واحده من اخر الروائع الصادرة على الاكس بوكس, فار كراي, صدرت اخيرا على الاكس بوكس في فروع متاجر جيم ماستر, لكن...قابلني موقف في محل جيم ماستر فرع جده, حبيت اني اشارككم هو بما انه متعلق بقسم الاكس بوكس, سواء بالمحل او بالمنتدى, وخصوصا بالعامل المسمى " بندر الجيلاني ".
دخلت المحل وسلمت على المحاسب عبدالله والمسؤول عن قسم الجيم كيوب جلال " مع انه متورط بهذا القسم صدقوني, ادعوله ينجو " وعلى عبدالله جريري اسطورة محلات جيم ماستر ورافع راية شعار المحل, وقفت امام واحد صفلكم طابور زباين قدامه بدون ادنى اعتبار او حس بالمسؤولية, واحد كل ماكلمه زبون مايرد عليه الا بدخول القرن المقبل على التاريخ البشري, واحد ماادري ايش,هو,معيار,تعيين الموظفين بالمحل كل مااشوف طريقته بالتعامل مع الزبون, وهذا الواحد, هو التحفة اللي اكثركم " عانى " منها, بندر الجيلاني.
ايش اوصفلكم هذا الادمي اللي ضرب بكل معايير التعامل مع الزبون عرض الحائط ومسحبه البوية!
على الرغم من انه في طابور " بالتحديد جمع غفير من الزباين لانه الطوابير بطلوها من القرن التاسع ميلادي " واقف امامه, الا انه ماسك يد الاكس بوكس, وفكه طاح على صدره " انبهارا باللعبة او انه فكه مخلوع اعذروني مااقدر احدد " ومتكي على الطاولة وعيونه مفقوعه سنايبر على التلفزيون وقاعد يلعبلكم ومعلي الصوت والزباين مستنين جلالته ينزل من السحابه اللي معشش فيها ويخدمهم ولو ثواني لانهم " على عكس غراره لحسن الحظ " وراهم مشاوير واهالي ويوم وطني عاجل " نبارك لكم بمناسبة اليوم الوطني على فكرة, اطال الله في عمر المليك ".
بما انه الزباين كان اكثرهم اطفال " كتاكيت في عمر الـ11-16 ماادري ليش لكن فكروني بأيام ماكنت اتابع البوكيمون قبل مايقطعوه من القنوات العربية لسبب اجهله الى الان, يمكن شركة البوكيمون فلست وانباعت او لسبب اخر...همم..على اية حال " استأذنت من بين الزباين لانهم خجولين او لساعهم اصغر من انهم يطالبو حقوقهم من بياع ماباعش حاجه.
انا : بندر, يابو, سيب اليد ياحبيبي.
بندر " علشان اوصفلكم هو بشكل موجز, اسوأ تعامل راح تتعاملو معاه في حياتكم البشرية الفانية, لمن يتكلم بس يزعق, واحد امي, مايعرف يقرى كلمة انجليزية, تعامل سيء جدا مع الزبون, لمن يتكلم تحسو صوته كأنه نعامه ذكر قاعده تولد من حلقها : كااااعااااااااق...كاعاااااااااااق...كااا...الخ, اللهم لاشماته, الحمدلله على نعم الله اللي مانحس بيها غير لمن نقابل من ابتلي بها " : هااااااااااه مشغول اوه شوف هذا معاه رشاش.
( بندر كان يلعب فار كراي على فكره )
انا : ياللي مالك مكانة بالمجتمع ولا احد داري بأي صفحه من تاريخ البشرية يطبعك, شوف الزباين وسيبك من اليد, ياعبدالله, عبدالله شوف خويك ايش مسوي عاجبك؟
عبدالله جريري : ياشيخ سيبك منه واحد مااحد داري مين اللي وظفه اصلا.
انا : عبدالله عيب عليك بالله عاجبك الوضع وهذولي اللي اهاليهم مستنينهم بالبيت قلقانين مو عارفين كيف يشترو من هذا اللي يوم مااتولد حطو تاريخ ولادته في برنامج " حدث في مثل هذا اليوم ".
عبدالله : بندااااااار, " بندر يخاف من عبدالله لانه الوحيد اللي يهجده " شوف الزباين لا أكلم عمك ابو فاطمة .
ابو فاطمة هو المدير غير الرسمي بالمحل, صدقوني حتى انا مو فاهم ايش معنى هذا.
وبس, انتهت المشكلة, وقام اللي ماله مكانه بالمجتمع الراقي يرمي هذه اللعبة وهذيك اللعبة للزباين, واخذت فار كراي ومشيت من المحل و " حلفت " اني ماادخل المحل مادام هذا الطقمبع بندر يشتغل فيه.
وهذه انطباعاتي عن اللعبة علشان مايكون الموضوع مخالف :
الرسوم : جباااااارة " بالنسبة للعبة على الاكس بوكس " بالفعل يوبي سوفت هي الشركة المبدعه في هذا الجيل, كل شيء بدءا من ضخامة المراحل, اسلوب تصميم الشخصيات, حتى مؤثرات الماء لاتضاهى .
10/10
الاصوات : اخييييرا استبدلو صوت البطل الموجود بنسخه البي سي بصوت اخر لنسخه الاكس بوكس, مايمديني حتى اوصفلكم قد ايش الفرق في اصوات الابطال يعتبر عامل مهم جدا لاندماجك في اللعبة وتحس انه انت الشخصيه داخل اللعبة, اصوات الاسلحه ممتازة وقوية ومنوعه, اصوات الغابة من طيور وحشرات لاتضاهى, ابدعت يوبي بشكل كامل .
10/10
التسلية : اسلوب وضع الافخاخ ممتاز وسهل للغاية, ومافي شي اروع من انك تحط فخ جذع الشجره الملفوف, وترمي حجر مكان الفخ وتختبيء, وتشوف العدو يقترب يبغى يعرف مصدر الصوت و BaAAAAAaM وقع في الفخ والجذع طيره لكوالالامبور.
9/10
القصة : بسيطة, شوية ارهابيين فاضيين استخدمو سفينتك كهدف لصواريخهم, وانت رايح تنتقم, لكن القصة راح تتطور بشكل دراماتيكي لاحقا, ماابغى اخبصها عليكم.
7/10
هذه هي انطباعاتي البسيطة, اعذروني لكن اللعبة شادة افكاري حاليا, جبارة بمعنى الكلمة, لكن بالفعل..
انا مستاء جدا من الموقف اللي سارلي اليوم بمحل جيم ماستر, تعامل **** مع الزباين من قبل المدعو بندر الجيلاني, قمة الوقاحة يتجاهل الزباين بهذه الدرجة وقاعد يلعبلي ومافي اي احد يحاسبه, اذا كان هذا هو معيار جيم ماستر في تعيين العمال, فعلى جيم ماستر... السلام.
حتى Dr.Aqas واجه موقف مع المدعو بندر لمن كان يبغى يشتري ميرسينيريز, ((((( بالضبط ))))) نفس الموقف اللي واجهني, كان بندر يلعب ميرسينيريز وعقاص بيحاول يشتري اللعبة والادمي صافه ولا كأنه في زبون امامه !! وقاحه!
ولكن لولا عبدالله جريري وغيره من اللي كونو لهم اسم وشهره بجيم ماستر كان حالة المحل فرع جده اسوأ بمراحل وبشكل لايتصوره المرء من حالة جيم ماستر فرع الرياض, بصراحه...شيء مخزي.
شباب, في اي محل ثاني يبيع العاب ممتازة للاكس بوكس بجده؟ بمعنى اول ماتصدر الالعاب مايمر اسبوع الا وتصدر بهذا المحل؟
لاني يإست من جيم ماستر بالفعل " اتأثرت " من انه محل بني على شهره ودعاياته كانت مليانه الدنيا الاقي فيه عامل بمستوى المدعو بندر, لاحول ولا قوة الا بالله.
