سلام للجميع
اول شي احب اشكر جميع اللي عزوني في وفاة قريبتي العضوة الرازم
وحبيت احط هالموضوع لأجل الاعضاء اللي مايعرفون الرازم يتعرفون عليها اكثر
لأني شفت في الردود ان بعض الاعضاء مايعرفونها فحبيت اعرفهم عليها اكثر
المهم خلوني ابدأ
==========
اول شي هذه الصورة الشخصية لعضوية الرازم
عضوة من اعضاء الصرقعة الابديين فمنذو دخولها المنتدى ما دخلت غير منتدى الصرقعة واذكر مرة انها ردت على موضوعي مرة بمنتدى القصص والرويات وما اعتقد انها دخلت مرة ثانية
تاريخ التّسجيلها في المنتدى : 06-08-2004
لاحظوا انها اقدم مني في العضوية
لكنها ماابتدت الكتابة الا بعد 3 اشهر من تسجيل دخولها والظاهر كان السبب انها مشغولة بامتحانات الثانوية العامة
ومن مواضيعها الغريبة واظنه اول موضوع لها في الصرقعة طبعا نزلته من البحث
كلاكيت 100 مرة Stop ....... ارجوكم
ولها من المواضيع ايضا
ترنمات على عتبات الرصيف
وفي الحقيقة يوم انك تدخل وتقرا تلاحظ شيئين :
الاول: انك ما تفهم وش مقصدها
والثاني: ان الردود على مواضيعها جدا قليلة مع ان مواضيعها مميزة جدا بس الي ما يعرف الصقر يشويه
واعتقد ان السبب غرابة الفاظها بالنسبة لمعظم الاعضاء وصعوبة فهم اسلوبها
ومن ذكرياتي الحلوة معاها اني كتبت موضوع عنها واظن معظمكم مر عليه وقراه وهو بعنوان
is me .... الرازم .... هباااااال .... استهبااااال
ويالله محد يصدق رغم كل الدفش والرفس والتعليق الي فيه عليها مازعلت
واذكر وحدة من العضوات ردت وقالت حرام عليكم اكلتوها بقشورها لانها شافت وقرت كلامي المسموم عليها
تصدقوا بالله انها زعلت على الرازم والرازم ما زعلت على نفسها ... اصلا اللي يعرف الرازم عدل يعرف انها ماتزعل
وردت علي بمنتهى الروح الرياضية الي كانت معروفة عنها وبتلاقون الرد بالموضوع
وردت علي بعد بموضوع خاص بعنوان
ازماااااااااااااااااات برعاية الرازم
المهم كانت تشتهر بلسانها الطويل وغرابة طبعها واسلوبها وغرابة الفاظها وكانت انسانة صعبة المنافسة والفهم
واذا تحديتها الله يرحمك ترى امك دعت عليك .... وتشتهر بقوة ردودها وعنفها حتى ان معظم الاعضاء كانوا يتجنبونها
ويتجنبون الاحتكاك معها واذكر اني قلت مثل هالكلام في موضوعي اللي هاجمتها فيه
وهذه الاشياء هي اللي لفتت نظري لها وخلتني انتبه لها >>> على فكرة عرفت انها قريبتي بعد موضوعها عني وعرفتها بطريقة تفشلت فيها وطاح وجهي بالارض
اول احتكاك لي معها اذكر اني ارسلت لها رسالة كنت ابي منها المساعدة لأجل اقلب موضوع لصديقي لارج ابقلبه شات
ومن يومها كنا نتبادل الرسايل وكنت اشتمها وتشتمني في هالرسايل
اصلا كان بيننا تحدي من فينا يزعل الثاني اول .... وكانت تقول لي وقتها انها لوح خشب ماتزعل >>> هذا قالته بالحرف الواحد وانا ما ابالغ ابد
وحقيقة تعبت معها وكنت احتار كيف ازعلها لدرجة اني ظنيتها شاب مو بنت وكنت اناديها يبو الشباب
اخر موضوع لها هو اللي كتبته عني
وقصة موتها تعرفونها من موضوعي
كل اللي اعرفه انها ماتت الله يرحمها بحادث سيارة
اخيرا الله يرحمها ويسكنها فسيح جناته
اسف اذا كنت طولت عليكم واقلقتكم بموضوعي ... ادري ان البعض يقول ماله داعي الموضوع لكن حبيت اكتب اخر شي عنها ولأجل يتعرفوا عليها الاعضاء اكثر
نشوفكم على خير بعد ما انتهي من اجراءات الجامعة
سلام للجميع
مشاركة: سيرة الرازم في المنتدى
