شوفو... هاالموضوع عباره عن نشر غسيل ... يعني كل اللي عندي بقوله ولا تلوموني اذا ما فهمتو شي .. لانه طلع مني مثل طلع الماي من الكاس اذا طاح ... تنتثر في كل مكان بدون ترتيب .. هذا كله كان في قلبي وطلع وانا نشرته على الحبل عندكم(اذا بتسمحون لي ) .... اقروه قبل لا ادخله النشافه
وملاحظه قبل لا ابدا : ترا مب شرط دايم اني اكون انا الصح يمكن اكون غلطان ...لكن هذا رايي وبقوله بصدق....
-(هذي البدله ) .... هذا موقف صار صدق وانا كنت احسبه ما يصير الا في طاش ما طاش ... امي كانت قاعده وعندها اخوي ... رن التلفون ... قام اخوي ورد .. الو .. هلا ....وعليكم السلام ... هيه موجود دقيقه ادور عليه .....وراح يركض لابوي يخبره ان التلفون يبغيه .... امي سالته قبل لا يروح من اللي في التلفون .... رد اخوي :" وحده تبغي ابوي "!!! .. امي انهبلت .. واذا وحده تبا ابوك تروح تزقره<تناديه> على طول ، شف منو هي اول ... ورفعت السماعه ( طبعا ) ... هلا خير من انتي ومنو تبغين .... ردت الحرمه :" انا فلانه الفلاني وابي فلان الفلاني(ابوي)" .... قالت امي:" وشو تصيرين؟؟" ... قالت:" انا اخته" ...امي :" ما خبرنا له اخت بها لاسم " ... قالت :" انا اخته من الرضاعه ... وامي موصيتني اكلمه واخبره ابراء للذمه " !!!!! ........ طبعا امي هدت ومشى الموضوع طبيعي .. وطلع عندي عمات جديدات لكن القهر انهن كلهن كبار وعندهن عيال ...... والسؤال اللي توه ماكل له صحن عيش وملحقه بكم كاس لبن وانبطح جدامي اول ما سمعت السالفه .... الحين الواحد فينا اذا سمع خبر ان اثنين متزوجين وعندهم عيال اخوان بالرضاعه ... هل بيروح يخبرهم ؟؟ .. انا بصراحه اظن اني بنطم ولا ني مخبر احد(خراب بيوت) ....
-(هذي فانيله).... واحد قاعد في قهوه والا يمشي في سوق ... مر بجنبه واحد يعرفه ... يا فهد ياحمار الله يلعن امك وينك ما عاد شفناك .... هلا بالغبي خالد ... شو اخبارك شو علومك من زمان عنك يا الثور شو فيك ما عاد تكلم .... هلا بك والله يالق__ انت اللي ما عاد كلمت انا دوم مع العيال .... انت خ___ اصلا ولا فيك خير ما تسال عن ربعك وهذي عادتك .... الله ياخذك انت اللي مختفي وكل ما كلمناك تهربت منا ... الخ .... السؤال اللي اكل شاورما ما يعرف مصدرها وانبطح من التسمم ..... ليش الكلام الوصخ صار على طرف اللسان وصار اللعن طريقه للتعبير ؟؟؟؟؟
-(هذي طاقيه).... الحين نحنا ذا شفنا بنت مطلعه شعرها والا ما تغطت زين .. نيلس <نقعد> نستلمها انها ما تستحي وانها وانها ... انزين السؤال اللي كان يركض وصقع في باب زجاج (ماشافه) وطاح هني جدامنا ...الحين الربال اذا لبس له شورت وطلع كراعينه وبعض من فخوذه .... ما يصير مطلع عورته .. ويستاهل انه يحصل ما تحصله البنت من تهزئ؟؟؟؟؟؟؟ .....
- (هذا احم!!)..... الواحد اذا كان مسافر وشاف بنت ماتحجبت والا ما تغطت قال انها ما تستحي وما تخاف ربها وانها وانها ... واذا كان وياها واحد قال انهم ما يستحون ... واذا قلنا له يمكن زوجها قال كيف يخليها تسوي هالشي .....ها المره سؤال طب في مسبح لكن طلع فاضي مافيه ماي وانبطح على الارض ميت .... ياخي شو عليك من العالم ؟؟ اذا تبغي تتكلم وقاهرك ها الشي قول له هو والا لا تجلس تفضح خلق الله ؟؟ انا متاكد انهم يدرون انه غلط لكن يمكن يبون يوسعون صدورهم شوي ... ويمكن انهم عرسان جدد وبايعينها في اول شهر وبيعقلون بعدها (ان كان ماتو وقتها ربك هو اللي بيحاسبهم)... مثل ما الواحد يدري ان الاغاني حرام لكن يسمعها ومثل ما تدري ان الجوال يلعب بالمخ لكن نستعمله ... وكلنا عارفين اننا بننحاسب على اغلاطنا؟؟؟ .. ... ويا كثر الاغلاط اللي نسويها ونحنا عارفين انها غلط ... ياكثر اللي نسويه وما نبغي الناس تدري اننا نسويه .. ( الله يغفر لنا ويرحمنا)
-( هذا البنطلون) ...البرمودا هذا البنطلون القصير اول ما نزل الكل قال وععع وانها مب شي ومافي امل نلبسها ... انا بصراحه ما عجبني ابد لكن رحت وخذيت لي كم واحد عناد ... و النعال اليديد اول ما نزل الكل حاربها وسفل بها ... واذا قلت ليش..... يقول: مب من عاداتنا ولا تعودنا عليها ...... والحين الكل لابسها.....اوكي السؤال اللي نط من طياره ولا انفتح براشوته وطاح على قمة راسه وبقى منبطح على الارض .... ليش كل شي نحكم عليه بعاداتنا وتقاليدنا قبل عقولنا ؟؟؟ حتى اول ما يابو طاري ان الحريم يسوقن.. كل الناس قالو لا .. مب لسبب ديني ولا لسبب منطقي ... بس لانهم ما يستسيغون ان الحرمه تيلس ورا االسكان(ويمكن يكون غيره من الرجال) .... الحكم في نظري يكون بالدين وبالعقل وماهو بالتقاليد والعادات ... والحكم ما يطلع من اول نظره ... الحكم يحتاج تفكير وماهو كره تشوتها يا انها في الباب والا تطلع ضربه مرمى
-( هذي الكندوره)... انا الحين اذا كنت امشي في شارع ولقيت جدامي اثنين شباب يسولفون وهم يمشون عند بعض في سياراتهم .....انقهررر وابدا اضارب ... وفي يوم من الايام لقيت نفسي واقف وبجنبي ربيعي في وسط شارع ونسولف بنفس الحركه اللي كنت انقهر منها .... ومره كنت مار في شارع ولقيت ابوي وعمي مسوين نفس الحركه
... عند هذيك اللحظه تاكدت ان الانسان طبعه غريب جدا يبغي الدنيا على كيفه .... يبغي يسوي والناس ما تسوي .. الريال يبغي الحرمه ما تسوي والحرمه ما تبغي الريال يسوي ......ها المره السؤال استحى ولا انبطح بعد شوف ها المشاهد
-(هذي الكندوره الثانيه).... الحين بعض الناس اذا شاف الحرمه تغلط وسوت شي غلط انهبل وقال كيف تسوي ها الشي وانها بتفضح اهلها (لاحظو بتفضح اهلها ..مب لانه حرام .. نرجع لموضوع العادات والتقاليد) و .. و... واذا الريال سوا نفس الغلط نقول الله يهديه بس ...وهو ناسي ان الغلط من اهم اطباع الانسان وان الحرمه انسان مثل ما الريال انسان وكلهم يغلطون وانهم يعاقبون نفس العقاب اذا انمسكو ...... ولو قلنا ان الحرمه محد متزوجها وبتعفن في بيت اهلها بعد ها الغلطه .... والريال.. من اللي بيزوجه؟؟ ... من اللي بيرضى انه يعطي بنته لواحد مثل هذا؟؟ ... وبيصير مثل البنت عند اهلها وكلهم بيصيرون مشكله على المجتمع ويمكن يكونون السوسه اللي تخربه .... الغلط غلط مهما كان كبير والا صغير سواء من حرمه والا من ريال ...
- (هذي الجلابيه) .... الحريم يسوقون .... انا الى الحين عجزت اعرف كيف الناس تفكر ... ما يشوفون الشوارع مليانه .. ما كنهم يوقفون عند اشاره خمس مرات قبل لا يمشون ... ما يشوفون كل بيت كم سياره فيه ... انا ما ادري هو جائز والا حرام ... ولا ابغي افكر هم يحتاجون والا لا ....لكن اللي اعرفه و متاكد منه زين اننا مب ناقصين سيارات وليتهم يمنعون الريال من السواقه بعد ......لكن السؤال اللي قطع اشاره على ريوله وشاف اشاره المشاه خضرا ومشى لكنه انبطح على الارض قبل لا يوصل الجهه الثانيه( صلحوها ولو انها ما تستعمل..بنحتاجها في يوم)..... شو البديل عن السيارات؟؟؟؟ .... في نظري (لاحظو الثقافه) ...انهم لو يحطون اندر قراوند(القطار اللي تحت الارض) .. ويشغلون اتوبيسات مثل العالم والناس .. ويهتمون بالنقل العام احسن مليووون مره من سواقه الرياييل والحريم ؟؟؟؟؟؟
خلصت مشابك الغسيل اللي عندي .. .. والا الغسيل وايد ... ولا عنده زياده يحط من عنده ...
وهي تصير باكبر العوائل!!
ملاحظه خارج الموضوع : اخصصصصصصصص والله قمنا نترجم اللي نكتبه عشان بعض الناس يفهمون
والله اخصصصصصصصصصص يالعرب
المشاركة الأصلية كتبت بواسطة aoks
~ 
! المهم يا عزيزي شووف بالنسبة لإثنين اخوان من الرضاعة .. الصراحة هذا مب خراب بيوت الله يسامحك الله ما يرضى بهالشي و بالعدين لازم لاحظ لازم ينفصلون وماراح تخترب الدنيا والعيال بيتمون شرعين ولو ان الزواج باطل لعذر وهو الجهل زيين تخيل طلعت اللي متزوجها هالشخص اخته شقيقته وبطريقة او بأخرى تزوجوا هل نقول حرام ونسمي امر الله خراب بيووت لاااا طبعا و ربك كريم بيغفر وهو داخل تحت قول الله "إلا ما قد سلف" ..
ما نقول غير الله يهديهم ... 
!!!
!!!
