بعد تردد طويل ..
و تفكير عميق ..
و ملل من الالعاب التي لدي ..
و باخذ راي اكثر من عضو -واحد منهم خدعني انتقاما فقط- ..
قررت شراء سايلنت هيل 2 و ليتني لم افعل ..
تقريري راح يكون عفوي يعني اللي يخطر في بالي راح اكتبه ..
نبدا من ........... من الجرافيك ..
اللعبة تتفوق من هذه الناحية فقط في الخلفيات اما الشخصيات فالخشونة واضحة جدا على الاطراف ..
اما اشكال الوحوش فليتها توقفت على غباء شكلها فقط حتى انك لن ترى سوى 7 اشكال و هي جسد براس و ساقين و بدون ايادي و اخر بجميع الاطراف -على ما اعتقد- و لكن بدون راس -الظاهر عندهم عرض اما انه يكون لهم روس و الا ايدين ؟؟- و اخر كانه سرير براس و قدمين و وحش يقاله الحين قمة في التنوع جسم انسان و راس على شكل هرم !! و وحش اخر ما ادري وش وظيفته بالضبط لكن اذا كانت الارض الي تحتك شبكة فتلقاه متعلق فيها و اما اخر الوحوش التي اتحفنا فيها فهو صرصور حجم عائلي !
علما باني لم انهي اللعبة الى الان يعني ما اعرف شكل الوحش الاخير بسبب عدم شعوري باي حماس نحو اللعبة و لكن وصلت كما قال لي البعض الى النهاية تقريبا ..
ندخل في القصة ...
من كثر اللي ماتوا فيها اخاف الحقهم ؟!
ما بقى احد ما مات الا البطل و لورا و في اشاعات تقول ان المخرج يبي يموتعلى العموم هي تقريبا نسخة طبق الاصل من الجزء الاول لكن هالمرة زوجة البطل هي ارسلت رسالة واضحة وصريحة ..
عندك اول شخصية تقابلها جوليا امها و اخوها متوفين و جاية تدور على مقابرهم ..
بصراحة هالشخصية تقهرك ودك لو تقتلها بايدك ..
ايدي اللي ما شاء الله اول مرة تشوفه تقول الله يستر بس من نهايته !!
ما ادري وش وظيفته بصراحة هو قال انه المدينة اختارته في النهاية تبي تقتله بايدك بعد ما تقول له انت صرت مجنون ؟!
ماريا ما ادري ميري الشخصية اللي تخليك تقول على الشريط كيف الحال ..
مرة تحس انها محترمة و بنت ناس و مرة تحس انها مضيعة او داخلة بالغلط في اللعبة ..
و من زود التكرار تشبه الشرطية في الجزء الاول ..
لورا الظاهر انهم حطوها مكان البنت اللي في الجزء السابق لكن تعيش هالمرة ..
القصة بشكل عام تبدو لي مكررة من الجزء السابق مع بعض التغيرات ..
نظام اللعبة ..
بصراحة نظامها حلو و خاصة الخريطة اللي اجزم بانها افضل خريطة موجودة على كل الالعاب و كذلك اذا كان في شي تقدر تلتقطه بدل ما تشوفه يلمع مثل العاب كابكوم البطل يتجه راس جيمس لمكان الاداة مثل اللاعب في لعبة ويننج اليفن لما يراقب الكرة ..
لكن الداهية هي اسلوب سباق اختراق الضاحية !!
يعني الاستكشاف ....
في بداية اللعبة تبي تجلس 5 دقايق و انت تركض هذا غير لما تبدا تدور مخرج للمناطق اللي تبي تروح لها يعني بدون مبالغة لو نحسب الوقت اللي تبي تقضيه في الركض اذا لعبت اللعبة اول مرة و ما تعرف وين تروح و وين تجي يمكن يوصل ل30 دقيقة !!
ارشح اللي حط هالنظام انه ينتج العاب سباقات للجري احسن له ..
و لا ننسى نظام قتل الوحوش
مثلا الوحش اللي ماله ايدين اذا طاح بالارض و بدا يتبعرص انسى تلحقه ..
يتبعرص يعني يزحف زي البعرصي -الظاطور (نوع من الزواحف تلقها على الجدران و دايما تلحقه النعلة)- بصراحة بديت اشك ان اللي صمم هالوحش فيه عرق سعودي
و الوحوش الاخرى اذا اطلقت عليها اكثر من طلقة و تكرمت و انسدحت فلا تحلم انك تقتلها بطلقة لا لا لازم تشوتها !!
يعني تخيل اللي ما قتلته رصاصة تقتله شوتة ؟!
التقدير النهائي :
75%
و ماتستاهل بعد اما سبب التقييم فهذا هو :
25 % فقط لانها تحمل اسم كونامي ..
25% هذا تقدير اللعبة الفعلي
25% لاني اشتريتها اصلية ..
لكن كل اللي قهرني في كل هاللعبة هو بعض الناس اللي قالوا انها مو بس تنافس ريزدنت ايفل لا و تتفوق عليها بعد -؟!- بصراحة بعد كلامهم هذا بديت اشك في اراء اي واحد في هالمنتدى ..
ارجو اني ما اكون طولت عليكم و بصراحة هذا اطول موضوع اكتبه من مدة و ان دل هذا على شي فانه يدل على المعاناة اللي عانيتها و انا العب فيها و يظل كل ما كُتب مجرد راي شخصي ..
بسيطة
