انا واحد نويت نيه00 بس احتاج مساعدتكمفلا تنسونا

[ss020202]

اهلين شباب هذي مواضيع تدور اهلها وانتم والله أهلها ونص بس نحتاج حلولكم وعلومكم يعني (( سااااااااااااااااااعدوني )) بليز
السالفة وما فيها انو وبكل صدق


أنا واحد ناوي نية بس محتاج مساعدتكم ابغاكم تدلوني على الصح لأني الحين قاعد بمشكله وبعقده لأني ماني متأكد من حاجات وحاجات ما اعرف عنها شي .. الموضوع هو
أنا إنشاء الله آخر الشهر بعد الاختبارات باشري بلاي ستيشن2 بس ماني عارف حاجات فيه ابغاكم تعلموني عنها وتفيدوني وأنا والله اخترتكم لخبرتكم في هذا المجال فأنا أقول يا ليتكم تعلموني عن حاجات وهي :-
1- وش احسن نظام اخذ , وليش , وكيف اعرف شكله , ووش مواصفاته , وبكم سعره , وزيادة الخير خيرين
2- وش يجي مع الجهاز , ووين احسن محل في الروضة يقدم عرض رهيب
3- هل يشغل العاب الكوبي بدون تعريف ( الي على نفس نظام الجهاز )
4- هل يشتغل الدي في دي عليه بدون مشاكل والانفتك منه
5- مهم (( هل هناك نوعيه محسنه من الجهاز كما سمعت أو شي من هالكلام))
6- وش افضل أنواع الأشرطة اللي تنصحوني بها اللي نزلت واللي باقي عليها
7- على أي كهرب يشتغل الجهاز 110 ولا 220
8- هل تنصحوني في شراء ملحق مع الجهاز أعطوني مثال
9- هل اقدر العب في الجهاز لساعات طويلة دون ما يصير له شي ولا يصير حار
10- بكم يد التحكم ألا صليه
11- هل هو حساس ويخرب بسرعة زي ما سمعت
12- هل صحيح انه يستقبل الصوت وان قوة رسومه يمكن تعادل قوة العروض
13- هل العاب سيغا مثل سونيك وغيره والأجزاء القادمة بتنزل عليه
14- شجعوني على شراه


ما عليش يا شباب كثرت عليكم الأسئلة بس والله اني محتاج لدرجة والله ما تتوقعون حتى اني والله اقعد أفكر وش اخذ هذا والا هذا , يعني والله تعقدت حتى اخوياي يقولون لي لا تشتري واتحدى يكون زين والا احسن من الأول لكن يا شباب أنا تارك كلامهم وأبغى اسمع كلامكم انتم يا لمحبين وتكفووووووووووووووون إذا فيه معلومات ثانيه مهمة والا أي شيء
بس اكتبوه لي أنا عارف معلومات بس ماني متأكد منها
تكفووووووووووووووووون فكو عقدتي وخلوني اتطمن وأرجو من الجميع يشاركو ويردو ويعطونا من اللي عندهم وأنا إنشاء الله ما راح اقصر معكم في حاجة واللي انتم قادرين عليه سووه وهذا تكرما لا أمرا وأنا الحين جالس انتظر ردكم على موضوعي و (إن الله مع الصابرين ) أنا عارف اني بأتبهذل لكن انتم إنشاء الله تساعدوني وتخففون وتفكون عني
وشكراااااااا للجميع والله يوفقكم ويونسكم بأجهزتكم الأسطورية البلايستيشن2 وغيره
ما علييييش طولنا عليكم , تكفووووووووون لا تنسوني وردو
وأي خدمة أنا SS جاهز
والسلالالالالالالالام عليكم

















ادعوا لي انشاء الله اشتري الجهاز (ps2)

[Gladieator]

السلام عليكم ....

وياهلا والله فيك أخوي ss020202 .....


أخوي أنت تامر وحنا نطامر , شدعوه اذا ماساعدناك بنساعد مين أجل ....


والله شكلك من جد محتار , طيب ليش الحيرة , توكل على الله واشتر البلاي ستيشن 2 والله ماتندم , بالعكس بتدعيلي ....


وبالنسبة لأسئلتك ( ولو إنها بتعتبني بس يالله تهون )


بسم الله نبدأ ....


1 - شوف أخوي أنا بأستعرض لك جميع الأنظمة ووميزاتها وعيوبها وأنت أحكم بنفسك , طيب ...


بالنسبة للنظام الياباني , ميزته أن أغلب الألعاب ان ماقلنا كلها تنزل عليه أول شي , يعني قبل الأنظمة الثانية , وعيبه , اللغة , طبعاً إذا كنت تعرف ياباني هذا كلام ثاني , لأن كل ألعابه باللغة اليابانية وهذي مشكلة .

نجي للنظام الأمريكي , ميزة هذا النظام ان العابه بلغة إنجليزية ومعروفة , وهو من أكثر الأنظمة المنتشرة في العالم , طبعاً ناهيك عن سهولة وجود الألعاب عليه وبكثرة , ولكن منعيوب هذا النظام , أنه ماله وكيل رسمي في المملكة العربية السعودية , يعني إذا صارت أي مشكلة في الجهاز , ماتعروف وين توديه لأي محل , لأن بيني وبينك أكثر المحلات هالأيام نصابين وقراصنة .

أما بالنسبة للنظام الأوروبي , فميزته , أن له وكيل رسمي هنا , وهو شركة الفيصلية , وكيل شركة سوني في المملكة , وهذي ميزته الوحيده عن الأنظمة الثانية , وعيبه , أن الألعاب ماتنزل عليه الا بعد مايمر يمكن شهر أو أكثر بعد ماتصدر على النظام الأمريكي .

طبعاً كلامي هذا كله عن الألعاب الأصلية , لأنك الحين تقدر تركب قطعة المودشيب وتشغلك جميع الألعاب الكوبي من جميع الأنظمة على جهازك بغض النظر عن نوع النظام اللي عندك .



لكن إن بغيت نصيحتي , خذ النظام الأمريكي , هو أحسن شي بالنسبة لي وللكثيرين . وسعره والله مدري وين وصلت أسعار البلاي ستيشن الحين , خبري فيها قبل شهرين كان الجهاز مع قطعة المود شيب بألف وأربع مية وخمسين ريال , هذا عند محل النسر اللي في الشرقية , مدرس والله عن الرياض لأني ساكن بالشرقية .


**************************************


2 - العلبة يجي فيها الجهاز طبعاً , مع يد تحكم أنالوج الجديدة ( الجيل الثاني ) وحدة بس + سلك التوصيل من جهاز الى التلفزيون + سلك التوصيل من الجهاز الى الكهرب + الضمان والكاتالوج الرئيسي للجهاز + خمس ألعاب كوبي ( وهذي على حسب المحل إذا بيعطيك ولا لا ) .

والله أخوي مثل ماقلت لك انا بالمنطقة الشرقية وياليت أحد الأعضاء اللي ساكن بالرياض يعلمك . معليش .


**************************************


3 - الألعاب الكوبي تشتغل على الجهاز , بس عن طريق المود شيب , وهي القطعة اللي تقدر من خلالها انك تلعب بالألعاب الكوبي , وطريتها أنك لازم تشغل أول شي الجيم شارك وهو يجي مع القطعة , وبعدين تطلع الجيم شارك وتحط الشريط الكوبي اللي تبيه وتلعب .


**************************************


4 - بالنسبة للـ DVD , فإن كانك تقصد الأفلام , فمثل مانعرف ان أفلام الـ DVD تشتغل على البلاي ستيشن 2 , ولكن تختلف من نظام الى آخر , بمعنى ان هناك أفلام من نظام البال الأوروبي , وهذي ماتشتغل الا على جهاز البال , وهناك فلام من نظام الـ NTSC الأمريكي , وهذي ماتشتغل الا على جهاز من نفس النظام .

ولكن أبشرك , فيه قطعة خاصة تشغلك جميع أنواع أنظمة الأفلام الـ DVD المختلفة على جهازك , والقطعة هذي أنا شايفها هنا عندنا بالشرقية , وهي تركب على الجهاز الأمريكي .

أما إن كنت تقصد الألعاب الـ DVD , فهذي مالها علاقة بنوع النظام , حيث ان كل لعبة تكون مصممة عشان تشتغل على الجهاز المخصص لها , وفي هذي الأيام ظهرت ألعاب الـ DVD المنسوخة , وهي يمكن تكون محذوفة منها بعض المقاطع السينمائية عشان تكتمل اللعبة بدون تقطيع في اللعب .


*************************************


5 - اي نعم , انا أيضاً سمعت بهالكلام , لكن الى الحين مافيه خبر يقين , عشان كذا أنصحك ان كانك مستعجل خذ لك الجهاز ولا تحرم نفسك , أما إذا ودك تنتظرك فبراحتك , لكن مثل ماقلت لك ان السالفة للآن غير أكيده .
وبعدين حتى لو شريت الجهاز الحين , تقدر تركب القطعة الجديدة المطورة عادي في جهازك .


*************************************


6 - أووه , من ناحية الأشرطة عد وأغلط ,

من الألعاب اللي متوفرة وأنصحك أنك تشتريها :

- أونيموشا ( لعبة مثل ريزيدنت إيفل لكن بالساموراي )
- جران توريزمو 3 ( أفضل لعبة سيارات في العالم )
- ديفل ماي كراي ( لعبة جديدة وروعة , مغامرات + رعب )
- ريد فاكشن ( لعبة تصويب مثل كويك وأنريل , حلوة مرة )
- ريزيدنت إيفل كود فيرونيكا إكس ( أول نسخة من اللعبة على الجهاز الجديد )
- جراند ثيفت أوتو 3 ( هذي توها نازلة قبل يومين , مطاردات + قتل + إجرام + عصابات + تفحيط + مغامرات )
- تكن تاغ تورنمنت ( أول لعبة تكن على الـ PS2 )
- أيكو ( لعبة رهيبة من جد , مغامرات + آر بي جي )
- إس إس إكس ( لعبة تزلج على الجليد , حلوة وممتعة جداً )
- سايلنت هيل 2 ( الجزء الثاني من اللعبة المرعبة جدا?ً , وحط خط تحت كلمة مرعبة )
- وينينج إليفين 5 ( والله بغيت أنساها , هذي لازم تكون جزء من الجهاز يعني اذا ماشريتها تراك ماتحب الكورة أبد )
- كريزي تاكسي ( هذي نسخة مطورة عن نسخة الدريم كاست , تاكسي مجنون من جد )


وفيه بعد ألعاب كثير من جد بس الذاكرة تخوني حالياً ....


وبالنسبة للألعاب القادمة واللي نستناها من جد ...

- ميتال جير سوليد 2 ( طبعاً هذي بدون تعليق )
- دبليو دبليو إف سماك داون 3 ( أقوى لعبة مصارعة قادمة )
- فاينل فانتسي 10 ( أروع لعبة أر بي جي + قصة + موسيقى + لعب + معارك + كل شي )
- توني هوك برو سكيتر 3 ( أروع لعبة تزلج )
- أونيموشا 2 ( الجزء الثاني من اللعبة المرعبة )
- نيد فور سبيد هوت بيرشوت 2 ( لعبة مطاردات من جد حلوة )


وباقي والله ألعاب ماذكرتها , على العموم فيه ألعاب كثيره حلوة قادمة بقوة .


**********************************


7 - الجهاز يشتغل على كهرب 110 فولت .


**********************************


8 - والله مافهمت عليك وش تقصد بالملحق ...?:


**********************************


9 - تقدر تلعب بحدود الأربع أو الخمس ساعات على ماأظن , لكن انت من جدك بتجلس كل هالمدة تلعب , إرحم عيونك


**********************************


10 - يد التحكم الأصلية الله يسلمك بحدود الـ 130 أو 150 ريال , تختلف من محل الى آخر .


**********************************


11 - لا أخوي , الجهاز يشتغل معاك عال العال , شوفني أنا شاريه من أول يومين من نزوله الأسواق , وللحين وهو شغال معي زي الحلاوة , قول ماشالله , الا إذا كنت بتقطه وبتهمله , الجهاز يبغاله شوية عناية .


**********************************


12 - من ناحية الصوت , الصوت لا يعلى عليه , تمام ورهيب , وعلى حسب التلفزيون اللي عندك , إذا كان عادي أو ديجيتال , لأن الجهاز فيه فتحة توصيل للتلفزيونات العادية , وفيه فتحة ثانية صغيرة , هذي للتلفزيونات الديجيتال , ويبغالك تشتري سلك خاص لهذي الفتحة وتشبك الجهاز بالتلفزيون الديجيتال وتطلع عند الصوت والصورة ديجيتال , يعني مكن جد روعة .

ومن ناحية قوة الرسوم , الجهاز قوته 128 بت , يعني أضعاف قوة البلاي ستيشن القديم , والرسوم تختلف من لعبة الى أخرى , هناك العاب رسومها روعة ومثل العروض , وهناك العاب رسومها لا بأس .


**********************************


13 - نعم , بتنزل على الجهاز , لأن شركة سوني متفقة مع شركة سيغا على تنزيل العاب السيغا القادمة على الـ PS2 .


**********************************


14 - أخوي , صدقني إشتر الجهاز وأنت مغمض , وتأكد ان فلوسك راحت لشي يستاهلها من جد .

خذ نصيحتي ورح أشتره الحين قبل لا تفوت على نفسك المتعة والوناسة وسعة الصدر



**********************************







آوووه والله من جد تعبت , ...



أتمنى إني أفدتك أخوي .....





وفي النهاية ,


لك تحياتي ......



............

[ss020202]

مشكووووووووور مشكورررررر جدا يا أخ gladieator على الرد الجميل والمفصل
ويا الله يعطيك الف عافية ويطول بعمرك ولا اعرف وش لون ارد لك الجميل
واي خدمة SS جاهز

[the slayer]

الحين سعر البال في الامارات وصل الى 975 درهم و يمكن يرخص في رمضان

[FARES360]

أقول ليش هالكذب يا اخGladieator
سونيك ماراح تنزل على الps2 الشركه نفسها قالت ان سونيك2و3و4...الخ
كلها على الجيم كيوب حصريه
---------------
أما الأكس بوكس
أفضل لعبه لديهم نقلوها على الأكس بوكس وهي(جيت سيت راديو فيوتشر)=هذا هو الجزء الثاني منها
----------
ملاحظه قالت يجا ان أفضل العابها ستكون على الأكس بوكس والجيم كيوب
فقط سونيك:":
-----------------------
سيجا تعتبر جهاز الأكس بوكس كجهاز لها اي يعتبر كدريم كاست 2(مثلا)
فلاحظ ان على يمين جهاز الدريم كاست مكتوب microsoft

[Gladieator]

أخوي ss020202
===========

العفو , هذا واجبي ...


ولك تحياتي ...




أخوي the slayer
===========

شكراً لك على المعلومة ....



ولك تحياتي ....





أخوي FARES15
==========

الله يسامحك بس ....


أخوي , انا قد قريت هذي المعلومة في المنتدى من زمان , والله مدري مين اللي قالها ...وحطيتها ....


على العموم أنا آسف إذا كانت المعلومة غلط , وشكراً لك على التوضيح والرد ....



ولك تحياتي أخوي ....





وشكراً لكم جميعاً ......





............