نصيحة لكل شاب وشابه

[ODIN]

الي يقرى الموضوع يقول اسكت ذا عنده سالفه شكله


ابد ما عندي سالفه الي داخل متوقع فيه سالفه والا شي لا يكمل الموضوع



فيه شسمونه حركه حلوة تصلح للعزوبية مرة


سواء بنات والا شباب .. ومادام كل ربعنا هنا وحبايبنا هنا لازم نقولها لهم


بدايتن ..


عزيزي الشاب عزيزتي الشابه ..


هل تشعر بفراغ عاطفي حاد .. تشعر معه وكأنك في عالم مجهول.. وعالم من النسيان ؟


هل تشعر بأن الدنيا لم تعد تطاق .. وأنه لا مجال للعيش على هذه الحال ..


هل تشعر بأن لقيا الحبيب اصبحت ضربا من الخيال .. و حضنه بين يديك اصبح من سابع المستحيلات .. وتقبيله اصبح من اصعب الأمنيات ..

سواء كان هذا الحبيب وهمي او موجود .. لا فرق بذلك لانك لن تصل له لو تفحط ويا وجهك ..



عشان كذا ولأننا معشر التماسيح مافيه امل نتزوج الا بعد عشر سنين وطالع .. هذا اذا حصلك اصلا يمكن تموت وانت ما تزوجت ..

.. فواجب علينا اننا نقص على روحنا

نعم نقص على روحنا .. أي نخدعها بصيغة اخرى


وفيه طرق واساليب كثيرة طبعا بذكرلكم وحده منها جربتها ونفعت صراحه كان مردودها جدا جيد ..



وهي الشموع



روح يا عزيزي الشاب واشتر شموع كثيرة بروائح مختلفه وادخل لغرفتك المشؤومة وتجاهل كل مناظر الفوضى الي فيها ودور لك على مكان فاضي وصغير وحط فيه الشموع او انشرها على كل غرفتك بطريقة رومانسية ورائعه ..


بصراحه الشموع راح تخلق جو هادئ وروحاني جدا ..


بفترة الليل واذا كان عندك عمل بغرفتك اعمل الحركه هذي .. واقعد على الانترنت تصفح واقرا مواضيع حلوة او افتح الفوتشوب وشوف النفسيه الحلوة كيف راح تبدع



بكذا راح تعيش جو رومانسي جدا رائع .. لكنه للأسف مع نفسك بس -___-


عاد بكيفك اذا ودك تتخيل الحبيبة جالسه جنبك على الجهاز او تحك ظهرك عادي كيفك كل واحد حر بخياله محد يقدر يقولك لأ



انا جربت حركه الشموع هذي وبصراحه جدا جدا رائعه وكان تأثيرها النفسي جدا جميل ..


راح تحس ان روحك تنشطت وراح تفكر بنفسك اكثر واكثر وراح تلاحظ ان وجدانياتك بدت تتحرك بشكل كبير ..






ماشالله اعرف واحد يعمل نفس الحركه هذي ويجلس يقرا قرآن ويصلي ماشالله .. ان شالله ناوي اجربها وانتو جربوها بعد



الشموع لها اثر سحري تخلق جو روحاني ورومانسي جدا رائع ..



انا صراحه جالس بهذا الجو الان وانا اكتب الموضوع .. وصورت لكم بعض الصور للشموع حتى تتشجعون وتجربون الحركه هذي ..


اليوم شريت مجموعه شموع مختلفه احجامها وروائحها .. صراحه عليهم خصم رهيب الوحده الكبيرة بعشره ريال بس عشان كذا شريتها

وفيه بعد مثل الشمع لكنه بطريقة ثانيه .. مثل عود البخور او المعمول ريحته مرة حلوة له وعاء خاص تعلقه فيه شوفوا صورته مرفقه بعد ..

..

والي عنده طرق ثانيه واحلى لا يتردد ويطرحها بهذا الموضوع .. والي جرب الحركه منكم خل يقولنا انطباعه

[snorlax]

أودين حبيب ألبي .. احس بمعاناتك يا ليتني جمبك أواسيك
بس اسمحلي خليت الشموع لك انا استخدم

GLADE



برائحة الفانيلا .. وفي واحد ثاني برائحة نسيم هاواي الرائع والآخر بنسيم الربيع والورود !
شتان بين من يضع الشموع ويصلي والذي يسمع الموسيقى الكلاسيك

توشكر خيي !

[ODIN]

اهلين سنور


حركه الجلاد هذا ما جربته من قبل .. حمستني بجربه ضروري

بس اسمحلي لا تقارن الدوائر الكهربائية النفاذه للرائحة الوهميه بالشموع الطبيعيه المعطره

وعلى طاري الموسيقى كلاسيكيه .. ولا يهمك حررت الموضوع لاني اعرف فيه وحوش ماترحم مو مشكله نتنازل عشان المجتمع

حياك نورت الموضوع يادوب

[NaughtY AngeL]

هااااي.. الفكره حلوه ما أقول لأ.. بس صراحه شي يحطم.. يعني لما تشوف غرفتك كذا حلوه و رومانسيه و تجنن و روعه و ضلاااااااااام مافي غير نور الشموع و الريحه الحلوه.. و بعدين....

تلقى نفسك لحالك..

صراحه شي يحطم.. تصير خلاص تبغى تتزوج بأي طريقه لووووول.. غير انه اذا ماما ولا بابا دخل عليا حيحسبني مجنونه لوووووووول .. بعدين بالعكس الفكره هذي بتشوقك انك تتزوج أكثر.. يعني انتا بنفسك قلت

نعم نقص على روحنا .. أي نخدعها بصيغة اخرى

لووووووووووول... بس لمتى نقص على روحنا؟ بيجي يوم و تصحصح و هذي هيا أكبر لحظه مدمره و شوكنغ.. و زي ما قلت بالأخير بتتحطم لووووووووول..

و ثانكس عالموضوع... تشاو فور ناو

[hussien-11]

أودين مأساتك شكلها أليمة

مشكور و الله عالحركة ، لكن أشوف أفضل وسيلة لملء وقت فراغ أي شاب أو بنت هي المطالعة
بحاول أجربها بالصيف

[ODIN]

هههه شباب وش فيكم علي مآساااه واكسر الخاطر ومدري وشو


الي يسمعكم الحين كل واحد متزوج اربع


انا عادي وش حلاتي شاب سعودي طموح في مقتبل العمر وقاعد اشتغل واجمع حق العرس اااه قصدي حق اقساط السيارة الشهر قرب مابقى شي وجيبي مطفر



هيييه عادي كلنا نحس بالفراغ هذا مو تقلبونها فوق راسي تقولون بس انت !!

كلكم كلكم كذا بعد .. بلا نكبات

[Tidus]

وفيه طرق واساليب كثيرة طبعا بذكرلكم وحده منها جربتها ونفعت صراحه كان مردودها جدا جيد ..



وهي الشموع

شمووووووووع

ناوي تهيضنا الله يهداك ؟ =______=""

الحين حنا و بالياااالله نتناسى حاجتنا لأجواء رومانسيه, نجي نحط نفوسنا بجو مليان و شبعان رومانتيكا

J/K

بس بجد يعني أودين, فكره ولا أروع! يعني أثبت ان الحاجه ام الإختراع @@ و بجذي اتضح لنا وضعك حاليا شلون بالضبط هههههههههه.. دخلت مزاجي سالفة الشموع, و يالله و الله منظر ولا اروع طالع مكانك!

عاد تصدق ما استغربها فكرتك مره و هاضمها, لان تجيني فترات انا دايم.. يعني باليوم ساعه جذي, احس ابي اقعد بمكان هادي, مكان هادي و خلاص.. هههههههه مقدر اقول لو فراغ عاطفي لان و لله الحمد ما اواجه فراغ من هالناحيه, بس و لو أحتاج وقت جذي.. فأروح اجلس بغرفتي و الليت طافي, مرات اكون مشغل الأبجوره بس..

فشموع.. يبيلها! على مقطوعات Yanni بعد.. يا سلااااااااام

والي عنده طرق ثانيه واحلى لا يتردد ويطرحها بهذا الموضوع .. والي جرب الحركه منكم خل يقولنا انطباعه

همممم لو بتكلم عن نفسي.. انا بلحظات جذي حيل أميل للرسم, و اروح ارسم اللي بخاطري اطلعه كله على ورقه! اي شي @@ أحس بفضفضه لما اللي داخلي يطلع على ورقه..

عاد من الرسم اروح مرات اكتب خواطر.. او اي شي, اللي ابي اوصله يعني ساعات القلم و الورق يلعب دور بالفضفضه و تخفيف العبئ مهما كان عن النفس..



و بالاخير يعني ودي أقول ان فعلا الواحد يحتاج وقت ينعزل فيه بس ترى مو حلو لو بالغ, هي فترة راحه من كل شي بس.. و الا الاختلاط مع الناس ترى يلعب دور بخصوص الفراغ العاطفي @@ يخفف حيل حيل على الواحد

[ODIN]

هههه تايدوس زين اخيرا انت الوحيد الي ردك يشجع صراحه



اجل مقطوعه لياني مع الجو هذا .. روعه مرة .. خاصه nostalgia وانتيل ذا لاست مومنت

وانت بالاخير وضحت نقطه مهمه جدا جدا وهي ان الحركه هذي تعتبر ملجأ للراحه بس ما تصلح الواحد يكثر منها ..


وسالفة الاختلاط مع الناس جدا ضرورية للفراغ العاطفي .. الواحد ينساه كثير مع الاختلاط

عن نفسي انا انقرفت من كثر ما احتك مع الناس بالجامعه والشغل .. عشان كذا احس ان الحركه هذي ملجأ حلو لي لوقت الراحه ..


وحلو اتجاهك للرسم .. كنت اسوي كذا اول بس مدري ليش احس اني خفيت كثير ..


صرت الحين التجئ الى الصور الطبيعيه بالكمبيوتر او الرسمات الفنيه .. اجلس اتأمل فيها كثير واتخيل نفسي عايش بالمناظر الحلوة هذي .. الى ما استرخي وارتاح كثير

[HArb200]

[Tidus]

صرت الحين التجئ الى الصور الطبيعيه بالكمبيوتر او الرسمات الفنيه .. اجلس اتأمل فيها كثير واتخيل نفسي عايش بالمناظر الحلوة هذي .. الى ما استرخي وارتاح كثير

أها تمام, حلو ميولك لهالشي.. وعشان جذي الواحد بعد يبيله يطلع لمكان حليو من فتره لفتره.. يشوف مناظر حلوه و يريح أعصابه, بيشغل باله عن أشياء كانت ممكن تشغله له وهو بغنى عنها =_=

عاد هذا حنا دخلنا الصيف.. الواحد ما يتوهق من هالناحيه بهالفتره

هههه تايدوس زين اخيرا انت الوحيد الي ردك يشجع صراحه

هههههههه انا أصلا أهنيك على حيويتك و إهتمامك بالأشياء اللي تخص هالمواضيع

[hussien-11]

هههه شباب وش فيكم علي مآساااه واكسر الخاطر ومدري وشو


الي يسمعكم الحين كل واحد متزوج اربع


انا عادي وش حلاتي شاب سعودي طموح في مقتبل العمر وقاعد اشتغل واجمع حق العرس اااه قصدي حق اقساط السيارة الشهر قرب مابقى شي وجيبي مطفر



هيييه عادي كلنا نحس بالفراغ هذا مو تقلبونها فوق راسي تقولون بس انت !!

كلكم كلكم كذا بعد .. بلا نكبات

أقول لا تحاول
انت ما حكيت عن الفراغ و بس و لكن عن لقيا الحبيب و و إلخ ...
معاناتك واضحة ليش بتنكر
و انت بتشتغل أنا بعدني ما خلصت ثانوية عامة
يعني بدري على وقت الفراغ .. ( احم )
بس حلوة حركة الشموع ، على الرغم من انها بتدل انك وصلت قمة اليأس ( استفزاز )

طيب شو رأيكم بهالحركة ؟
بما إنا بفصل الصيف ، و الجو راح تزيد حرارته قرييبا ... شو الحل ؟ كيف أنعش نفسي ؟
جيب حبة ملبس ( حلو ) بنكهة النعناع و ضعها في فمك و بعد أن تنتهي من أكلها اشرب عليها جرعة من الماء البااارد و سوف تشعر بلذعة و شعور بالانتعاش
سوري للخروج عن الموضوع و شكرا

[.Atlas.]

ههه الله يهداك انت اللي تبي تتكلم عنه هو الجو الرومانسي ...الفراغ العاطفي كلمة واسعة شوي ....وتختلف ....
بالنسبة للشموع والصور اللي حطيتهم ....احسها رهيبة صراحة تعطي جو حلو..الصور تعطي احساس بالراحة....حلو تجربها...بس صعب تجربها وفيه احد يشاركك بالغرفة -__-

بس كأني سمعت قبل ان الشموع تستخدم في تحضير الجن والشياطين يمكن يطلع لك شيء بالغلط !!

أحيانا اقعد اقرا..روايات.. وادخل فيها وانسى نفسي...بس هالفترة مركزة على الكتابة والمانجا والفوتوشوب ..واحلى شيء صوت جوش جروبان ...يعطي جو مو طبيعي صراحة..خصوصا Vincent احلى شيء سمعته من فتره طويلة .. قصدي وانت تسوي هالشغلات ....

.. فواجب علينا اننا نقص على روحنا

نعم نقص على روحنا .. أي نخدعها بصيغة اخرى

ههه.. حلو الاعتراف بالحقيقة لانه احيانا يكون عكس

وعلى فكرة تكلمتوا عن ياني...اللي عنده موقع اقدر احمل منه له...ياليت يضيفه

[Angel whisper]

عشان كذا ولأننا معشر التماسيح مافيه امل نتزوج الا بعد عشر سنين وطالع .. هذا اذا حصلك اصلا يمكن تموت وانت ما تزوجت ..

لا تفاول عليي بعرس اول ما اتخرج انا ..


احم ..

المهم.. ذكريتني ببازارنا .. تتذكر التصميم XD استوولك 5 معجبات .. اتنقى اربع

الشموع حلوه .. انا ما كنت احبها الين ما سوينا البازار .. ومن يومها قمت اشتري

اشتر من the one .. اشكال الشموع تجنن وريحها وايد حلوة .. انا شاريه وحده على شكل وردة لوتس عوده .. وثلاث سمجات صغار .. ومثل علبه فيها ماي وعليها 3 شمعات طافيه على شكل وردات جوري حمر .. كلهن حلوين .. وشارتنتهن في فترة التنزيلات .. 50% خصم

ويبيعون بعد مثل صحون صغار يحطون عليهن الشموع ..ما اعرف شو يسمونهم ..

هو غريب ان الشموع الها مفعول .. هي غبية .. بس تريح لسبب من الاسباب

little angel:
Josh = My Confession

[.Atlas.]

عندج موقع لها ؟

عشان مانطلع برا الموضوع...

صرت الحين التجئ الى الصور الطبيعيه بالكمبيوتر او الرسمات الفنيه .. اجلس اتأمل فيها كثير واتخيل نفسي عايش بالمناظر الحلوة هذي .. الى ما استرخي وارتاح كثير

المناظر الطبيعية ...احلى شيء ..
ياكثر مانتخيل ..احيانا يريح واحيانا لا -__-

[smigle]

فراغ عاطفي عيل هاااا؟؟؟؟

أنا الصراحة عندي ثلاثه حلوات في غرفتي، وكل يوم أقعد مع وحده.

من يومين عطيت رفيجي العراقي أصغر وحدة عندي قلت له يخليها عنده ثلاث شهور ويرجعها (مسكين ما عنده فلوس مهر).
____________________________________________________

وبخصوص الشموع.....ما جربتها بس ما أميل وايد للأجواء الرومانسيه، يمكن لأني واقعي
---أيش الفايدة من هالأجواء وأنا قاعد بروحي، بالعكس الا يمكن هذا الشي يزيد الطين بله معاي---

على فكرة أعرف واحد من ربعي الله يستر عليه يحب هالسوالف، مره كان حاط هالشموع الصغار اللي على شكل ورود، كان حاطها تطفح في البانيو، وهو مركلس ومرتاح في البانيو ومسكر الليتات ومغمظ عيونه يا سلااااام...... ........

فجاْة شم ريحة شي يحترق......شنهو ذيه؟؟؟؟؟؟؟

واااااااااااي شعر صدرييييييييييييييييييييي.....

__________________________________________________

بالله عليكم وين تبوني أجرب شموعكم هذي؟؟؟