واخيرا حصلت على الكيوب الامريكي

[The Elder]

من طلب الكيوب سهر الليالي
ولله الحمد اشتريت صباح اليوم كيوب امريكي طازة بعد محاولة فاشلة البارحة. واليكم القصة للمشاركة.
رحت متاخر الساعة 11:30 مساءا الى محل Wal-Mart فاتح 24 ساعة اثر العالم صافين من بدري. تقريبا 70-80 شخص. بدى التوزيع الساعة 12 حكم. بعد نص ساعة قالوا خلاص بح. ما عندنا الا 39 جهاز بس. تعلوا الاسبوع الجاي. رجعت بحسرتي وقلت والله ما انام لين اشتري واحد. الساعة 6:30 (لسه ظلام) رحت الK-Mart لقيته فاظي وهو يفتح 8. رحت الTarget لقيت واحد بس صاف لحاله. رجعت الK-Mart وصفيت لحالي. بدو الناس يجون 7:30 بس خلاص انا اول واحد. فتح المحل 8 ودخلت على طول على قسم الالعاب وطلبت كيوب. دخل العامل جوه وجاب كرتونين. كل كرتون فيه 8 كيوب. واحد ازرق وواحد اسود. يعني ما عندهم الا 16 جهاز بس. اخذت واحد(200 دولار) مع كرتين ذاكرة(الواحد 15 دولار). المجموع مع الضرايب 246 دولار (923 ريال). وعندي ستار وورز (50 دولار-200 ريال) وبعد عندي قولدن سن (30 دولار-120 ريال). يعني معلبات لبن اخر الشهر. مونكي بول ارخص (40دولار-160 ريال) بس مخلص.
المشكلة عندي اختبارات نهائية الاسبوعن الجاية. يعني مقدر العب الحين. الله يوفقنا ويصبرنا. يمكن اجرب الجهاز بس، الله يستر من هالتجربة.

على العموم حبيت اشارككم هذي المناسبة الحلوة وعقبالكم كلكم. الي يبغى يسال عن الجهاز الامريكي انا حاظر. للمعلوميه كتيب التعليمات ماهو ملون مع انه كله صور. يلعن ابو التوفير. الكرتون كله شبر في شبر. وكرت الذاكرة حجمه صغير بعد. كل شوي افتحه، ماني مصدق. اخيررررا الكيوب عندي. الحمد لله.
بروح انام الحين، مواصل. نشوفكم على خير.

الدر

[yooooo]

مبرووووووووووك ألف مليون مبروك عقبالنا

[nintendo]

الف مبروك اخوي ذا الدر ...

والله انا سامع انه ازدحام شديد جدا في المحلات عبر امريكا كلها وللاسف الطلب اكبر بكثير من الكمية الموجودة . هذا ما اسميه نجاح مبكر ...

[Tails&Kirby]

مبرووووك عقبالنا على فكرة وين المسابقة راحت

[the slayer]

اشتريت الكيوب على 932 ريال ?:

[t@l@l]

مبرووووووووووك .... وعقبالي بعد أسبوعين!!!
"على العموم حبيت اشارككم هذي المناسبة الحلوة وعقبالكم كلكم. الي يبغى يسال عن الجهاز الامريكي انا حاظر. للمعلوميه كتيب التعليمات ماهو ملون مع انه كله صور. يلعن ابو التوفير. الكرتون كله شبر في شبر. وكرت الذاكرة حجمه صغير بعد. كل شوي افتحه، ماني مصدق. اخيررررا الكيوب عندي. الحمد لله.
بروح انام الحين، مواصل. نشوفكم على خير. "

ممكن اتقولي بالمختصر المفيد عن اللعبيتين اللي شريتهم وتقييمك لهم؟؟؟

مع تحياتي,,,
وشكراً

[ganon0]

يا هوووووووووووووووووووه
مبرووووووووووووووووووووووووووك الف الف مبروك منك المال و منها العيال انشاء الله.. الله يرزقكم بالذريه الصالحه قل امين...(ابتاسمة مجامله ما تشوفونها جايه بعد نقط؟)
لا عاد صحيح مبروك الكيوبو انا انشاء الله بشتريه قريب لكن ما ادري وش اخذ معه...ستار ورز على انها جيده بس ما اعتقد تناسبني بالاضافه الى انها عندك (عشان نتبادل بس لا تعلم باقي الاعضاء تراهم ما ينعطون وجه خاصة واحد الله لا يوريك اسمه ننتندو...امزح)
و الله قصتك حلوه و اهم شيء انك حصلته بس انتظر لا تلعب به في وقت الدراسه...يعني اذا بغيت تاخذ استراحه شوي من المذاكره يمكن اسمح لك تلعب 10 دقايق...
مبروك مره ثانيه و عقبال ما احل مشكلتي(اللي هي التمويل بدون مذله من احد...شكلها ما تجي كذا والله..الا ان كان يشاركني احدهم فيه و هذي يبي لها تفكير..)
لا صحيح لا تلعب و اانت ما خلصت دارس اوكي؟
مبروك
اخوك سعد

[The Elder]

مشكور، مشكور يا شباب وعقبالكم. فعلا حاس انكم فرحانين لي. فرحة اصدقاء واخوان افتخر فيهم. الله يديم المعزة.
يووو، ننتندو، T&K، سلاير، طلال، قانون (ترتب الردود) مشكور على مشاعركم وان شاء الله نسمع منكم نفس الاخبار قريب.
ننتندو/ الزحمه عندنا اقل من الولايات الثانية. كلموني شباب في ولايات ثانية وماهو مصدقين اني حصلت واحد. الزحمة عندهم اكبر بكثير. الحمد لله علىالتوفيق. يومين ونسمع اخبار التوزيع ولو انها ما هي زي زحمة العام على البلايستيشن2. زحمة لدرجة انها جابوها حتى في الاخبار. المهم اني حصلت واحد والحمد لله.
T&K/ شكرا والمسابقة انزلقت تحت. اذا حد رد عليها كملنا ولو انه في مسابقة جديدة مختلفه قريب. خل اخلص اختبارات بس.
سلاير/ الكيوب مع كرتين ذاكرة ب932 ريال. شف عاد كم بيحطونه عندكم. الله يعينكم.
طلال/ شكرا حبيبي وعندي لعبة وحدة بس، ستار وورز. قولدن سن للقيم بوي ادفانس. عطني يومين وان شاء الله اجربها واعطيكم تقرير عنها.
قانون/ لاتخاف حبيبي علي. صحيح احب الكيوب بس مستقبلي اهم. يمديني ان شاء الله العبه بعد الاختبارات. ولو خويك ديب. وبالنسبة للفلوس، الله يعينك بس حاول. حلاة الشي في اوله. انا صراحة تسلفت لين الشهر الجاي من الشباب لاني باقي اشتري العاب. اجهزة الالعاب زي السيارات، مميزة اكثر اذا توها نازله. رح حب راس ابوك وقله بسمع كلامك لمدة سنه بدون نقاش على شرط تشتري لي كيوب. بعد كمن كف على كمن رفسه يمكن يوافق. قد جربت الطريقة هذي ونفعت، بس الى الحين جنبي يعورني. انا حاضر اي خدمة. اوصف لك لزقات جنب على كيفك اذا بتحاول.

مشكوووووووووور مرة ثانيه للجميع ولكل الاصدقاء المخلصين.

الدر

[دكتورالحب]

هل best buy عنده كيوب وكيف الكيوب معاك انا صراحة مو داخل مزاجي وخصوصا حكاية السي دي الصغير بس احس ان الكيوب له مستقبل بس مادري هل سينزل منة كوبي ولا لأ ويش رايك انت The Elder وهل هو فعلا اقوى من البلاي شتايشن في الامكانيات

[The Elder]

واو دكتور وكل هذي الاسئلة. هاهاها. هلا حبيبي
Best Buy اكثر محل عندة العاب واجهزة بس بعد عنده اكبر زحمة ناس. الناس هناك من الصباح. يعني اذا بتشتري منه يبغالك تستنى دفعات ثانيه وتروح بدرييييي. الجهاز بجربه قريب وانا متاكد ان اي شي من ننتندو رائع. الشريط الصغير ميزة واللعبة الي ما يكفيها دسك واحد، بسهولة يحطونها على اكثر من دسك. مستقبلة مضمون ما دام وراه ننتندو. نجحت ال64 الضعيف ما تنجح الكيوب القوي؟ الكوبي محتمل. فيه دسكات CD عادية بنفس حجم دسكات الكيوب الصغيرة. يمكن يسوون زي البلايستشن2. يحطون لعبة الDVD على CD عادي بس بدون مقاطع الافلام. معليه اذا رخيص. بالنسبة للامكانيات فاحول السؤال للخبير. استشاري باطنية الكيوب...ننتندو. ان شاء الله يفيدك اكثر مني. وشكرا على الثقة.

الدر

[بوشي]

مبروك....وعـقبالـنـا إن شاء الله .....

المشكلة عندي اختبارات نهائية الاسبوعن الجاية. يعني مقدر العب الحين. الله يوفقنا ويصبرنا. يمكن اجرب الجهاز بس، الله يستر من هالتجربة.

عادي مو مشكلة عندي لك الحل ليش ماترسله لي



وبالتوفيق في الإختبارات يالغالي......

وشكرا....

[The Elder]

مشكوووووووووووووووووووووووووووووووووووووووووور
يابووووووووووووووووووووووووووووووووووووووووووشي
كح كح، انبح صوتي. بس انت تستاهل والكيوب يستاهل وكلكم تستاهلون. وبالنسبة لطلبك، تامر على عمري ... بس الكيوب لا. هي هي

الدر

[asf4ever]

مبروووووووووووووووووووووووووووووووك
أخوي الدر
عقبالي
اهئ اهئ اهئ يمكن أاااااااااااااااااااخررررررررررررررر السنة
يمكككككككككككككككككن اذا ما كان السنة الجاية

[The Elder]

مشكور حبيبي آسف
وعقبالك قريب. السنه الجايه واجد. انت ما شفت الكيوب على الطبيعة. لو شفتم عنيه، حلوين قد ايه. شد حيلك وتسهل لك ان شاء الله.

الدر

[ganon0]

كتب العضو (The Elder)
. يمكن يسوون زي البلايستشن2. يحطون لعبة الDVD على CD عادي بس بدون مقاطع الافلام. معليه اذا رخيص. الدر

هلا الدر.بالنسبه لنسخ العاب الكيوب على سيديات ما اعتقد فيه امكانيه لان الكيوب ما يقرى سيدي..بس يقرى دي في دي.فاذا بغوا يسوون الطريقه بالله يجيبون درايفر خاص للسيدي تشتريه و تشبكه للكيوب.و يمكن ما يحتاج اذا كان للكيوب حق بناسونك...
بالنسبه للفلوس الله يعن بس...و الله ما ادري وش اسوي انا ادري ان حلاة الشيء اذا توه نازل لكن ما فيه فلوس...المكافئه اليوم طلعت لكن 840 ما تسوي شي و غير كذا اخصم منها من 100 الى 200 التزامات؟رحت فيها صراحه...شكلي بصبر الى ان افطس...مكشله الله يعنني و يعين المسلمين.عموما مشكور على الحلول المنطقيه(ايه مره منطقيه)