قنوات جديدة رائعه

[ODIN]

السلام عليكم

في هذه الفترة بالذات .. حسيت ان التلفزيون صاير يفتح النفس اكثر من اول ..

والسبب ان القنوات الطيبه والمفيده بدأت بالتكاثر ..

الحين لما نفتح التلفزيون ما صرنا مجبروين نشوف فيديو كليب خليع والا اغنيه فاسده .. ولا نجبر نشوف فلم سيئ او مسلسل تافه وفارغ ..

بتكلم الحين عن قناتين في الحقيقه هم في قمة الروعه والتسلية والفائده ..

أول وحده هي جزيرة الاطفال

بصراحه القناة هذه لو نصفها راح نصفها بأنها غيرت مفهوم اهتمامات الطفل واساليب جذبه وتربيته ..


معها .. ما تكون اهتمامات الطفل محصورة بين الكارتون وبس !

فيها اشياء متنوعه كثير .. منها البرامج الوثائقيه

بصراحه اختيارهم لمواضيع البرامج موفق في اغلب الاحيان .. ومادة الفلم الوثائقي معقوله جدا ومناسبه لكل الاعمار ..

ليست بالدسمة ولا الطفولية ..

وفيه ايضا المسابقات جدا رائعه ومناسبة للاطفال خصوصا المعلومات الي فيها ..

وايضا اكثر شي عجبني فيها والي يعتبر نقله نوعيه لاهتمامات الطفل العربي

الي هي البرامج الحوارية ..

وهذا الي كان ينقصنا .. برنامج يستضيف اطفال ويجعلهم يشاركون بالحوار ويبدون رأيهم بكل جرأة وصراحه ..

والافضل من كذا الموضوعات الي يطرحونها مناسبه جدا لتطوير عقلية الطفل .. ما تحصره بين كرسي الدراسه وحل الواجبات بس !!

وبصراحه اطفالنا خصوصا بالخليج يحتاجون الشي هذا .. لانهم يعانون بنقص فظيع منه !


قارنوا اطفالنا مع اطفال الدول العربية المجاورة .. بصراحه فرق كبير بالجرأة والتحدث والاعتماد على النفس ..

وشوفهم اذا طلعوا بالتلفزيون ..اذا قابله مذيع يقعد الولد يتميلح بس يقلب بعيونه ويستحي .. بعكس لو ولد من دولة عربية ثانيه تشوفه يتكلم بطلاقه ولا عليه من احد !

----------------

القناة الثانية الي بتكلم عنها هي قناة النجاح

قناة رائعه جدا .. تابعه لقنوات سمارت واي .. ومازالت في طور التجربه

أول قناة متخصصه بالاناشيد الاسلاميه .. فيها فيديوكليبات لمعظم الاناشيد الي صدر لها كليبات ..

وجميل جدا انك تربي اخوانك الصغار على هذه الاناشيد .. لان الاطفال بفطرتهم يحبون النشيد ..

واعتقد انه توجيه سليم جدا للطفل انه يحفظ ويتعلق الاناشيد صاحبه الكلمة الطيبه .. احسن من ما يفرحون اهله اذا عرف يغني آه نص ونص !


القناة ما زالت في طور التجربه وان شالله انها تنجح وتستمر لانها بديل رائع جدا لمساوئ روتانا وميلودي ..

من السلبيات الي فيها ...

انهم خالطين اناشيد الاطفال مع الكبار .. يعني تشوف نشيده لسامي يوسف والا ابراهيم السعيد .. وفجأة الي بعدها نشيدة يا اطفال اشربوا الحليب .. اعتقد لو يرتبون الاناشيد افضل بكثير ..

ومب بس من ناحية اناشيد الاطفال والكبار .. حتى الموسيقى والايقاعات والبدون

مثلا بالبدايه فترة الاناشيد بموسيقى .. بعدين اناشيد بالايقاعات .. وبعدين اناشيد بدون دفوف ..


وفيه مشكله لكن المشكله هذه ليسوا مسؤولين عنها .. وهي ان كليبات الاناشيد توها في بدايتها .. وما كثرت للحين .. فايضطرون انهم يعيدون الكليبات كثير نظرا لقلتها .. ان شالله مع الوقت تكثر وتنتشر هذي الاناشيد وتملي القنوات اكثر واكثر ..

---------------


ابد هذا الي في خاطري صراحه وحبيت بموضوعي هذا اني ادلكم على هذي القنوات الجميلة وبنفس الوقت يكون الموضوع هذا كتاب تسجيل اعجاب بالقنوات هذه ..

والمعذره على العجله في كتابة الموضوع .. حبيت انه يكون مثل السوالف اكثر من انه موضوع تعريفي متكامل .

وشكرا

[احلامو ادوماتو]

انت لسا تتابع تلفزيون

أمذح أمذح بووووكرة تزعل ألقاني مطرود وش يرجعني O.o

الموووووووووهم

صحيح ، في الأيام الأخيرة رخصت تكلفة انشاء قناة فضائية بشكل كبير ، الي بشكل جميل وفر بدائل جيدة للي يبحث عن أشياء غير "الهز يا وز" و "البرتقاااااااااااله" الي يسبب بطبيعة الحال مغص عقلي حاد ×ــــــــ×

لكن حتى الآن ما لقينا البدائل بكمية كافيه للأسف O.o

وش رايكم نقط و نسوي لنا قناه O.o عندنا مواهب : P

خصوصا مع قنوات مثل "ممنوع" الي اتوقع انه آدمي واحد بس الي يشتغل عليها O.o

بس شكلها انقطع بثها O.o

=-=-=-=-=-=--=-=--=-=-=-=-=-=-=

اخواني ما يطيقون قناة هالجزيرة للأطفال ، ما يعرفون غير mbc3 و Space Toon وش أسوي بهم T-T

[القــعـقـاع]

حتى مواهب و افكار بيصير لهم قناة خاصة فيهم ^___^

http://www.alriyadh.com/2006/02/04/article127889.html

[moon girl]

قناة الجزيرة للأطفال اعرفها
بس الثانيه لا كان ودي عندي مادامها عن الأناشيد اموووت بالأناشيد

قناة الجزيرة للأطفال مو كثير تنفتح اخواتي الصغار مايحبون الا كرتون كونان وغيره الله يخلف -_-

ماعندهم غير Space Toon او MBC3 >_<
بس ام بي سي 3 اكثر شيء

خخخخخخخ تعودوا على الكرتونات الخايسه
كرتون x كرتون طفش -_-

شكرا على الموضوع ...

[! غــريــب !]

هلاووين أودين ,,

القنوات اللي قلتها .. مثل ماقال كرونو و الأخت اللي ردت بعده ,, أخواني معطينها

أشكل بقوه .. ,, ياخي المشكله أنا أشوف مافيه توازن .. بتقولي الجزيره للأطفال

تجيب كرتون وتجيب بعدها برامج حواريه أتفق معك وأقولك صح

بس أنا شفت الكرتون اللي يجيبونه .. هذاك مايصلح الا لنا قبل 15 سنه

يوم كانت حكايات عالميه اللي تغني مقدمتها أصاله شئ مايوصف

وكنا بعد العصر كلنا نتسمر عشان نشوفها مع إننا ماندري وش الطبخه حقتها

بالنسبه لـ عيالنا في الخليج .. يقول الشاعر : خليجنا واحد

فعشان تسذا ثقافتنا تقريباً وحده وإن إختلفت اللهجه وبعض الأشياء إختلاف بسيط

في الدول المتقدمه << ناصر القصبي

يحاسبون عيالهم وتلقى الواحد يوم يجي له ولد كل همه كيف يربيه بطريقه

صح .. حنا أول مايجينا مولود جديد في العائله وش نسوي ؟

حي الله يكبرون راس أبوه وتعال يا أبو فلان وروح يا أبو فلان

وإذا مره أخربوها سووا له سابع وذبحوا إثنين من الغنم وخلاص جانا ولد جديد

يعني ماعندنا منهج واضح نمشي عيالنا عليه .. يعني أسلوبنا مايتعدى

نضربه أول مايكسر شئ .. ونشتري له حلاو أول مايبتسي ( يبكي )

خصوصا مع قنوات مثل "ممنوع" الي اتوقع انه آدمي واحد بس الي يشتغل عليها O.o

هههههههههه ذي وقسمن قناه خالعه كل شئ فيها كان مو معقول بس أظن توقفت اللحين

أودين ,, يعطيك العافيه على الموضوع

[Angel whisper]

غريبوه!
اشبلاها حكايات عالمية؟
والله القصة الوحده تسوى كونان والنمر المقنع واخوانهم كلهم!
احم >.>
والله بادره طيبه .. وصف القنوات الصراحه .. مادري .. ما توقعت انه بتطلع قنوات اطفال جذيه!
بس ترى اذا الاهل ما عودو عيالهم عليها .. والله يسوولها طاف بالقو ..
لازم الام والابو يراوون مثل هالبرامج حق اليهال ويعودونهم عليها يكون يستسيغونها ويستفيدون منها ..
ريبورت حلو اودن.. نشوف منك اكثر!

[xnnx]

انا شيد اسلامية !!!!!!
اي اسلامية الله يرحم والدينك
في اناشيد الموسيقة فيها واضحة
خصوصا اناشيد يوسف ماني عارف الاسم الثاني حقة
يستخدمون فيها البيانو والعود ممكن الكلام فيها اسلامي
والله في بعضها فيها دق يغلب على 2pak

[ODIN]

كرونو

هذي الميزة من جد ان القنوات رخصت كثير .. لكن المشكله بالطرف الثاني شوف الكم السخيف الي راح يستغلونه بالامور التجاريه

مثل قنوات سوالف والخرابيط هذي حقت التشات يسحبون فلوس ذهب من العالم المغفل الي مدري وش يفرق تشات التلفزيون عن الانترنت بالعكس الانترنت احسن واوفر واسرع وكل شي بس تخلف بالعالم سبحان الله ..

اذا عندك صغار لا تتوقع من نفسهم يحبون الشي الجديد عليهم لازم توجيه من الاكبر منهم شد حيلك عاد انت

القعقاع /

والله رهيب الخبر وحلو .. خاصه المذيع صالح هذا يعجبني مرة تحس محترم من قلب ههههه

موون جيرل /

لو عندي التردد للقناه كان عطيتك بس للاسف ماعرف كيف اطلعه في احد يعرف ؟

ومثل ما قلت لكرونو حاولي توجهين انتي اخوانك صعبه يقبلون الشي لحالهم

الغريب/

والله من جد ذكرتني بالقصص العالمية .. تحس من جد قصص راقيه وتهذب الروح خساره انقطعت عن الجيل الحالي

ونظرتك لتربية الطفل وشأنه عندنا .. صحيحه للاسف وما جبت شي من عندك الله يعين بس

انجل ويسبر /

بس ترى اذا الاهل ما عودو عيالهم عليها .. والله يسوولها طاف بالقو ..

بالضبط كلامك عين الصواب ..
والاحلى ايش .. اذا الاهل نفسهم تابعوا برامج الاطفال هذي مع اطفالهم بجلسة عائليه .. لا يشعرون الطفل بأنهم غير مهتمين للأشياء المفيده هذي لانهم هم قدوة الطفل ..


xnnx /
هي من ناحية اناشيد اسلاميه فهي ايه اسلامية .. واحنا مب بصدد بهذا الموضوع نفتح الموضوع هذا الي سئمنا من النقاش منه لذلك بعتبر الموضوع الي انت طرحته خارج نطاق موضوعنا الاصلي وبحذف اي رد مثله بعد كذا لانه راح يغير مجرى الموضوع وفائدته ..

[ODIN]

ااع كتبت رد وش طووله والمنتدى علق وراح علي -___- سامحوني برد باختصار مرة ثانيه عشان الحق على العزيمة

كرونو /

هذي الميزة ان التكلفه رخصت كثير عن اول.. بس بالطرف المقابل شوف الي يستغل الشي هذا بقنوات مثل سواليف و التشات الغبيه .. مستغلين فلوس العالم المغفل الي يدفع ويدفع حق اشياء ممكن يلاقي احسن منها بالنت وارخص بكثير .. بس تخلف وش تقول الله يستر عليهم

وبالنسبة لاخوانك هم صغار لا تتوقع من نفسهم ينجذبون لهذي الاشياء الجديده عليهم لازم انت توجههم شد حيلك بس ^^

القعقاع /

ياخي المذيع صالح هذا جدا جدا احترمه ماشالله عليه يعني 15 سنه مع البرنامج هذا ومع قناة واحده تحس ان عنده هدف ووصله مع القناة هذي الله يوفقهم ..

والخبر جدا رائع ..

موون جيرل /

صراحه ماعرف تردد القناة والا كان عطيتك .. في احد يعرف كيف اطلعه من الرسيفر ؟

وبالنسبة لاخوانك مثل ما قلت لكرونو لازم احد كبير يوجههم ..

الغريب /

يالله حسيت بحنين لما جبت سيرة قصص عالمية .. من جد كانت قصص راقيه وتهذب الروح

خساره الجيل الحالي ما لحق عليها ..

ونظرتك لتربية الطفل والاهتمام له صحيحه وواقعيه للأسف ما جبت شي من عندك ..

انجل /

بالضبط الي قلتيه صحيح جدا عين الصواب

بس ترى اذا الاهل ما عودو عيالهم عليها .. والله يسوولها طاف بالقو ..

xnnx /

من ناحية اناشيد اسلاميه فهي ايه اسلاميه .. لكن احنا بهذا الموضوع لسنا بصدد نقاش النقطه هذي الي ( سئمنا ) من النقاش فيها اعتقد اعطيناها حقها كثير .. لذلك بعتبر النقاش فيها تغيير لمسرى الموضوع الاصلي وهدفه .. معناتها راح نحذف اي رد ممكن يغير مجرى الموضوع بعد كذا ..


والف شكر لمشاركاتكم والله يجزاكم خير

[ODIN]

هههه اثره الرد انشر وكتبته مرة ثانيه على الفاضي اااه يالقهر

بس مب حاذفه احس الموقف يضحك اضحكوا معي

[Da S.O.S]

تصدق ما اعرف ولا قناة من الي قلتها -__-
اتوقع معرفتي بالقنوات متوقفه على الجزيره والعربية لانها دايما مفتوحه عندنا..P:
ما افتح التلفزيون ابد ما اعرف ليش:S
يعني لو ابي اتفرج شئ معين ما حيخرج عن نطاق فلم او مسلسل وكلها تنباع بره... غير اني ما احب اتابع شئ معين بالتلفزيون.. واصلا بيتنا ما يسمح لكP:
يعني مسوين حجر وثائقي على الجزيره والعربية والكشته حقتها..
بس يبي لي والله اشيك على القنوات الي قلتها.. لان فعلا على خبري اخر مرة فتحته.. اقدر اقولك اني لقيت قوان اغاني خايسه بنسبه 90% من القنوات الي مريت عليها قبل ما افقد اعصابي.. المشكلة حتى ما يجيبون اغاني زي الناس.. او اغاني تستهويني..
وانا ناقم على العرب في هالموضوع.. ما ابغى اطلع عن الموضوع وافتح موضوع ثاني لا تزعل علينا بعدين P:
على العموم لي رجعة ثانية ان شاء الله

[! غــريــب !]

هههه اثره الرد انشر وكتبته مرة ثانيه على الفاضي اااه يالقهر

بس مب حاذفه احس الموقف يضحك اضحكوا معي

ههههههه طول عمرك ظريف يابدر

[7_Dark Soul]

موضوع....كويس ^^

قناة النجاح ذي عمري ما سمعت فيها...P:

اما

أول وحده هي جزيرة الاطفال

بيني و بينك ذي القناة من وقت الى وقت اطالعها....تجيب برامج علمية رائعة....خاصة اذا جاك خواص الفيزياء و ذي الخرلبيط...

بس محاولة جذبها حق الاطفال ضعيفة...كثير من الاطفال ما يحبون ذي النوع من البرامج...

يعني اربعة و عشرين ساعة علم و علم و علم....هم المساكين منحاشين من المدرسة تطلع لهم ذي

و حتى اذا جابت كرتون..تجيب من ذي النوعية:مرحبا يا صديقي...لنذهب و نشتري المثلجات...
:حسنا و سوف نأكل الإجاص...

عيالنا يبون:تبا لك ايها الحيوان سوف اقضي عليك
: انقلع...لن تقضي علي ايها الكلب O.o

لحظة..جالس اقرى كلامي الي فوق....هاع...ليش انا سلبي لهدرجة...صدق احد الشيوخ دايما نترك الاجابيات و نطالع السلبيات حتى لو نقطة ..

خلني اطلع من هنا لا انصدم في روحي اكثر.....

طانكيو اودين على الموضوع

[smigle]

السلام عليكم جميعاً

كيف حالك بدر، ومشكور على الموضوع.

المهم بخصوص الجزيره للأطفال، بصراحه انا أشوف ومثل ما قلت أنت انها قناه هادفه وحلوه وأيضا مواضيعها متنوعه ومفيده

لكن

تبون الصراحه انا شفت فيها أشياء استنكرت انهم يعرضونها للأطفال، اللي شفته الله يسلمكم هو برنامج مادري شسمه كل حلقه تكون عن طفل من بلد معين ويتكلم عن حياتهم وديانتهم واسلوب معيشتهم، فكانت فيه لقطه الولد يدخل الكنيسه وييقول "ونحن ها هنا في الكنيسه كل أحد، ونشرب من الماء المقدس ومش عارف أيش"

ومره ثانيه بنت تتكلم عن زياره مادري وين رايحين والعائله متجمعه على الطاوله والحلوه تقول : ونأكل لحم الخنزير اللذيذ.

بصراحه انا هالكلام كلش أستغربت انهم يعرضونه للأطفال، أنا مش ضد ان الواحد يعرف ان الغرب ياكل لحم الخنزير او انهم يشربون من مايهم المقدس في الكنيسه، لكني اعتقد ان هالأمور يطلع عليها الواحد لما يكبر شوي يعني يكون من سن ال14 وفوق علشان في وقتها تكون عنده قاعده صلبه في دينه الأسلامي و يكون عارف ان هالشي غلط.

تذكرون احنا لما كنا صغار، وكانوا يعرضون الرسوم المتحركه مثل ليدي اوسكار وغيرها، ما كانوا يتلفظون بكلمة نبيذ او لحم الخنزير، كانوا يقولون عصير او اي شي ثاني.

الزبده، انا من رأيي ان هالأمور ما تنعرض "كأنها شي عادي" للطفل في هالمرحله، لأنه بيشوفها كأي شي عادي، لازم في البدايه نعلمه ايش هو الحلال والحرام، ولما يكبر هو بنفسه بيفرق بينهم.

ولكم جزيل الشكر.

[ODIN]

Da S.O.S
زين اجل دليتك انا على القنوات هذي

وصادق التلفزيون كله صاير محطات اغاني وليتها حلوة .. يدورون بس على كليبات الاغراء عشان زباينها

! غــريــب !هههههه انت الظريف والله يالغالي

7_Dark Soulصااادق من ناحية طرق جذبهم للاطفال .. غير جيده تقريبا .. احس انهم معتمدين على توجيه الاهل لهذه الاشياء

وصحيح سالفه الكراتين من جد ما تجذب الاطفال الحين .. ان شالله يطورون الاشياء هذي مع الوقت

smigle
ما انتبهت للنقاط الي انت ذكرتها .. صحيح المفروض ما يعرضون الاشياء هذي وخصوصا لحم الخنزير بطريقة عاديه وكأنه شي عادي وبسيط وتتقبله مع الوقت

المفروض ينتبهون اكثر لانه هدفهم هم الاطفال العرب المسلمين لابد يراعون ثقافتهم


ويعطيكم الف عافيه