العيد يهجول -___- .. ابو المزاج الي عليه ..

لا تخاف مب انا


Mista Koo

اذا تذكرت تعالنا ^^ ..

العفو ^^ ..


Darkness withiN

هلا بالي اسمه كوول مثل اسمي :icon6: ..

لوووووووووووووووووووووووول .. يا حليلك ..

تصدق .. انا عندي بعد تقريبا نفس جرحك على جبتهي .. وللحين باين شوي .. كنت اركض وانا مره صغير .. وصقعت حافة الباب T_T ..

الموقف الثاني : طلعت Gangsta ولله ..



King Kubaj

هلا ولله ^^ .. شرفتنا ..

هههههههههههههه .. تصدق .. انا ما اتوقع تجيني الجراة اسرق من بقاله -__- ..

عمك شكله زاحف :icon6: ..



الف شكر على تفاعلكم .. فله اقرا زحفكم ..

ومنتظرين البقيه

جانا ^^ ..

[حمــد]

العن ام الفله ياحسام قصدي Trapped Inside

مواقفكم كل واحد يضحك اكثر من الثاني ..

انا باكتب موقف على السريع لأنه عندي مدرسه ..

انا صف خامس ابتدائي كانت اخرب سنه في حياتي جربت انواع الزحف كله الين ما السفايف خلصت ..

كنا الصبح اول ماينزلنا الباص عند باب المدرسه نروح ورى البقاله الي جمب المدرسه وكنا ندخن ..

المهم انا يوم كنت ادخن بس ادخن علشان شوفوني اني كبير و وداجر وراعي سوالف ..

وكنت أدخن بس هوى يعني مو صدر ... الا مره واحد كبير يكلم الشباب الي حوليه انتوا اشبلاكم تعطون

هالبزر دخان الا اقوله والله البزر انت وأشكالك وما وعيت الا ويجيني ذاك الكف الي خلاني اشوف نجوم الصبح الساعه 6 : 30 .. هههههه

ومن بعدها ما قربت الدخان ولا جيت ذاك المكان ..

لحد يفكر اني الحين ادخن الحمد لله كانت ايام سودا وراحت ..

[Kubaj]

هههههه.. حمد.. عندي احساس انه هالكف احد افضل الأشياء اللي حصلت لك في حياتك..

التدخين وباااء.. والحمدلله اغلب اللي اعرفهم مايدخون.. على عكس مرحلة المتوسطة والثانوي..