من اول ما رجعت من السفر ما شفت لك بين
وانا اللي كنت احسب اني قبل ادوس ارض المطار تجين
تكونين انتي اول شخص عيني تحتضن عينه
وكنت اتخيلج من زود فرحة رجعتي تبكين
واشوف بدمعتج حكيج واعرفه قبل تحكين
واجيب احلى من اللي بتحكينه واتركج تحكين
تقولين الوطن نور واقول بنور مظوين
تقول لي غديت احلى واقول عيونج الحلوين
كلام نام بشفاهج وخفتي لا تصحينه
ذخرتيه لغرام اللي ينام ويتركج تصحين
تغانمتي غيابي لين رجحتي موازينه
تعلم من ايدج لمس الكفوف وعلمج تجفين
وليتج لاقية به شي فيني ما تلاقينه
ما هو بغرور لكن خابرج مالج امل تلقين
تغافلتي بغلا ولا الحلا ما هو بمنزينه
تزينه الصور بس الصحيح ان ابن الحلال ازوين
وانا ماني بناقص عنه يوم انج تبدينه
نصيبي هو نصيبي لو يسددها من الصوبين
قنوع بمظهري والسم ما يذبح ثعابينه
على قول المثل ماني حلو لكن ماني شين
اذا اهداج الزهر مرة فانا اهديتج بساتينه
واذا الهاج بفرح ليله فانا تهت لبكاج سنين
واذا استضعفتج املاكه وشتتج ملايينه
انا حتى فتات الخبزه اقسمها معج نصين
طموحي بس اظفر بشي تستحقينه
تدينته ... تسلفته ... سرقته
مو مهم من وين
كاني من كثر ما ارضى بكل اللي تتمنينه
لو انج تطلبين الله يعنيني بقول امين
انا ما العب على الحبلين وقت الطيش وسنينه
تبين الحين يوم اني كبرت العب على الحبلين
ترى عند البدو بالذات عيب اللي تسوينه
حلاتج لا عشقتيني تعشقيني ليوم الدين
غرام نسكن ظلوعه حشيمه من مجانينه
جفا يجمع معزتنا ولا عشق يذل ثنين
كثار اللي تحدوني وقالوا لي تحبينه
امانه لا تخليني صغير بعينهم تكفين
لاني كل ما قالوا تخون اقول مسكينه
عليج الله وامانة علميهم منهو المسكين
انا خايف لا طاح الجمل تكثر سكاكينه
وانا ما عادت ظلوعي تتحمل طعنه السكين
مثل ما قالوا المكتوب واضح من عناوينه
لو ارحل منج للغربة بسافر من ظلامج وين
كفاية كل حلم يمر في رقادي تزورينه
كفاية من تفارقنا وانا ما غمضت لي عين
قبل يومين شفتج بالمنام وقمت من حينه
ونمت امس ورجع نفس المنام اللي قبل يومين
وسلامتكم
تحياتي
