ليلى والذيب ... قصة مصرقعة

[عبرات الزمن]

هذي القصة الحقيقة لـ ( ليلى والذيب ) مو التخاريف إلي كانوا يقولونها زمان : _ إن شاء الله تعجبكم _


كان يا ما كان في قديم الزمان وسالف العصر والأوان حتى كان ...

كان في بنت صغيرة وحلوة إسمها ( ليلى ) بيضاء البشرة , مدورة الوجه , حمراء الخدود , دقيقة العود وكانت فتاة محترمه دائما" حاطه على راسها شاش أحمر في البيت برا البيت مايفارقها كأنه مدبس في راسها ...



المهم البنت هذي كانت مطيعة ومحترمه تسمع كلام أمها حرف , حرف ... وكان عندها جدة عجوز خرفه وقشبه تعيش على الجنب الثاني من الغابة ....



كانت الأم كل يوم تسوي الوجبات الثلاث كلها للجدة حتى تفك نفسها من الشماتة حقت العجوز وبعدين ترسل البنت لجدتها بهم



ومن صباح ربنا الباكر تروح ليلى للجدة بالفطور ( عصيدة و سمن ) ... تقطع الغابة في خط مسفلت مستقيم حتى توصل للبيت الكركوبه تسلم على رأس جدتها وتعطيها فطورها وبعدها ينطلق لسان العجوز قائلة:



( ذحين هذا إلي قدرتن عليه من متى أنا أكل العصيدة بالدخن أبغاها بالدقيق الأبيض وبعدين ليش البخل والا حاطين فيها يعني ما عندنا لبينه ... وينك يا ولدي تجي وتشوف شمسون فيًا هالخمات ...) ومع هذا تأكل الفطور وتنظفه كأنها فيري ...



تأخذ البنت مواعين الفطور وترجع بها إلى أمها قاطعة الغابة مرة ثانية عبر طريقها المسفلت المستقيم حتى بيت العائلة تجلس قليلا" تشيك على النت وعلى الشباب والصبايا في المنتدى , ثم تزهمها أمها حتى تأخذ الغداء للجدة وهو غالبا" ( مرق وخبز ... على قد الشايبه)



تقطع البنت الدرب للمرة الثالثة في اليوم نفسه لتسمع كلام الجدة الشماتة :



( الله يصيبكن منك لأمك ... المرقه صماط والخبز بايت ..إنتن ناوياتني تحسبني ماني فاهمتكن بس والله قاعدة على قلوبكن ..)

وكما حدث مع الإفطار تمسح الجدة المواعين وتذرها قاعا" صفصفا ...



ثم تنطلق للمرة الرابعة عبر نفس الطريق ( تمشي البنت مغمضة فيه من كثر ما حفظته ) ماشيه للمنزل ...



ولحسن حظها فالمدة بين الظهر والمغرب طويلة يعني تقدر تقًيل وتشرب شاهي وتتقهوى وبعدين تستمر الحكاية نفسها ..

تزهمها الوالدة بعشاء الجدة ( هذي الوالدة ما عندها سالفة غير التطبخ ) وهو يوميا" خفافي مايبغون الشايبة تسوي رجة علية علشان كذا يسوون لها ( فطير ومعاه حليب ) وتذهب البنت عبر ذلك الطريق مرة خامسة مع الليولة بس الدنيا أمان وماعليها خوف



تصل الجدة والحمد لله تلقاها راقدة من بعد صلاة المغرب فتاكل البنت العيشة وتجلس شوي وبعدين تقطع الطريق مرة سادسة للبيت

حيث تكون دااااااااايخة من المشاوير فتروح طوالي على السرير و تنخمد متحضرة ليوم جديد ...



في اليوم التالي تصًحي الأم البنت في الساعة الخامسة وراهم جدة لقلوقة لازم يصكون فمها وتستمر سالفة اليوم الأول وكذا كل يوم



حتى ظهر في الأجواء ذئب قليل الحياء ...



والــــــــــــــــتــــــتـــــــــــمــــــــــــة تـــــــتأتـــــــــــــــــــــــــــــــــــــــــــــــــــــي ....

[عبرات الزمن]

تتمة القصة :

الذيب هذا كان ما يستحي ولا عنده خشية ولا خجل من أول ما درى إنه في بنت حلوة تقطع الغابة ستة مرات يوميا" في خط مستقيم روحه ورجعة إنبسط و قال يا فرصه .... وصار يستناها كل يوم على الطريق...



كل يوم يمسًح راسه بهذاك الزيت ( قالك جل يعني ) ويلبس بلوزة ضيييييييقة و بنطلون واااااااااااااااسع يعني بإختصار عندة مشكلة مقاسات ... وبعدين يطلع للشارع و يتصلق في الشجرة يستنى البنت تمر .... حتى جات اللحظة المنتظرة ...



طلعت ليلى من بيت العائلة رايحة للجدة الشماته زي كل يوم ماشية في حالها مارة بطريقها إلي دائم بس هذا اليوم ماكان زي أي يوم لأنه كان في ذيب فالح واقف على الطريق ومن أول ما لمح البنت جاية نصب نفسه وقف وطلع الجوال ( منظرة بس يعني أنا عندي) وإستناها حتى وصلت قريب منه وقال :



(ياهووووووووووة يا عسل في واحد جديد وصل .... أشيل عن الأنامل الحلوة لا تتعور .... ما تعطونا وجه يا جماعة ) *



أسرعت ليلى خطواتها وقلبها يدق بسرعة فهي أول مرة تشوف الخايب هذا واقف على الطريق حتى وصلت إلى بيت الجدة ولكن لأنها كانت في حالة مقربعه سكتت وما علمت الجدة ... وبعد ذلك لمت المواعين وإتكلت على بيتهم لكن المفاجئة :



فالغبي على كثر ما صكت فيه الشمس مازال واقف على الطريق حتى مرت وبعدها فتح فمه وقال:

( ليش الحلو مستعجل كذا ... كلمة ولو جبر خاطر يعني بنتعبكم إذا نظرتم لنا )

لفت عليه البنت وشمقت وبعدين كملت طريقها من غير ما تقول ولا كلمة **

ضحك الذيب زي الحمار , وأكملت البنت الطريق حتى البيت , وإستمرت الحكاية إذ أن البنت لم تخبر أمها معتقدة أن ذلك البغل راح يختفي بعد مدة ....



جاء وقت الغداء وإتكلت البنت إلى الجدة وفي الطريق ( يالله على النشبة ) :



الذيب كان واقفا" ينتظر بعد أن صار الوجة مدعوكا" من الشمس ...( يعني الشيفه الحمدلله وكمان يعاكس )

مرت البنت وأخذ الذيب يصًفر ويغني وهي ساكته تمشي منزلة عيونها في الأرض حتى وصلت الجدة وهي مصممة على إخبارها



وبالفعل ما إن تغدت الجدة ( وعينت من الله خير ) حتى سألتها البنت :

(يا جدة تعرفين ذيب هنا في الغابة يتمشى ما عنده ولا صنعة ولا عملة ؟؟!! )



لكن الجدة كانت مخرفة بمعنى الكلمة وراحت تتكلم عن الغابة و متى جاتها السكة والكهرباء وعن زمان والطريق إلي كانوا يقطعونه كل يوم مشي وبعدين دقت فيها الشماتة وسابت الهرجة كلها وراحت تتشكى على الغداء ( تذكرت إنها ما هرجت من البداية علشان البنت صكت عليها بالسؤال ) ... المهم البنت ماطلعت بفايدة من الهرجة كلها ...



إتكلت على الله بعد ما جاها الصداع من كثر الهرج ماشية للبيت والدلخ هذاك مازال على الطريق ومازال يعاكس ... حتى وصلت البيت ....

حكت البنت أمها بالحكاية لكن الأم ما قدرت ترد عليها لأنها كانت خايفه لو تقول البنت إنها ما عاد راح تروح للجدة بسببه لأنه لو حصل هذا الشئ الجدة بتنزل كافة شماتها على الوالدة... والأم مع الشايبة هذي تمشي الحيط بالحيط وتقول ياربي أستر ... علشان كذا سكتت الأم وحطت نفسها ما سمعت شئ ...



طبعا" فهمت ليلى حركات أمها فتركتها ورا حت عنها للغرفة .... وجلست تفكر كيف تفك نفسها من سبع البرمبه إلي لاصق على الطريق زي العلكة وخططت ودبرت وطلعت بفكرة بس كيف توصل لها ....



يقولون إنه في حطاب في الغابة وهو رجل كبير في السن , خلوق, متعاون , ملتحي و قوي ( على أساس إنه حطاب ) ولكن المشكلة مازالت قائمه كيف تصل البنت للحطاب وهي تستحي كيف تخرج من البيت وتروح لبيته وإيش تسوي بالشايبه ذاك اليوم



قالت البنت أسيب كل شئ لوقته يمكن الفالح هذاك يبعد عن الطريق أو يذوب من الشمس إلي صاك فيها من صباح الله وخير ....



الروتين اليومي إستمر .... والأم طلبت منها تأخذ العشاء للجدة .... سلكت البنت الطريق المسفلت إياه رايحة للجدة ( والله يطولك ياروح ) الدلخ على الطريق ومعاة دباب من فين جابه الله أعلم ومستمر في المعاكسة :



( يا حلو إحنا مستنين .... ومتمنين .... أعطونا وجه أو لفته يا هووووة ) وصار يرقم بعد ....( مو الذيب فنان معاه جوال )

وصلت البنت للجدة وسبحان الله لقيت عندها الحطاب جاي يطل عليها هذيك الليلة من زمان ما شافها ... عشت ليلى جدتها وإستنتها حتى خمدت وبعدها حكت الحطاب قائلة :

( أنا سمعت عن ذيب هنا في الغابة صحيح الكلام هذا ؟؟؟1)



قام الشايب الثاني ذا قال : (يا قليلة الأدب أصلا" إنتي من يومك خايبه حتى الذيابه لفيتي عليها !!! )



وتخانقوا الجماعة مو الشايب ما إحترم نفسه من البدايه لو جاوب بأدب كانت هي كمان إحترمت نفسها ....



خرجت البنت وهي معصبه عالآخير ومرت على الذيب الدلخ إلي قال :

( طيب بس إسمك عالبلوتوث يا عسل ؟؟!!!)

آآآآآآآآآآآآآآآآآآآه وقتها ما درى إنه دق على الجرح وعصبت من جد(( فالبنت من زمان تبغى تجيب جوال الباندا بس أمها داقها الوسواس من السالفه إياها وتقولها دايما" إيش تبغين به يا بنتي ما تقدرين تشيلينه الجامعه ولا الأفراح ( الأعراس ) ولا النادي ولا حتى تقدرين تزورين ناس معينه وهو معاك ...))



لما قال الغبي الكلام هذاك ماكان عارف إن نهايته كانت هناك فالبنت من جد عصبت وشوشت وياولك وسواد ليلك يا ذيب.....





الرواية المعروفه والمشهورة تقول أن الذئب قد قتل ... ولكن الحقيقة .....





قد أكــــــــــــل...





توته , توته , خلصت الحدوته ..... مصرقعة ولاً فتوته





ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـــــــــــــــــــــــــــــــــــــ

* بعض هذه المعاكسات تعرضت لها أنا شخصيا" لكن مو كثيرة لأني أمشي في السوق بمسدس أما الباقي فكلها مواقف حقيقة تعرضت لها زميلاتي...



** طبعا" هذا الأمر يوضح المغالطات الشائعة التي دائما" تقول أن البنت تحذف الولد بجزمتها هذا الشئ لا يحدث لأن الجزمة غالية وهو ما يستاهلها....

[X.X.Large]

خخخخخخخخ
هع هع هع هع هع
يا عيني على رواقة اخر الليل
الحين صفحتين كاملات عشان تستبدلي كلمة قتل بأكل:vereymad:
يعني بالعقل كدا ايش فرقت
كل الطرق تؤدي الى روما
هع هع هع هع
والله نفسي ارفسك لبرع انتي وجزمتك الفرحانة فيها
بس والله ما تستاهلي حتى شمة رجلي
خخخخخخخ
اقول تراني امزح لا تشكيني للمراقب وتخربي بيتي >>>بدا يخاف الاخ
يلا سلااااااااامون
ومشكورتون على هذا الموضوعون

[راعي الSKYLINE]

يا اقدم قصه في العالم اش ذا بالله تتعب نفسك عشان ذي القصه والله انك مصرقعه وبعدين عيب استحي شويه احنا بتهاوش معا البنات بالمزح عشان نروح عن نفسنا مو توصل لذي الدرجه والله عيب جزمه وكلام فاضي.

[Freaky Angel]

ليلى والذيب و عجوز الاكل

وفيها تحريف مصرقع متصرقع

المهم

ثانكس على ذيس موضوع

[THE KILLER]

بس ما قلتي لنا وش جوال ليلى؟؟؟؟؟
وكم رقمها
و وش نوع جوال الذيب و كم رقمه و وش الدباب حقه... و... و...و...إلخ...
أسئلة كثيرة تنتظر الإجابة
بس أنا عارف الإجابات:
جوال ليلى : العنيد
رقمها: ×××××××050
جوال الذيب: الزعيم
رقمه: ×××××××050
دبابه: هارلي <<< بس ما أعرف أكثر من كذا
و أرجو إني أكون وضحت بعض الأمور

ومشكورة على القصة

[الوردة السوداء]

شكراً على القصة
بصراحة الموضوع متعوب عليه فعلاً وشكراً
وتسلم إيدك الحلوة العسل

[اخـ القمر ـت]

ههههههههههههه

حلووووه القصه مررره

مشكوووره اختي عبرات الزمن

على القصه اللي كذه

وباي باااي

[المحرومه]

شاش أحمر <<<<<< ليه شاش
اسمك بالبلوتوث <<<<<<<< حلوووه
مشكووووووووووووورة عبرات الزمن

[عبرات الزمن]

هذا المطلوب ... أبغى كل ولد هنا يقراها وياكل نفسة من القهر ....

شكرا" ... وعلى فكرة أنا كتبتها لما كانت الكهرباء مقطوعة يعني مافي شئ إسمه عيب ..^ــ^

بس والله ما تستاهلي حتى شمة رجلي

وإنت ما تستاهل حتى .............. >>> خايفة من المشرف يفصل العضويه عند الكلمه هذي..

[Dark Matey]

وين الهيئة عن ابو الشباب ( الذيب ) ...........


وبعدين الذيب هذا مهوب هين ما شاء الله عليه عنده دباب وجوال واكييييييييد عنده اسكاليد او رانج روفر او همر



قد شفته مار في التحلية <<<<<< اقول لا تفقش


سلام :icon6:

[الهدوء المزعج]

قصة روعة



متشكرين عليها

[راعي الSKYLINE]

هذا المطلوب ... أبغى كل ولد هنا يقراها وياكل نفسة من القهر ....

شكرا" ... وعلى فكرة أنا كتبتها لما كانت الكهرباء مقطوعة يعني مافي شئ إسمه عيب ..^ــ^

ما في شي اسمه عيب (بس المراقب لو يسمحلي اكمل ) عبرات الزمن اديني رقمك شكلك فله وين تتكي في اي مركاز

[عبرات الزمن]

Dark Matey

وين الهيئة عن ابو الشباب ( الذيب )

يعني هو واحد ما أكثرهم وفي كل مكان زي<< الناموس<<

الهدوء المزعج

قصة روعة

إنت أروع ثانكس ألوت.. ^ــ^

راعي الSKYLINE

عبرات الزمن اديني رقمك شكلك فله وين تتكي في اي مركاز

إلي بجنب كودو في شارع التحلية ورا حديقة الأمير شرق صاري جنب الرحيلي .... ^ـــ^

[Kira]

القصة روعه وأنتي أروع منها
شكرا على القصة