السلام عليكم ورحمة الله وبركاته
بتكلم بدون مقدمات وبتكلم بلهجتي وبتكلم من قلبي وبتكلم بصراحة وصدق
اليوم بوحدة من المحاضرات كنا فاضين
جت لنا بنت من سني
جت وتكلمت عن الدين والصلاة والحياة
كل كلمة بكلامها كان موجود بالغالبية العظمة من الناس
واجهتنا بالصدق الي نكذب فيه على نفسنا وغيرنا
كلامي الي بقوله سمعته من اول كثيررر وانتم نفس الشيء
بس عرفت انه من خيبتي انه عرفته وماطبقته يمكن لو كنت جاهله فيه احسن من اني اتفاخر اني اعرفه ومااطبقه
كلامي عن حياتنا
عن عبادتنا
لو سألتكم راضين عن حالكم ؟
بجاوب عن نفسي كنت بقول أيه راضية انا احسن من غيري انا اصلي غيري مايصلي انا اصوم غيري مايصوم
طيب ليش شفت الأقل مني
ويني عن الي احسن مني
ويني على السنن
ويني عن الخشوع
ويني عن حسن الخلق
بتكلم عن نفسي
انا كل يوم اصلي خمس صلوات ومبسوطه وكني مسويه فضل
لكن السؤال هل اصلي علشانها عاده او عبادة ؟؟
احس نفسي اذا اذن اقوم اتوضى واصلي وانا مادري شسالفه مجرد انه شيء تعلمت عليه من ايام طفولتي اذن قومي توضي وصلي وبس
اكبر واصلي تعالوا اسألوني شقلت الله اعلم
تعالوا قولوا لي شسويت مادري
الصلاة بوادي وانا بوادي
اسمع بالخشوع واتمنى من قلبي اني اخشع بصلاتي
بس كيف بخشع ؟؟
وانا معلقه المسجل على اذني طول اليوم
كيف بخشع ؟؟
وانا اغتاب فلانه واحش بعلانه
كيف بخشع ؟؟
وانا ماسوي من ديني الا الاركان وتاركة السنن
كيف بخشع ؟؟
وانا اذا صليت اقول متى اخلص
نقراء الايات والاحاديث بس مانطبقها ولانستشعر فيها
انا انسانة اخطأ واغلط وعندي خطايا ماليتني من راسي لرجولي
وفوقها ماحاول اساعد نفسي
كلنا نعرف ان الوضوء يغسل الذنوب والخطايا صح ؟؟
طيب مين يستشعر هالشيء بوضوئه ؟؟
الاغلب يتوضأ بحركة الالية وعقله مو معه مايستشعر بذنوبه وخطاياه وهي تتساقط
نجي نكبر للصلاة
يروح العقل
نتذكر اشياء نسيناها
ونتذكر المواقف
كلها ماتجي الا وقت الصلاة
واذا احد واجهني اقول ابليس شاطر
طيب لو اني قويه كان ماقدر علي ابليس
مين الي استشعر الوقفه امام الله
لو الواحد وقف قدام مديره احترمه وركز بلي يقوله!!
كلنا نعرف ان الصلاة اذا صحت تصح جميع اعمالنا والعكس صحيح
طيب مين استشعر بهالشيء ؟؟
مين الي استشعر بلي يقوله بصلاته
مين الي عظم الايات الي يقراها ؟؟
مين منا يخلص صلاته ويتذكر الكلام الي قاله ؟؟
نستثقل الصلاه ماكنها خمس صلوات خلال 24 ساعة
باقي اليوم وين يروح
لو قلنا نبي نصلي كل صلاة بخشوع ونصلي معها السنن فمستحيل رح تاخذ اكثر من ساعتين كحد اعلى للرجال الي يصلون بالمساجد
وبالنسبة للحريم فأتوقع مايعدي الساعة !!
22 ساعة عندنا
ونستثقل الصلاة ويالله خلصها والسلام
لاشفنا تفكيرنا اغلب الشباب والشابات يقولون مشي حالك توك شابة لاكبرتي التزمتي وتتعدل صلاتك
طيب وش الي يضمن لي اني بكبر او انك رح تكبر
الي ضامن انه رح يصحى بكرة يجي يحلف ويقول والله انا بقوم بكرة ؟!!
بعدين الي يقول لسى شباب مايذكر حديث الرسول عليه الصلاة والسلام من شب على شي شاب عليه
يعني انسان متعود على نمط معين سنوات كثيرة رح يغيرها بمجرد انه وصل عمر معين واحتمال انه ماراح يوصل له
ولا نجي نفكر بالصدقات
هذي انا بستلم مكافئة حق عشر شهور
يعني مبلغ كبير
والله قسمته بكذا حاجه
مافكرت اني اتصدق بجزء يسييييير
سبحان الله فضل الصداقه عظيم تبارك لنا بفلوسنا بس نخاف نتصدق بكذا ريال وتنقص فلوسنا
مين الي يتصدق من راتبه ؟؟ مين الي يتصدق من مصروفه ؟؟ مين الي يتصدق من اي مبلغ يحصله ؟؟
نادراً !!
رح تقولون لي مو الكل
عارفه مو الكل
نتكلم على الغالبية العظمة
ولا واحد طالع
مر من فقير او صندوق تبراعات
فتح بوكه لقى معه ريالات
يستحي يتصدق فيها
سؤال
هل تستحي انك تتصدق بهالمبلغ من ربك ؟؟
فأذا كان نعم فلا تستحي الصدقه مو محدده بمبلغ معين كل واحد وطاقته
او
تستحي انك تتصدق بكذا ريال لازم تتصدق بمبلغ كبير علشان محد يقول عنك بخيل ؟؟
فأذا كان نعم فاهل أنت متصدق للناس ولا لربك!!
يجيك الشباب والبنات الي يكلمون
تجي تنصحهم يقولون ايييييييه لاعرسنا رح نتوب
طيب انتم توقعكم هل معقول يتساوى شخص ماسك نفسه ومحتسب للأجر وقايل من ترك شيء لله عوضه الله خير منه
من شخص يوم لقى البديل تاب
معقول لهم نفس الأجر ونفس الجزاء ؟!!
يجيك من يقفل او تقفل باب غرفتها ويجلسون يكلمون على بالهم محد سامعهم طيب متأكدين محد سامعهم ؟؟
هذا طبعنا يالبشر نخاف من الشيء الظاهر نخاف من الشيء الي قدامنا
رب العالمين فوق سبع سموات يراقبنا ماحسبنا حسابه
وحسبنا حساب ام ولا اب ولا اخو ولا زوج
حسبنا حساب الخلق الضعفاء خفنا من عقاب دنيوي خفنا من ضرب او غيره
رب العالمين الرحيم الغفور بمجرد ان يتوب العبد يمسح كل ذنوبه كل خطاياه كل اثامه
تفتح له صفحة جديدة
محد من البشر يسامح بشكل كلي ولاحد من البشر يفتح لك صفحة جديدة وانت اخطيت بحقه بدون مايكون شايل عليك لو واحد بالمية
كلنا نطمع برحمه الله لين ماوصلنا لدرجة التكبر ويالله الله غفور رحيم ويالله الله يهدينا
كيف الله رح يرحمنا ويغفر لنا واحنا مافتحنا لأنفسنا ابواب الرحمه والمغفره
الرسول عليه الصلاة والسلام افضل الخلق والمبشر بالجنه ماكان متهاون بعبادة الله والسنن والدعاء والاستغفار
ويجيكم احنا يلي اخطائنا ماليتنا شايفين بأنفسنا وخلاص يكفي صليت ويكفي تصدقت قبل سنة ويكفي صمت ستة شوال ولا صمت يوم عرفة
عارفة وقتنا كله فتن وشهوات والقابض على دينه كالقابض على جمر
بس هذا مو عذر
بسألكم لو جا لكم واحد
وقال لك رح تموت بكرة اكيد؟؟
ايش رح تسوي
هل رح تظل على حالك؟
هل رح تصلي مثل ماتصلي وتعيش يومك مثل ماتعيشه كل يوم
بلاش يقول لك بكرة
لو يقول لك رح تموت بعد عشر سنوات
هل رح تظل على حالك برضو ؟؟
يعني كلنا نعيش بأمان ولا كن ورانا موت وقبر ووبعث وحساب وجنة ونار
فكروا بهالشي اذا هالدرجة الدنيا حلوة اجل كيف بالجنة ؟
واذا هالدرجة الدنيا تعذب وبعضنا يعيش بأسى من كذا موقف اجل كيف بعذاب النار النفسي والجسمي
تجي البنت تتمشى بسوق ولا مكان عام بكامل الكشخة ماشاء الله
وتنبسط من كل نظرة وكل مدحة
تقول ياحضي الكل يطالعني
مفروض تقول ياويلي كم ذنب جمعته
نجي للعبايات والغطا
سألتنا مدرسة
الغطا ع عادة ام عبادة ؟؟
كلنا قلنا عبادة
بس للأسف القليل منا عبادة
متعودين على هالشيء متعوده اني اغطي وجهي واني البس عباية
ولو كنت عند عائلة منفتحه يمكن كان رميت عباتي وغطاي
يعني هل انا سويت هل الشيء عبادة ؟
ام عادة تعودت عليها وتربيت عليها وعندنا عيب من يكشف ... الخ
حتى لو جيت وقلت اني اغطي وجهي علشان رضى الله فهل رح اكون صادقة مع نفسي ؟؟
دايماً نسمع جملة الحمدلله على نعمة الأسلام
بس تتوقعون لو ان احنا بدولة ثانية كان صار هذا حالنا ؟
تتوقعون كان قلنا خلونا ندخل للأسلام
ماتوقع هالشيء بالنسبة لي
يعني نفس الحجاب انا مسلمة لأني انولدت ببيئة مسلمة بس هل قدرت الأسلام ؟؟ هل حسيت بطعم الأسلام والأيمان ؟؟
بعد هالكلام الطويل ... اتمنى اني اتغير اتمنى اني التزم اتمنى اني اذوق حلاوة الأيمان اتمنى اني اجرب الخشوع بالصلاة اتمنى اني احس بالصلة الي يحسها المؤمن مع ربه اتمنى ان تتحسن اخلاقي اتمنى ان ربي يرضى عني اتمنى واتمنى واتمنى
كل مره اعزم على اني بلتزم واتراجع ليش ؟؟
لأني ماربطت النية بالجزاء ماأصلحت نفسي من داخل كيف بخشع بصلاتي وانا اسمع اغاني واحش بخلق الله ؟ !
كلامي مو محاضرة دينية لأني مو اهل للنصيحة ...
كلامي مجرد معاتبة نفس ومصارحة ومواجهة للنفس بعد طول الكذب
اتمنى ماكون ثقلت بطول موضوعي ...
دعواتكم ^^
السلام عليكم ^^
المشاركة الأصلية كتبت بواسطة hussien-11
و خبطة على راسي 
