المشاركة الأصلية كتبت بواسطة d12_girl
السلام عليكم إخواني و اخواتي
انا آسفة لأني طولت شوي على ما رديت لكن انا بهالفترة حاولت اني اقول لصديقتي بشكل غير مباشر مثل ما نصحني اخوي Life_End
إليكم اللي صار:
انا قعدت فترة ما اقول لصديقتي عن اي شي جديد يصير لي او اي شي يخصني انا
كنت دايما اكلمها على اشياء عامة لين ما هي لاحظت و قالتلي انها ملاحظة تغيري معاها
انا قلتلها
" فلانة انتي تدرين اني اعزك مثل اختي و اكثر. انا دايما اسمعج تقولين انج تقولين كل شي عن حياتج لأختج حتى انها تعرف كل صغيرة و كبيرة تمر عليج. انا في يوم علقت هالجملة براسي و فكرت فيها اذا انتي تقولين كل شي لأختج هل انتي تقوليلها كل شي يدور بينا؟؟؟"
قالتلي بوجه فعلا جد
" ما توقعت انج تفكرين بهالطريقة. انتي اساسا ما تعرفين شو معنى الصديقات بالنسبة انا عمري ما فتنت سر اي بنت في حياتي حتى مرة اختي كانت تبي تقرأ ايميل من صديقة لي و انا نزلت الصفحة و قعدت اختي تترجى فيني انها تشوف الأيميل لكني ما خليتها لين ما زعلت مني و صارت ما تكلمني.
انتي نفسك ذاك اليوم سألتيني عن شي يخص فلانة معنا في المدرسة و قلتلج اني ما اقول اسرار اي احد حتى لو ما كانو صديقاتي. ارجوج لا تفكرين عني بهالطريقة انا مستحيل افتن اسرارج لأني انا نفسي ما اريد اي احد يفتن اسراري. بعدين لو كنت ابي افتن عليج ما كان قلتلج على اسراري انا بعد
تدرين انج عزيزة عليي جداااا"
بعدين ابتسمت و غيرت الموضوع
ما اقولكم شو شعوري وقتها لأني حسيت نفسي اني صغيرة جدا و ما افهم
نظرة عيونها كانت صادقة
مادري هل جوابها هذا يؤكد لي انها صادقة و نيتها صافية ولا لأ؟
انا مشكلتي يا اعضاء اني ما عندي اخوات بنات ما عندي غير صديقاتي بالمدرسة
ممكن الأشياء هذي ( اسراري, مشاكلي, حياتي ) اخليها بقلبي و ما اقولها لأحد لكن نفسيتي تتعب لأن الصراحة الكبت شيء مو حلو
صحيح الأنسان ما يقول كل شي لكن في اشياء في حياة الأنسان يحب يحكيها عشان يحس على الأقل انه موجود بهالدنيا
انا من كثر ما اخبي و ما اقول لأحد اسراري او اي شي عن حياتي او مشاكلي صديقاتي في المدرسة صارو ما يقولولي اي شي صارو دايما يتكلمون مع بعضهم و لما اكون موجودة يسكتون حتى لما اسألهم اي شي يردون عليي بأجوبة مختصرة
هم يكلموني و يمزحون معاي و يضحكون معاي و يكلموني في اشياء كثيرة لكن اي شي يخصهم ما يقولون.
انا حاولت اني اكتب يومياتي بدال ما اتكلم لكن اخاف في يوم من الأيام احد يفتح الكتاب و يقرأ اللي فيه
انا آسفة اني طولت عليكم و اذيتكم بمشكلتي مع انها ما تستاهل كل هالموضوع لكن مثل ما قلتلكم انا ما عندي احد اشكيله و خصوصا ان المشكلة هذي تتعلق بصديقتي الوحيدة اللي كنت احكيلها
شكرا مرة ثانية على وقتكم و مساعدتكم و على إهتمامكم
