بسم الله الرحمن الرحيم
السلام عليكم…كيف الحال؟
اعجبك اسم الموضوع يا ykm ؟
نبداء الموضوع…
اليوم طنت براسي اني اروح اشوف اذا كنت اقدر اجرب الكيوب في محل اشتهر في انه يأجر الجهاز بالساعه او اقل…خاصة اني اليوم اخيرا جتني فلوس(قبل لا تجيني ما كان معي الا خمسه و متحسف اخردها بالسفن اب)المهم قبل لا اروح فكرت اهتم بشكلي شوي(مهو من عادتي) لكن قلت :وشوله؟انا رايح لعزيمه؟و الا طالع مع واحد مهم؟و الا بلقى احد اصلا؟(قايل لكم يا مخفات انها مهي من عادتي)و المهم و اربط لك الصندل المحلي …كله املاح عقب بحر الاجازه…و اروح بثوبي القديم لاني نسيت اخذ ثوبي المغسول…و شعري الله لا يوريكم ..تقول شايف له جني…داهنه بكريم عشان يزين و طلع مخصل خصل صغيره تقول خيوط سبحه.و وجهي ما يحتاج…خلقة ربي و اللهم لا اعتراض…يقلع الكبد…الله لا يوريكم بس…المهم رحت بسيارتي اللي ما غسلتها عقب الاجازه(ما تستاهل) و فوووووووووم(مهوب ثووووم).
يوم وصلت لقيت واحد من الاصدقاء القدماء من الثانوي لي سنه ما شفته عقب المدرسه لكن الحمد لله انا واصل اتصل عليه دائما.المهم الرجال تغير و صار هزيل من الهموم على قولته تقول اكلينه من عبيد افريقيا لا يصومون و لا يصلون…الله يعيننا و اياه عيا يقول لي وش اللي هامه من الاجازه…مهوب موضوعنا…نرجع للموضوع. المهم طلعوا اهل الرجال من السوق و راح للبيت و دخلت انا المبنى عشان اروح محل الالعاب. يوم دخلت ادربي راسي ما كان فيه ناس واجد مثل ما توقعت عشان كذا ما اهتميت بشكلي(جريتكم يا مخفات…اصلا بكل الاحوال مهي عادتي)المهم قال لي الحرامي الساعه ب 50 و النص ب 30 .قلت انا هات نص.قعدت العب و صراحه كانت شيء رهيب و اليكم الوصف:
…
وش كنت بقول؟…ايوه تصدقون اليوم توي اجرب الكيوب؟؟؟ جربته بلعبه لويجي منشون ب 30 ريال بالنصف ساعه هالحرميه.
صراحه شيء مثير للانطباعات(على الاقل بالنسبه لي) يعني اليوم تحكمت باليد بشكل فعلي بلعبه لويجي و جربتها و عرفت معنى يد تحكم .اول مره بحياتي…المهم كانت شيء خيالي و على ما قالوا الاخوان بالمنتدى اليد تركب مع يدك بشكل اتوماتيكي و ما استغرب لانه واضح ان كل شيء مدروس بعنايه.بالنسبه للعبه لويجي التحكم بالبدايه كان غريب بسبب الانالوج الثاني اللي يتحكم بالمصباح.انا كنت اظنه يوجه المصباح في كل الاتجاهات اللي مواجهه لوجه لويجي،لكن طلع يوجه لويجي كله…مثلا للي ما فهموا
اذا كنت تمشي متوجه ليمين الشاشه و حركت انالوج سي لليسار راح يمشي لويجي يمين لكن وجهه للخلف! يعني يمشي على ورى..
و هكذا دواليك(كرهت هذي الكلمه من مدرس و الحين قاعد اقولها)و صراحه ما قصر اللورد يوم تكلم عن العالم (اللي يشبهykm )
صراحه هرجه و صوته يفطس ضحك
المثير للاهتمام انه جوا شباب ما اعرفهم لكني شاك اني اعرف صوت واحد منهم..كان جدا مألوف. و كانوا واقفين خلفي و انا جالس العب…المهم كانوا يناظرون باهتمام و يمدحون و ينقدون…الى الان شيء عادي…و انا كنت مستحي التفت(انا جدااااااا خجول!…و يا ويل اللي يعترض انا جاد)كنت ابغى التفت عليهم اتأكد اذا كنت اعرف واحد منهم او لا لكن اخاف التفت و يظنون اني ابغى افهمهم كلمت:وش تبون؟ و الا يفهمون غلط بطريقه ثانيه…انا ما التفت.
بعد كذا جاء واحد منهم باين عليه حبوب و جلس بجنبي و قعدنا نتناقش حول لغز ما عرفت احله.و احنا نتناقش جو مبزره و تفرجوا على الكيوب و تفحصوه(الصراحه كانوا مؤدبين على الاقل استأذنوا بادب.)بعد كذا قالوا السوني 2 شكله احسن(انا انقهرت بس انطميت)و قالوا رسمه سخيف(لويجي سخيف؟انهبلت بس برضه انطميت) و بدأوا الاخوان يأخذون راحتهم و يسبون بالجهاز لكن برضه انطميت…هذا مهو المنتدى اناقش بكيفي محد سألني وينك رايح.لو بناقشهم و الله ان يفقعون وجهي و يفرشوني على كنبتي اللي جالس عليها مع انهم بزران بس واجد 4 او 5 من عمر 13 الى 15.المهم ما طولوا الاخوان و راحوا و الرجال الى الان جالس بجنبي.عاد تعرفون أي واحد يحب ننتندو يكون له مواصفات خاصه.وسيم(ما ينطبق على ykm )طيب(ما ينطبق عليه).ذكي(برضه ما ينطبق)شكله انسان(هذي ما فيه امل تنطبق على القطو)انا شكيت ان الرجال من المنتدى مثلي…بلقافتي الي هي سبب شهرتي الى جانب جمالي(انحش!)بادرت و سألت الرجال بدون تفكير و قلت:انت متابع لاخبار ننتندو؟خاصة انه قال ان اللعبه من العاب مياموتو.قال نعم.قلت بالنت؟ قال نعم؟بمنتدى الننتندو موقع الالعاب العربي؟قال نعم.قال انت وش اسمك هناك؟انا جاني الموت!قلت يا ويلي على شكلي..بيفضحني و انا مسوي حلو و اتمنن علىالقطو بصورتي و كل شوي جايب طاريها!فكرت عااااد من زين شكلي الحين؟انا وثوبي اللي تقول عالكته بقره؟
و قلت شوفوا الصدمه وشلون بتصير لو شافوا كل اعضاء المنتدى كشرتي.و الا احد وصفها لهم كما هي..وش بيقولون؟وش بيقول ykm ؟عاد الا هالقطو يشمت بي قلت له مسوي ماني واثق فيه انت قل وش اسمك؟قال انا……انا……انا……انا لينك هيرو! (صراحه كانت انا وحده بس)انا انصدمت و قلت هذا اللي اكلمه بالمسنجر؟اجل شكله كذا؟اثره ما شاء الله عليه وسيم؟و انا بعد من زين الطبايع اخر مره كلمته كنا جافين شوي مع بعض.انا قلت:الله...وش هالصدفه الحلوه هذي؟قال انت وش اسمك؟كنه يقول لا تصرف
قلت انا قانون.قال انت سعد؟سعد المحب للخير(اسمي كذا بالمسنجر و لا احد يتطنز او يعترض لاوريه موقعه من الاعراب)؟قلت نعم انا سعد.بابتسامه لبقه طبعا.قعدنا نضحك و نتكلم و قام يسألني كيف حال القطو؟انا ما ادري من القطو الى ان تذكرتykm (امزح و الله ما جاب طاريك و لا قال القطو
و جاء احد اصدقائه و كان مليان شوي و قاعد ياكل…لحظه و الله ما ادري هو كان يأكل و الا لا..بس انا تعودت ان المليانين دائما ياكلون فلا يزعل علي لانه برضه معنا بالمنتدى
و كل هذا كان من بركات لويجي…جيت بشوفه و شفت اكثر بكثير
هذا الموضوع كتبته كبدايه انشاء الله عشان كلنا نلتقي و نكون اخوان نعرف بعض زين. انشاء الله بشوفكم كلكم(طبعا اذا جت صدفه مثل اللي حصل اليوم ما عندي مانع لكن غيره لا(امزح
ملاحظه:1_اللي بيجي يجدع وجهه من اللي في بالي(و انتم عارفينهم)و يعترض و يقول لا تقلبون شات لا يجي و لا يرد و يظف وجهه من اولها..بيرد زين حياه الله لكن لا يعترض على أي شيء.و تكلموا زي ما تبون المنتدى حر.و هذا الموضوع اصلا كله سالفه مهو مجرد اخبار منعا للرتابه و الملل.بطريقه ثانيه: السبايك يمتنعون…
2_الرجاء عدم تحرير أي شيء و أي كلمه من ايا كان.و اذا كان احد المراقبين عنده اعتراض يقول لي قبل لا يحذف مجرد احتراما لطلبي.
اخوكم اللي ما يقدر يفتك من وجوهكم (او بطريقه ما احبها:يحبكم):سعد
..
..
على العموم لو يسمعك لينك هيرو اني انا اللي كنت معه الله يعينك ...
