~+ المدارس الثانويه +~

[Tokimeki]

+مساء الخير +

بما ان الحين راح تبدي المدارس عندنا بالوطن العربي ( الله يكون بعونكم ) قلت راح اتكلم و اشرح عن النظام الدراسي بالياباني من مختلف النواحي و طبعا راح يفتح نقاشات و اسئله ان شاء الله تستفيدون منها و الاهم ان نستمتع فيها +^o^+



للأسف ما راح اقدر اشرح عن كل المراحل الدراسيه لكن اخترت اهم مرحله و هي المرحله الثانيويه الي يطلقون عليها اسم kotogakko الي تبدء من الصف العاشر الي الثاني عشر .

http://upload.wikimedia.org/wikipedia/en/b/be/Jun1.jpg


لا تتوقعون ان الانتساب الي مدرسه معينه في المرحله الثانويه شيء سهل بالعكس فقراره هذا مثل قرار دخول الجامعه . يعني يضطر الطالب ان يمتحن امتحانات معينه و عن طريق النسبه الي يحصلها هي الي تأهله الي ثانويه معينه .


~+الزي المدرسي +~

يختلف زي المدارس من مدرسه لأخرى ...و الطلاب اذا شافو شخص غريب يقدرون يعرفون من اي مدرسه هو منتسب لها من خلال زيه . و من اشهر زي مدرسي و معروف من قبل محبين الانمي هو زي " البحاره " او "Sailor Fuku"



و بالنسبة للصبيان اشهر زي هو زي gakuran





* الدوام الرسمي *

يبدء الدوام الرسمي الساعه 8:30 صباحا و ينتهي 3:00 مساء مقسمه ل 6 حصص . تبدء الدراسه في شهر ابريل و تنتهي في مارس للسنه المقبله و يقسم العام الدراسي الي 3 مواسم :

الموسم الاول من ابريل - اغسطس
الموسم الثاني من سبتمبر - ديسمبر
الموسم الثالث من يناير - مارس


الاجازات و العطل الرسميه

اجازه الصيف ( سته اسابيع )

اجازة الشتاء عند حلول ليله رأس السنه

اجازة الربيع

بالاضافه الي العطل الرسميه لليابان .

يبدء الاسبوع الدراسي من يوم الاثنين الي الجمعه و ايضا سبتين من كل شهر ×__× ;;




* المواصلات *



اغلب الطلاب يختارون يا انهم يمشون او عن طريق الدراجات الهوائيه او الوسيله المعروفه هي الباصات . نادرا اذا شفت احد يروح بسياره بعض المدارس اصلا تمنع انك اتيي بسياره +_+





* الحصص الاضافيه *

تعرف ب yobiko و هذه حصص تقويه اظافيه تقدر تستمر لاكثر من سنه يأخذها اغلب الطلاب قبل التحاقهم بالجامعه


* داخل المدرسه *

اول ما يوصل الطالب الي المدرسه لازم يغير حذاءه الي حذاء مخصص فقط للمدرسه ( UWABAKI )




* القوانين و اللوائح *

القوانين صارمه في النظام المدرسي الياباني ....كمثال يمنع ان الشخص يصبغ شعره او يحط مكياج او حتى يسوي شعره wavy +_+



* حصص الرياضه *

من المواد المهمه عند اليابانين هي التربيه البدينه و لهم زي خاص يسمونه ( TAISOUGI )




* الغداء *

مع ان في المدارس الثانويه عندهم كافتريا لكن اغلب الطلاب اييبون معاهم غداهم الخاص الي يطلقون عليه ( BENTOU ) يعني

علبه الغداء ووقت الاستراحه عندهم 45 دقيقه و طبعا يمنع ان الشخص يأكل غداه في وقت الحصص .




* النشاطات المدرسيه *

كل طالب لازم ان يشترك في نشاط معين و طبعا يؤخذ بشكل جدي ...يعني لو قرر ان يدش نادي التنس تلقاه يتدربون بعد المدرسه بصوره مستمره



* مهرجان الثقافه المدرسي *

يعتبر من اهم الاحداث الي ينطرها كل الطلاب و هذا اليوم الي عاده ما يكون في يوم عطلة نهايه الاسبوع تشارك كل المدرسه بنجاح هذا اليوم الي يمكن تستمر مده الاستعداد حقه لاكثر من شهرين.




هذه نبذه مختصره عن الحياة الثانويه باليابان و اكيد في اشياء ثانيه ان شاء الله راح اتكلم عنها بالمستقبل و اتمنى ان عجبكم الموضوع البسيط و ان شاء الله تستفيدون منه +^-^+

[asf4ever]

مساء النور توكي^^
مدام الموضوع عن الثانوية فقلت لازم أرد مع إنه علي أطنان من المذاكرة -___->>>يبالغ
Ahem
الصراحة معلومات أول مرة أعرفها مع إني أحسها مهمة في الأنمي والمانغا ونشوفها بشكل كبير

الموسم الاول من ابريل - اغسطس
الموسم الثاني من سبتمبر - ديسمبر
الموسم الثالث من يناير - مارس

ثلاث مواسم أحسن من إثنينة على الأقل ما يخلونك تنسى المدرسة مثل إجازة الصيف عدنا>.>
بس دوامهم متعب فعلا@_@
وعن الزي المدرسي فأظن إنه تحت الركبة لكن في الأنمي يبالغون (أذكر قريت هالكلام في منتدى أجنبي )
المووهم
شكرا على الموضوع توكي ونسيت أقول الحمد الله على السلامة
والحين بروح أحل واجب الفيزيا أبركلي

[Amidamaru]

السلام عليكم ورحمة الله وبركاته..

موضوع كووول وحلو
الظاهر طلعت البارحه استفدتي منها

لا تتوقعون ان الانتساب الي مدرسه معينه في المرحله الثانويه شيء سهل بالعكس فقراره هذا مثل قرار دخول الجامعه . يعني يضطر الطالب ان يمتحن امتحانات معينه و عن طريق النسبه الي يحصلها هي الي تأهله الي ثانويه معينه .

شغل عدل ! مب احنا
طب وتخير وحياك

~+الزي المدرسي +~
يختلف زي المدارس من مدرسه لأخرى ...و الطلاب اذا شافو شخص غريب يقدرون يعرفون من اي مدرسه هو منتسب لها من خلال زيه . و من اشهر زي مدرسي و معروف من قبل محبين الانمي هو زي " البحاره " او "Sailor Fuku"

ايه زي البنات عجيب ويحمس الواحد يدرس في اليابانXD
بس انهم يعرفون مدرسة الواحد من زيه ..شي فعلا يدل على نظامهم

و بالنسبة للصبيان اشهر زي هو زي gakuran

ايه هذا اللبس رهيب الصارحه وودي في واحدT_T

اغلب الطلاب يختارون يا انهم يمشون او عن طريق الدراجات الهوائيه او الوسيله المعروفه هي الباصات . نادرا اذا شفت احد يروح بسياره بعض المدارس اصلا تمنع انك اتيي بسياره +_+

هذا حال اغلب اليابانين مو بس عيال الثانويه
والأفضل هناك بصراحة هو الدراجة الهوائيه فعلا ..

تعرف ب yobiko و هذه حصص تقويه اظافيه تقدر تستمر لاكثر من سنه يأخذها اغلب الطلاب قبل التحاقهم بالجامعه

سنة كامله! حق تقويه بس..
راح عمره هذا>< بس اهتمامهم بالتعلم قوي فعلا .يعني ياخذ حصص اضافيه تستمر لسنه! عشان يجهز عمره بس.. يستحقون هالتطور فعلا

اول ما يوصل الطالب الي المدرسه لازم يغير حذاءه الي حذاء مخصص فقط للمدرسه ( UWABAKI )

يب..
سامع عن هالشي ..لأنهم يحترمون دار العلم ويقدسونها
بس الله يعلم شو يصير داخل

القوانين صارمه في النظام المدرسي الياباني ....كمثال يمنع ان الشخص يصبغ شعره او يحط مكياج او حتى يسوي شعره wavy +_+

وهذا اصلا اساس تطور الشعب هناك!
القوانين والالتزام بها
عقبالنا

مع ان في المدارس الثانويه عندهم كافتريا لكن اغلب الطلاب اييبون معاهم غداهم الخاص الي يطلقون عليه ( BENTOU ) يعني
علبه الغداء ووقت الاستراحه عندهم 45 دقيقه و طبعا يمنع ان الشخص يأكل غداه في وقت الحصص .

ايه هذا شخصيه معروفه في الأنميXD
بس اغلب اكلاتهم متشابهه

هذه نبذه مختصره عن الحياة الثانويه باليابان و اكيد في اشياء ثانيه ان شاء الله راح اتكلم عنها بالمستقبل و اتمنى ان عجبكم الموضوع البسيط و ان شاء الله تستفيدون منه +^-^+

لا موضوع فعلا رووعه
تسلم ايدج عليه^^ ومعلومات حلوة فعلا..
والله يخلي اليابانيه ما قصرت وياج الظاهر

بايو

[Yamato]

الصراحة يعجبني الزي في الانمي اكثرر (يمكن لانه اقصر @_@)

ويا عصفور.. سير ذاكر احسنلك (حلاته يوم الواحد يتامر على طالب.. خخ)

مشكورة توكي عالموضوع المدرسي.. بس يا ليت كان اقصر.. لوول

[HIME-SAMA]

السلام عليكم جميعا
-----------------------------

يوووو اشلونج توكي

واااااو خوش موضوع

ذكرتينا ايام الثانوية

يختلف زي المدارس من مدرسه لأخرى ...

وناسه عيل اختار المدرسه على لبسها اي وحده لبسها احلى

نادرا اذا شفت احد يروح بسياره بعض المدارس اصلا تمنع انك اتيي بسياره +_+

ويييه واحنا مدلعين
حتى لو بيتنا ورا المدسه ما نروح الا بسياره ولا اخر مديل بعد

اول ما يوصل الطالب الي المدرسه لازم يغير حذاءه الي حذاء مخصص فقط للمدرسه ( UWABAKI )

... ...

والله ناس نظاميين مو احنا ...
زين الطالب عندنا يوصل المدرسه بملابسه XD هذا اذا ما كام نايم بنص الطريج

و طبعا يمنع ان الشخص يأكل غداه في وقت الحصص .

هذول يمنعون الاكل بالحصص
اصلا ما تحلى الحصه ولا تقدر تفهم
الا اذا كل وحده بدرجها بطاط خل XD ومعاه بطل فلفل

تسلمين عزيزتي توكي على هالموضوع الحلو

وبانتظار المزيد منج

Sayonara
---------------------------------------------

[Al-RaQmi]

مرحبـــــا توكي
كيفك وكيف امورك ؟؟
صدق انكِ احسن وحده ^_^
لاني كنت دائما اتسائل عن طريقة المدارس في اليابان
ومن موضوعك عرفت اشياء اول مرة اسمع فيها *_*

لا تتوقعون ان الانتساب الي مدرسه معينه في المرحله الثانويه شيء سهل بالعكس فقراره هذا مثل قرار دخول الجامعه

الحمد لله انا مو مثلهم احنا مدلعين ومرفهين ^_^

يختلف زي المدارس من مدرسه لأخرى ...

معلومه جديدة

يبدء الدوام الرسمي الساعه 8:30 صباحا و ينتهي 3:00 مساء

غريبه !! دائما في اغلب الانميات ما يطلعون الا مع غروب الشمس ؟

و يقسم العام الدراسي الي 3 مواسم

والله شي طيب ^^

اغلب الطلاب يختارون يا انهم يمشون او عن طريق الدراجات الهوائيه

اه وش يصير عندنا في الصبح كل واحد يجر الثاني للسيارة -_-"

تعرف ب yobiko و هذه حصص تقويه اظافيه تقدر تستمر لاكثر من سنه يأخذها اغلب الطلاب قبل التحاقهم بالجامعه

هذا يبين سبب ان اغلب العرب مكرشين &_&

اول ما يوصل الطالب الي المدرسه لازم يغير حذاءه الي حذاء مخصص فقط للمدرسه

المهم عندنا انك تحظر للصف بجسمك مو مهم شكلك ولا لبسك ولا عقلك

يمنع ان الشخص يأكل غداه في وقت الحصص

اذكر ايام المدرسة ما يحلا الاكل الا وقت الحصص فشفاش وفول سوداني وعصيرات ......
==
على العموم ان موضوعك تحفه واشكرك على المعلومات الحلوه الي افدتينا فيها ^_^

[TNT-BOY]

يعني تتوقعي الواحد له خلق يتكلم عن ثانويته على شان يتكلم عن ثانويات الناس ؟-_-"

يمكن لو كان عندنا خيارات اوسع في التدريس زي اليابانيين راح يكون نسبة الذكاء اعلى

الثانوية اشبه بالحرب بين الطالب وزميله والمدرسين والادارة
وكل يوم اروح المدرسة آملاً اني ارجع بأقل اضرار ممكنة
-=ايام راح افتقدها في الجامعة =-

بالنسبة للنظام الياباني :
عجبني انه 6 حصص فقط !
لان الحصة السابعة احيانا تنقلب كابوس وتخرب كل اله جمعته في الحصص السابقة >_<
بالنسبة للزي الرسمي
عند الاولاد مال البحارة رهيب
وعلى فكرة الازرار لها دلالات "المرحلة - الحب - القوة" والاشيا دي
بس انا استانس على زي البحار اله معاه حاشية طويلة وهو الزي الرسمي مال الصيع والعصابات

بالنسبة للبنات:
.....اعتقد عرفتو ليش الاولاد متحمسين للدراسة
خاصة المناقشات الدراسية اله يعملوها جنب الدرج وله قدام المسبح


نظام الدراسة 3 سمسترات ؟
ممتاز جدا !



رافقكم الرب ايه الجنود الشجعان

بالنسبة لي مدرستنا قريبة من البيت
احب اتمشى لها لان المشوار يكون صغير ومسلي <<<<<اكيد اولها يمر على مدرسة البنات XD
بس وناسة لما اتمشى مافي طفل\طفلة في الابتدائي ما اتحرش به
حتى ان بعضهم اعرف اساميهم من كثر ما اشوفهم وانا رايح

بس طلعتنا الجو العالمي مالنا ما يشجع ارجع اتمشى فأرجع بسيارة صاحبي

مدرستنا متشددين في القوانين بعد
يعني حتى الجيل ممنوع تحط لك قبل ماتجي المدرسة
الشعر الطويل ممنوع
انك تجيب اكل ممنوع <<<< متحسر على اليابانيين XD
انك تتكلم اثناء الدرس.....ممنوع


على طول تذكرت مأساة كابامارو مع علبة الطعام
بالنسبة لي العلكة والحلاوى ما يحلون اله ايام الدراسة #_#

وعن الزي المدرسي فأظن إنه تحت الركبة لكن في الأنمي يبالغون (أذكر قريت هالكلام في منتدى أجنبي )

لا الشي دا يصير
بس اكيد مو في كل المدارس
على حسب المدرسة وتشددها

اذكر مرة شفت انا برنامج عن اليابان وكانو يطلعو الناس اله في الشارع وهم رايحين للعمل والمدرسة فكنت ملاحظ ان في بنات فوق الركبة وبنات تحت الركبة
طبعا اله تحت الركبة للـLossers وله ركبهم سود

الصراحة يعجبني الزي في الانمي اكثرر (يمكن لانه اقصر @_@)

مشكورة توكي عالموضوع المدرسي.. بس يا ليت كان اقصر.. لوول

Yamato اشعر بالفخر لمعرفتك يا رجل

غريبه !! دائما في اغلب الانميات ما يطلعون الا مع غروب الشمس ؟

اعتقد بسبب النشاطات لانه تكون بعد المدرسة



مشكورة توكي
وياليت لو تعطينا اطلاع اكبر على موضوع طول وقصر التنورة وتدعميه بالصور........اوه نسيت ما اقول "من باب الفائدة والتعلم "فقط لاغير !

وهذي اغنية منزلنها قبل فترة تتكلم عن الثانوية <<<<<< لحقو قبل ما يجو المراقبين يحذفو اللنك

[Kashiwaba]

آخ ذكرتيني بالمأساة اللي تبدي الأسبوع الياي

[Tokimeki]

مساء النور توكي^^
مدام الموضوع عن الثانوية فقلت لازم أرد مع إنه علي أطنان من المذاكرة -___->>>يبالغ
Ahem

مسااء النور اي انا قلت لازم اغثكم شويه علشان تتهيئون نفسيا


الصراحة معلومات أول مرة أعرفها مع إني أحسها مهمة في الأنمي والمانغا ونشوفها بشكل كبير

الحمد الله و هذا الهدف من الموضوع +^^+


إقتباس:

الموسم الاول من ابريل - اغسطس
الموسم الثاني من سبتمبر - ديسمبر
الموسم الثالث من يناير - مارس



ثلاث مواسم أحسن من إثنينة على الأقل ما يخلونك تنسى المدرسة مثل إجازة الصيف عدنا>.>

والله لو يخلونها 8 مواسم تعرف المثل الي يقول تيتي تيتي مثل ما رحتي جيتي ما ينفع هني عندنا احنا مخوخنا غير ما تستقبل


بس دوامهم متعب فعلا@_@

بس يونس !! يعني هو يحببونك بالدراسه ....و اصلا يقعدون بالمدرسه اكثر من البيت ....فتعتبر هذه المرحله جزء كبير من حياتهم .

وعن الزي المدرسي فأظن إنه تحت الركبة لكن في الأنمي يبالغون (أذكر قريت هالكلام في منتدى أجنبي )

لا هذه الصور صج ....و عندي رفيجاتي يابانيات لبسهم تنوره قصيره ....يعني الانمي مقتبس من الواقع XD اصلا سألت البنت و بالشتاء تغيرون لبسكم ؟ تقولي اييي تكون التنوره نفس الطول بس الخامه تتغير تكون اسمك ...قتلها يعني شنو ما تستبردون قالت بلى بس Fashion comes first ْ

شكرا على الموضوع توكي ونسيت أقول الحمد الله على السلامة
والحين بروح أحل واجب الفيزيا أبركلي

الله يسلمك ....واجب الفيزيا ابرك لك .....وينك انت ايام دراستي جان سلفتك كل الي عندي



موضوع كووول وحلو
الظاهر طلعت البارحه استفدتي منها

يب يب ....و كانت طلعه موفقه XD

شغل عدل ! مب احنا
طب وتخير وحياك

احنا حكم ديكتاتوري غصبن عليك تروح هل المكان رضيت ولا انرضيت

ايه زي البنات عجيب ويحمس الواحد يدرس في اليابانXD
بس انهم يعرفون مدرسة الواحد من زيه ..شي فعلا يدل على نظامهم

احس القاك اول واحد مداوم بس علشان ما يطوفه شيء
و صج كل مدرسه لها زيها الخاص و يتميز فيه ...و اصلا وايد يختارون مدرستهم علشان زيهم !! * تفكير بناتي بحت *

هذا حال اغلب اليابانين مو بس عيال الثانويه
والأفضل هناك بصراحة هو الدراجة الهوائيه فعلا ..

عاد اتصدق هذا هو الصح ! من ناحيه الصحيه و حتى الركضه و المشي شويه تطير النومه ...مو احنا اول ما نوصل نص عين مغمضه و ما ادري متى يستوعب المخ

سنة كامله! حق تقويه بس..
راح عمره هذا>< بس اهتمامهم بالتعلم قوي فعلا .يعني ياخذ حصص اضافيه تستمر لسنه! عشان يجهز عمره بس.. يستحقون هالتطور فعلا

ما ادري اذا فهمت عدل ...بس هذه حصص تقويه يعني خلال فترة الدراسه مو لما يتخرج ياخذها ...يعني لما يخلص الدوام يروح مدرسه ثانيه علشان يتعلم * ماكو شغل !! *

سامع عن هالشي ..لأنهم يحترمون دار العلم ويقدسونها
بس الله يعلم شو يصير داخل

اذا عرفت قول


لا موضوع فعلا رووعه
تسلم ايدج عليه^^ ومعلومات حلوة فعلا..
والله يخلي اليابانيه ما قصرت وياج الظاهر


سااانكيو دود !! و بس ذليتني ما صارت طلعه



الصراحة يعجبني الزي في الانمي اكثرر (يمكن لانه اقصر @_@)

اهلا ياماتو شخبارك !!

و صدقني راح اتغير رايك لو شفت الواقع


مشكورة توكي عالموضوع المدرسي.. بس يا ليت كان اقصر.. لوول

هيههيهي هذا الي قدرت عليه XD

[Tokimeki]

يوووو اشلونج توكي

واااااو خوش موضوع

ذكرتينا ايام الثانوية


هلووو هيمي !! شخبار القنفات XD
و اي ايام ثناويه صلي على النبي ...احنا مقارنة معاهم ايام الجاهليه و انت الصاجه
.

وناسه عيل اختار المدرسه على لبسها اي وحده لبسها احلى

و هذا الحاصل !! Girls Rules


ويييه واحنا مدلعين
حتى لو بيتنا ورا المدسه ما نروح الا بسياره ولا اخر مديل بعد


اي والله و تلقي السياره مافيها الي شخص واحد ...المسافه من بيته للمدرسه دقيقتين بالسياره ياخذله 3 ساعات من كثر زحمة الاوادم



والله ناس نظاميين مو احنا ...
زين الطالب عندنا يوصل المدرسه بملابسه XD هذا اذا ما كام نايم بنص الطريج


والله لو طبقو النظام عندنا احس من اول يوم الاوادم اتصارخ : عبووووووود شفت جوتييي ّ!! و لا هااااك و يحذفه جنه بازوكا و بويه على بو غشمره و ما تلقيت بعد ما يطوف اسبوع الا الجوتي صار اسوووووووووووود و مشقق و اصلا يقول الله يرحم والديك قطني

هذول يمنعون الاكل بالحصص
اصلا ما تحلى الحصه ولا تقدر تفهم
الا اذا كل وحده بدرجها بطاط خل XD ومعاه بطل فلفل

هيههيهيهي يعني ما نقيتي الا الاشياء الي فيها ريحه و على طول يجكونج XD

تسلمين عزيزتي توكي على هالموضوع الحلو

العفوو !!! سانكيو على البووست


مرحبـــــا توكي
كيفك وكيف امورك ؟؟
صدق انكِ احسن وحده ^_^

والله يا رقمي بصراحه ما اقدر اناقشك بهذه النقطه لانها حقيقه علميه ما يختلف عليها اثنين

لاني كنت دائما اتسائل عن طريقة المدارس في اليابان
ومن موضوعك عرفت اشياء اول مرة اسمع فيها *_*


يعني كسبت اجر صح ؟! يلا زين قاعده ايمعهم


الحمد لله انا مو مثلهم احنا مدلعين ومرفهين ^_^


احنا VIP محد يصك علينا


غريبه !! دائما في اغلب الانميات ما يطلعون الا مع غروب الشمس ؟

هذا يكون وقت نشاطهم ...يعني تخلص الدراسه الساعة 3 و بعدين كل واحد يروح نشاطه ..مثل السله و التنس و الجودو الخ الخ


اه وش يصير عندنا في الصبح كل واحد يجر الثاني للسيارة -_-"


لا و تلقاهم يعني يبدي الواك 8:30 اهم يقومون 6:30 تقريبا الي يسوي الاكل ماله و الي ياخذ الباص و يستغرق وقت على ما يوصل ...يعني يومهم يبدي من الفير


المهم عندنا انك تحظر للصف بجسمك مو مهم شكلك ولا لبسك ولا عقلك

عليك نور ....! المهم ان يمتع ناضريه بشوفتك و يتأكد الاستاذ ان يومه من التعذيب النفسي و العقلي بده و طبعا هذا غرامه


اذكر ايام المدرسة ما يحلا الاكل الا وقت الحصص فشفاش وفول سوداني وعصيرات ......

شفيكم كلكم تاكلون بحصصكم


على العموم ان موضوعك تحفه واشكرك على المعلومات الحلوه الي افدتينا فيها ^_^


مشكووور و الحمد الله ان استفدتو منه +^_^+

[Tokimeki]

يعني تتوقعي الواحد له خلق يتكلم عن ثانويته على شان يتكلم عن ثانويات الناس ؟-_-"

ما عندي ثانويه و ابي اغث احد ...فمافي غيركم

الثانوية اشبه بالحرب بين الطالب وزميله والمدرسين والادارة
وكل يوم اروح المدرسة آملاً اني ارجع بأقل اضرار ممكنة
-=ايام راح افتقدها في الجامعة =-


ايام الثانويه عبط ....بس عندي ايام الجامعه وايد احلا ....

بالنسبة للنظام الياباني :
عجبني انه 6 حصص فقط !
لان الحصة السابعة احيانا تنقلب كابوس وتخرب كل اله جمعته في الحصص السابقة >_<

يعني يت على هذه الحصه خل الطبق مستور

بالنسبة للزي الرسمي
عند الاولاد مال البحارة رهيب
وعلى فكرة الازرار لها دلالات "المرحلة - الحب - القوة" والاشيا دي
بس انا استانس على زي البحار اله معاه حاشية طويلة وهو الزي الرسمي مال الصيع والعصابات


مال الصبيان قصدك هذا صح



صج اتحس حق الPunks مع ان احس يضايق و تقريبا عبيط +___+

.....اعتقد عرفتو ليش الاولاد متحمسين للدراسة
خاصة المناقشات الدراسية اله يعملوها جنب الدرج وله قدام المسبح

No Comment


رافقكم الرب ايه الجنود الشجعان

لوووووووووول


بالنسبة لي مدرستنا قريبة من البيت
احب اتمشى لها لان المشوار يكون صغير ومسلي <<<<<اكيد اولها يمر على مدرسة البنات XD
بس وناسة لما اتمشى مافي طفل\طفلة في الابتدائي ما اتحرش به
حتى ان بعضهم اعرف اساميهم من كثر ما اشوفهم وانا رايح

والله احس وناسه ....بس حلات اليهال يتيمعون عليك و تروح فيها و برستيجك يضيخ خصوصا جدام مدرسه البنات


مدرستنا متشددين في القوانين بعد
يعني حتى الجيل ممنوع تحط لك قبل ماتجي المدرسة
الشعر الطويل ممنوع
انك تجيب اكل ممنوع <<<< متحسر على اليابانيين XD
انك تتكلم اثناء الدرس.....ممنوع

صج ؟! غريبه...يعني خصوصا انك تييب اكل ....لا الجيل هني عادي ..يا معود خل يسنعون شعورهم ..كل واحد يروح و شعره على شكل نومه و ستايل مخدته


اذكر مرة شفت انا برنامج عن اليابان وكانو يطلعو الناس اله في الشارع وهم رايحين للعمل والمدرسة فكنت ملاحظ ان في بنات فوق الركبة وبنات تحت الركبة
طبعا اله تحت الركبة للـLossers وله ركبهم سود


هيههيهيهي يعني يمكن البنت شريفه و حيويه


Yamato اشعر بالفخر لمعرفتك يا رجل


الله يستر


وياليت لو تعطينا اطلاع اكبر على موضوع طول وقصر التنورة وتدعميه بالصور........اوه نسيت ما اقول "من باب الفائدة والتعلم "فقط لاغير !

والله كنت راح احط لبس الBuruma مال الرياضه حق البنات ...بس بعدين تذكرتك قلت لاااع و الف لااااع


وهذي اغنية منزلنها قبل فترة تتكلم عن الثانوية <<<<<< لحقو قبل ما يجو المراقبين يحذفو اللنك

لوووووووووووووووووووووول !!!! اتعقد XD


آخ ذكرتيني بالمأساة اللي تبدي الأسبوع الياي


و هذا الهدف من الموضوع

[Yurilin]

السلام عليكم ورحمة الله وبركاته ^.-
مساء النور حبيبتي ^-^
************
موضوعج رااااااائع جدا ^.-
وعجبني اسلوبج ^.-....بس امبيه شنو هذا !!!!!!!
والله انهم غريبين ^^"...او احنا الغريبين مايندرا ^-^"
الدوام الدراسي من الساعة 8 ونص الى 3 O.O!!!!
ولا العطلة الصيفية 6 اسابيع بسO-O!!!!!
و العام الدراسي من ابريل - اغسطس ...ومن سبتمبر الى ديسمبر ...ومن يناير الى مارسO_O!!!!! شنو هذا ^^"!!
هههههههههههXD ....... ملابسهم حلوة ^.- + الاكل يشهي الواحد
اقول ليش ياربي بالانميات تختلف ملابسهم ... وخاصة في sailor moon ملابس ليتا غير مينا غير عن ري ^-^"ههههههXD
**********
معلومات حلوة وقيمة ^.-
تسلمين حبيبتي عالموضوع الرائع جدا -.^
ونتمنى لج التقدم الدائم بإذن الله ^-^
Au revoir^.-

[solid snake leg]

السلام عليكم toki و مشكورة على الموضوع
مع أني لست من المهتمين بالحياة في اليابان لكن هذا الموضوع مثير للاهتمام

ما عندي ثانويه و ابي اغث احد ...فمافي غيركم

شرررررر:vereymad:

ايام الثانويه عبط ....بس عندي ايام الجامعه وايد احلا ....

الله يسمع منك أنا السنة حتكون أول سنة لي لكن مش جامعة معهد عالي

[OrOcHiMaRu SaMa]

السلام عليكم ورحمة الله وبركاته ....^^

كيفك اختي ان شاء الله تكوني بخير وصحة

ما شاء الله تبارك الرحمن ......... موضوع رائع ومرتب ...الله يعطيكي العافية

بالتوفيق اختي

See You....^^

[Kaze]

السلام عليكم ورحمة الله وبركاته << تحية الاسلام >_>

ايه طوكي عفية شو هل النشاط الظاهر فيج عقدة مدارس XD

تبي ترجعين ايام الثانوية

الا اقول طوكي شنو سوالفكم الي تسوونها بالثانوية

بما ان الحين راح تبدي المدارس عندنا بالوطن العربي ( الله يكون بعونكم )

مالي شغل انا بطالي

قلت راح اتكلم و اشرح عن النظام الدراسي بالياباني من مختلف النواحي و طبعا راح يفتح نقاشات و اسئله ان شاء الله تستفيدون منها و الاهم ان نستمتع فيها +^o^+

ايه من قدج ثقافة يابانية , تصدقون ما تحسون ان توكي فيها عرج ياباني XD

لا تتوقعون ان الانتساب الي مدرسه معينه في المرحله الثانويه شيء سهل بالعكس فقراره هذا مثل قرار دخول الجامعه . يعني يضطر الطالب ان يمتحن امتحانات معينه و عن طريق النسبه الي يحصلها هي الي تأهله الي ثانويه معينه

ايه مالت علينا هني T_T المدرسة على حسب التخصص وال منطقة
يعني الواحد اذا يبي التخصص الفلاني لازم يروح المدرسة الفلانية ومافي الاذي الي درس التخصص هذا واذا تبي غيرها لازم تبدل مناطق والله قهر ><

يختلف زي المدارس من مدرسه لأخرى ...و الطلاب اذا شافو شخص غريب يقدرون يعرفون من اي مدرسه هو منتسب لها من خلال زيه . و من اشهر زي مدرسي و معروف من قبل محبين الانمي هو زي " البحاره " او "Sailor Fuku"

هيهيه لا انا عندي اللباس المدرسي المسمى عند البنات المريول احلى بوايد XD
عاد حنا بالبحرين نسميه نريول وانتوا شنو تسمونه XD

و بالنسبة للصبيان اشهر زي هو زي gakuran

ايه والله شغل عدل التفصيل وخاصة انه كووول يصلح حق طلعات مجمعات XD
هيهيه لما اضعف بلبس واحد

يبدء الدوام الرسمي الساعه 8:30 صباحا و ينتهي 3:00 مساء مقسمه ل 6 حصص .

ايه عفية هذا الدوام ^^ مو احنا نقوم مع طلعت اهالينا الصبح ونرجع معاهم كان رايحين نشتغل ><

الاجازات و العطل الرسميه

اجازه الصيف ( سته اسابيع )

اجازة الشتاء عند حلول ليله رأس السنه

اجازة الربيع

بالاضافه الي العطل الرسميه لليابان .

هيهيه بس هذولة الاجازات XD
حنا بدول الخليج ناخذ تقريبا 3 اشهر اجازة صيفية وغير الاجازات الثانية بس حنى يالشباب ما نقصر نعطي روحنا اجازات من عندنا XD
مره من المرات غابيت يومين عن المدرسة وكان في ظغط بالتدريس ان كانوا يبون يجربون علينا نظام جديد وكان مافي وقت فكان كل شيء بالسريع فقلت آخذ يومين اجازه وارجع ولما رجعت سالني الاستاذ ليش غايب ( يبي عذر ) رديت عليه حاله نفسية وشرحت انه هذا النظام مو شيء ومسوي اكتآب المهم تفليفيت عليه حصو كامله وكنت بالعمد علشان اطوف حصة الرياضيات لاني اكرها XD

* المواصلات *
اغلب الطلاب يختارون يا انهم يمشون او عن طريق الدراجات الهوائيه او الوسيله المعروفه هي الباصات . نادرا اذا شفت احد يروح بسياره بعض المدارس اصلا تمنع انك اتيي بسياره +_+

الله يخلي الاهل XD

* داخل المدرسه *

اول ما يوصل الطالب الي المدرسه لازم يغير حذاءه الي حذاء مخصص فقط للمدرسه ( UWABAKI )

اقول الحذاء الثاني على حساب المدرسة ولا على حساب الطلاب ؟ XD

* القوانين و اللوائح *

القوانين صارمه في النظام المدرسي الياباني ....كمثال يمنع ان الشخص يصبغ شعره او يحط مكياج او حتى يسوي شعره wavy +_+

ايه عفية ><
انا كنت بالثانوية سنتين وفي آخر فصل ما دخلوني المدرسة
ليش ؟
شعرطويل XD

* حصص الرياضه *

من المواد المهمه عند اليابانين هي التربيه البدينه و لهم زي خاص يسمونه ( TAISOUGI )

هيهيهيه حنا في المدرسة يعطونه كورة وسوو فيها الي تبون بس جيبوها آخر الحصة XD

* الغداء *

مع ان في المدارس الثانويه عندهم كافتريا لكن اغلب الطلاب اييبون معاهم غداهم الخاص الي يطلقون عليه ( BENTOU ) يعني

علبه الغداء ووقت الاستراحه عندهم 45 دقيقه و طبعا يمنع ان الشخص يأكل غداه في وقت الحصص

خلف الله علينا هذا الاكل ولا بلاش
مو احنا شوارمه و برجر XD
او طعمية مثل الصخر اكيد سراب فاهم قصدي لانا من نفس المدرسة XD

* النشاطات المدرسيه *

كل طالب لازم ان يشترك في نشاط معين و طبعا يؤخذ بشكل جدي ...يعني لو قرر ان يدش نادي التنس تلقاه يتدربون بعد المدرسه بصوره مستمره

حذي النشاطات مو موجوده عندنا بس الي موجود فريق الكشافه -___-"

* مهرجان الثقافه المدرسي *

يعتبر من اهم الاحداث الي ينطرها كل الطلاب و هذا اليوم الي عاده ما يكون في يوم عطلة نهايه الاسبوع تشارك كل المدرسه بنجاح هذا اليوم الي يمكن تستمر مده الاستعداد حقه لاكثر من شهرين

المهرجانات والحفلات انا في البيت نايم XD

مشكوره توكي على هذه المعلومات الجميلة وواصلي تميزك والى الامام دائما

Angle