مين فينا الإرهابى
لما مسكوه ..... وع النيابة ودوه ..... هوه وعشرات ( المتهمين ) .... صرخ وقال لعضو النيابة .......
قوللى إنت يا عضو يا نيابى
قوللى مين فينا الإرهابى
******************
أنا ..............
إللى بدافع عن أرضى
وعن عرضى ودينى
ولا إللى إتهمونى غيابى
******************
قوللى فهمنى رسينى
إيه ذنبى وإيه ذنب إصحابى
******************
دا إحنا رايحين ندلى بصوتنا
زى ما قالوا ف الجرانين
أتاريهم ناويين على موتنا
وأتارى الناس دول مجانين
فى الأول قالوا اللنتخابات إتلغت
فصار كلام كتيييير ولغط
وأخيرا قالولنا طابور
ووقفنا ننتظر الدور
والزحمة تَعَبِتْ أعصابى
******************
ظباط وعساكر وآلات
ومحدش عارف فيه إيه
وعمايل بدأت تخنقنا
والناس بتزيد بالألفات
فنادينا وقولناله يابيه
هنصوت وداقل حقوقنا
قال طييييب ياولاد الـ .. ( لفظ نابى )
******************
وهات يا واد فين يوجعك
تصرخ تنادى ومين يسمعك
قنابل تِسَيِّلْ
وراجل وعيل
مفيش فرق عنده
ولو حد عانده
يرميه برصاص حى بيتلعبط
الواحد إتلخبط
إنتخابات دى ولا هوجة عرابى
******************
مات تقول كتير ؟ ؟ ؟
سبعة ف عين الحسود
فدا الجنود والحشود
ده غير الجرح والكسر
وغير إللى ف الأسر
إللى هو إحنا
تصور يابيه
كان معانا قال إيه
قنابل وسلاح ومولتوف
بالله عليك مش مكسوف
يقتل إنسان
ويقول ده كان
مثير شغب وإرهابى
******************
قولى ياباشا رسينى
وإقف ف ضهرى قوينى
دا أنا عاوز يوم عرضى ودينى
آخد بيمينى كتابى
متقوللى مين فينا الإرهابى
******************
وعليه
أقفل المحضر عقب إثبات ما تقدم .....
وقررنا
أولا :- يحبس الإرهابيين خماشر يوما على ذمة قضية أمن دولة.
ثانيا :- نصرح بدفن الجثث وتشدد عليها الحراسة لخطورة أصحابها الإرهابية على أمن الدولة.
ثالثا :- لا تعزية للسيدات وينبه عليهن بعدم الذهاب للإنتخابات.
رابعا :- إحنا شعب طيب وهينسى وإللى فات مات.
أبو عبد الله
سَعيد ندا
شاعر تحت الإحتلال
مصر – دمياط – فى 8 / 12 / 2005
