الله أكبر!!! (صوره) طفل يولد برأس على شكل اسم نبينا محمد صلى الله عليه وسلم

[The Fridge]

السلام عليكم ورحمة الله..

شحالكم شباب،
انشالله بخير
وبصحه وسلامه
وبعافيه
وعيدكم
مبارك
مقدما
اعزائي!!
وارجع يا كل الحب
ارجع يا روحي


(يحاول يطول بالمقدمه عشان اللي يممرون بالماس على اسم الموضوع ويحاولوا يقروا بدون ما يدشوا )
بصراحة وبدون مقدمات مافي لا صوره ولا شي .. انا بس حبيت نناقش ظاهره المواضيع اللي تيجي زي كذا، يعني صور الامعاء الغليظه اللي تتشكل على شكل اسم النبي او كريات الدم البيضاء اللي تأخذ شكل ورسم كلمة "الله" والاشجار اللي تنعوج على شكل "لا اله الا الله محمد رسول الله" وغيرها من المواضيع اللي نشوفها كل يوم في المنتدى الاسلامي.

قبل ما اقول رأيي أبي أسأل كل واحد فيكم:

ما رأيك بمثل هذه المواضيع؟

هل تؤيدها؟ برجاء ذكر السبب

هل تستنكرها؟؟ برجاء ذكر السبب

ما الهدف منها برأيك؟

ولي عودة بإذن الله لو الموضوع ماتسكر او رقبتي ما طارت.. يقولون عندنا مرقبيين نازيين هنا، الله يستر

سوليداد

[Yamato]

الناس ينشرونها لانهم يشوفون انها شي مثير للاهتمام

نفس لما يحطون صورة بطاطا على شكل بطة ولا حجر يكون مكتوب عليه اسم الله او النبي محمد صلى الله عليه وسلم


بس كيف انها تحصل.. فهذا من عند ربك يا حفيدي.. كح كح



على فكرة..
قعدت اتتبع حركة حلج ربيعك في الصورة.. كانه يقول What's up with me <<<< ما يلمح ابدا

بس صدق تتبع الحركة

[The Fridge]

لا لا .. انا اقصد لما يحاولون يضفوا عليها طابع المعجزه الإلاهيه ويحاولوا يطلعوها كإنها رساله او msg من الله سبحانه وتعالى..

فاهم علي..

وبخصوص رفيجي فهو مايقول whats up with me.. هو يقول شي ثاني..

[Yamato]

في صورة الشجرة اللي منحينة وكانها تركه لله..
بس انا اتفق معاهم في هالشي..

التذكير زين..



وتعال.. لا يكون قاعد يسب الاخ

[ثريول]

أعتقد أن خلق الله لرأس هذا الطفل, أو جذع تلك الشجرة, أو تشكيل تلك السحابة أعظم بكثير من أن يُستصعَب عليه تشكيلها على شكل اسمه بلغة من لغات خلقة لا يتكلم بها غير 300 مليون, الله سبحانه وتعالى يخاطبنا جميعاً بتلك الشجرة كشجرة وذاك الطفل كطفل وتلك السحابة كسحابة وينقل فيهم جميعاً رسالة تفيد وجوده وعظَمَته. المفروض الإهتمام والإنبهار لخلقه لهذه الأمور لا لمَ قد يصير عليه شكلها!

[! غــريــب !]

تخلف x تخلف ,,

عمر الدعوه من بدايتها الين اللحين ماصارت كذا ,,

معظم ناشرينها يتوقعون إنهم يبون يحصلون أجر كبير

مادروا إن كمية الدعاوي اللي تبي تلفحهم على قولة جدتي حمده

تبي تشيل كل هالأجر ,,

لنفترض إنك شفت فلان انمسخ بعد مادخَن ومدري وشو تبي تخاف يوم

أو يومين بالكثير و تجلس تصلي , بعدها بترجع لنفس المعصيه لأن

مفعول (التخويف ) خلاص راح !!!!

ألا نملك قرآن كريم فيه وردت معجزات حدثت وأشياء سوف تحدث ؟

لكن سبحان الله النفس البشريه ’جبلت على حب الإثاره

سوليداد , طرح مميز ’تشكر عليه : )

[.Atlas.]

شخصياً..اشوف ان هالمواضيع لها فائدة نوعا ما..واقل الايمان بالنسبة للشخص اللي يقرى الموضوع ويطلع على الصور..انه بيقول "سبحان الله "
مواضيع تذكر الانسان بعظمة الله ونعمته عليه ..
المشكلة ان البعض يلجأ للتلفيق وفبركة الصور..مثل موضوع الفتاة العمانية قبل فترة!والهدف مجهول !
الله المستعان ..

[Angel whisper]

هو مب المشكله في نشرها .. المشكله في اختراع قصص على كيفهم ونشرها بين الاوادم .. يخلون خلق الله يضحكون علينا

[Lezard Valeth]

شكثر السوالف الي يألفونها من هالنوع, وما أدري شلون في ناس تصدق بعض هالسوالف, مثلا, سالفة البنية العمانية الي قالوا سوت شي مو زين بالقرآن فالله تعالى سخطها, أوكيز الحين الامريكان يوم ادخلو العراق في منهم داس على القرآن واحرقه استغفر الله, ليش الله تعالى ما سخطهم زين ؟ الجواب بسيط, أي شي أي أحد يسويه ويسيء للأسلام ولله تعالى فمو قاعد يضر الا نفسه, الله سبحانه وتعالى هو العظيم المترفع عن الامور البشرية ما راح يستفيد من شي او يتضرر من شي يسوونه البشر سبحانه وتعالى..

[Classic Evil]

وعليكم السلام ورحمة الله وبركاته

اخوي ليش تستغرب الدنيا فيها خوارق طبيعية وتأتي بما هو غير متوقع , فكيف إذا الأمر تعلق بالله سبحانه؟


لكن اللي يخلينا نستنكر هالشي هو اختلاق القصص هذي ويكون مالها أساس في الواقع أصلا على سبيل المثال :


1- إصابة اللي اقترح ضرب الكعبة بالنووي بالشلل.

2- قصة حامل مفاتيح الكعبة واللي يقولك انشرها واذا مانشرتها تتعرض للمشاكل.

3- الصخرة الساجدة لله , وهي في الحقيقة -ان ثبت فعلا انها صورة حقيقية- على شكل انسان يسجد وليس صخرة , لأن كل يسبح الله و لا نعلم تسبيحه .. إلخ من هذي القصص .


لكن يبقى الأمر فيه بعض من المصداقية خصوصا إذا شفتها بعينك ..

لأنه يقال إن زليخا عليها السلام (زوجة عزيز مصر وزوجة النبي يوسف الصديق عليه السلام فيما بعد) لما فصدت (سال منها دم لجراحة أو نحوه ...) ارتسم الدم على الأرض : يوسف يوسف !!

وقصة واحد أيضا من الصالحين اللي قال فيما معناه يا ربي كل شي في جسدي يلهج بذكرك فلما قطعوا راسه تناثر الدم وكتب : الله الله !!

وواحد ثاني في فتنة خلق القرآن بعد قطع رأسه سمعوا الراس وهو معلق على شجرة يقرأ قرآن فراح واحد يتأكد .. إلى آخر القصة وإذا تبي اكتبها مافي مانع بس الشاهد منها وصل .

فالحاصل انه موجود , لكن السالفة الحين صارت فالتوه , والدعوة فيها طرق كثيرة مشروعة مب بالكذب , الله المستعان .

[The Fridge]

بنظري بصراحه وعالبلاطه ان الامر لا يبعد عن كونه محض خزعبلات!!

انا لا احتاج اني اشوف دوده مصارينها تنسدح على شكل ورسم كلمة الاسلام لأني متأكد ان الله سبحانه وتعالى اكبر من ان يذكر عباده بهذه الطرق الملتويه والعسيرة الفهم. طيب ليش ما نشوف معجزات كذا وباللغات الاجنبيه، انا متأكد انه في عرب يجيدون الحديث بالانجليزيه والاسبانيه والايطاليه والفرنسيه وحتى الصينيه! ليش ما نشوف معجزات كذا بلغات العالم الاخرى؟ ولا ربنا عز وجل لا يهتم بالخمسه بليون والفكّه (اللي فيهم مسلمين) الغير ناطقين بالعربيه؟

لما انا ابي اشوف واتفكر في خلق الله اروح اشوف النجوم، البحار،السماء، الارض، الشجر، جسم الانسان.. وجميع عجائب خلق الله الاخرى، ولكني ما اروح اتأكد اذا اذن طفلي الوليد فيها اسم الله لأن اعتقد وبصراحه ان اللي يطلعون مثل هذه الاقاويل يستهبلون او شئ من هذا القبيل.

شفت قبل كم من يوم صوره لطفل يقولون انولد ومكتوب على ظهره لا اله الا الله. لما دققت في الصوره لقيت ان الامر مجرد خطوط سوداء متعرجه لما تشوفها من زاويه معينه تشبه رسم اللالله او شئ كذا. بس الناس تصورهم يخلق لهم اشياء ماهي موجوده بالحقيقه وكأنهم يودون خلقها بالغصب ارضاء لتخيلاتهم..

لو على كذا فقريبا سنرى صور بالمجهر لكريات الدم الحمراء وهي تستطر جملا على غرار:

لا للمخدرات

إن الصلاة تنهى عن الفحشاء والمنكر

سبحان ربي العظيم (ثلاث مرات)

الصلاه بتتأخر ساعه اليوم

وغيرها مما ينتجه خيالات الناس اللي عقولهم في إجازات رسميه من ساعات الدوام (او شاردين)

سوليداد

[Da S.O.S]

ما ازيد ولا حرف واحد على كلام ثريول!!..
سبحان من اعطاك الحجه في الكلام!

[badabeedoo]

حلوووووووووووووووووووووووووووووو اوييييييييييييييييييي ييييياااا معلم

[عاشق X360]

خرافات يااخي أول عملو بيضة وبعدين باذنجانة وبطيخة والأن على ولد قمة التخلف صراحة

[Mada Mada Dane]

بإختصار @_@ مااصدقها اصلا انا ومضحكه ><

غباء